رواية حبي الاول الفصل العاشر 10 - بقلم نيرة عبد الله

بسمه: أحمد مسافر، فروح أنا وماما نسلم عليه. شيما بصدمة: بتقولي إيه؟ أحمد مسافر؟ بسمه: أيوا، هيرجعوا بلدهم إسكندرية. وهما كانوا قاعدين هنا مع باباه عشان شغله، بس هو دلوقتي هيسافر هو ومامته وأخواته. وباباه هيفضل هنا عشان شغله. نور: تمام يابسمه، إحنا هنروح الدرس وهنسجلك اللي هيتشرح. وقفت معاها. شيما كانت مصدومة من كلام بسمه، فهي مش مصدقة إنها خلاص مش هتشوف أحمد تاني. وفي نفس الوقت حاسة إنها السبب اللي خلاه يسافر.

نور باستغراب: سرحانة في إيه؟ شيما: ها، لا مفيش حاجة. بقولك إيه؟ أنا هروح. نور: ليه يابنتي؟ وبعدين هتروحي بعد ما جينا الدرس؟ شيما: معلش يانور، أنا دايخة شوية وعايزة أمشي. نور: طب يلا تعالي لما أروحك البيت. شيما: لا يابنتي خليكي، أنا هروح لوحدي وإنتي احضري الدرس. نور: لا مش هحضر لوحدي، وبعدين مليش مزاج أحضر أصلاً. وخدتها وراحوا البيت. في بيت شيما. شيما كانت قاعدة في أوضتها سرحانة وزعلانه إن أحمد مسافر ومش هتشوفه تاني.

نور: مالك ياشيمو؟ سرحانة في إيه؟ شيما: أحمد سافر، بسببي أنا يانور. نور: بسببك إزاي يعني؟ شيما: هحكيلك. وحكت ليها كل اللي حصل. نور: طب مش يمكن سافر عشانك مش بسببك؟ شيما: قصدك إيه يانور؟ نور: يعني أحمد عارف إنه مش هيقدر يمنع نفسه عنك إنه يقرب منك، هيمكن سافر عشان ميحصلش ليكي مشاكل بسببه. وبعدين طالما بيحبك يبقى هيرجع ليكي تاني، بس في الحلال المرة دي. شيما: تفتكري كده فعلاً؟

نور: أيوا افتكري كده. ويلا أنا همشي بقى عشان متأخرش. وسلمت عليها ومشيت. نور وهي ماشية قابلت مراد. مراد بابتسامة: عاملة إيه يانور؟ نور: كويسة يامراد. وإنت أخبارك إيه؟ مراد: أنا تمام. وبعدين كويس إني قابلتك عشان كنت عايز أقولك حاجة. نور: عايز تقولي إيه؟

مراد: كنت عايز أعتذرلك عن كل مرة زعلتك فيها أو اتعصبت فيها عليكي. بس أنا بعمل كده عشان إنتي تخصيني يانور. إنتي بالنسبة ليا مش شخص عادي، لأ إنتي غالية عندي أوي. إنتي مكانتك عندي مختلفة عن الكل. نور: ومكانتي مختلفة عن الكل ليه بقى؟ مراد: عشان بحبك يانور، بحبك. نور: بس إنت أخويا يامراد. مراد بصدمة: بتقولي إيه؟ نور: بقول إنك أخويا يامراد، وعمري ما تخيلت إن يكون بينا حاجة في يوم، لأننا أخوات. بس.

مراد: تمام يانور، إحنا من النهاردة أخوات وبس. نور: مراد، مش عايزك تزعل مني. مراد: لا يانور مش زعلان، دي مشاعرك وأنا محترمها. وبعدين الحب مش بالعافية زي ما بيقولوا. نور: عن إذنك. وسابته ومشيت. نور أول ما مشت دموعها نزلت، لأنها بتحب مراد، بس اضطرت تقول كده لأنها بتخاف من مراد ومن طبعه الصعب. شيما كانت قاعدة في أوضتها بتعيط وافتكرت

كلام نور وقالت بدموع: يارب يانور يكون كلامك فعلاً صح ويرجع تاني. بس أنا مكنتش عايزاه يسافر، أنا كنت مبسوطة بوجوده قدامي. معرفش إزاي هدخل المدرسة وهو مش فيها وهقعد فترة مش هشوفه. ويعلم هشوفه إمتى. هيوحشني أوي. قدام بيت أحمد. محمد: خلاص ياصاحبي هتسافر وتنساني؟ أحمد: أنساك إيه يبني، إنت أخويا وهكلمك كل يوم وهجيلك في الإجازات، وإنت هتيجي إسكندرية. محمد: أكيد طبعاً هجيلك، بس مبلاش ياصاحبي وخليك هنا.

أحمد بتنهيدة: مش هينفع يامحمد. طول ما أنا هنا مش هعرف أنساها، لأنها هتفضل قدامي وهفضل أحن ليها، وده مينفعش، لأنها هتبقى مع حد تاني غيري. فعشان كده لازما أسافر عشان أنساها. محمد حضنه: ربنا يريح قلبك ياصاحبي. هتوحشني. أحمد حضنه: وإنت كمان ياصاحبي. سلام. وركب العربية ومشي. عدي وقت كبير على سفر أحمد لإسكندرية، وحصل فيهم حاجات كتير أوي. مراد اتخرج من كليته واشتغل في شركة هندسة.

شيما وبسمه ونور نجحوا في الثانوية العامة وخلوا الكليات اللي نفسهم فيها. شيما وبسمه دخلوا هندسة. ونور دخلت طب. أما أحمد فدخل كلية الهندسة وكليته جت في القاهرة. ومحمد دخل كلية طب أسنان. في كلية الهندسة. شيما وبسمه كانوا ماشيين سوا بعد ما خلصوا محاضرات، رايحين عند نور يفوتوا عليها عشان يروحوا كلهم سوا. بسمه: اليوم النهاردة كان متعب أوي. شيما: أوي إيه؟ كل المحاضرات والسكاشن دي، ولا المعلومات اللي بناخدها؟

أنا دماغي بتفصل في المحاضرة فعلاً. بسمه: مكنتش اتخيل إن أول سنة لينا في هندسة صعبة كده. شيما: كل حاجة في أولها صعبة، بس واحدة واحدة هنتعود. بسمه: معاكي حق. شيمو، بصي كده، أحمد هناك أهو. شيما بصت ناحية ما بسمه شاورت ليها، وكانت بتبص بفرحة وشوق له. بس اتضايقت لما لاقت أحمد قاعد في الكافتيريا مع بنت وبيهزروا سوا. شيما وهي بتحاول تتحكم في أعصابها قالت لبسمة: هو دخل كلية إيه؟ بسمه: معانا هنا في هندسة، وأكبر مننا بسنة.

شيما: وإنتي مقولتيش ليا ليه؟ بسمه: مش إنتي اللي قولتي محدش يجيب ليا سيرته تاني، عشان كده مقولتش. شيما بغيره: ومين اللي قاعدة معاه دي؟ بسمة بخوف: دي يبقى البنت اللي بيحبها. شيما بصدمة: بيحبها؟!