رواية حب بعد عذاب الفصل الحادي عشر 11 - بقلم بسمة محمد

مريم كانت بتقرأ المسدج وهي مبسوطة ومبتسمة إنه بيفكر فيها وبيحاول عشانها، بس في نفس الوقت لسه حزينة على اللي عملوه فيها ومش قادرة تنسى إنه كسر قلبها. وفجأة باب الأوضة اتفتح. فاطمة: مالك يا أختي قاعدة مسهمة وبتضحكي كده ليه؟ مريم بخضة: إيه ده، في إيه؟ حد يدخل كده؟ فاطمة: أيوه يا أختي، وبعدين انجزي، متوهيش، بتعملي إيه يابت؟ مريم: هه، لا أبدًا، مفيش. ده أنا كنت بكلم هنا.

فاطمة: مش مرتحالك. بس ماشي، هعديها بمزاجي. يلا قومي ساعديني. مريم: أووف بقا، حاضر. فاطمة: من غير برطمة يابت، انجزي. مريم: حاااضر، جايه أهو. يعني هو أنا هطير. بعد شوية لقت جرس الباب بيرن والباب بيخبط جامد. فاطمة: استر يا رب، روحي بسرعة شوفي مين. مريم: هو مفيش غيري؟ إيه ده يربي الناس دي. حااضر، ثواني يا اللي عالباب... است... إيه ده! هنا بعياط: ممكن أقعد عندك يومين لحد ما أشوف هعمل إيه.

مريم: أكيد يقلبي، اهدى بس وادخلي واحكيلي إيه اللي حصل. فاطمة: مين يامري... يلهووي، مالك ياهنا؟ إيه اللي حصلك؟ هنا: ممكن بس أرتاح شوية، أنا مش قادرة أتكلم دلوقتي. مريم: طيب يحبيبتي، تعالي نامي ولما تصحي. هنا: طيب. بعد شوية خرجت من الأوضة. فاطمة: ها يامريم، قالتلك حاجة؟ مريم بحزن على حال صديقتها: لا، متكلمتش، بس باين عليها تعبانة أوي. فاطمة: طيب يبنتي خليكي جنبها، وأنا هقوم أحضر الأكل لحد ما تصحى. مريم: حاضر يا ماما.

في بيت هنا. مدحت أبو هنا: يعني إيه ياهانم، مش عارفة بنتك راحت فين؟ سعاد: معرفش، أنا صحيت ملقتهاش في البيت. مش عارفة أعمل إيه، ولا هعمل إيه فالراجل اللي جاي النهارده. مدحت بغضب: هجيبها حتى لو راحت آخر الدنيا. البت دي مكنش عندها أي صحاب أو أي حد تعرفه، حكتلك عنه؟ سعاد: معرفش يخويا، هي مكتش بتحكي حاجة. مدحت: اومال إنتي لزمتك إيه؟ يعني إيه كل حاجة معرفش، معرفش دي بقت عيشة تقرف.

سعاد: استهدي بالله بس، هتلاقيها إن شاء الله. بس قولي إنت رايح فين؟ مدحت: في داهية، ملكيش إنتي دعوة. سعاد: في داهية، في داهية، المهم ترجع البت. في بيت إبراهيم. مروان: يا أهل الدااار، أنا جيت. فاطمة بسرعة: وطي صوتك، عندنا ضيوف. مروان بهمس: ضيوف مين؟ هو إحنا حد بيجيلنا أصلاً؟ وبعدين أوطي صوتي ليه؟ فاطمة: أصل صاحبة أختك نايمة في أوضتها، وشكلها عندها مشكلة. مروان: آه، قولي كده بقا... هي مزة؟ فاطمة: هي مين دي يواد؟

متحترم نفسك، بقولك صاحبة أختك. مروان: وأنا سنجل وابنك بردو. فاطمة برفعة حاجب: نعم... سمعني كده تاني. مروان: احممم... لا، ده أنا بقول إني جعان. فاطمة لسه هترد بس قاطع كلامها جرس الباب. فاطمة: افتح الباب، ده مش عارفة في إيه النهارده. مروان: هنشوف، هنشوف. فارس: إزيك يامارو؟ إزيك يا فطوم يا عسل انتي. فاطمة: الحمد لله يا حبيبي، ادخل ادخل. اقعد معاه يامروان، أنا داخلة المطبخ. مروان: من عنيا يسطا. إيه ده؟ إيه اللي معاك ده؟

فارس: أوعى كده، ملكش دعوة. امال مريم فين؟ مروان: مريم... آه، قول كده بقا. على فكرة دي أختي، يعني المفروض أعرف إيه اللي إنت جايبه ده. فارس: وإنت مالك؟ ادخل ناديها بقا. مروان: طب مش داخل بقا. فارس: والله؟ مروان: آه والله. فارس: تمام، مش عاوز منك حاجة. مرييييم، يامرييييم. مريم طلعت من الأوضة بسرعة: إيه؟ في إيه؟ حد ينادي على حد كده. فارس: أنا حر، على فكرة. مريم: لا مش حر، على فكرة. إنت هنا في بيتنا.

فارس: أنا حر في أي مكان يا حبيبتي. مريم: أنا مش حبيبتك أصلاً. فارس: طب خدي ده، وانتِ تعرفي أنا بحبك قد إيه. مروان: كيس جوافة أنا، صح؟ فارس: لا يامارو يا حبيبي، متقولش كده. مروان: والله! فارس: اومال، دي مجرد هدية. تعالي بس أقولك. مريم بتفتح الهدية واتفاجئت ب...