رواية حبك نار الفصل الثاني والثلاثون 32 - بقلم أسماء الكاشف

تعالي يا مروة أوصلك في طريقي قالها فارس وهو مركز في وشي. *لاء شكراً، هنروح لوحدنا. يله يا غادة. قولتها وشديت إيد غادة. اتحرك من مكانه ووقف في وشنا. _مينفعش كده، العربية برة. يله هوصلكم. جيه يلمس إيدي فبعدتها بعنف وبصيت بغضب. *أوعك تلمس إيدي مرة تانية. أنا بقولك أهو. وسحبت غادة وخرجت. ابتسم أياد بشماتة وقرب من فارس بغل وحط إيده على كتفه واتكلم بشماتة. ^هو ده وضعك عندها؟ لو في حد هتحبه مروة هيكون أنا.

قالها وغمز ليه. زق فارس إيده بغل ومشي لبرة. قبل ما يركب العربية شاف مروة وغادة واقفين مع عاصم ومعاذ. كور إيده بغضب وهمس. _بقي هو ده اللي فضلتيه عليه يا مروة؟ صدقيني هخليكي تنسيه وتحبيني أنا وبس. قالها بوعد لنفسه قبل ما يكون ليها. وركب عربيته ومشي بسرعة كبيرة. عند مروة وغادة خرجوا من السنتر لقوا عاصم ومعاذ مستنينهم. بصوا لبعض باستغراب وبعدين بصوا على مكان وقوف عاصم ومعاذ. *إيه ده؟ إيه اللي جاب عاصم هنا؟

غادة برعشة وتوتر مسكت إيدي وقالت بخوف. _سي معاذ؟ إيه اللي جابه تاني ليه؟ *معرفش. قولتها ولوّيت شفايفي. *بس عموماً يله نروح ليهم واجمدي كده يا بنتي. افتكري إنه بيحبك، بيحبك وبس. ابتسمت غادة بفرحة ورحنا ليهم. وقفنا قدامهم بس عاصم اتحرك ناحيتي ومعاذ اتحرك ناحية غادة. سحب معاذ غادة بعيد شوية وقالها بهمس. ^إنتي مخطوفة. وشها بهت وبان الخوف عليها ورجعت خطوة لورا. أخذ باله فابتسم يطمنها وقال.

^استأذن عاصم من والدك علشان نقضي اليوم كله مع بعض. نفسحكم يوم قبل الامتحانات وتنشغلوا بيها. حبينا نديكم ريست صغير كده. ابتسمت بتوتر وقالت بارتباك. =بس أنا مش عايزة أخرج. أنا عايزة أروح البيت وبس. رفع حاجبه وقال وهو بيشاور ليها على العربية. ^قولتلك إنتي مخطوفة انهارده والمخطوف ما بيعترضش. يلا يا بنتي. قرب عاصم مني بهدوء وأداني وردة. ضحكت جوايا. صدقت غادة لما قالت اليوم العالمي للورد. انهارده أخذتها منه بفرحة وقولت.

*دي ليه أنا؟ ضحك بهدوء وسرحت في ضحكته وعينيه اللي دايماً بتشدني. مسك إيدي بلطف وقال. _هو في حد غيرك هنا واقف معايا؟ هي ليكي يا بنتي. انتي انهارده عاملك مفاجأة كبيرة أوي. اليوم هنقضيه مع بعض. ابتسمت ليه بفرحة وقولت. *الله! مفاجأة؟ هنروح فين؟ _الملاهي. كشرت بضيق. *الملاهي؟ هو أنا عيلة؟ رفع حاجبه لفوق وقال. _مش عاجباكي نروح يعني؟ مسكت إيده. *طبعاً لاء. يله ملاهي ملاهي.

ضحك وشاور ليه على العربية. أسبقه وجريت جري على العربية. ركبت واستنيته. شاور لمعاذ اللي هو كمان شاور ليه بهدوء وغمزو لبعض. وركب عاصم جنبي وشوفت معاذ ماسك غادة في إيده وركبها معاه. *هم ليه مركبوش معانا؟ _علشان عربيته. هيسيبها فين؟ *أوكي. قولتها وبصيت من الشباك وهو اتحرك ورا عربية معاذ. عند غادة بتوتر اتكلمت. =ليه ماركبناش معاهم؟ ابتسم بهدوء ومسك إيدها وقربها من صدره. ^علشان نكون لوحدنا يا جميل. مش عايز عزول بينا.

ارتبكت من وقاحته وصراحته. سحبت إيدها بتوتر بس فضل ماسك فيها. قضب حاجبه وكشر وقال بعصبية طفيفة. ^ممكن أعرف فين الأسورة؟ مش لابساها ليه؟ ابتسمت بتوتر. =عادي ملحقتش ألبسها. ساب إيدها وقال وهو مركز في الطريق قدامه. ^طيب البسيها دلوقتي. =مش دلوقتي. ^قولت البسيها. قالها بأمر. اتنهدت بضيق ولبستها. شد إيديها ناحيته وقال وهو بيشوفها على إيديها. ^حلوة أوي عليكي حبيبتي. أحلى مما اتخيلت.

قالها وباس إيدها بإعجاب. سحبت إيدها بتوتر وقالت بانفعال. =لو سمحت ما ينفعش كده. رفع حاجبه. ^ما ينفعش إيه؟ بضيق قالت. =تمسك إيدي وتبوسها كمان واحنا مش متجوزين. إحنا حتى ما فيش بينا أي رابط يخليك تهتم بيه كده وتخرج مع بعض. ^بس أنا هتجوزك. =إيه اللي مخليك واثق كده؟ ما يمكن أرفض أصلاً. أنا لسه صغيرة ومش مرتاحة بوجودي قربك.

كور إيده بغضب وبصلها بعيون قاتمة. بلعت ريقها بتوتر ورجعت خطوة لورا. لزقت في الكرسي اللي قاعدة عليه وساندة على الشباك بخوف. شاف خوفها منه فاتنهد بقوة. قرب منها وهمس بقوة. ^أنا واثق مش من نفسي لاء. أنا واثق من عينيكي دي اللي فاضحة مشاعرك. ليه؟ أنا عارف إنك بتحبيني زيك ما بحبك. بص قدامه لحظات ورجع بص عليها وكمل.

^هخلي قلبك ده ما يعرفش غيري. هتتنفسي بحبي. هتكوني مستنية قربي ليكي. بوعدك لغاية الوقت ده مش هضغط عليكي والمسك مرة تانية. بس ده مش معناه هبطل حربي معاكي لكسب قلبك يا حب. بص قدامه وكمل سواقته. وهي ابتسمت بحب. عاجبها تمسكه بيها. لفت وشها وبصت على الشارع. بعد ربع ساعة العربيتين وقفوا قدام ملاهي كبيرة. نزلت مروة وبتبص بانبهار حواليها. مسكت إيد عاصم بتشده لقدام. *يله بينا. أنا اللي اختار الألعاب كلها.

ابتسم بحب. سيبته وجريت على غادة اللي نزلت ووشها محمر. رفعت حاجبي ليها. بس معاذ وقف بينا وقال برخامة. ^هش من هنا. بيتك بيتك يا ماما. روحي لعند جوزك. كان عاصم وصل. مسك إيدي وشدني ناحيته وقال. _هنتقسم كل اتنين مع بعض. بعد ساعة هنتجمع هنا ونكون على اتصال. يا معاذ أوك. خلي بالك منها. يله بينا. قالها وسحب إيدي لبعيد. وغادة وقفت مكانها مستغربة تصرفهم. بصت عليه لقيته بيبص عليها بابتسامة واسعة. قال بهدوء وهو بيشاور قدامه.

^يله بينا. قاعدة ميرا على طرف السرير بتقلب في الفون بملل وبتشوف حجز تذاكر الطيران. سمعت طرق الباب فقفلت الفون بهدوء وقالت. *اتفضل. دخل جدها وهو بيتسند على العكاز. قرب منها بهدوء. فلت شفتيها بضيق أول ما شافته. بقالها كام يوم حابسة نفسها في الأوضة بعيد عن جدها. مش عايزة تشوفه مقهورة منه ومن كذبه عليها. خلاها تسيب كل حاجة وترجع علشانه. بس طلع عايزها علشان صفقة ليه. عايز يجوزها من جاسر علشان مصلحته هو. *عايز إيه؟

قالتها ميرا ببرود وقلة ذوق. قرب أكثر ووقف قدامها وقال. =خطوبتك بجاسر الأسبوع الجاي. اعملي حسابك كويس ومش عايز مشاكل. هبت فيه وصوتها علي. *إنت بتقول إيه؟ إيه الجنان اللي بتقوله ده؟ مستحيل أقبل بكده. أنا مش هرتبط بحتة العيل ده. =أنا مبطلبش منك ده أمر وهتنفذيه. لو رفضتي أو لمحتيله حتى هينسفنا من على وش الدنيا. *إنت خايف منه ليه؟ ده حتة عيل.

قالتها وهي بتحاول تكذب على نفسها. هي خايفة من جاسر قبل جدها حتى. رغم سنه الصغير بس أقوى بكتير من تخيلها. =عيل في عينك يا بت انتي. عايزاه يموتنا. أوعك تقولي له كده في وشه. ضحكت ببلاهة. *ما أنا قولته كده فعلاً. =نها*ر أبوك أسود. رفعت عيني بملل فكمل بخبث. =يا بت انتي لو مستغنية عن نفسك ماشي. معنديش مشكلة. روحي انتحري عادي. بس أنا لاء. عايز أعيش. *أكتر من اللي عيشته يا جدي. حط إيده في وشها وفرد إيده قدامها وقال.

=قل أعوذ برب الفلق. أعوذ بالله من عينك يا شيخة. بتحسديني في وشي كده. اتحرك بعيد عنها وقال. *أسيبك تجهزي شوية. جاسر هيجي يشوفك انهارده. قالها وخرج جري قبل ما تتعصب عليه. قفل الباب وهي زقلت الشاحن اللي جنبها على الباب وصرخت بغيظ.