رواية حبيب طفولتي الفصل الثاني 2 - بقلم روضه احمد

وفجأة خبطت في حد. خديجة: أنا آسفة جداً، ما كانش قصدي. عمر! عمر: خديجة؟ خديجة: عمر، عمر! انت بجد؟ فجأة لقت بنت جايه تجري على عمر. البنت وهي بتحضنه: عمر وحشتني أوي. عمر بادلها الحضن: وأنتي كمان وحشتيني أوي يا قلب عمر. وكل ده خديجة واقفة بتبصلهم بصدمة. خديجة دموعها نزلت ومشيت وسابتهم لحد ما وصلت البيت. منى فتحت الباب لقت خديجة منهارة من العياط. منى: خديجة مالك يا بنتي؟ بتعيطي ليه؟ خديجة سابتها وجريت على الأوضة.

منى راحت وراها، لقيتها نايمة على السرير وبتعيط. منى: مالك بس يا حبيبتي؟ احكيلي إيه اللي حصل. خديجة اترمت في حضنها وعيطت بقهر: ما طلعش قد وعده يا ماما. استنيته كتير بس هو ما طلعش جاي ليا. آه يا ماما، آه من وجع قلبي على عمري اللي عدى وأنا مستنياه. منى: اهدي يا حبيبتي، متوجعيش قلبي عليكي. خديجة: مش قادرة يا ماما، مش قادرة. منى: يا حبيبتي اهدي طيب واحكيلي إيه اللي حصل. خديجة

وهي بتتكلم ما بين دموعها: شفته يا ماما، شفت عمر. للحظة حسيت إن خلاص الدنيا ضحكتلي وهبقى أسعد واحدة. بس... منى: بس إيه؟ خديجة: بس لقيتها بتحضنه وبتقوله وحشتني يا عمر. أنا استنيته يبعدها أو يمشي ويسيبها، لكنه بادلها الحضن. في اللحظة دي الدنيا ضلمت في وشي. أنا استنيته كتير وضيعت عمري مستنياه، وفي الآخر يطلع كل ده حلم جميل في مخيلتي؟ يا ريته كان فضل حلم.

منى: عشان خاطري متعمليش في نفسك كده. وهو ميستاهلكيش، انتي ربنا هيعوضك بالأحسن منه وهيعيش عمره كله ندمان عليكي. خديجة بعياط: لا يا ماما، أنا كنت عايزاه هو، مش عايزة الأحسن منه. منى لسه هتتكلم، لقت خديجة فاقدة الوعي بين إيديها. منى: خديجة قومي يا بنتي، أنا ماليش غيرك، متوجعيش قلبي عليكي. مريم جت على صوت مامتها. مريم: ماما، في إيه؟ خديجة مالها؟ ماما ردي عليا، خديجة مالها؟

منى بصراخ: كلمي أخوكي يجيب الدكتور بسرعة، بنتي هتروح مني! مريم جريت تكلم يوسف، وفي خلال دقايق كان يوسف والدكتور وصلوا. الدكتور دخل كشف على خديجة وخرج. يوسف: طمنا يا دكتور، أختي مالها؟ الدكتور: جالها انهيار عصبي. الظاهر اتعرضت لضغط وزعل جامد مقدرتش تستحمل. منى: طب وهي هتفوق امتى يا دكتور؟ الدكتور: أنا اديتها حقنة مهدئة، هتنيمها لحد بكرة. أهم حاجة متتعرضش لأي ضغط نهائي، وإن شاء الله هتبقى كويسة.

يوسف: متشكر جدا يا دكتور، تعبناك معانا. الدكتور: ولا تعب ولا حاجة، ربنا يطمنكم عليها. تاني يوم. منى: خشي اطمني على أختك، شوفيها صحيت ولا لسه، وقوميها عشان تفطر. مريم: حاضر. مريم دخلت لقت خديجة صاحية والدموع على خدها. مريم أخدتها في حضنها: بس يا حبيبتي، اهدي، مفيش حاجة مستاهلة دموعك الغالية دي. خديجة: قولي لماما إني موافقة أقابل العريس. مريم: بس... خديجة: من غير بس، اسمعي الكلام يا مريم وسيبيني لوحدي شوية.

مريم: حاضر يا حبيبتي. مريم: ماما، خديجة بتقولك هي موافقة تقابل العريس. منى بصدمة: إيه؟!