رواية حب الصدفة الفصل التاسع عشر 19 - بقلم ملك عتمان

كريم كان ماشي في الشارع مش مصدق إنه سابها وراح، كان واعدها إنه يجي معاها يقدمها في الكلية وهيفضل معاها وعمره مايسيبها، ومرة واحدة وهو ماشي خبط في واحدة. نوران: مش تحاسب يعم. كريم مكنش حاسس بحاجة، كمل مشي من غير ما يرد. ريم صحبة نوران: هو عبيط ده ولا إيه، انتي هتسكتيله، ده حتى متأسفلكيش. نوران طلعت وراه ومسكته من كتفه: انت عبيط يلا ولا إيه، تخبطني كدا ولا تقولي آسف حتى. كريم راح باصصها، وفجأة أغمى عليه. نوران:

يا نهار إسود، إيه اللي حصله ده. ريم: تعالي نوديه المستشفى بسرعة. نوران: طيب أنا هجيب العربية وخليكي انتي جنبه هنا. نوران راحت جابت العربية وشالت كريم هي وريم، ودوه المستشفى. في المستشفى. الدكتور: اطمنوا يجماعة، هو أغمى عليه بس نتيجة صدمة حصلتله، بس متقلقوش، هو بقى كويس دلوقتي، تقدروا تدخلوله. ريم: يلا يا نوران نمشي، احنا كدا عملنا اللي علينا. نوران: استني أدخل اطمن عليه. ريم: يلا يا على عليكي، احنا كدا هنتأخر. نوران:

اهدي بس ولا نتأخر ولا حاجة. وراحت شداها من إيديها ودخلوا جوا. نوران: حمدلله على سلامتك يا... هو حضرتك اسمك إيه. كريم: اسمي كريم، هو انتو مين. نوران: انت خبطت فيا وانت ماشي في الشارع، ولما جيت أزعقلك لقيت وقعت على الأرض أغمى عليك، جبتك أنا وريم هنا، بس اطمن، الدكتور قال إن مفيش حاجة وحشة وانت كويس. كريم: شكرا يا... نوران: اسمي نوران ودي صحبتي ريم، يلا بقى عشان نروحك. كريم: لا أنا هروح لوحدي. نوران:

لا والله يا أستاذ كريم ميصحش، لازم نروحك الا يغمى عليك تاني ولا حاجة. كريم: طيب. ريم لنوران: لازم يعني نروحه، احنا كدا هنتأخر. نوران: متسكتيش يابة الا يسمع. وبعد شوية كانوا وصلوا عند بيت كريم. كريم: شكرا جدا. وبعدين مشي. ريم: يلا بقى نمشي، ولا تحبي نطلع معاه بالمرة. نوران: ياريت. ريم: اطلعي يابة بالعربية بدال مرتكب فيكي جريمة دلوقتي. نوران بضحك: حاضر. كريم طلع فوق لقاهم جابوا جثة أبوه،

وألين ونهى قاعدين جنبها بيعيطوا، وفارس بيهديهم. استغرب لما شاف نهى من غير عمر، كانوا قايلينله إنهم مسافرين في شغل بره مصر، بس مداش اهتمام، بص لأبوه وقعد جنبه يعيط. وبعد شوية أخدوا أبوهم وراحوا دفنوه. ألين كانت بتعيط على آخرها وبتصوت: بابا متسبنيش، لا مش مصدقة إنك خلاص هتروح وتسبني. نهى بعياط: اهدي يا ألين عشان خاطري. ألين بعياط: بابا يا نهى سابنا وراح. نهى أخدتها في حضنها: ربنا يرحمه يا حبيبتي. ألين: بقولك إيه،

لازم تمشي عشان فارس ميشكش في حاجة. نهى: مش هيين عليا أسيبك ولا أسيب كريم، زمانه يعيني زعلان خالص ومصدوم، مهما كان صغير لسه برضو. ألين: اطمني أنا معاه، وعايزاكي تروحي الشركة بكرة عادي. نهى: حاضر. وبعد شوية كريم وفارس رجعوا من الدفنة. فارس: ألين كنت عايزك في موضوع. ألين: إيه. فارس: أنا عاوز أتجوزك، أنا عارف إنه موضوع مينفعش أكلمك فيه دلوقتي مش وقته، بس احنا هنجوز على ورق نظرا للظروف اللي احنا فيها دي،

عشان أنا مستحيل أسيبك في الظروف دي لوحدك، أنا وعدت باباكي إني هقف جنبك وهكون ليكي الضهر والسند وهحميكي، ومش هقدر أعمل كل ده من غير ما يكون بينا حاجة، وهسيبلك وقت تفكري. ألين: أنا موافقة. فارس: طب مش هتقولي لكريم. ألين: متشغلش بالك، أنا هكلمه. فارس: تمم، أنا هسيبك دلوقتي، ولو احتاجتي حاجة اتصلي عليا، وبكرة هجيلك تاني. ألين: تمم. فارس أول ما مشي، ألين طلعت بره راحت لأخوها. ألين: كريم. كريم بص لها ومتكلمش. ألين:

كريم أنا هتجوز بكرة. كريم بص لها بقرف: انتي إيه يا شيخة، معندكيش إحساس، أبوكي لسه ميت وعايزة تتجوزي، إيه قلبك حجر انتي، وياترى عمر أخوكي عارف إنك هتجوزي ولا إذا كان فارق معاه أصلا، ده حتى مجاش عزا أبوه، انتي مستحيل تكوني ألين أختي اللي أعرفها، مستحيل. وراح سايبها وماشي. ألين مسكت تليفونها واتصلت على عمر. عمر: نعم. ألين: انت لسه زعلان عشان خليتك متجيش العزا، بس كل ده عشان بابا. عمر: ماشي يا ألين، عايزة إيه بقى. ألين:

خططنا بدأت تنجح وهنجيب حق بابا قريب أوي خلاص. عمر: إزاي. ألين: فارس عرض عليا الجواز وأنا وافقت. عمر: تمم، احنا كدا قربنا نوصل للي عايزينه، بس كريم قال إيه لما عرف. ألين: كريم ملكش دعوة بيه، أنا هعرف أتعامل معاه. عمر: طيب خلي بالك من نفسك بقى، سلام. ألين: سلام.