رواية حبي الوحيد الفصل السادس 6 - بقلم جنى

مراد بوجع: آه آه، فريدة. فريدة بصدمة: مراد، مالك يا مراد؟ مراد بتعب: هاتي الدوا ده. فريدة بخوف: فين ده؟ أي واحد؟ مراد شاور لها على الدوا، وفريدة خلتِه ياخده. فريدة بخوف: بقيت أحسن؟ مراد: آه الحمد لله، وجع راسي بدأ يروح. فريدة: لا، مش هروح. هقعد معاك. مراد: روحي ذاكري يا فريدة. فريدة: طيب، هروح. بس انت متأكد إنك كويس؟ مراد بضحك: والله كويس. فريدة: ماشي، أنا رايحة أوضتي. عايز حاجة؟ مراد: لا، شكراً. فريدة: يلا سلام.

ومشيت. *** في الشركة. مازن: ياااه، خلاص فاضل تكّة وناخد الصفقة. ليل: الحمد لله. مفاضلش غير إننا نروح شرم الشيخ وناخدها. مازن: هتعزمني على إيه؟ ليل بحدة: مازن، قوم روح على مكتبك. مازن: ولو مروحتش؟ ليل وهو بيحدف عليه الملف: قوم يا مازن. سليم دخل، والملف جه على وشه. سليم: آآآه، آآآه! في إيه؟ مالك؟ ليل بصدمة: بابا! أنا كان قصدي مازن. مازن ببكاء مصطنع وضحك: يرضيك كده يا عمي؟ افرض كانت جت في عيني، كنت هعمل إيه ساعتها؟

سليم بضحك عليه: معلش يا مازن. مازن ببكاء مصطنع وضحك: لو سمحت يا عمي، هات لي حقي. فين حقوق الإنسان؟ ليل: ما خلاص بقى، متسوقهاش فيها. مازن: بيعاملني معاملة مرات الأب. سليم بضحك: طب ما أنت قبل كده ضربته بإزازة الماية. بطلوا شغل الأطفال ده. مازن: ده حتى الأطفال أحباب الله. ليل: روح على مكتبك يا مازن. مازن: باي يا عمي. سليم: باي يا مازن. متنساش إننا هنسافر بعد أربع أيام. مازن: حاضر يا عمي. ومازن راح على مكتبه. ***

بعد أربع أيام. ليل صحي، وخد شاور، وسرح شعره اللي طويل لحد ما. ولبس بدلة أنيقة، ورش من برفيومه الغالي. ورن على مازن. ليل: الوو، يا مازن. عامل إيه؟ مازن: الحمد لله. أنت عامل إيه؟ ليل: الحمد لله. إيه، خلصت؟ مازن: آه، خلصت. هروح أركب العربية وأجي. ليل: ماشي. وقاله على المكان اللي هيتقابلوا فيه. وليل نزل تحت. ليل: خلاص بقى يا ماما، هو إحنا أول مرة نسافر؟ ثريا بعياط: خلي بالك من نفسك.

ليل بضحك: وهأكل سندوتشاتي كلها، وهأحافظ على أقلامي. ثريا بضحك ممزوج بعياط: ماشي. سليم: عايزة حاجة يا ثريا؟ ثريا: عايزة سلامتك. مراد: بابا، على فكرة أنا عندي جلسة النهاردة. سليم: مين هيروح معاك؟ ثريا: مش هينفع أروح معاه، هسيب فريدة لوحدها؟ سليم: خلاص، روح، وهبعت معاك حراسة. مراد بملل: حاضر. ليل: فين فريدة؟ عايز أسلم عليها. ثريا: نايمة فوق. سهرت جامد عشان المذاكرة ونامت. حتى مش هتقدر تروح الجامعة.

ليل: ده الدكتور بتاعها زمانه بيتوعد لها. ثريا: على رأيك. وليل حضن مراد وسلم عليه، وقبّل راس ثريا، وراح ركب عربيته واتجهوا إلى المكان اللي هيتقابلوا فيه. *** في فيلا الجرحي. مراد: أنا رايح الجلسة يا ماما. ثريا: ماشي يا مراد. واحد من الحراس: اتفضل يا أستاذ مراد. ومراد ركب عربيته واتجه إلى المستشفى. *** في المستشفى. ندي كانت قاعدة بملل على الكرسي بتاع المكتب وبتلف بيه. ووصل مراد إلى المستشفى. مراد: ندي موجودة؟

أحم، قصدي دكتورة ندى موجودة. روان: ثانية، دكتورة ندي. أستاذ مراد جه. ندي: دخليه يا روان. روان: اتفضل يا أستاذ مراد. دخل مراد. ندي: إزيك يا أستاذ مراد؟ مراد: ممكن بلاش أستاذ؟ ندي باستغراب: إزاي يعني؟ مراد: أنا مش هقولك دكتورة، وإنتي مش هتقوليلي أستاذ. ندي في سرها: هو الدوا اللي قلتله عليه عملوا حاجة في مخه؟ ندي: لو الحاجة دي هتساعد نفسيتك، موافقة. يلا نبدأ جلستنا يا مراد.

واتكت على مراد، وبدأت الجلسة. مراد طول الجلسة كان بيحاول يركز معاها، بس جمالها كان بيشتته، وعينيها السودا اللامعة بتنسيه كل حاجة. مراد بتلقائية وعدم وعي: هي دي عينك ولا لينسيز؟ ندي: حضرتك مركز معايا ولا في عيني؟ مراد: مركز في جمالك. ندي قامت وقفت: أفندم؟ مراد: احم احم، لا طبعاً مركز في الجلسة. ندي بحدة: على فكرة دي تاني مرة تقولهالي. مراد: آسف. وكملت ندي جلستها. وهو بيقول لنفسه: الله يخربيتك، إيه اللي أنت عملته ده!

قلبه: ما هي اللي جميلة. عقله: بس يا مراد، مين دي اللي تقع في حبها؟ قلبه: يا عم اتنيل اسكت بقى. ندي: الخاصية بتاعت الجلسة اللي فاتت، يارب تكون فادتكم. مراد: هي فعلاً فادتني، صداع راسي بدأ يقل. علي خبط على ندي. ندي: معلش ثانية. اتفضل. علي: إيه ده؟ أنتي عندك جلسة؟ ندي: أيوة يا بابا، ده معاد الجلسة. حضرتك نسيت ولا إيه؟ علي: أصل كان عندك الصبح، فاستغربت. ندي: الصبح دي كانت متأجلة، لكن دلوقتي ده معادها.

علي: آسف، مكنتش أعرف. ندي: اتفضل حضرتك، كنت عايز إيه؟ علي: كنت عايز الورق. رنيت على السكرتارية بس مردتش، ومش لاقيها. ندي: طيب، تلاقيها بتعمل حاجة. وفتحت الدرج وقالت: اتفضل الورق أهوه. علي: ماشي. أنا خلصت شغل. ندي: بس أنا لسة مخلصتش. علي: بصي، أنا همشي، وهبعتلك عربية بحراسة. ندي: ماشي يا بابا. علي: عايزة حاجة؟ ندي: لا، شكراً. مراد كان متعجب من طريقتها مع باباها واحترامها ليه. ندي: آسفة يا استـ... قصدي يا مراد.

مراد في سره: مراد، طالعة منها حلوة أوي. مراد: لا لا، ولا يهمك. ندي: يلا نكمل. وكملوا. *** عند ليل ومازن وسليم. ليل: أخيراً خدنا الصفقة. مازن: الحمد لله. سليم: بجد رفعتوا راسي. اشتغلتوا جامد عليها لحد ما أخدناها. ليل: شكراً يا بابا. مازن: شكراً يا عمي. سليم: عارفين لو أخدنا الصفقة الجاية، إن شاء الله، هتبقى شركتنا من أكبر شركات العالم. مازن: يلا على العزومة يا ليل. سليم: عزومة إيه؟

ليل: كنت واعد مازن لو أخدنا الصفقة، هعزمه على الغدا. سليم: اممم، طيب. مازن: ما تيجي معانا يا عمي. ليل: آه، صح. ما تيجي معانا يا بابا. سليم: لا لا، اتبسطوا انتوا. أنا هروح. ليل: حاضر يا بابا. وسليم مشي بالعربية مع حرّاسه طبعاً. ليل: اتفضل يا سيدي، عايز تاكل إيه؟ مازن: تعالي تعالي، أعرف مطعم حلو هنا. ليل: ربنا يستر، ما يكونش الأكل مسمم. مازن: أنت متعرفش أنا مين ولا إيه؟ ليل بضحك: ما المشكلة إنّي عارف.

ومازن وليل راحوا ركبوا عربيتهم واتجهوا للمطعم. *** في فيلا الجرحي. فريدة بتعب: راسي بتوجعني. ثريا: يا حبيبتي، مينفعش كده. لازم تنامي كويس، ومش كله سهر كده. أنتي كده هتأذي نفسك. فريدة: أعمل إيه يا ماما؟ لازم أشد في المذاكرة. ثريا: يا حبيبتي، اصحي بدري وذاكري ونامي بدري. حرام عليكي نفسك. فريدة: ماشي يا ماما. *** في المستشفى. ندي: ودي كانت آخر حاجة في جلستنا. أشوفك الجلسة الجاية. مراد: إن شاء الله.

وندي ومراد طلعوا من المكتب، لكن ندي سبقته. ندي باستغراب: إيه ده؟ فين العربية؟ ورنت على علي. ندي: الوو يا بابا، فين العربية؟ علي باستغراب: هي العربية موصلتش؟ ندي: أيوه، مافيش حاجة وصلت. علي: إزاي؟ أنا قايلهم من بدري. هقفل معاكي وأكلمهم. *** السواق: هنعمل إيه؟ العربية عطلت في نص الطريق. الحارس: ما أنا قلتلك رن على أستاذ علي، مردتش. عملت فيها جان وقلت أنا هصلحها، ومافيش حاجة اتصلحت. السواق: اسكت اسكت، بيرن.

علي: الوو، انتوا فين؟ بقالكوا ساعة بتوصلوا. السواق بتوتر: الصراحة، العربية عطلت في نص الطريق. علي: وما رنتش عليا ليه؟ السواق: ما أنا الصراحة قلت هصلحها. علي بعصبية: بنتي واقفة قدام المستشفى مستنياكوا. ما ترن عليا وأبعتلها عربية تانية. إيه الاستهتار ده؟ السواق: أنا قلت عطل صغير، مش محتاج أكلم حضرتك. علي بزعيق: ميت مرة أقولك متتصرفش من دماغك. اقفل دلوقتي، هبعتلها حد تاني. السواق: تحت أمرك يا أستاذ علي. وقفل.

الحارس: قالك إيه؟ السواق: هيبعتلها حد تاني غيرنا. نادية: مالك يا علي، عمال تزعق كده ليه؟ علي: العربية اللي بعتها لندي لسة موصلتش، وكلمتهم قالولي العربية عطلت. طب ما يرنوا عليا؟ نادية بصدمة: كل ده والعربية موصلتش؟ علي: بعتلها عربية تانية. زمانها على وصول. وهنرن عليها، أخليها تقعد في مكتبها لحد ما العربية توصل. أكيد مش هخليها واقفة في الشارع كده. نادية: طيب، اهدي كده. علي: هديت. *** في المستشفى.

ندي: استغفر الله العلي العظيم. كل ده والعربية موصلتش؟ : مين اللي مزعل القمر دي؟ ندي في سرها: هما بيكلموني؟ أعمل إيه يا ربي؟ : ما براحة على الأرض، أصل مش بتاعتنا. مقلتليش بردوا يا قمر، مين اللي مزعلك؟ مراد: اللي مزعلها هيزعلك دلوقتي. ونزل فيه ضرب. ندي: مراد! مراد! خلاص! مراد مسمعهاش وكمل ضرب فيه لحد ما وشه فضل يجيب دم من كل حتة، وهو هيغمى عليه. ندي بعياط: كفاية يا مراد.

مراد أول ما شاف دموعها قلبه وجعه وسابه. والولد قام جري. مراد: أنتي كويسة؟ ندي بعياط: آه كويسة. إيه ده؟ إيدك بتنزف. مراد: مش مهم. إيه اللي موقفك هنا؟ مروحتيش ليه؟ ندي: العربية بتاعة بابا لسة موصلتش. مراد: طيب، تعالي أوصلك. ندي: لا، شكـ... مراد بمقاطعة: تعالي أوصلك. يلا. وراحت معاه. ركبت العربية. مراد للحراس: امشوا انتوا، وأنا هروح دكتورة ندي وهروح. الحراس: بس أستاذ سليم قال منسيبوش حضرتك.

مراد: قولوا لأستاذ سليم اللي أنا اللي قلتلكوا كده. الحراس: تحت أمرك يا أستاذ مراد. مراد: تعرفي إن شكلك حلو لما بتعيطي؟ ندي: أكيد مش همشي في الشارع بعيط عشان شكلي أحلى. أنا بعيط. مراد: أصلاً شكلك حـ... ندي: شكراً. مراد: أنا معملتش حاجة. لو كان أي حد مكاني كان عمل... مراد: راسـ... ندي: أنت كويس؟ مراد وهو بياخد الدوا: لما بتعصب، راسي بتوجعني. وأخد الدوا. ندي: دلوقتي بقيت كويس؟ مراد: آه الحمد لله. فين، ابعتي لوكيشن بيتك.

ندي: حاضر. ثانية. وبعتت اللوكيشن لمراد. مراد: تمام. اربطي حزام الأمان. ندي: ربطته. واتجه لفيلا الأسيوطي. عربية مراد مشيت، وحتى وراها على طول العربية اللي علي بعتها لندي. *** عند ليل ومازن. ليل: يلا يا مازن. بقالك ساعة ونص بتاكل. مازن: أنت هتحسدني؟ ليل: يا سيدي مش هحسدك ولا نيلة، بس يلا المطعم هيقفل. مازن: طيب، يلا. ليل: هروح أحاسب، وأنت روح على عربيتي. مازن: ماشي. وليل حاسب، وراحوا ركبوا العربية واتجهوا لبيتهم. ***

في فيلا الجرحي. ثريا: أومال فين ليل ومازن؟ سليم: في المطعم. ليل كان واعد مازن لو أخدنا الصفقة، هيعزمه على الغدا. ثريا: امممم، ماشي. هخلي سميحة تحط الغدا. سليم: ماشي يا حبيبتي. *** في فيلا الأسيوطي. علي: يعني إيه مش لاقيها؟ السواق: زي ما بقول لحضرتك. مافيش حد موجود. علي: إزاي يعني؟ هتكون راحت فين؟ عربية مراد وندي وصلت. علي بصدمة: أنت؟ ندي: بابا؟ هو... يتبع.