رواية حب في ورطة الفصل الثاني 2 - بقلم ريهام

_أنا اللي عمل فيكي كدا؟ ارتمت في حضني وهي تبكي، وماسكة في هدومي. توترت، وبعدتها بالراحة. _قوليلي بس إيه اللي حصل، إنتي كنتي فين؟ لم تكن ترد، وكانت تبكي. أخذتها في التاكسي وروحنا البيت. قعدنا في مدخل البيت وجبت لها ميه عشان تهدى. _اتكلمي يانهلة، إيه اللي حصل معاكي وإيه اللي خرجك في وقت زي ده؟ مرات عمي عارفة إنك برا. تكلمت بين شهقاتها: _لالا متقوليش لماما، والنبي يازين، ماما هتموتني. شددت شعري بغيظ:

_نهلة، أنا مش فاهم حاجة، فهيميني لأن دماغي فيها مليون سيناريو، كلهم أسوأ من بعض، فبسرعة قوليلي اللي حصل. بكت زيادة: _ماما عند خالتي في إسكندرية من امبارح، وأنا كنت زعلانه وقاعدة لوحدي، كلمت واحدة زميلتي في الجامعة ونزلت سهرنا في كافيه و... فضلت تخبط بيدها على وشها. _وإيه يانهلة؟ بصتلي بخوف: _واحد جابلي مشروب، وأنا شربته ومحستش بنفسي بعدها غير أما لقيتني في شقة معرفهاش و... قاطعتها بقلم على وشها:

_معقول يانهلة، إنتي تعملي كدا؟ مفكرتيش في أمك اللي بقت أرملة من عشر سنين ورفضت تجيبلك جوز أمي يضايقك؟ تكافئيها كدا؟ هو دا كتر خيرك اللي بتقوليهالها؟ انهارت وقعدت في الأرض: _أنا كنت مخنوقة وحاسة إني تايهة، قررت أخرج وأشوف ناس يمكن أنسي. _تنسي؟ تنسي إيه؟ ضيعتي نفسك عشان وهم في دماغك.

_أنساك يازين، أنا محبتش غيرك، وإنت كنت بالنسبة لي العالم، معرفتش ولا راجل غيرك، حتى أبويا وهو عايش كان بعيد عني ومش مهتم بيا، وف الآخر هو مات، وإنت هتتجوز غيري ليه يازين؟ بصتلها بقرف: _متحمليش حد غلطك، أنا طول عمري أخوكي، إنتي ورنا مبفرقش بينكم، إنتي ترجمتي معاملة الأخوات حاجة تانية، دا مش ذنبي. قلبي وجعني عشانها وأنا شايف عياطها مكنش بيقف نهائي.

_كفاية عياط يانهلة، الفجر قرب يأذن، تعالي نطلع ونامي جمب رنا، وربنا يحلها. _هتقف جمبي يازين؟ عطيتها ضهري: _معنديش حل تاني. طلعنا وفتحت الشقة، وماما ورنا نايمين. دخلت أوضتي وأنا مخنوق ومش عارف أعمل إيه. بعدها بدقيقة سمعت خبط على باب أوضتي، قمت لقيت نهلة واقفة قدام الباب. _رنا قافلة أوضتها بالمفتاح عليها، وأنا... أخذت فوني من على السرير وخرجت من الأوضة من غير كلام. قعدت على الكنبة وهي دخلت أوضتي وقفلت الباب.

الفجر أذن، دخلت اتوضيت ونزلت المسجد اللي في أول شارعنا. مع كل سجدة كنت بدعي ربنا يحلها من عنده، لأني مش عارف أتصرف إزاي. افتكرت عمي الله يرحمه ودعيتله هو وأبويا. فضلت قاعد في المسجد أقرأ قرآن لحد شروق الشمس، وبعدها روحت البيت. كانت ماما صحيت. _كنت فين زين بدري كدا؟ _كنت بصلي الفجر. على فكرة نهلة عندنا. استغربت: _جت امتى يابني؟ _ها، أول مانمتي ياماما، أصل مرات عمك في إسكندرية، ومينفعش تقعد لوحدها.

_طب ياحبيبي، هروح أحضرلكم الفطار على ما رنا تجهز عشان كليتها. دخلت أوضة رنا. _صباحو ياعسل، إيه مصحيك بدري كدا؟ _بقولك إيه، مش وقت هزار، لو أمك سألتك تقوليها إن نهلة كانت بايته معاكي امبارح. _نهلة مين؟ _رنااااا. _عيوني يابو رنا، بس قولي هي البت نهلة مزوغة فين وإنت بتداري عليها؟ _نهلة في أوضتي. شهقت بتمثيل: _يالهوي يالهوي! التار ولا العار؟ هات البندقية ياهريدي لأجل مانغسل العار. كتمت بوقها:

_اخرسي الله يهديك، خشي صحيها وأنا هشغل أمك في المطبخ على ماتخرج. _مطلعتش سهل إنت يزيزو، وأنا اللي فاكراك مؤدب. ضربتها على دماغها: _نفذي اللي بقولك عليه وإنتي ساكتة. باك. فوقت من سرحاني على رنة الفون، وكان أمين صاحبي. مردتش عليه، بس رن كذا مرة. رديت: _خير يامين؟ _حبيبي، وحشتني، بطمن عليك. _اقفل يارخم. _ياض أنا اللي هشيل خشبتك، بتبعني. قفلت السكة وقفلت الفون خالص، ماللي ميعرفش يقول عدس فعلاً.

غمضت عيني وحاولت أنام، ولأني مش بنام بقالي كذا يوم، نمت بسرعة. صحيت على صوت ندى بتتكلم في الفون. _* يانور متتأخريش لو سمحتي، أنا محتاجاكي. _* لا، تعاليلي قبل ماما أنا... شديت منها الفون بسرعة وقفلته. _* إنت مجنون؟ اللي بتعمله دا؟ _إيه اللي أنا بعمله؟ ولا إنت إيه اللي بتعمليه؟ عاوزة أختك ليه؟ _* إنت مالك. _ندى اتكلمي عدل. بصت في الأرض: _* عاوزاها تساعدني في فك الفستان قبل ما ماما وأهلي يجوا. رفعت وشها ليا:

_حبيبي، مانا معاكي أهو، أنا أساعدك، والله أنا بساعد حلو، وغمزتلها بعيوني. زقت إيدي: _* انسي يزين. قامت من على السرير واتكعبلت في الفستان، وقعت. روحت قومتها. _يابنتي يهديكي ربنا، تعالي أفكلك الفستان اللي هيتقطع من مرمطتك فيه دا. _* هو إنت مأجره ولا إيه؟ خايف عليه. _مأجره؟ لا طبعاً، خايف عليكي إنتي والفستان دا كان عاجبك أوي، حرام يبوظ وإنتي عاوزة تحتفظي بيه. _* مبقتش بحبه ولا عاوزاه يزين.

خبطت بإيدي على الحيطة وأنا بحاول أهدى. طلعت الصالة لقيتها قاعدة بتعيط. _بتعيطي ليه بس؟ _* عاوزة آخد شاور. _طب دا أنا تخصص شاور أصلاً. كشرت وبصت الناحية التانية. _أعمل إيه بس عشان تبطلي عياط؟ _* هاتلي أختي. _ي حبيبتي، أنا اللي منظري هيبقى اختك لو اختك جت وشافتك كدا. _* طب وبعدين؟ _ينفع أتصل برنا تجيلك تساعدك، واهي هعرف اسكتها بدل الفضيحة يعني. ضحكت وسط دموعها. قربت منها ومسحت دموعها بإيدي. بصتلها وأنا ماسك وشها بإيدي:

_بحبك. بصتلي بملل وعتاب: _* طب ليه عملت كدا؟ شدتها لحضني: _صدقيني، الموضوع لو يخصني هحكيلك، لكن دي سمعة بنت عمي، اعذريني ياندى. عياطها زاد وأنا بطبطب عليها وهي ماسكة فيا. _طب إيه، أكلم رنا ولا أساعدك أنا؟ بعدت عن حضني وخبطتني بيدها على كتفي: _* كلمهالي. _ماكنتي خليكي في حضني وأنا هاخد منك حتة يعني. _* بس اسكت، إنت مابتصدق. كلمت رنا وقمت جبت عصير من التلاجة وعملت سندوتشين عشان ندى. _يلا يادودو، القطر رايح فين؟

بصتلي بقرف: _* على أساس إني بنت اختك. اتنهدت بنفاذ صبر: _بلاش يستي، كلي واشربي العصير، إنتي ما أكلتيش من امبارح غير العياط اللي عيطيه. أخدت العصير وشربته من غير كلام. وبعدها الجرس رن، بصيت من العين السحرية الأول، لقيت رنا، بس لقيت معاها نهلة. وقفت ببص للباب ولا لندى. أنا لو خنقت كتاكيت وأنا صغير مكنش هيحصلي كدا وأنا كبير.