رواية حبيبي المدير الفصل الأول 1 - بقلم شيماء صبحي

خرجت من باب الشركة اللي شغالة فيها وهي حاطة إيدها على رقبتها وبتقول بهمس: "مش قادرة، تعبت أوي النهارده؟ قاطع كلامها اتصال من صديقة قديمة ليها من أيام المدرسة. استغربت ورفعت حاجبها وردت عليها. صديقتها قالت بفرحة: "احزري فزري مين رجع مصر يا أحلام؟ هزت أحلام راسها بتعب وقالت: "مش عارفة، بس قولي بسرعة علشان أنا طالعة من الشغل تعبانة وهموت وأنام." ضحكت صديقتها وقالت:

"طيب طيب، بس قبل ما أقولك هو مين، عاوزة أقابلك علشان وحشتيني." هزت أحلام راسها بالموافقة وقالت: "خلاص خلينا نتقابل دلوقتي في الكافيه اللي بنروحه على طول وابقي قوليلي هناك مين ده اللي رجع مصر. يلا مع السلامة ومتتأخريش عليا." هزت صديقتها راسها بالموافقة وأجابتها بابتسامة: "متقلقيش، مش هتأخر." قفلت أحلام المكالمة بتعب وبصت في ساعتها وقالت: "مش مشكلة، هي نص ساعة هقعدها مع مروة وبعدها أروح أنام."

قالت كلامها ومشيت خطوتين، ولكنها افتكرت إنها نسيت مفاتيح عربيتها في مكتبها. جريت بسرعة ركبت الإسانسير وهي بتاخد نفسها بصعوبة. عدى دقايق وكانت وصلت لمكتبها، أخدت المفتاح بسرعة وقبل ما تتحرك سمعت صوت جاي من غرفة المدير. اتحركت ببطء عشان متعملش صوت، وأول ما وصلت لمكتب المدير فتحت الباب بسرعة واتصدمت من اللي شافته. ***

في الكافيه كانت وصلت مروة، صديقة أحلام، وكانت بتدور عليها في كل مكان لحد ما شفتها قاعدة وعلى ملامح وشها الحزن الكبير. قربت منها بخضة وقالت: "أحلام مالك؟ رفعت أحلام راسها لمروة وقالت: "أنا اترفضت من الشغل يا مروة." شهقت مروة بصدمة وقعدت جنبها وقالت: "ليه؟ إيه اللي حصل؟ رجعت أحلام بضهرها لورا وهي بتفتكر اللي حصل بعد ما فتحت باب المكتب بتاع المدير وبدأت تشرح لمروة. ***

وصلت لمكتب المدير وفتحت الباب بسرعة واتصدمت من اللي شافته، كان المدير ومعاه السكرتيرة وكانوا الاتنين في وضع مخل. أحلام شهقت وحطت إيدها على بوقها بصدمة وقالت: "يانهار أسود! بتعملوا إيه؟ المدير والسكرتيرة اتصدموا لما شافوها واقفة ومديالهم ضهرهم. بصت السكرتيرة للمدير وزقته بعيد عنها وأخدت هدومها بسرعة وبدأت تلبسها. المدير بص على أحلام وقال: "أحلام، انتي فاهمة غلط."

أحلام خرجت من المكتب وقفلت عليهم الباب وهي مش مستوعبة اللي شافته. وبعد دقائق خرج المدير ومعاه السكرتيرة وكانوا الاتنين واقفين قدامها وباصين في الأرض. السكرتيرة قالت بعياط: "أرجوكي يا أحلام متفضحنيش." رفعت أحلام راسها ليها وقالت: "فضيحة؟ خايفة من الفضيحة يا هاجر؟ السكرتيرة بدأت تنهار من العياط وبصت للمدير وقالت: "ده جوزي يا أحلام، أنا معملتش حاجة غلط." أحلام هزت راسها بصدمة أكبر وقالت: "جوزك؟ يعني إيه؟

المدير رفع حاجبه بتحدي وبص لأحلام وقال: "يعني انتي غلطتي لما دخلتي المكتب من غير ما تستأذني. وعموماً، زي ما هاجر قالتلك بالظبط، إحنا متجوزين." أحلام بصت لهاجر وقالت: "إيه اللي بتقوليه ده؟ انتي ناسيه إنه أكبر منك في السن وكمان متجوز ومخلف؟ انهارت هاجر أكتر من العياط وبصتلها وقالت: "اصل انتي عارفة ظروفي وأنا كنت محتاجة... " مقدرتش تكمل كلامها وشهقت من كتر العياط. قاطع كلامهم المدير وبص لأحلام بغضب وقال:

"اسمعي يا أحلام، انتي موظفة شاطرة وأنا مقدر كل ده، بس من بعد اللي حصل ده انتي ملكيش أكل عيش هنا تاني." أحلام رفعت حاجبها بصدمة وقالت: "يعني إيه؟ انت أكيد بتهزر، أنا بقالي هنا ٥ سنين؟ المدير بص للسكرتيرة وقال: "روحي انتي يا هاجر وأنا هحل الموضوع ده معاها، متخافيش." هاجر هزت راسها ومشيت بسرعة وسابتهم. والمدير وقف قدام أحلام وقال: "انتي السبب في خسارتك لشغلك، لولا تطفلك ده مكنتش كل حاجة باظت." أحلام زعلت من

كلامه وبصتله بتحدي وقالت: "انت إزاي تضحك عليها وتدمر مستقبلها؟ دي لسه بنت صغيرة، أنا هوديك في داهية." المدير مسح على وشه بغضب وقال: "ميخصكيش الكلام ده كله، واتفضلي بقى لمي حاجتك دي وامشي من هنا." قال كلامه وهو بيزقها بعيد عنه، ولكن أحلام اتعصبت أكتر من كلامه ورفعت إيدها عشان تضربه، ولكن مسك إيدها بسرعة وضغط عليها جامد وقال بغضب: "آخر مرة هحذرك، لو ممشيتيش من هنا هقضي الليلة معاكي بدالها." أحلام فتحت عينيها

من الصدمة وقالت بغضب: "انت بني آدم قذر وأنا مش هسكت على اللي حصل ده وهفضحك." المدير اتعصب أكتر وقرب منها، ولكنها كانت مشيت من قدامه واتحركت لمكتبها. أخدت كل حاجتها وحطتها في كرتونة وبعدها خرجت من الشركة بغضب. *** مروة قالت بصدمة: "الحيواااان إزاي يعمل كده! أحلام مسحت دموعها اللي نزلت غصب عنها وقالت: "بس أنا مش هسكت يا مروة، ده لازم يتفضح عشان يعرف إن ربنا حق، وأكيد دي مش أول بنت يظلمها بالشكل ده."

مروة خبطت على كتفها وقالت: "اهدي يا أحلام، وبعدين متنسيش إن البنت دي تبقى مراته، يعني ممكن الموضوع يقلب ضدك ويقول إنك بتعملي كل ده عشان متجوزكيش انتي واتجوزها هي." رفعت أحلام حاجبها وقالت بغضب: "أنا؟ أحلام أبص لده؟ مروة حركت راسها بالرفض وقالت: "انسي يا أحلام اللي حصل، هما حُرين مع بعض. أنا عارفة إنك خايفة عليها، بس هي برضه محدش غصبها تتجوزه وعملت كل ده بمزاجها؟ أحلام خبطت رجليها الاتنين في الأرض بسرعة وقالت:

"عندك حق، إن شاء الله يولعوا هما الاتنين." مروة رجعت بضهرها لورا وقالت: "طيب هتعملي إيه في موضوع الشغل بعد اللي حصل؟ أحلام قالت بتحدي: "أكيد هشوف شركة تانية، أكيد مش هقعد أحط إيدي على خدي من غير شغل." مروة هزت راسها، ولكنها افتكرت حاجة مهمة وقالت بحماس: "استني يا أحلام، مش أنا كنت بقولك إن فيه حد مش هتتوقعي إنه رجع مصر تاني؟ أحلام هزت راسها وقالت: "أيوه صح، مين ده صحيح؟ مروة ابتسمت وقالت: "ماهر! ماهر الصياد يا أحلام.

*** بداخل شركة الصياد وبالتحديد في غرفة المدير التنفيذي للشركة كان موجود ماهر الصياد، وبجانبه السكرتيرة الخاصة بيه كانت واقفة وهي باصة في الأرض بتوتر. ماهر حط الأوراق قدامه وقال بضيق: "أنا قولتلك الملفات دي تروح لمين؟ البنت بلعت ريقها وقالت بتوتر: "أستاذ نصر مدير الحسابات." كمل كلامه وقال بنفاذ صبر: "ودلوقتي بقى راحوا لمين؟ البنت قالت بدموع: "أستاذ أنور المحامي." وقف ماهر بضيق وقال: "يعني أعمل فيكي إيه دلوقتي؟

بص لوشها ولقاها بتعيط، فقال بضيق: "هو انتي هتعيطيلي؟ البنت بخوف منه قالت: "أنا آسفة يا مستر ماهر، والله مش هتتكرر تاني صدقني، ده بس حصل كده عشان كنت متوترة." مشي ماهر خطوتين وحط إيديه الاتنين في جيبه ولف بجسمه وقال وهو بيبص عليها: "طيب أنا مش عاوز أظلمك معايا وأرفدك، خصوصاً إنك لسه خريجة يعني معندكيش خبرة كافية تكوني مديرة مكتبي. فأنا هنقلك لقسم الحسابات متدربة. اتفضلي يا آنسة وابعتيلي أستاذ نصر مدير الحسابات."

هزت راسها باحترام وخرجت من المكتب وهي بتفرك في إيديها لحد ما وصلت قسم الحسابات وقالت: "أستاذ نصر، مستر ماهر عاوزك في مكتبه." وقف نصر وهز راسه واتحرك بسرعة لمكتب ماهر. وأول ما دخل قال: "تحت أمرك يا مستر ماهر." ماهر كان بيبص على الطريق من النافذة، فبصله وقال: "ياسمين هتكون متدربة معاك، وعاوزك تعلن عن مديرة مكتب متقلش خبرتها عن ثلاث سنين. عاوزها تكون عندي بكرة." نصر قال باحترام: "أوامرك يا فندم."

رفع ماهر صباعه وشاورله يخرج، وفضل هو يبص على الطريق بهدوء. *** أحلام قالت بصدمة: "قولتي مين؟ مروة بضحكة: "أنا كنت عارفة إنك هتتفاجئي لما تعرفي. أنا عرفت إنه بقى له أكتر من ٣ سنين ودلوقتي بقى عنده شركة كبيرة جداً واسمه معروف، بس أقولك حاجة، انتي لو شوفتيه ممكن يغمى عليكي من شدة حلاوته." رفعت أحلام حاجبها بسخرية وقالت: "ماهر وحلاوة الاتنين مع بعض؟ ضحكت مروة بهستيرية وقالت:

"اللي يسمعك وانتي بتقولي كده ميشوفكيش وانتي دايبة فيه من إعدادي." قلبها اتحرك أول ما مروة قالت كلامها، فوقفت أحلام وقالت برفض: "أنا بصراحة ميهمنيش رجع ولا مرجعش، أنا مالي. المهم دلوقتي ألاقي شغل عشان ألاقي أكل أنا وزقزوقة. الأستاذ ماهر بتاعك ده ميأكلش عيش." مروة بصت عليها وقالت بسخرية: "برضه؟ لفت أحلام بجسمها وهي بتاخد شنطتها وغمزتلها وقالت: "حاسبي بقى عشان أنا مفلسة." اتصدمت مروة وهي بتبص للأكل اللي أحلام طلبته،

فقالت بصوت عالي: "يا أحلاااام متهزريش! وقفت تبص تاني للأكل وقالت بصوت عالي أكتر: "احلااام استنييييي! كانت أحلام خرجت من الكافيه وركبت عربيتها واتحركت وهي بتضحك، وسابت مروة لوحدها في الكافيه. وفي طريقها كانت مشغلة أغاني بصوت عالي كعادتها لأنها مبتحبش تسمع الدوشة بتاع الطريق. جالها اتصال من مروة فردت عليها وهي بتضحك وقالت: "إيه يا حبيبتي؟ فيه مشكلة ولا إيه؟ مروة قالت بصوت عالي: "مش مسامحاااكي يا أحلام!

ضحكت أحلام من قلبها وقالت: "معلش معلش، الأصحاب لبعضيهم." مروة كانت متغاظة من أحلام فقالت بضيق: "طيب يا أحلام، أنا بقى مش هسكت غير لما آخد حقي منك." ضحكت أحلام وقالت: "مش لما تشوفيني تاني بقى." مروة حركت راسها وقالت: "هشوفك يا أحلام، بس مش هرحمممك وقتها." ضحكت أحلام على كلامها وبسبب انشغالها معاها ما أخدتش بالها من الكمين اللي كان على الطريق، فقبل ما تخبط الظابط كانت وقفت العربية بصدمة.

أول ما أحلام انتبهت للي بيحصل قفلت بسرعة في وش مروة وبصت للظابط ورفعت إيدها وقالت: "هو أنا لو حلفتلك إن مكنش قصدي واني ما اخدتش بالي أصلاً هتصدقني." الظابط قال بصوت قوي وغاضب: "هاتولي البت دي على البوكس."