رواية حبي الأول الفصل الثاني 2 - بقلم روان احمد

وقفنا لحد أما مي كانت بتساوم عمر عشان السر. صفاء: يلا يولاد خليكوا تفطروا، انتوا قاعدين عندكم ده كله بتعملوا إيه؟ عمر ومي في نفس واحد: جايين أه. عمر: صباح اللوز على عيونك الجوز يا قمر إنتي. صفاء: بس ياواد بطل تبقى بكاش كده، صباح النور يا حبيبي، يلا تعالى الفطار جاهز على السفرة. عمر: الله عليكي يا صفصف، ريحته تجنن، تسلم إيدك يا حبيبتي. صفاء: ألف هنا يا قلب أمك.

يلا خلصوا إنتوا فطار وأنا هنزل أشتري شوية حاجات من تحت، مش هتأخر. عمر: لا إله إلا الله يا حبيبتي، لو عاوزتي حاجة رني عليا. صفاء: محمد رسول الله. مي بابتسامة خبيثة: بقولك يا موري؟ عمر في سره: طالما قالت موري يبقى عايزة حاجة، ربنا يستر. عمر: خير يا حبيبتي، أبهريني. مي: حبيبي اللي حافظني، كنت بقول يعني بما إن النهاردة إنت إجازة، فتعمل جميل في أختك حبيبتك وتاخدني تفسحني. عمر: آه قولي كده بقى.

مي: قولي إنك بصالي في إجازتي. مي متصنعة نظرة البراءة: يرضيك يعني أفضل كده قاعدة في البيت أذاكر؟ يا أما أنزل الكلية وخلاص، ده حتى صحابي مبقتش أخرج معاهم، مين هيخرجني؟ مش لو كان معايا قرة عيني دلوقتي كان زمانه مفسحني وعملي اللي أنا عاوزاه. عمر في سره: يارب يجي خلينا نخلص. عمر: لا يا حبيبتي ميرضنيش، خلصي أكل يلا وقومي البسي. مي بفرحة: هيييييييي يسسس، يعيش عمر يعيش!

عمر بابتسامة: خلاص يا مجنونة إنتي، بدل ما أرجع في كلامي. مي بخوف متصنع: خلاص خلاص، أهو. مكان تاني كان قاعد عبد الرحمن في البلكونة ولكنه سرحان، بيفتكر حاجات حصلت معاه في الماضي ولسه مأثرة عليه. نسرين: إيه يا ابني بقالي ساعة بنادي عليك، ولا إنت هنا؟ في إيه يا حبيبي؟ مالك؟ عبد الرحمن: مفيش يا حبيبتي، بس سرحت شوية كده، كنتي محتاجة مني حاجة أعملهالك؟

نسرين: لا، بس كنت عاوزة أقولك إننا نازلين إسكندرية عند خالتك كمان كام يوم تكون الإجازة جت. عبد الرحمن: إسكندرية؟!! غريبة يعني، إشمعنى افتكرتيها دلوقتي؟ ده إحنا آخر كنا هناك ساعة ما كنت في الثانوية. نسرين: أيوه يا حبيبي، ما أنا عارفة، عشان كده عايزة أنزل أقعد مع أختي شوية، وحشتني، واهو بالمرة أطمن عليهم وأشوف البت مي وحشاني أوي، بنت اللذينة دي، وعمر بقى عامل إزاي ف بدلته الجديدة. واهو بالمرة إنت كمان تشوف جوك.

عبد الرحمن: جو إيه بس يا ماما؟ إنتوا لسه فاكرين الموضوع ده؟ كنا ساعتها صغيرين ومش فاهمين إحنا بنقول إيه، وأنا أصلاً نسيته. نسرين بصتله بجنب عنيها: نسيته؟؟؟ امممم، طيب على العموم متنساش تجهز نفسك وتشوف تاخد إجازة كام يوم كده، يا أما تنقل الفرع اللي هناك، المهم اتصرف لحد ما نرجع. عبد الرحمن: حاضر يا ماما. نسرين بابتسامة عريضة: حضرلك الخير يا أخويا.