تحميل رواية «حبيبي المجهول» PDF

الكل اتفاجئ ان ريهام نازله تقابلهم ورحبت بيهم جامد جدا

علي مستغرب جدا لانه عارف ان مراته مش بتتنازل بسهوله او تستسلم

ليلي واهلها وجيرانها دخلو القصر الطويل العريض الفخم جدا وانبهروا بكل حاجه وكل شويه يغمزوا لليلي يا بختها

الكل فرحان ومبسوط الا ليلي خوف مبهم ماليها ومالوش سبب

اخيراً ادهم نزل يقابل ضيوفه وسلم علي الكل

لقاهم بيكلموه بطريقه رسميه قوي وبينادولو بالباشمهندس مش ادهم زي الاول

ادهم: ايه ده بقي؟ لا انا اسمي ادهم وزي ما انا مفيش حاجه اتغيرت فلو سمحتم ما تحسسونيش اني بقيت غريب كده

ام امل: ولا غريب ولا حاجه بس المقامات محفوظه

ادهم: مقامات ايه وكلام فاضي ايه؟ لا انا ادهم زي ما انا والا هعتبر انكم معتبرني غريب

عم فتحي: لا يا ابني ما غريب الا الشيطان

ادهم: يبقي خلاص

فضل يتكلم معاهم هو وابوه وكل الحواجز اترفعت والكل حاسس بانهم عيله مع بعضها

ريهام اختفت شويه ورجعت

ريهام: العشا جاهز اتفضلوا

ادهم بيبص لامه وهو مستغرب وعايز يفهم ايه اللي في دماغهابالظبط وبتخطط لايه

ادهم: طيب يالا اتفضلوا نتعشي مع بعض

عم فتحي: لا معلش يا ابني اتفضلوا انتو واحنا نتكل علي الله

علي: لا والله ما ينفع انت مش عايز يبقي عيش وملح بينا ولا ايه؟

عم فتحي: خلوها مره تانيه الباشمهندس تعبان وخارج من المستشفي والمفروض يكون في سريره مرتاح

ادهم: لا يا عم انا كده مرتاح

نتعشي مع بعض الاول وبعدها ربنا يسهل

ريهام: لازم تتعشوا الاول ولا ايه؟ وبعدين يا عم فتحي انا سمعت انك طباخ صح؟ لازم تدوق اكلنا احنا ولا انت اكلك احسن ولو اكلك احسن يبقي انت تعملنا الاكل بعد كده ولا ايه؟

ادهم بص لامه وما اتكلمش

عم فتحي: حضرتك بس تشاوري يا هانم

ادهم: يالا نتعشي يا جماعه لان انا واقع من الجوع وصراحه اكل المستشفي لا يؤكل

عم فتحي: حمدلله علي سلامتك وربنا يكفيك شرها وشر اكلها قوم انت بس بالسلامه لينا وكل اللي انت عايزه نعملهولك

ادهم: تسلم يا عمي بس ابوس ايدك بلاش شطه

كلهم ضحكوا وخصوصا ليلي اللي افتكرت لما حطتله شطه ساعت الكشري واكل علشان خاطرها

ليلي: مش قد الشطه بتاكلها ليه؟

ادهم: مش بيقولو لاجل الورد

ليلي اتكسفت وسكتت

ادهم: مش قد الكلام ورده بتتكلمي ليه؟

المهم يالا نتعشي

الكل اتعشي وسط جو مليان رغي وحب الا ريهام هتولع لانها معرفتش تبوظ الحكايه بس لسه سلتها مليانه خطط

اتعشوا وبيشربوا القهوة والشاي والعصير كل واحد وطلبه

ريهام استاذنت وسابتهم شويه

ريهام: اتاخرتي ليه مش قولتلك تيجي يالا بسرعه

هنا دخل علي عليها

علي: بتكلمي مين؟ يالا علشان الناس خلاص هيشربوا القهوه ويمشوا

واياك تحاولي تعملي حاجه تاني؟ انتي مش شايفه ابنك مبسوط قد ايه وهو معاها؟

ريهام: ده بس علشان ما طالهاش لو طالها كان رماها

علي: لا طبعا اللي بينهم حب بجد

ريهام: بكره نشوف

علي: ريهام ما تعمليش اي حاجه

ريهام: مش انا اللي هعمل يالا بينا

نزلت وسابته يفكر امال مين اللي هيعمل

يدوب خلصوا شرب القهوه والشاي والباب خبط وداده كريمه فتحت الباب

# بيبي حبيبي الف سلامه عليك نورت بيتك يا جميل #

الكل بص للي داخله دي ولابسه قصير وشكلها استايل جدا واول ما دخلت سلمت علي ادهم بانها حضنته وباسته في خده

وبعدها باست ريهام اللي سلمت عليها بترحاب جامد وكانها عايزه توريهم الفرق

ادهم: اهلا يا دولي خير بقالنا كتير ما حدش شافك

دولي: عادي مشغوله بس اول ما عرفت انك تعبان مقدرتش اتاخر علي الرغم من اني زعلت منك لما كنت بايت عندي وصحيت الصبح ما لقيتكش جنبي

طبعا الكل بص لادهم اللي مكنش عارف يقول ايه بس هو كده فهم لعبة مامته ايه

ادهم: انتي قولتيلي عرفتي منين اني تعبان؟

دولي: سمعت

ادهم: اهم طيب مش اتطمنتي عليا

ريهام: ايه يا ادهم ده اتفضلي دولي حبيبتي البيت بيتك انتي عارفه __ انتي ياما بيتي هنا عندنا ولا ايه؟

دولي: اه طبعا يا طنط والنهارده ان شاءالله هقضي الليله هنا اخلي بالي من ادهم وحضرتك ارتاحي بقي

ريهام: وماله يا حبيبه قلبي

ادهم: ههههه حلو الفيلم اللي بتمثلوه ده

بقي دي لعبتك؟

ريهام: لعبه ايه مش فاهمه؟

ادهم: انك تقولي قدامها ان انا علي علاقه بواحده تانيه

احب اطمنك ان لعبتك مش هتفلح اما انتي يا دولي طالما ما بتحبيش الذوق اتكلم معاكي بقله ذوق

سبق وقلتلك مليون مره قبل كده انا عمري ما حبيتك ابدا ولا هحبك

دولي: امال اللي بينا ده تسميه ايه؟

ادهم: بينا؟؟؟ وهو في بينا وانا مش واخد بالي؟ انتي مجرد واحده بشوفها في نايت كلب اخر الليل ارقص معاها شويه او اقضي وقت مش اكتر

دولي: ترقص معايا شويه؟؟؟ ( بصت حواليها واستنتجت ليلي) انتي بقي ليلي؟؟ مش بطاله!

ادهم: اطلعي بره يا دولي

دولي: ليه خايف احسن اقول لحبيبه قلبك انك كنت بتيجي تنام في حضني اول ما تتخنق منها او تمل

ولا اقولها انك طول وقت دراستك بره كنت بسافرلك اقضي معاك شهر واتنين مع بعض

ادهم: اطلعي بره او هنادي للخدم يطلعوكي بره

دولي: وعلي ايه؟ بس هستناك تجيلي لما تزهق من قطتك الجديده وهترجعلي

ادهم: روحي واحلمي واتغطي كويس علشان البرد

خرجت دولي بس طبعا كلامها عمل مفعوله لانها اول ما مشيت الكل وقف يمشي

ادهم معرفش يتكلم قدام الكل كده ولا عرف يعمل ايه

نظره واحده لليلي كانت كفيله بانها تتطير النوم من عينه لانه عرف انها مش هتسامحه بسهوله ده اذا سامحته اصلا

اما ريهام فكانت مبسوطه باول انتصار ليها

مشيوا واول ما خرجوا

ادهم وعلي وريهام واقفين بيبصولهم وهما بيتحركوا لحد ما اختفوا خالص

ادهم: اتبسطي كده اعتقد صح؟ دي لعبتك انك تعرفيها الماضي بتاعي بالطريقه دي

ريهام: انت بتتكلم عن ايه؟ اه عن دولي؟

دولي اتصلت بيا وعرفت مني انك عملت حادثه ويدوب خرجت اعرف منين بقي انها هتيجي النهارده وبعدين لو اعرف كنت خليتها تيجي بدري اهي كانت ترحمني من التمثيل طول الوقت ده

ادهم: علي العموم براحتك بس ليلي مش هسمح لحد يبعدني عنها مهما يكون التمن

بس انا عايز الفت نظرك لنقطه مهمه

ريهام: اللي هيا ايه؟

ادهم: ان انا ابنك مش عدوك

ريهام: وعلشان انت ابني مش هسيبك تضيع حياتك كده مع واحده ما تستاهلكش

ادهم: واللي تستاهلني دولي؟؟؟

اللي كل يوم بتسهر مع راجل شكل وتنام مع واحد شكل؟؟ هيا دي اللي انتي عايزاها هنا في بيتك زوجه ليا؟؟

ريهام: مش شرط دولي في غيرها كتير محترم

ادهم: ليلي وبس فاهمه؟؟ ليلي

سابهم وطلع حاول يكلم ليلي بس طبعا تليفونها مقفول

اتصل علي تليفون البيت بس قالوله انها نايمه

اول ما ليلي روحت البيت جريت علي اوضتها تعيط

خالد نادي عليها تطلع بره معاهم

اخواتها كلهم متجمعين

خالد: وبعدين انتي ما عندكيش غير العياط؟

ليلي: عايزني اعمل ايه؟

ماجده: تعمل ايه يعني؟ انت شوفت امه عامله ازاي؟ استعوضي ربنا فيه وبكره يرزقك باحسن منه؟ وبعدين ده من توب واحنا من توب

شوفت البت البجحه اللي جايه تبات معاه عيني عيني كده ولا ادب ولا خشي

ناديه: بنات اخر زمن اهو لايقين علي بعض ماهو كان بيبات معاها واكيد مع غيرها

خالد: خلصتو لك وعجن ولا لسه؟

ماجده: خلصنا قول يا سيدي انت

خالد: بصي يا بت يا ليلي اول حاجه انتي بتحبيه؟؟صح ولا؟

ليلي: صح وبعدين؟

خالد: وانتي قبلتي بيه علي وضعه الجديد ورجعتيله صح؟

ليلي: صح بس ده علاقته ايه ب

قاطعها: ليه كل علاقه واحد غني ومليونير وشايفه شكله عامل ازاي وغير كل ده متعلم بره وعاش في امريكا يعني ولا عيب ولا حرام

محمد: وانتي نفسك يا ليلي اشتكيتي منه قبل كده فاكره ولا نسيتي لما زعل منك انك بعيده عنه وساعتها كنتي مستغربه تصرفه

هو طبعه كده واتعود علي كده

ده انا دلوقتي بس عذرته علي تصرفاته دي

ليلي: يعني ايه؟

خالد: يعني هيكون في مليون واحده زي دولي دي هتظهرلك لو فضلتي معاه

ده واحد عنده الموضوع ده عادي مش زينا

ليلي: والمفروض اني ايه اقبل بالوضع ده واحمد ربنا انه اخر الليل يجيلي وتشاركني فيه مليون واحده صح؟

خالد: حماره من يومك محدش قال كده ولا حد يقبل بكده

اللي بقوله انك تحاسبيه اه بس من يوم ما ارتبط بيكي مش قبل كده

اللي قبل كده مش بتاعك

ماضيه بقي ماضي وبعدين هو اكيد هيجيلك اول ما يشد حيله ويقدر يتحرك وهيشرحلك كل ظروفه وهيطلب منك كمان تسامحيه علي اللي فات

انتي بقي حددي هتقبليه بوضعه ده ولا انتي ناويه علي ايه؟

ليلي: وامه؟

خالد: اهو امه دي الواحد نفسه يمسكها يروقها

بس ما علينا مالكيش دعوه بيها سيبي ابنها يتصرف معاها وخليكي بعيد عنها

ليلي: انت هتقول زيه مالكيش دعوه بيها

خالد: طيب اهو كمان قالك _ ايوه هو يتصرف معاها ابن وامه يتخانقوا يتصالحوا مالكيش فيه وهيا مسيرها هتقبلك اول ما تعرف انه مفيش فايده

وعلي فكره اقطع دراعي ان مكنتش هيا اللي كلمت البت دي وقالتلها تيجي وتقول كده قدامك وكل مره هتعمل فيكي حاجه زي كده

وانتي وشطارتك هتسمحيلها تفرق بينكم ولا هتكوني ذكيه وتحافظي علي جوزك

ليلي: جوزي؟

خالد: بكره يبقي ولا ايه؟ فكري كده وعلي مهلك مستعده للحياه الجديده دي ولا نفك منه ونشوف حد علي قدنا؟؟؟ والاهم هو هينفع اصلا نشوف حد غيره ولا خلاص هو اتطبع في القلب ونستحمل علشانه؟؟ فكري وخدي قرارك

بس المهم اوعي تستقلي بنفسك وعلشان هو غني تحسي انك قليله جنبه

هو غني اه بس في حاجات كتيره نقصاه وعايز يكملها بيكي

ليلي: هو ناقصه حاجه!؟ايه اللي ممكن يكون ناقصه او يعوزه ومش لاقيه؟؟

خالد: عايز حب ودفا وبيت واخلاق وواحده تصونه وتحبه هو مش فلوسه

عايز كتير وانتي بس اللي تقدري تكمليه فاهمه يالا تصبحي علي خير وبطلي العياط اللي لا بيقدم ولا بياخر ده

وانتي وهيا هش كل واحده علي بيتها يالا نجوزكم علشان نرتاح منكم ترجعوا بعيالكم واجوازكم هيا ناقصه! كل واحده علي بيتها

ماجده: انا بايته جوزي روح اصلا

ناديه: وانا كمان قولتله يروح هنبات عندك مانع

خالد: باتوا انتو حرين خشوا ناموا فوق بعض تصبحوا علي خير انا هنام بكره اجازه واياك اصحي بدري علي صوت العيال

الصبح اول ما طلع اتفاجؤا بالباب بيخبط

خالد قام من نومه وفتح الباب لقي ادهم في وشه

ادهم: اسف لو جيت بدري ومن غير معاد

خالد: يا فتاح يا عليم ادخل يا عم يعني انت اخر حد توقعت انه ممكن يصحيني بدري ولو حد غيرك صحاني كنت روقته وعملت معاه الجلاشه

ادهم: عملت ايه؟؟ ما علينا مش وقته معلش بقي يعني لو ينفع هما كلمتين مع ليلي

خالد: علي فكره انت مفيش حاجه بينك وبينها لحد دلوقتي

ادهم: عارف بس معلش استحملني ما انت شايف اللي بيحصل اهوه

خالد: شايف بس احنا حته شعبيه وكلام الناس فيها كتير

ادهم: عارف بس هو انا ينفع اقعد الاول انا مش قادر اقف نهائي وانت بتستجوب فيا

خالد: يوووه انا نسيت اصلا انك تعبان معلش اتفضل اقعد

ادهم: متشكر

عم فتحي: صباح الخير يا ابني تعال وهعملك احلي فطار

ادهم: لا معلش مش وقته

عم فتحي: ده هو وقته وبعدين شكلك كنت تعبان جامد امبارح وما نمتش

ادهم: انا فعلا ما نمتش بس مش من التعب

عم فتحي: امال من ايه؟

ادهم: مش بيقولو ما ينام الليل غير مرتاح البال

عم فتحي: وانت ايه اللي تاعب بالك كفاله الشر؟؟

خالد: عمايله السودا

ادهم: ماشي مقبوله منك

خالد: امال لما تدور تعط مع نسوان ده اسمه ايه مش عمايل سودا!!!!

ادهم: اولا انا ما بعطش مع نسوان وثانيا دولي دي كانت ماضي واهي قالت بنفسها ايام دراستي يعني زمان

خالد: عارف بس انا رايي مش مهم المهم اقنع صاحبه الامر

ادهم: طيب ممكن بقي تناديلها ولو ينفع يعني نخرج انا وهيا ساعه؟؟؟

خالد: نعم؟؟؟ تخرجوا!؟؟ اه؟؟؟ انت عارف المثل بتاع سكتناله

ادهم: لا مش عارفه وبعدين فيها ايه؟ انا لازم اتكلم معاها لازم تفهم مني الدنيا ماشيه ازاي

خالد: ماشيه كدهو... خروج لا كفايه بقي كلام الناس

ادهم: ناس ايه؟ انا في البيت اهو قدامكم مش بخرج معاها من وراكم وجاي استاذنكم

خالد: لا معلش اتكلم هنا براحتك

ادهم: لا معلش اللي هتكلم فيه حياتي الخاصه وهيا بس اللي من حقها تسمع

خالد: يبقي تاجل الكلام في حياتك الخاصه لحد ما هيا تبقي جزء من حياتك الخاصة دي

ادهم: معنديش مانع بس هيا اوكي بالنسبه للي حصل امبارح ومفيش مشاكل بالنسبالها؟؟

يبقي خلاص ناجل الكلام لبعدين

هنا ليلي خرجت

ليلي: لا طبعا انا مش اوكي بالنسبة للي حصل امبارح

انت كنت معاها وانت معايا صح؟

هو ده اللي كنت تقصده ساعت ما قولتلي انك كل يوم نايم في حضن واحده؟؟

ادهم:اولا ممكن تهدي شويه؟ وثانيا ينفع ما نتكلمش كده قدام الكل ده مش اسلوب نقاش

ليلي: اه سوري نسيت انت ما بتتكلمش في حياتك الخاصه قدام الناس

بس بتنام مع بنات عيني عينك كده

ادهم: لو هتفضلي تتكلمي كده يبقي بلاش كلام احسن

ليلي: انت بتهددني؟؟؟

ادهم: هو فجأه بقي كلامي مع اي حد تهديد؟؟

امي تقولي انت بتهددني وانتي تقوليلي انت بتهددني وبعدين معاكم؟

عم فتحي: اهدي يا بت انتي دي مش طريقه كلام دي

اطلع انت يا ادهم واستني عند البنزينه وهيا هتجهز وخالد هيجبها وروحو اتكلموا بس ما تاخرهاش وتنزلها برضه بعيد

علشان بس الشارع ما يشوفهاش خارجه داخله معاك ولسه مفيش حاجه بينكم رسمي

خالد: ايه يابا ده؟

عم فتحي: اللي سمعته... ساعات بتبقي عاقل وعقلك يوزن بلد زي امبارح بالليل وساعات بتبقي حمار وعايز رسن زي دلوقتي كده

انتي عايزه تتكلمي معاه اتفضلي البسي

مش عايزاه اصلا قوليله روح ارتاح في بيتك وينساكي اصلا

ليلي: هلبس

دخلت تجهز وادهم قام وقف بالعافيه

ادهم: متشكر يا عم فتحي

خالد: ما تاخرهاش

ادهم: مش هاخرها يا خالد

خرج ادهم وركب عربيته

حسين: طردتك ولا ايه؟ كان لازم تكون واضح معاها وتقولها علي ماضيك المهبب

ادهم: هو انا لحقت اصلا وبعدين انت بتتدخل ليه في اللي مالكش فيه اطلع واستني عند البنزينه اتحرك

حسين: طلعت بس حصل ايه؟

ادهم: انت راجل فضولي بشكل مستفز

حسين: اهو وصلنا البنزينه احنا مستنين ايه؟

ادهم: مالكش دعوه

حسين: مستنين ليلي اكيد وهو في غيرها

ادهم :_____

حسين: طيب كويس انهم وافقوا انها تخرج معاك طيب وهما قبلوا كلامك اصلا؟

ادهم: ____

حسين: ايوه طالما بنتهم هتخرج معاك يبقوا قبلوه

ادهم: ارحمني يا الله

حسين: هيرحمك ان شاءالله بس انت ادعي كتير كده وخليك قريب منه وليلي برضه هتسامحك بس انت قولها علي كل حاجه واوعي تقولها انك كنت بايت عند دولي دي

قولها انه كله كان ماضي

ادهم: ايه رايك تكلمها انت بدالي؟

حسين: معنديش مانع لو تحب فعلا انا

ادهم: اخرس يا عمي حسين اخرس شويه عصبتني ووترتني

اهي ليلي جت اهي انزل افتحلها

نزل حسين وفتح لليلي ودخلت جنب ادهم

ادهم: تحبي تروحي فين؟

ليلي: مش عايزه اروح اماكن هما كلمتين اسمعهم منك وخلاص

ادهم: حسين ودينا اي مكان هادي نعرف نتكلم فيه

حسين وداهم مكان هادي ونزل من العربيه وسابهم

ادهم: هاه عايزه تقولي ايه؟

ليلي: مش انا اللي هقول

ادهم: عايزاني اقول ايه؟ ان انا ليا ماضي وانتهي

ليلي: هو سؤال واحد تجاوبني عليه بصراحه ومن غير كدب ولا لف ولا دوران

ادهم: اسالي وهجاوبك

ليلي: انت شوفت دولي بعد ما عرفتني وقضيت ليله عندها؟؟؟؟

اتنهد ادهم تنهيده طويله

ادهم: ايوه شوفتها فعلا

ليلي: بس خلص الكلام كده بعد اذنك

ويدوب هتفتح باب العربيه فمسكها وشدها

ادهم: لسه الكلام ما خلصش الكلام ما بداش اصلا

اولا دولي دي اعرفها من سنين طويله لكن عمرها ما كانت حبيبتي اه بقضي معاها وقت بس تسليه وعارف ان ده غلط قبل ما تتكلمي بس انا كان وضع طبيعي وحاجة طبيعيه وهيا كمان معارضتش ابدا مع انها عارفه اني ما بحبهاش لاني قولتها صريحه

ليلي: انت شوفتهاونمت معاها بعد ما عرفتني يبقي ما تقولش ماضي

ادهم: مش بالظبط كده اولا انا شوفتها في الفتره اللي اتخانقنا فيها يعني مكناش مع بعض

ليلي: يعني كل ما نتخانق تروح لواحده وتقولي احنا مش مع بعض؟؟؟؟

ادهم: الوضع مختلف ودلوقتي حاجه وقبل كده حاجه؟

ليلي: يعني ايه؟

ادهم: يعني اول ما عرفتك مكنتش اعرف حدود العلاقات ايه ولا كنت مهتم اعرفها وكنت بتعامل معاكي زي اي بنت اه بحبك بس عادي العلاقه ما يبقلهاش حدود اعمل اللي انا عايزه ولما رفضتي اتهمتك ساعتها انك ما بتثقيش فيا مش ده اللي حصل؟

ليلي: انت عايز توصل لايه؟

ادهم: اوصلك ان انااتغيرت ومفاهيمي اتغيرت وعرفت كتير عن عادات وتقاليد هنا وعرفت كتير عن الحرام والحلال

انا اتغيرت لانك انتي حطيتيني علي اول الطريق الصح

اما دولي بقي فدي ساعتها كنت لسه ادهم القديم وبعدين قابلتها وانا سكران مش في وعي وايوه بيت عندها في بيتها بس ما لمستهاش ابدا كنت سكران لدرجه اني اول ما شوفت السرير تقريبا اغمي عليا واول ما فقت الصبح مشيت

ليلي انا من يوم ما عرفتك ما لمستش واحده تانيه ابدا

وانتي لو هتحاسبيني يبقي من يوم ما عرفتك وبس قبل كده انتي مكنتيش موجوده

ليلي: انت ايه اكتر حاجه عملتها غلط؟

ادهم: يعني ايه؟ انا بشرب سجاير وساعات بسكر وبروح كازينوهات يعني حاجات زي كده

ليلي: وانا مش قصدي علي كل ده انا قصدي مع البنات

ادهم: مالهم البنات؟ عمري ما عملت حاجه باسم الحب او خدعت واحده لو ده قصدك

ليلي: مش كده قصدي وصلت لحد ايه معاهم؟

ادهم: مكنش في حد جدي في حياتي ما وصلتش يعني لاي حاجه مع اي واحده

ليلي: يوووه مش قصدي كده

ادهم: وانا مش فاهم انتي بتسالي عن ايه علشان اجاوبك

ليلي: قصدي وصلت لايه؟ يعني بتمسك ايدهم بس؟؟؟ بتبوسهم؟؟؟ بتعمل لحد فين معاهم؟

ادهم: اه قصدك بمارس معاهم الجنس ولا لأ ده سؤالك؟؟؟

ليلي: ايوه ده سؤالي بس مش كلنا عندنا نفس جراتك في الكلام كده

ادهم: وده يفيدك بايه السؤال ده؟

ليلي: عايزه اعرف انا هكون اول واحده في حياتك ولا ايه؟؟؟

ادهم: انتي اول واحده احبها في حياتي

ليلي: مش ده سؤالي جاوبني بصراحة

ادهم: هتفيدك بايه الاجابه؟

ليلي: مش عايزه مفاجآت في حياتي وكل شويه واحده تظهر وتقولي انا كنت مع جوزك قبل كده؟ فلو عملت حاجه زي كده يبقي تقولي عليها انت خليني ابقي مستعده نفسيا لاي حد

ادهم: ليلي ارجوكي بلاش كلام كتير في الماضي

الماضي بتاعي كان مشين ومهين وعملت كل حاجه غلط وحرام فارجوكي خلينا نقفل الشابتر ده من حياتي ونبدا شابتر جديد نظيف

ليلي: طيب جاوبني علشان نقفله

ادهم: اه يا ليلي كنت مع بنات قبل كده وكتير واغلبيتهم ان مكنش كلهم اجانب

ليلي: مكنتش اعرف ان دولي اجنبيه!!!

ادهم: انا قلت اغلبهم دولي واحده من البنات المصريه عايزه تعرفي ايه تاني؟ واوعي تقوليلي كام واحده

ليلي دمعه نزلت منها علي خدها وما ردتش

وهو كمان سكت لان معندوش كلام يقوله

ليلي: كان نفسي اكون اول واحده في حياتك واول فرحه

ادهم مسح دموعها: انتي فعلا كده! ليلي انتي اول واحده قلبي يدق علشانها واول واحده اتمنيتها واول واحده هموت والمسها

كل حاجه معاكي تعتبر تجربه جديده ليا

انتي اول واحده هلمسها وهيا مراتي

انتي اول واحده هلمسها واكون انا اول راجل في حياتها

انتي اول واحده المسها وانا بدوب فيها وبعشقها

انتي اول حقيقه واضحه وثابته في حياتي

كل ده مش كفايا؟؟؟

ليلي: توعدني اني هبقي الاخيره في حياتك ما تبصش ولا تلمس واحده غيري؟؟؟

ادهم: اوعدك طبعا

ليلي: لو مت بس من حقك

حط ايده علي شفايفها

ادهم: ولا حتي الموت هيفرق بينا انا ليكي انتي وبس

انا حبيبك انتي وبس ولا في غيرك ولا هيبقي في غيرك

وارجوكي بقي انا اترهنت مع امي انها مش هتعرف تفرق بينا اوعي تخلينا اخسر الرهان

ليلي: مش هتخسره ومحدش هيفرق بينا ابدا ابدا

حطت راسها علي صدره وهو ضمها براحه

ادهم: ضلوعي هاه خلي بالك

ليلي: طيب انا غلطانالك

ويدوب هتبعد

ادهم: حقك علي قلبي بس خليكي قريبه

ريهام اتجننت لما عرفت ان خطتها فشلت برضه لكن مش هتستسلم

ادهم اتحسن واخد ابوه وراحو طلبو ايد ليلي رسمي ولبسوا دبل كمان

اخدها هيا واخواتها واهلها واشترالها احلي شبكه في الدنيا دهب زي ما اخواتها اختاروا

والماس علشان يليق بحبيبته

وطبعا كل واحده من اخواتها وصحباتها هداهم بهديه دهب معتبره جننت الكل

عملها حفله خطوبه بالنسبالها كانت وهم

الحفله كانت في الشارع بتاعهم بناءا علي طلبها بس ادهم علشان خاطرها حول الشارع لاحلي مليون مره من اجمل قاعه افراح

الانوار اتعلقت الشارع اتفرش كله الورد بقي في كل مكان احسن فرق للدجي كانت موجوده واتعمل احلي ليله ليهم

ادهم عزم الناس اللي بيحبوه وبس في شغله او معارفهم وليلي كل اللي يعرفها واللي ما يعرفهاش من الشارع كان موجود اصلا اي حد بيعدي بيقف يتفرج وليلي كانت لابسه فستان مخليها اميره ( صوره الفستان علي الغلاف)

اتعملت ليله الكل بيحكي بيها

كلها ضحك ورقص وفرح واتمني ادهم انه ياخد ليلي ويمشي

اخر الليل قبل ما يمشي كانوا لوحدهم

ادهم: هو يجري ايه لو طلعت قولت لابوكي اني عايز اخدك معايا وتبقي مراتي بجد؟

ليلي: ولا اي حاجه جرب كده

ادهم سابها وخارج فعلا شدته من ايده

ليلي: تعال هنا يا مجنون انت رايح فين؟

ادهم: مش قولتي روح قول لابويا!؟ فاكراني هخاف يعني ولا هتكسف؟؟؟

ليلي: لا ده ولا ده مجنون وتعملها

ادهم: مش كنا عملنا الفرح بالمره ده ايه الغتاته دي لازمته ايه الانتظار يعني؟؟

ليلي: معلش كل حاجه بأوان اصبر

ادهم: والل مش قادر يصبر يعمل ايه بقي؟

ليلي: يعني ده هو شهر مش كتير

ادهم: مش كتير؟؟؟ انتي بتستعبطي صح؟؟ كل ساعه بتعدي وانتي بعيد بيوم يعني اليوم بالنسبالي 24 يوم الشهر هيبقي قد ايه بقي

ليلي: ايه ده كله براحه

ادهم مره واحده شدها عليه جامد وهيا كانت هتقع فسندت عليه

ادهم: انتي بعيد علي طول ليه؟ يعني اغلطي وقربي مره

ليلي حطت ايديها حوالين رقبته وضمته ليها للحظات سندت راسها علي صدره

ليلي: واغلط ليه؟ انت بقيت ملكي وانا ملكي

مشيت نص المسافه فاضل نص كمان

ادهم: طيب النص ده مفيهوش اي تسهيلات؟؟

ليلي ضحكت بطريقه ناعمه وقربت اكتر ووقفت علي طراطيف صوابعها وباسته في خده

ادهم اندهش من تصرفها بس ابتسم وكان عايز يضحك

ليلي: مالك في ايه؟

ادهم: لا مفيش

ليلي: لا بجد في ايه؟

ادهم: اصل انتي حسستيني ان انا اخوكي لما بوستيني كده يا حبيبه قلبي العشاق ما بيبوسوش كده

ليلي: ده اخرك عاجبك ولا مش عاجبك؟؟؟

ادهم: عاجبني هو انا اقدر اتكلم

طيب اردهالك انا بقي وبنفس طريقتك

قرب منها قوي وهيا خافت للحظه انه يلمس شفايفها بس هو مسك دقنها ودور وشها بحيث خدها هو اللي في وشه وقرب قوي منها لمس خدها بخده نفسه في رقبتها جننها قربه منها بالشكل ده عايزه تصرخ وتقوله خلص بس انفاسها مقطوعة

لمس بنعومه خدها وطبع بوسه رقيقه علي خدها وبعد

الاتنين بصوا لبعض بنظره مليانه شوق ولهفه

ونفاذ صبر

ادهم كان عايز اكتر وفعلا قرب منها جامد يلمس شفايفها ويدوب لمسها فهيا بعدت لحظه وحطت ايدها علي شفايفه بحيث تبقي فاصل بينهم وباست ايدها كانها بتبوسه هو

هو مسك ايدها وباسها

ادهم: حاضر هاصبر

رجع لورا خطوه وعمل صوت يدل علي نفاذ صبره وبصوت عالي شويه

ادهم: يا صبر ايوب تعالي نطلع بره مش قادر اقعد معاكي لوحدنا وافضل بعيد يالا يا بنتي يالا

ضحكت هيا برقه ومسكت ايده وخرجوا بره

شرين: انتو جيتو ليه؟

هبه: تلاقيهم اتخانقوا

ادهم: بس بس انتي وهيا وبطلوا افتراضات كتير كده

ليلي: وحشتونا جينا نقعد معاكم

ادهم: فعلا وحشتونا!!!! وحشتونا لدرجه مش عارف صراحه اقولكم ايه؟

اتقلبت القعده هزار وضحك واتفاجئ ادهم ان الوقت اتاخر جدا

فقام واستاذن واخد ابوه اللي كان مندمج مع الرجاله في الشارع وروحوا علي البيت

اول ما الكل مشي اتلم البنات حوالين ليلي

هبه: عملتو ايه؟

شرين: بالتفصيل الممل لو سمحتو

وفاء: انتو خرجتو ليه؟

ليلي: وانتو مالكم ايش حشرركم

هبه: ايش حشررنا؟؟؟ هيا من اولها ايش حشررنا ماشي؟؟؟

ليلي: لا لا ابدا معملناش حاجه كان عايز يقول لبابا ياخدني علي البيت معاه وفضلنا نهزر حبتين وبوسه علي الطاير

هبه: باسك بجد؟؟

شرين: طعمها ايه هاه حلوه؟؟؟

وفاء: طويله ولا ايه

ليلي: يخربيت اسئلتكم انتو بنلت سفله اصلا

لاطبعا مش اللي في بالكم ده خالص بوسه في خدي عادي كده يعني وبعدين دي مجرد خطوبه مش جواز مش هيبوسني غير لما ابقي في بيته

البنات قاموا وقفوا

هبه: نقوم ننام طالما طلعت في الخد

البنات سابوها ومشيوا وهيا فضلت هيمانه في حبيبها

ادهم رجع بيته مبسوط واول ما دخل

""" اخيرا سيادتك شرفت؟؟ مستنيك من بدري؟ والله ليك وحشه عامل ايه؟ سمعت اشاعه عنك كده وجننتني فجيت اتطمن منك انها غلط """

ادهم بص للزائر بصه حذر وترقب وهو وابوه بصوا لبعض ولامه بصه لحد امتي هتفضلي كده

ادهم دخل من بره مبسوط واول ما دخل لقي حد في انتظاره

( اخيرا شرفت انا في انتظارك من بدري

سمعت اشاعه كده جننتني وقولت اجي اطمن منك انها غلط)

ادهم بص لامه واتنهد

( ايه مش هتسلم عليا ولا ايه)

ادهم: اهلا بالخطاب الكبير!! عاش من شافك مش بتقولوها كده برضه؟؟؟!

سليم : لا اتقدمت كتير وبقيت بتتكلم عربي كويس اهو

ادهم: اكيد طبعا بقالي تقريبا سنتين اهو هنا

المهم خير؟؟

سليم : خير؟؟؟ انا جدك اجي في الوقت اللي يعجبني ولا ايه؟

ادهم: جدي!!! اه؟؟ طيب اهلا بيك بعد اذنكم انا طالع ارتاح شويه

سليم: استني هنا قولت عايز اتكلم معاك شويه

ادهم: اجلها للصبح دلوقتي تعبان

سليم: لا الموضوع ما يتجالش اقعد

ادهم قعد قصاده: خير اتفضل

سليم: خير بس انا كنت جايبلك عروسه حفيده واحد صاحبي جدا و

قاطعه ادهم: مع احترامي لحضرتك ولصاحبك بس انا مش محتاج عروسه

انا اعرف انقي لنفسي كويس

سليم: بتعرف تنقي؟ قولتلي!! وعلشان كده منقي واحده جايبها من الشارع وعايز تتجوزها؟؟؟ هيا دي تنقيتك؟؟؟

ادهم: انا مش جايب واحده من الشارع

انا حبيت بنت محترمه ومن بيت محترم

سليم: اه بيت محترم!!!! ابوها طباخ في كل بيت شويه واخوها الكبير بلطجي وسواق

ده غير المنطقة البيئه اللي ساكنه فيها

دي تربيه شوراع ما تلقيش بينا

ادهم: عجباني ودي خلاصه الكلام

سليم: يعني ايه عجباك؟؟

ادهم: ملهاش كذا معني

وبعدين ده شيئ ما يخصكش اصلا فلو سمحت ما تتدخلش في شيئ ما يخصكش

سليم: يعني ايه ما يخصنيش!؟ انا جدك وانا كبير العيله دي وانا المسؤل عنها ولا علشان سبتكم انت وابوك تديروا الشركات يبقي خلاص

لا فوق وشوف انت بتكلم مين؟

ادهم: بكلم مين؟

سليم: انا قبل كل شيئ جدك

ادهم: جدي؟؟؟ بعد ما بقي عمري 30 سنه جاي تقول جدي؟؟

انت يدوب واحد اعرفه شكلا مش اكتر

وما تطمعش في اكتر من كده

ورايك احتفظ بيه لنفسك

ريهام اتدخلت: عيب كده يا ادهم ما تكلمش جدك كده

ادهم: هيا دي خطتك التانيه؟؟؟ بس احب اقولك انه ما يعنيليش اي شيئ قال جدي قال؟

شوفو انتو الاتنين خلال شهر هتجوز ليلي ومفيش قوه علي الارض هتمنع الفرح ده فريحوا نفسكم

سابهم و ابوه دخل بعد ما ابنه طلع

علي: ايه ناويين علي ايه؟

ايه يا سليم باشا؟ مش مكفيك حياتي اللي ضيعتها مني جاي تضيع حياه ابني؟؟

سليم: الظاهر اني غلطت لما احترمت رغبتك وسيبتك تربي ابنك بعيد عني!! كان لازم اربيه انا

على: تربيه انت؟؟؟ ابني متربي احسن تربيه

متعلم احسن تعليم

من اذكي الناس في شغله وفي حياته

سليم: ولما هو ذكي جايب واحده اي كلام ليه يتجوزها ولا من شابه اباه

على: القلب وما يريد

ابعد عن ابني ومالكش دعوه بيه

انا غلطت لما سيبتك تمشي كلامك عليا بس مش هسمحلك تبعد ابني عن حبيبته فاهم؟

سليم: انا انقذتك من ورطه كنت هتعيش فيها ده جذاتي وحفيدي انا هتصرف معاه ومش هسمحله علي اخر الزمن يدخل عيلتنا واحده زي دي

على: مش هتقدر تعمل حاجه ادهم غيري

سليم: هتشوف

تاني يوم ادهم نزل شغله هو وابوه

اما الجد ففضل في البيت مع ريهام

سليم: اتصلي يا ريهام بالبنت دي وخليها تيجي او ابعتيلها السواق يجيبها

ريهام: حاضر بس هتعمل ايه؟

سليم: هحاول ابعدها هاتيلي البنت دي

ريهام طلعت بس ملقتش غير حسين والسواق بتاعها مع جوزها وحسين ولاؤه لادهم بس مضطره

بعتته يروح لليلي ويجيبها

حسين: خلاص هتصل بالباشمهندس وابلغه واجيبها

ريهام: لا انا عايزه افاجؤه وبعدين عايزه اقرب منها واحنا لوحدنا عايزه اشوف ابني بيحبها ليه؟

محتاجه احبها علشان ادهم ولا ايه؟

حسين: اه طبعا يا افندم

ريهام: طيب روح وما تتاخرش

مشي حسين وراح لليلي وطول الطريق بيحاول يتصل بادهم بس موبيله مقفول وفي مكتبه محدش بيرد

عدي عليه بس مالقهوش في الشركه خالص ولا هو ولا علي

في الاخر اضطر يروح لليلي واول ما قالها خافت تروح من غير ادهم بس اخواتها قال لها انها فرصه تحاول تكسب حماتها وتوريها قد ايه هيا بتحب ادهم وتلطف الاجواء شويه

راحت ليلي وقبل ما تدخل

حسين: خلي بالك يا بنتي هما ممكن يحاولو يبعدوكي عن ادهم

ليلي: بس انت قلت

قاطعها: انا بنصحك بس مش مصدق كلامها هيا اختارت وقت عارفه اني مش هعرف اوصل لادهم او ابوه الله اعلم هما راحو فين؟

ممكن يكون مدبرين اي حاجه ليكي

ليلي: انت بتخوفني كده يعني اعمل ايه؟

حسين: تكوني واثقه من حب ادهم ليكي وما تسمحيش لحد يبعدك عنه مهما يكون الحد ده

واوعي تسمعي منهم انك مش مناسبه ولا انك فقيره ولا ان ادهم هيزهق منك مثلا

مهما يقولو خليكي واثقه في ادهم وفي نفسك

ادهم سعادته معاكي انتي وبس ده اهم حاجه مهما يحاولو يقنعوكي بالعكس. فهمتي؟

ليلي: ربنا يستر

دخلت ليلي واستقبلتها ريهام ودخلتها عند سليم اللي ليلي خافت منه اول ما شافته

فضلو يتكلمو كلام كتير وليلي واقفه وبيحاولو يرهبوها قبل ما يوجهولها اي كلام

سليم: اه انتي بقي اللي واكله دماغ حفيدي؟

ليلي: انا مش واكله دماغ حد

سليم: امال ايه بيحبك ليه ومتشعبط فيكي كده؟ عملاله عمل مثلا؟؟

ليلي: لا طبعا انا وادهم بنحب بعض

سليم: انتي بتحبيه؟

ليلي: طبعا بحبه

سليم: بتحبي فلوسه؟ مستواه؟ المركز اللي هينقلك فيه؟ لكن بتحبيه هو؟؟؟ ما اعتقدش

ليلي: انا يوم ما حبيت ادهم مكنتش اعرف انه غني اصلا ولا مركز ولا مستوي كنت فكراه انسان عادي

سليم: اه سمعت بالفيلم ده بس مش مصدقه

ادهم صوره واسمه في مجلات كتير

ما تقنعينيش انك مكنتيش تعرفي

انت بس بتمثلي كويس

ليلي: حبي لادهم حقيقة مش تمثيل حضرتك غلطان

سليم: لا طبعا مش غلطان

ريهام: انتي بتحبيه بجد؟؟

ليلي: طبعا بحبه بجد

ريهام: طيب اثبتي حبك ده

ليلي: اثبته ازاي؟؟

قلقت ليلي وخافت منهم وندمت انها جت من غير ما ادهم يكون موجود

ريهام: اثبتي حبك واتاكدي من حب ادهم ليكي

ليلي: انا بحب ادهم وواثقه من حبه هو كمان

سليم: امال خايفه كده ليه ووشك اتخطف؟؟

ليلي: انتو بتشككوا في حبي ليه وحبه ليا

انا والله بحبه من كل قلبي

ريهام: طيب هصدقك بس انتي ليه رفضتي انه يلمس شعره منك؟؟؟ بتجننيه وبس وبتعليقه بيكي

خايفه انه لو لمسك ما يتجوزكيش صح؟

ليلي: لا طبعا انا رفضت ادهم يلمسني لاني ده حرام ولاني اتربيت علي ده مش علشان اجننه وبعدين ادهم هو بنفسه اللي قالي انه مش عايز يلمسني غير بعد ما يتجوزني

ريهام: ده كلام لكن انتي عارفه انه لو لمسك مش هيتجوزك لان خلاص مفيش حاجه فاضله يتجوزك علشانها

ليلي بدمعه بدات تنزل: لا ادهم بيحبني

سليم: ايه الميزات اللي انتي شايفاها في نفسك علشان يحبك؟؟؟

انتي بنت عاديه بنت طباخ

جمالك عادي وفي مليون واحده جميله

معندكيش ولا مركز ولا نسب ولا اي شيئ

ذكائك عادي وتعليمك اقل من العادي

ايه فيكي مميز؟؟؟ بتحبيه؟؟ في مليون غيرك بيحبوه واحسن منك مليون مره؟؟

هاه ردي

ليلي: معرفش بس هو بيحبني

ريهام: شرط اساسي في الجواز التكافئ

قوليلي حاجه واحده انتي متكافئة فيها مع ادهم

مستواه؟ مركزه؟ تعليمه؟ شغله؟ اهتماماته؟ هواياته؟ اصحابه؟

ايه اللي بينكم مشترك؟

سليم: العلاقه دي لازم تنتهي

ليلي: لأ _لأ _ انا بحب ادهم وهو بيحبني

سليم: يكفيكي كام؟؟

سكتت فجاه من العياط وبصتله باستغراب

ليلي: افندم؟

سليم: اللي سمعتيه تاخدي كام وتسيبيه؟؟؟

ليلي: ولا ملايين الدنيا تساوي ضفره حتي

ريهام: سيبك من الكلام اللي لا يودي ولا يجيب

تاخدي كام وتسيبيه؟؟؟ كل انسان ليه ثمن المهم تعرفي ثمنه كام؟

_______________

ليلي: انا اسفه بس انا مضطره امشي بعد اذنكم

ويدوب لفت وشها وهتمشي

سليم: طبعا سيادتك ما تعرفيش حاجه عن الذوق او اداب المعامله بدليل اهو ان احنا لسه مخلصناش كلامنا وحضرتك ماشيه!!!

ليلي: انا ماشيه لان معنديش كلام اقوله

حبي لادهم مش للبيع اسفه

سليم: مليون جنيه؟؟ مبلغ ما تحلميش انتي وعيلتك كلها تملكيه هاه؟

تعلمي اخواتك وو تتجوزوا وتريحي ابوك من الطبخ في البيوت وتجيبي لاخوكي عربيته الخاصه بدل السواقه

ايه رايك فكري بعقلك؟ حتي لو اتجوزتي ادهم مش هتملكي مبلغ زي ده لانه طبعا مش هيصرف علي اخواتك لكن لما تاخدي المبلغ ده عيلتك كلها هتستفاد

ليلي: عيلتي مش محتاجه فلوس وكل واحد فينا قنوع وراضي بحياته اما انا لا عمري اتمنيت املك مبلغ زي ده ولا عيزاه اصلا

اتمني تكونو خلصتو كلامكم؟؟

سليم كتب الشيك برضه وعطاهولها

سليم: اتفضلي واياك تعملي زي الافلام وتقطعيه... خديه وفكري وتشاوري مع عيلتك ومعاكي لحد بكره فكري

ليلي ؛ انا مش محتاجه افكر ولا محتجاه

ريهام اخدت الشيك وحطته لليلي في شنطتها

ريهام: حاجه كمان

ليلي: ايه تاني؟؟؟

ريهام: لو واثقه في حب ادهم وفي حبك سلميله نفسك ونشوف هيفضل معاكي ولا لأ؟

ليلي: انا اسفه ده مش هقدر اعمله

ريهام: لو بيحبك وبتحبيه مش هتخسري حاجه بالعكس هتتبسطي معاه! ولو ما بيحبكيش برضه مش هتخسري حاجه!

ليلي: سواء بيحبني او ما بيحبنيش هخسر احترامي لنفسي واخسر ديني واخون مبادئ اتربيت عليها

ريهام: ما قلتلك سيبك من كلام الشعارات ده

لو ادهم بيحبك فعلا هيكمل معاكي لانه ما يفرقش معاه قوي موضوع العذريه اللي انتي مهتمه بيه قوي

اما لو ما بيحبكيش وقرر ينفصل عنك فساعتها الشيك اللي معاكي ده ملكك وغير اني هاخدك بنفسي لاكبر دكتور في مصر وهرجعك بنت تاني وبكده ما خسرتيش اي حاجه

ليلي: انتي بتتكلمي في ايه؟؟؟ انا اسفه انا ولا عايزه فلوس ولا عايزه اتجوزه اصلا باتهاماتكم دي كلها انا اسفه

سابتهم المره دي وطلعت تجري وتعيط

اول ما خرجت شافها حسين وجري وراها

حسين: ليلي يا بنتي استني،،،، استني ____ طيب انا هوصلك تعالي

ليلي: اسفه بس مش عايزه بعد اذنك

سابته وجريت علي بره وهيا دموعها سابقاها

ريهام: هاه يا حمايا العزيز تفتكر هتقبل؟؟

سليم: لا طبعا ما اعتقدش بس ممكن تسيبه لانها هتشوف نفسها قد ايه صغيره وما تلقيش بيه وبعدين انتي قلقانه ليه؟ ادهم علي طول مع بنات

ريهام: لا المره دي مختلفه والبنت مختلفه دي بيحبها بجد

سليم: حب ايه وكلام فاضي ايه

بكره هيسمع كلامنا ويرضخ زي ابوه ولا نسيتي واهو اتجوزك وكمل معاكي وخلفتو اهوه وكله بيتنسي

اخر النهار ادهم وابوه راجعين من بره ويدوب ادهم ركن العربيه ونزل هو وابوه

حسين شافهم جري عليهم

ادهم: خير جاي تجري ليه؟

حسين: انت فين من الصبح؟ وما بتردش علي تليفونك ليه؟

ادهم بص لابوه وضحكوا الاتنين

ادهم: انت عامل زي الزوجه النكديه وانت مالك انا كنت فين ولا قافل تليفوني ليه؟؟

حسين: طيب انا زوجه نكديه؟ الزوجه بتسال جوزها كان فين لانه اتاخر عليها وبتسال من باب الحب وبعدين لان انت مردتش عليا شكلك مش هيكون عندك زوجه اصلا ومش هيفضلك غيري اسالك كنت فين ورحت فين؟؟

ادهم انتبه وبص لابوه

ادهم: قصدك ايه مش هيبقي عندي زوجه؟؟؟

حسين: كان لازم ترد عليا

علي: ليلي مالها في ايه اللي حصل؟ وقعت قلبنا اتكلم

ادهم قلب بيدق بسرعه من الخوف علي حبيبته

حسين: لا مش كده ليلي سليمه محصلهاش حاجه

ادهم: امال انت بتلعب باعصابي ليه؟

مسك التليفون ويدوب هيتصل

حسين: ما تتصلش بيها روحلها

ادهم: في ايه اللي حصل؟

حسين: اللي حصل ان الهانم طلبت مني اجيبلها ليلي

ادهم: وطبعا سيادتك روحت وجبتها صح؟

حسين: قالتلي عايزه اقرب منها واحاول احبها زي ادهم واهي فرصه نقضي وقت مع بعض

ادهم: وانت صدقتها؟؟؟

حسين: لا مصدقتهاش طبعا بس هعمل ايه يعني؟

ادهم: وبعدين ايه اللي حصل؟

حسين: جبتها وفضلت احذر فيها انها ما تهتمش بكلامهم

ادهم: حسين انجز ايه اللي حصل؟

حسين: معرفش انا ايه اللي حصل

كل اللي اعرفه انها خرجت من عندهم منهاره ورفضت حتي تخليني اوصلها او اكلمها

ادهم: عندهم؟؟؟ مش قلت ماما بس مين بقي عندهم؟

حسين: جدك

ادهم: ربنا يسامحك

حسين: انا برضه؟ المفروض كنت اعمل ايه يعني اقولها لا مش هجيبها!!!

ادهم: ايوه تقولها اني قلتلك لا

تقول اي حاجه مش تسلمهالهم

على: مش وقته يا ادهم روحلها دلوقتي حسين مكنش في ايده حاجه يعملها روحلها وابقي طمني عليها

علي اول ما دخل لقي مراته وابوه قاعدين بيتكلمو مع بعض

علي: بتخططوا لايه تاني؟ مش هتعرفوا تبعدوهم عن بعض

سليم: كله بيرضخ في الاخر

على: ادهم غيري __ ربيته انه ما يرضخ ابدا ولا يتنازل عن حقه ابدا

سليم: حق ايه وزفت ايه؟ البنت دي مش مناسبه ودي نهايه الكلام

علي: البنت دي حبيبته ودي نهايه الكلام

وانت كجد كان المفروض تاخده في حضنك هو وحبيبته مش تحاول تفرق بينهم

سليم: لما يختار واحده تليق ابقي اخدهم في حضني

على: سبق وخسرتني قبل كده ودلوقتي بتخسر حفيدك كمان

بعد اذنكم

_______________

راح ادهم لليلي واول ما خبط وفتحوله

ماجده فتحتله لقي ليلي وناديه وماجده كمان كلهم عنيهم منفخه من العياط

وعم فتحي قاعد في الارض قدام باب اوضته وباين عليه الحزن وكسره النفس

ادهم: في ايه؟ ايه اللي حصل؟

عم فتحي: ادخل يا ابني

ادهم دخل وعم فتحي وقف وسلمه كيس

ادهم: ايه ده؟

عم فتحي: دي شبكتك وهداياك وايه حاجه جبتها اتفضلهم

ادهم: انت بتهزر صح؟ ليلي في ايه؟

عم فتحي: مالكش دعوه بيها وكلمني انا

احنا ناس بسيطه وغلابه واه فقره بس اغنيه باخلاقنا ومبادئنا

ادهم: انت بتقولي الكلام ده ليه؟ انا عارفه كويس

عم فتحي: لان علشان احنا غلابه يبقي نتهزا ونسكت مش هنعرف نرد وهنرد بايه وكل الكلام صح

انت في وادي واحنا في وادي

معلش يا ابني سيبنا في حالنا

ادهم: انت بتتكلم في ايه؟ ايه اللي حصل لكل ده؟ وبعدين لو حد غلط فيكو انا هرد وانا هجيبلكم حقكم وانا مش هسمح اصلا لحد يغلط فيكم

عم فتحي: هترد علي والدتك وتوقفها؟؟

ادهم: هعرف اتعامل معاها

ممكن لو سمحت اتكلم مع ليلي!!! ممكن انا وهيا نحل مشاكلنا بنفسنا

عم فتحي: مشاكلكم؟؟ دي مش مشاكل دي

ادهم: لو سمحت ممكن نتكلم انا وهيا؟

عم فتحي: اتكلم بس قرار فسخ الخطوبه ده قرارها هيا مش انا علشان تبقي عارف

ادهم: ماشي

راح ادهم وشد ليلي من الارض

ادهم: قومي معايا

ليلي: انا مش عايزه اتكلم ارجوك سيبني

ادهم: لا مش هسيبك _____ مش هسيبك يا ليلي ولا النهارده ولا بكره ولا في اي يوم قومي

شدها من ايدها وسحبها معاه

ليلي: يا ادهم سيبني ارجوك سيبني

هيا بتتكلم وهو بيشدها وخرجها بره

ليلي: يوووه يا ادهم سيبني استني

ادهم: استني ايه؟

ليلي.: انا حافيه

ادهم: مش مهم اتفضلي

شدها وركبها العربيه وطلع بيها ساق لحد ما وصل مكان هادي علي الكورنيش فطفي العربيه وبصلها

ادهم: ممكن بقي تبطلي عياط وتقوليلي ايه اللي حصل؟

ليلي زودت عياطها

ادهم: انا بقول بطلي عياط مش زودي العياط

ليلي مش عارفه اصلا تسكت حاولت تتكلم بس ما عرفتش من كتر العياط

ادهم: طيب بس بس هششششش اسكتي ما تقوليش حاجه اهدي الاول

ضمها لصدره وهيا خبت وشها وفضلت تعيط كتير قوي وهو ضاممها وساكت وبيحاول يهديها

قلبه كان بيوجعه علي عياطها ده وعجزه هو انه يعمل حاجه

اخيرا بدات تهدي شويه شويه

رفعت راسها وبصتله مسح وشها بايديه

وجاب مناديل وكمل مسح وشها المبلول

اخدت المناديل منه وكملت هيا

ادهم: علي فكره انتي بليتي القميص

ليلي ضحكت وهو كمان

ادهم: اخيرا ضحكتي

ليلي سكتت ودموعها لمعت في عنيها

ادهم: علشان خاطري ما تعيطيش تاني قلبي وجعني كفايه بقي علشان خاطري

بيكلمها وهو بيشيل شعرها من علي وشها

بيتكلم بمنتهي الرقه معاها

ادهم: بقي عايزه تسيبيني يا ليلي؟؟ هنت عليكي انا؟؟ ايه مش بتحبيني كفايه؟

ليلي: انا بحبك والله بحبك

ادهم: من غير حلفان طيب

ليلي: ما هو انتو كلكم بتشككوا في حبي ده

ادهم: بصي خليني انا لوحدي في كفه والعالم كله في الكفه التانيه

انا بعمل كده ما بحطكيش مع اي حد

ممكن بقي تحكيلي ايه اللي حصل الصبح مع امي وجدي؟؟؟

ومن غير عياط وواحده واحده

ليلي حكت لادهم كل حاجه وهو سامعها وساكت مش بيعلق ولا بيتكلم لحد ما هيا سكتت

ادهم: وعلشان كده عايزه تسيبيني؟؟؟

ليلي: مش عايزه اسيبك بس اعمل ايه؟

ادهم: يعني هما بيعملوا كده علشان يبعدونا عن بعض وانتي عارفه كده وبرضه عايزه تنفذي رغباتهم؟؟؟

ليلي: امال اعمل ايه؟ هما مش عايزيني

ادهم: انا عايزك!!!! والمفروض ان ده اللي يهمك انا وبس ( مسك وشها) انا بحبك مالكيش دعوه بيهم!! انا اللي هتجوزك مش هما وانتي هتعيشي معايا مش معاهم فاهمه؟

وسبق واتفقنا ما نسمحش لحد يدخل بينا بتدخليهم ليه بقي؟

ليلي: دي مامتك مش حد ومش عايزاك تخسرها بسببي

ادهم: اديكي قولتي مامتي!!! مش هخسرها

هيا بتحاول وبتجرب بس في الاخر هترضي بالامر الواقع وهتستسلم المهم انتي بس ما تستسلميش الاول

انتو الاتنين مهمين عندي كفتين الميزان راجحين قصاد بعض وهيا عارفه كده كويس خليكي بقي ناصحه زيها

ليلي: يعني ايه؟

ادهم: يعني هيا عارفه اني بحبها ومهما تعمل اه ممكن ازعل منها بس عمري ما هخسرها وهيا بتلعب علي النقطه دي وبتقول لنفسها مهما تعمل هسامحها

انتي كمان خليكي واثقه من حبي ليكي وواثقه اني عمري ما هخسرك ابدا

نزعل اه لكن ما نسيبش بعض

ليلي: يعني اعمل ايه؟

ادهم : تفضلي جنبي ومالكيش دعوه بيها ومهما تعمل او تقول ما ترديش عليها بس تصدريني انا ليها وانا اللي هعمل اتفقنا؟

ليلي: وجدك؟

ادهم: اهو ده بقي تجاهليه تماما وما تسمعيلوش اصلا سيبك منه خالص

ليلي: انا اول مره اعرف ان عندك جد اصلا

ادهم: لاني ما بعتبروش جد اصلا هو عمره ما كان له اي دور في حياتي فهمتي بقي؟

ليلي: مامتك قالتلي ---------

ادهم: قالتلك ايه؟

ليلي: قالتلي اني يعني -----

ادهم: يعني ايه ما تتكلمي علي طول

بصت للارض ووطت وشها

ليلي: اني لو واثقه في حبنا ااا

ادهم: ااا ايه؟ تعملي ايه؟

ليلي: اسلمك نفسي

ادهم: وبعدين؟

ليلي: لو انت بتحبني هتكمل ولو لأ هتسيبني

ادهم: وبعدين؟

ليلي: وبعدين ايه مفيش بعدين

ادهم: وبعد ما اسيبك ايه اللي يحصل؟ هتستفادي ايه يعني؟

ليلي: ما هيا بقي هتعوضني

ادهم: تعوضك ازاي ان شاءالله؟؟ بفلوس يعني وكده؟

ليلي: بفلوس وترجعني تاني زي ما كنت

ادهم: ترجعك ازاي بقي؟

ليلي: توديني لدكتور يرجعني بنت تاني

ليلي بتتكلم وهيا باصه للارض واول ما قالت كده ادهم ضحك بصوته كله ليلي بتبصله باستغراب لان الموضوع يضايق مش يضحك

ادهم: سوري يا قلبي

بس امي دماغها ضربت خالص

طيب انتي قولتلها ايه؟

ليلي: مقلتلهاش طبعا سبتهم ومشيت

ادهم: طيب وانتي عايزه ايه؟

ليلي: عايزه ايه في ايه؟

ادهم: عايزه تشوفي اذا كنت بحبك ولا لأ؟ ولو لمستك هسيبك ولا لأ؟

ليلي: انت عايز تلمسني؟؟؟

ادهم: نعم يا روحي وده سؤال برضه؟ انا عايزك طول الوقت

ليلي: انت فاهم انا قصدي ايه؟ لو ده الدليل علي حبي يا ادهم انا موافقه اعمله

ادهم: موافقه تسلميلي نفسك؟

ليلي: موافقه اثبت حبي ليك

ادهم قرب منها قوي ومسك وشها وباسها علي راسها بوسه حب وتقدير واحترام

ادهم: عمر ما ده كان دليل حب يا ليلي وانتي فهمتيني ده وعرفتيني ازاي احب بجد

سيبك يا قلبي من كلام كل الناس

وخليكي معايا انا وبس -- انا بحبك وبعشقك وبموت فيكي ومحدش في الدنيا دي يفرق معايا غيرك وبعدين اه عايزك وعايز كل حاجه منك وهاخدها بس لما تلبسي الفستان الابيض واخدك من ايدك واخدك بيتي مش قبل كده اتفقنا يا اغلي ما في قلبي؟

ضمها ليه وهيا لقت الامان بين ايديه

ادهم وصل ليلي بيتهم وقبل ما يروح عطته الشيك بتاع جده

ليلي: ده اعمل بيه ايه؟

ادهم اخده منها: ده انا اللي هعمل بيه مش انتي هاتي

روح بيته لقي جده وامه في انتظاره دخل بيصفر ويدندن وطالع علي اوضته

ريهام: ادهم

قاطعها: هششششش انا راجع مبسوط ومش عايز اتكلم تصبحي علي خير

ريهام: استني

وقف علي السلم واستني

ريهام: هيا سلمتك نفسها ولا ايه؟

ادهم ابتسم: زي ما انتي قولتليها؟؟؟ علي العموم اللي بيني وبينها شيئ ما يخصكيش تصبحي علي خير

سابها وطلع اوضته من غير ما يتكلم معاهم

الصبح طلع وهو نزل فطر معاهم فتليفونه رن

ادهم: صباح الخير يا قمر عامله ايه دلوقتي؟

____________

ادهم: هفطر واكلمك اوك يا قلبي

قفل وكمل فطاره وكلهم مستغربينه حتي ابوه كمان مستغرب من رد فعله لانه كان متخيل انه هيزعق ويتخانق مش اللامبالاه دي

تليفونه رن تاني

ادهم: هاه يا محمود عملت ايه؟

_______________________--

ادهم: طيب تمام كده متشكر يا غالي

ادهم حط الشوكه من ايده وبص لجده

الكل انتبه لانه اخيرا هيتكلم

ادهم: اللي حصل امبارح وعملتوه مش هيتكرر تاني ابدا وليلي هتجوزها بموافقتكم غصب عنكم هتجوزها!! فبلاش بقي حركاتكم النص كم دي لانها بتجيب نتيجه عكسيه

امبارح لما ليلي عيطت وهيا في حضني ورتني قد ايه انا بعشقها واني لا يمكن ابدا اسمح لحد ياذيها او يضايقها فشكرا ليكم لانكم قربتو بينا جامد قوي

الفرح بعد اسبوعين ما تنسوش وانا هبقي ابعتلكم دعوات ان شاءالله

قام ادهم ورجع تاني

ادهم: اه صح متشكر يا سليم باشا علي هديتك الجميله دي مقبوله منك

سليم: هديه ايه؟ انا ما اديتش حد هدايا

ادهم: امال المليون جنيه دول كانوا ايه؟ ( خبط ايده علي راسه بتريقه) اوف سوري نسيت دول كانوا علشان ليلي تسيبني؟!! اممم علي العموم ليلي اديتني الشيك وانا اخدته وبعدين قولت مفيش اكرم من جدي طبعا روحت ايه بقي؟؟ فتحت لمرات حفيدك حساب باسمها في البنك وحطتلها المليون جنيه بتوعك

علشان كده بقولك هديه مقبوله

سليم: انت اتجننت رسمي روح اقفل الحساب ده وهات الفلوس

ادهم: ههههههههه انت عطيته واحنا قبلنا وبعدين ليلي الوحيده اللي تقدر تسحب الفلوس دي

سليم: كمان؟؟ عملتها هيا لوحدها مسؤله عنه انت اكيد مجنون

ادهم: تاني مره ابقي فكر مليون مره قبل ما تلعب معايا لان انا غير

بعد اذنك

ويدوب هيمشي اتفاجئ باللي قدامه

مش هو بس كلهم اتفاجؤا

ادهم: تاني مره ابقي فكر مليون مره قبل ما تلعب معايا لان انا غير

بعد اذنك

ويدوب هيمشي اتفاجئ باللي قدامه

مش هو بس كلهم اتفاجؤا

اتفاجئ بليلي واقفه قصاده في منتهي الشياكه والجمال واول ما شافته

ليلي: وحشتني قلت الحقك قبل ما تفطر نفطر مع بعض ولا ايه؟ اصلا وانت بتكلمني كنت في الطريق لهنا

ادهم مش مستوعب وقفتها قدامه وشكلها بشعرها المفكوك الطويل وجمالها

ليلي: ايه مالك؟ مش مبسوط اني جيت ولا ايه؟

ريهام ردت بسرعه: لو بتفهمي في الاتيكيت كنتي عرفتي انك المفروض تتصلي قبل ما تيجي وخصوصا لو في وقت مش مناسب اصلا للزيارات

ادهم: خلصتي كلامك؟ حد عنده حاجه ممكن يضيفها؟ مفيش كويس

ليلي بيتي هو بيتك تيجيه في الوقت اللي يعجبك ( مسك ايديها وباسها وكل كلمه ببوسه) صبح! ظهر! فجر! اي وقت انا متاح ليكي ال 24 ساعه انتي بس تشاوري اوك

ليلي: اوك هنفطر مع بعض ولا فطرت معاهم؟

ريهام: للاسف فطر معانا

ادهم: تعالي نفطر مع بعض في مكان يفتح النفس شويه لان الجو هنا خنقة حبتين يالا بينا

اخدها ومشي وهما الاتنين هيولعوا وعلي فرحان جدا

علي: ياريت بقي تسيبوهم في حالهم وانتي بصي لابنك قد ايه مبسوط معاها مش كفايه ده؟

ريهام: لا مش كفايه مش علي اخر الزمن هناسب طباخ وبياعه

سليم: ما تقلقيش انا وراه ويورينا هيعمل ايه في المره الجايه

علي: كفايه بقي انتو ما بتزهقوش

انا رايح الشغل وخليكو مع بعض خططوا للخراب

ادهم وليلي قضوا اليوم كله مع بعض ضحك وفسح وتسوق طبعا

اخدها ادهم لافخم الاتيليهات تشتري لبس يليق بمكانتها الجديده. وهو كان بينقيلها بنفسه

فساتين بناطيل بلوزات لبس بيت واتوصي جدا بقمصان النوم اللي ليلي كانت مكسوفه اصلا تبصلهم

اليوم خلص وروحها بيتها وهو كمان روح

ادهم: مساء الخير وتصبحوا علي خير

سليم: مرحتش الشغل النهارده يعني؟

ادهم: كنت مع ليلي عندك مانع؟

سليم: واخبارها ايه؟

ادهم: ويهمك في ايه؟

سليم: ما يهمنيش بس انا لو مكانك مخليهاش تغيب عن عيني

ادهم بعد ما كان طالع السلم نزل تاني لجده

ادهم: قصدك ايه؟ لو هتوصل ان ممكن حد يأذيها فده مش هسكت عليه ابدا

سليم: هتعمل ايه يعني؟ لو مثلا خبطتها عربيه او مثلا اتخطفت او حد اغتصبها مثلا

ادهم: قسما بالله لاقتلك فيها فاهم؟ اوعي تفتكر انه علشان اسمك مكتوب مع اسمي انك جدي بجد لا اوعي تنسي نفسك انت ما تعنيليش اي شيئ خليك فاهم ده كويس

سليم: طيب اهدي اهدي انا كنت بقول مثلا وبعدين انا مش راجل عصابات ولا بلطجي

ادهم: والله حتي البلطجيه وبتوع العصابات بيحترموا بعض وليهم قواعد وقوانين

سليم: طيب اطلع وكلم حبيبتك واسهر معاها طول الليل اطلع

ادهم طلع وهو قلقان وقبل ما يدخل اوضته دخل لابوه

ادهم: ممكن اتكلم معاك شويه؟

علي: طبعا ادخل

ادهم: لا تعال انت علشان نكون لوحدنا

ريهام: ده علي اساس اني خلاص بقيت عدوتك؟؟

ادهم: انت اختارتي انك تقفي قصادي وتحاربيني ده كان اختيارك مش اختياري

ريهام: طيب ما تسيبك منها وتعال لحضني وانا هجوزك احلي واجمل منها مليون مره

ادهم: هو انتي معداش عليكي الحب قبل كده؟ هقولك مثال صغير لو انا وانا صغير حد جالك بعد ما ولدتيني وقالك هاخد ابنك واديكي غيره احلي منه واجمل منه كنتي هتقوليله ايه؟ اه موافقه؟؟

ريهام: ده وضع مختلف انت ابني وحته مني

ادهم: لا مش مختلف الحب واحد زي ما انا حته منك وما ينفعش تبدليني ليلي حته مني وما ينفعش ابدلها يارب اكون وصلتلك احساسي

اخد ابوه وخرج وقعدوا مع بعض

علي: خير في ايه؟

ادهم: لا خير بس عايز اسالك سؤال غريب ولو سمحت جاوبني بصراحه

على: بلاش تفتح الماضي يا ادهم

ادهم: لا لا مش هفتح حاجه في الماضي ده سؤال يخصني

على: طيب قول علي طول

ادهم: هو سليم له في الاعمال الخارجه عن القانون؟

علي: جدك؟؟؟ قصدك ايه بخارجه عن القانون؟

ادهم: قصدي قتل او خطف او بلطجه!!؟؟ امور زي دي يعني

على: بتسال ليه؟

ادهم: ارجوك جاوبني الاول! له ولا مالوش؟

علي: لا معتقدش هو ممكن يبتز حد او يجبر حد لكن بلطجه وقتل وكلام من ده ما اعتقدش بس بتسال ليه؟

ادهم حكاله علي الحوار اللي دار بينهم

على: لا يا ادهم معتقدش انه ممكن يعمل حاجه زي دي بس ده ما يمنعش انه هيفضل يضغط عليكم باي طريقه ممكنه

ما تتوقعش هو ممكن يعمل ايه؟ خلي بالك منه

ادهم: مع احترامي ليكم انتو الاتنين بس سؤال تاني

علي: اسال

ادهم: هو البيت ده بيتك ولا بيته هو

على: لا ده بيتي انا! انا اشتريته بنفسي اول ما انت جيت الدنيا

مكنتش عايز اي شيئ يربطني بجدك فبعدت عنه خالص وجيت هنا واستقليت بشغلي وحياتي

الشركات دي تعبي انا وشقايا انا جدك مالوش حاجه هنا

ادهم: طيب معلش يعني هو ابوك وكل حاجه بس طالما انتو مختلفين هو هنا ليه؟ ما تخليه يروح بيته؟؟

علي: علي الرغم من ذكائك وتعليمك الي ان تربيتك بره اثرت عليك

ادهم: وده ايه علاقته ده؟

علي: هو انا وانت لو اختلفنا او اتخانقنا وانا في بيتك هتطردني وتقولي بره بيتي!!

ادهم: لا طبعا الوضع مختلف انا وانت بنختلف عادي بس مش لدرجه ان اننا نقاطع بعض لكن انت وجدي مش بينكم العلاقه اللي بيني وبينك

على: بس برضه هو ابويا وما ينفعش اطرده

وبعدين انا وهو كنا زي انا وانت كده في يوم من الايام

ادهم: وبعدين ايه اللي حصل؟

علي: نفس اللي بيحصل معاك حب دخل في النص

ادهم: انت حبيت؟ ما تقولش انك حبيت ماما لانه مش باين عليكم الحب

لا اعتقد حبيت واحده تانيه وهو رفضها صح؟ ومن ساعتها انتو اختلفتو

على: ادهم لو سمحت مش عايز اتكلم في الموضوع ده فاقفله لو سمحت وبلاش اسئله كتير تصبح علي خير

علي ساب ابنه ومشي ورجع لذكرياته 30 سنه

############################

منذ 30 عاما

علي راكب عربيته وماشي بيها وفجأه ظهرت واحده بتجري في الشارع ملحقش يتفاداها فخبطها بس خبطه خفيفه

نزل يجري من عربيته ويشوف حصل ايه

علي: انتي كويسه؟ فيكي حاجه؟؟ انتي ازاي تجري كده اصلا في نص الشارع

رفعت البنت وشها وبصتله وهو غرق في عنيها لدرجه انه نسي انه خبطها او انه في الشارع اصلا زي ما يكون حلم

اتكلمت البنت بصوت سحره اكتر واكتر

البنت: انا اسفه بس كنت بجري لانه لازم ألحق حاجه مهمه قوي واتاخرت عليها

عيطت البنت وهو قرب منها مش عارف يسكتها ازاي

على: لا ما تتاسفيش انا اسف اسف بجد ما تعيطيش خلاص

ارجوكي ما تعيطيش

البنت: اسفه بس رجلي بتوجعني ومش هقدر اروح مشواري

عيطت تاني وهو واقف مش عارف يعمل ايه

فجأه شالها من غير مقدمات

البنت: انت بتعمل ايه؟ ارجوك استني ارجوك نزلني

علي: مش هنزلك الاهم فالمهم اهدي واسكتي وماتخافيش مني

دخلها عربيته وطلع بيها

البنت بخوف: اوقف ارجوك انت خاطفني ولا ايه؟

علي: خاطفك؟؟؟؟ لا طبعا انا هاخدك المستشفي علشان رجلك

البنت: لا لا ارجوك مالوش لازمه نزلني شويه وهبقي كويسه

علي: هششش اسكتي بقي

اخدها المستشفي وكشفوا عليها وكانت رجلها مجزوعه بس

بعد ما خلصت وعلي واقف قصادها

علي: يالا هتقدري تقومي؟

حاولت البنت تقوم بس مجرد ما وقفت كانت هتقع لانها مقدرتش تحمل علي رجلها

طبعا علي جري ولحقها ومسكها واتقابلت عنيهم تاني في نظره طويله

علي شالها تاني واخدها ونزل بيها

البنت: ارجوك ارجوك نزلني انا همشي عليها

علي: هو انتي معندكيش غير ارجوك دي وبعدين جربتيها ومجابتش نتيجه

البنت: انت مش مضطر تعمل كل ده

علي: عارف ___ علي فكره انا اسمي علي وانتي

البنت: اسمي امل

علي: امل!!! اهلا يا امل واسف اني خبطتك مكنش قصدي ابدا

امل: حصل خير

وصل لعربيته وركبها معاه تاني

امل: ارجوك بقي انا هروح

علي: تاني ارجوك دي؟ مش قلتلك ما بتجيبش نتيجه

امل: طيب اقول ايه؟

علي: تقولي كنتي رايحه فين وكنتي بتجري ليه؟

امل: خلاص بقي مالوش لازمه

على: ايه اللي مالوش لازمه ده قولي كنتي رايحه فين؟

امل: كنت رايحه شغل جديد هقدم فيه وكانوا بيختاروا ناس بس الكلام ده خلاص

على: خلاص ليه انتي ممكن تروحي وتقوليلهم اللي حصل واكيد هيقدروا

امل: لا خلاص هما طالبين عدد معين وهياخدوا اللي راح الاول الاسبقيه في الحجز يعني

على: طيب انا ممكن اساعدك

امل: انت ساعدتني كفايه شكرا

على: طيب انتي ساكنه فين علشان اوصلك

وصلها علي بيتها وروح بس معرفش يشيلها من تفكيره ابدا كانت عايشه مع امها وخالها

وابوها ميت وخالها هو المسؤل عنها

زارهم تاني يوم يطمن عليها لانه مقدرش يشلها ابدا من تفكيره

بدا الحب يكبر بينهم عجبه جدا رقتها وصفاءها ونقاءها وحس كانها ملاك ماشي علي الارض

__________________________

ساعدها انها تشتغل لانها رفضت اي مساعده منه فخلاها تشتغل عند ابوه في شركته

ومع الوقت علاقته بيها بدات تاخد وضع جدي جدا

علي: امل انا بحبك ومش عايزك تبعدي عني ابدا

امل: بتحبني انا؟؟ طيب ليه؟

علي: وهو الحب بيتقال فيه ليه؟ بحبك وبس

تقبلي تتجوزيني؟

امل: انت بتسالني سؤال معنديش الجرأه اني اوافق عليه

علي: ليه؟ السؤال اجابته بسيطه يا اه او لأ؟

يا بتحبيني يا ما بتحبينيش؟

امل: لا طبعا مش بسيط ابدا

انت فين وانا فين؟ انت مين وانا مين؟

مين هيسمحلك تتجوزني؟ عيلتك؟ ابوك؟ مجتمعك؟ مين قولي؟

علي: امل انا عايز اسمع رايك انتي لان ده اللي يهمني

امل: انا اقصي امل ليا اشوفك كل يوم دقايق واسرق لحظات اشوفك فيها ومش هطمع في اكتر من كده

علي: برضه دي مش اجابه

بتحبيني ولا لأ؟؟؟؟

امل: انت لسه بتسال؟

انا حبيتك من اول لحظه شوفتك فيها وعشقتك لما اتقابلو عنينا تاني مره

ودبت في غرامك لما شلتني بين ايديك

كده جاوبتك ولا لأ؟

عل: انتي هتبقي حبيبتي ومراتي وشريكه عمري فاهمه؟

#########################

ادهم صحي وكلم حبيبته صبح عليها وطلع علي شغله

وهو في شغله علي الظهر كده سمع صوت عالي وخناق بره مكتبه

كان عنده اجتماع مهم ويدوب هيقوم يشوف في ايه الباب اتفتح ودخل خالد ووراه محمود بيحاول يوقفه

ادهم: خلاص يا محمود سيبه

خالد: انت يا بني ادم انت، انت تطلع من حياتنا وتحل عنا بقي

احنا استحملنا منك كتير لكن توصل لكده يبقي تغور في داهيه انت وعيلتك كلها

ادهم: في ايه لكل ده؟ اهدي كده وقولي في ايه؟

خالد: في انك ما تستاهلش ظفر ليلي وطالما مش هتحافظ عليها يبقي تحل عنا بقي

ادهم: انا برضه مش فاهم في ايه؟

ليلي مالها وايه اللي حصل؟

هنا علي جه علي صوت الخناق والدوشه

علي: في ايه بيحصل هنا؟

خالد: في ان احنا قرفنا منكم بقي

علي: ايه اللي حصل يا ادهم في ايه؟

ادهم: معرفش في ايه وماله وليلي كلمتها من ساعتين كانت كويسه

خالد: كانت فاهم كانت

ادهم قلبه دق بسرعه وخاف يكون جرالها حاجه

ادهم: خالد في ايه اللي حصل؟ اتكلم بقي وليلي فين؟

خالد: ليلي!!! ليلي يا حيلتها اتقبض عليها

خالد: ليلي اتقبض عليها

ادهم: ايه؟ اتقبض عليها؟ انت بتهزر صح؟

خالد: اه بهزر وجاي اتخانق معاك هزار واقولك حل عنا هزار

ادهم: اتقبض عليها ازاي يعني وليه؟

خالد: انت بتسالني انا؟ ما تروح تسال جدك

ادهم كان هيتجنن ا ول ما سمع اسم جده وبص لابوه

علي: اكيد ده سوء تفاهم

خرجوا كلهم وراحو للقسم اللي ليلي موجودة فيه

واول ما دخلوا لوكيل النيابه اللي بيحقق مع ليلي لقوا سليم قاعد هو وريهام وليلي واقفه متكلبشه وبتعيط

اول ما ادهم دخل جريت عليه ورمت نفسها في حضنه وبتعيط

ادهم: ايه اللي بيحصل هنا ده؟

وكيل النيابة: ارجعي مكانك يا بت انتي

ادهم: اسمها ليلي ولما تتكلم معاها تتكلم بادب انت فاهم؟

وكيل النيابة: افندم؟ وتطلع مين سيادتك؟

ادهم: اطلع زي ما اطلع انت تتكلم عدل وبعدين انت قابض عليها بتهمه ايه ان شاءالله؟ ؟

وكيل النيابة: وانت مال اهلك

علي: لو سمحت انا علي سليم خطاب وده ابني ادهم خطاب ومعلش اعذر ابني علي تهوره

وكيل النيابة: افندم؟ انا كده مش فاهم حاجه

( بص لسليم) هما دول ابنك وحفيدك؟؟؟

سليم: ايوه ابني وحفيدي

وكيل النيابة: امال في ايه؟

ادهم: المفروض سيادتك اللي تقول في ايه وقابض علي خطيبتي ليه؟

وكيل النيابة: خطيبتك؟ دي خطيبتك؟

ادهم: ايوه خطيبتي

وكيل النيابة: جد حضرتك بيتهمها بسرقه مليون جنيه منه والتحريات اثبتت انها فعلا اتفتح لها حساب في البنك امبارح بالمليون جنيه دي

ادهم: وفين دليل السرقه؟ وبعدين من امتي اللي بيسرق بيروح يحط الفلوس في البنك؟

وكيل النيابة: انا معرفش جدك عملها محضر بالسرقه

ادهم: جدي كتب شيك وعطاه لليلي وليلي عطتهولي وانا فتحتلها حساب بالبنك بالمبلغ ده والمحامي بتاعي عمل الموضوع ده وده سهل تتاكدوا منه مفيش سرقه حصلت

استمر التحقيق والمحامي بتاع علي جه

طول الوقت كان ادهم قاعد تايه مكسور متكتف مهزوز مش عارف يعمل ايه؟

نظرات الاتهام اللي شايفها في عيون خالد او ماجده او عم فتحي مش قادر يستحملها

اما نظرات ليلي فكانت.... هو مش عارف يفسرها هيا نظرات استنجاد؟؟ نظرات اتهام انت السبب؟؟ ولا نظرات خيبه امل؟؟؟ ولا نظرات فقدان ثقه؟؟ ولا هيا ايه بالظبط؟؟

وخلال كام ساعه كان الموضوع خلص وادهم اخد ليلي يروحها بيتها وطول الطريق الكل ساكت بيقطع الصمت ده دموع ليلي اللي عامله زي السكاكين بتقطع في قلبه

ريهام وسليم كمان روحو وخيبه امل مرسومه علي وش ريهام

سليم: مالك في ايه؟

ريهام: في ايه؟؟ في ان احنا رجعنا بخيبه امل قد كده وطلع كله فشنك

سليم: مين قالك كده؟ الموضوع ماشي زي ما انا عايز بالظبط

ريهام: ازاي بقي وبسلامتها خرجت منها ببساطه؟؟؟؟

سليم: طيب ما هي لازم تخرج امال ايه

ريهام: ولما هيا هتخرج وانت عارف كده كان لازمته ايه بقي الوش ده كله؟

سليم: ده ليه كل لازمه هتشوفي دلوقتي لازمته ايه

ريهام: لااااا انت تفهمني

سليم: في ان انا كنت عايز اوصل رساله وهي وصلت زي ما انا عايز

ريهام: رساله ايه؟ ادهم طلع ليلي وبقي بطل في نظرها وملاكها الحارس

سليم: انتي شايفه كده؟؟

ريهام: ايوه طبعا احنا اللي رجعنا بخيبه الامل

سليم: لو حد رجع بخيبه امل يبقي مش احنا

ريهام: امال مين؟ ده ليلي وادهم زمانهم بيحتفلو

سليم: يحتفلو بايه؟ بانها اتحبست بسببه؟؟ ولا انها اتهمت بالسرقه؟؟؟ ولا انها اتهزقت مننا؟؟ ولا اتهزقت من وكيل النيابه؟؟ لو في حد خاب امله هيبقي ليلي وادهم كل واحد فيهم خاب امله

ليلي هيخيب املها انها تعيش حياه طبيعيه مع عيله عندهم استعداد يحبسوها

وادهم هيخيب امله في انه يعرف يحمي حبيبته او يحسسها بالامان

انا كنت عارف انها وقت بسيط وهتطلع بس اثارها هيفضل محفور عند الكل فهمتي

ريهام: انت ايه؟؟ داهيه بتعرف توصل للي انت عايزه

بس افرض انهم تخطوا المرحله دي وكملوا؟

سليم: اشك وبعدين انا سبق وجربت موضوع خيبه الامل ده وصدقيني بيجيب من الاخر وحتي لو تخطوه خططي ما بتخلصش ما تقلقيش

ريهام: بس ده ابني

سليم: وحفيدي وعايزله واحده تستاهله وهو هيفوق وهيعرف ان احنا بنعمل كده علشان خاطر مصلحته ما تخافيش

ريهام: يعني هيسامحنا؟؟

سليم: طبعا ده ابنك

ادهم وصل اخيرا لبيت ليلي ودخلها ودخل معاها

لاول مره يحس انه مش مرغوب فيه

ادهم: انا عارف انكم كلكم بتتهموني ان انا السبب وعندكم حق

عم فتحي: يا ابني لأ بس انت بتعادي اهلك واعلنتوها حرب واحنا بنتاخد في الرجلين

ادهم: عارف وحقكم عليا

خالد: ونصرفها منين دي؟

ادهم: معلش يا خالد

ليلي: انت ليه عملت كده؟ انا مش عايزه فلوس.. انت خليتهم يتهموني بالسرقه بعملتك دي

ادهم: متخيلتش ابدا انها ممكن توصل لدي

ليلي: اهي وصلت والله اعلم المره الجايه هتوصل لايه؟؟؟

ادهم: مفيش مره جايه

ليلي: يعني ايه؟

ادهم: يعني هما بيأذوكي علشاني ومش هيبطلو وانا عندي استعداد اكمل قصادهم واحارب بس مش علي حسابك انتي

كل حرب بيكون فيها خساير فمش هينفع لو هتكوني انتي الخساير دي

انا بحبك يا ليلي وبعشقك وحياتي من غيرك ملهاش طعم او معني

بس حياه من غير معني ارحم مليون مره من حياه انتي بتتأذي فيها

مش هستحمل انهم يأذوكي تاني

وبعدين طالما مش هقدر احميكي يبقي ما ينفعش افضل معاكي

ليلي: انت بتقول ايه؟ وعايز توصل لايه؟ انت بتسيبني؟؟؟

خالد: هو بيقول اللي لازم يحصل. لا احنا من تووبه ولا هو من توبنا

ادهم: انا اسف يا ليلي بس دي كانت البدايه وسليم لمح انه ممكن يعمل اكتر من كده وانا كنت غبي مفهمتوش او تجاهلته او افتكرته جد واخره هيضايقك بكلمه او كلمتين مش اكتر لكن طالما عمل كده يبقي ممكن يعمل اكتر وانا مش هستحمل حاجه تجرالك بسببي

فمفيش حل قدامي غير اني ابعد عنك وتعيشي بامان او اقتله

فده اسلم حل اسف ( قلع دبلته وحطها في ايد ليلي) انتي اجمل حاجه حصلتلي في حياتي ومش هبطل احبك ابدا وده وعد مني ولا قبلك ولا بعدك

اتمني تعيشي حياة اجمل مع غيري

ليلي مصدومه مش قادره تنطق والدموع اتحجرت في عنيها لدرجه انها مش شايفه

ادهم قال كلمته ومشي وسابهم

في البيت

ادهم وصل البيت ودخل لقي امه وجده مستنينه

سليم: كفاره وحمدلله علي سلامه حبيبتك

ادهم: حبيبتي!!!!! انت عارف يعني انها حبيبتي؟؟؟ متخيلتش ابدا انك ممكن توصل لده

سليم: واكتر من كده كمان

ادهم: لا خلاص مالوش لازمه انت انتصرت وانا رفعت الرايه البيضا

ريهام بفرحه: قصدك ايه؟ سيبتو بعض؟؟

ادهم باستغراب ازاي امه مش حاسه انه بيموت من جواه

ادهم: اه سيبنا بعض افرحوا بقي انتو الاتنين ان خطتكم نجحت بعد اذنكم

ادهم سابهم وطلع وريهام بتنادي عليه

ريهام: ادهم حبيبي استني بكره اعرفك علي ست ستها ولا يهمك استني

سليم: مش وقته سيبيه لوحده شويه

#########################

علي خرج من القسم فضل ماشي في الشارع

التاريخ بيعيد نفسه من تاني

بس المره دي ابنه بيدفع الثمن

رجع لذكرياته القديمه

علي: بابا انت فين؟

سليم: هنا في المكتب تعال

علي: انا اسعد انسان في الدنيا

سليم: خير؟

علي: انا بحب وعايز اتجوز

سليم: بجد؟ ومين بقي سعيده الحظ؟؟

علي: واحده انت ما تعرفهاش

سليم: ابوها مين او من عيله مين؟

علي: مش عيله حد

سليم: يعني ايه مش عيله حد؟؟ جايه من بره مثلا؟ مش مصريه؟؟ ايه شوقتني؟؟

علي: لا مش كده هيا بنت عاديه واهلها ناس علي قد حالهم

سليم: اوعي يكون قصدك علي البنت اللي انت ماشي معاها بقالك فتره دي وجبتها شغلتها عندنا

على: ايوه هيا دي بالظبط

سليم: انت اتجننت؟؟ انا قولت دي مجرد بنت هتقضي معاها وقت حلو وتروح لحالها واهو ترميلها قرشين وخلاص

دي اخرها ساعتين في شقه مفروش مش تقولي هتجوزها

علي: انت بتقول ايه؟ انا بحبها وعايز اتجوزها

سليم: انت اتجننت رسمي صح؟ فوق لنفسك

علي: هتجوزها حتي لو غصب عنك هتجوزها

سليم: وريني شطارتك

اتفاجئ علي بان اول حاجه امل اتطردت طبعا من شغلها وخالها كمان اترفد من شغله علي الرغم انه شغال في مكان بعيد عن سليم بس نفوذ سليم كان واصل

المصايب بدات ترخ فوق راس امل وعيلتها

علي راح لابوه

علي: انت ليك علاقه باللي بيحصل لامل وعيلتها ده؟؟؟

سليم: وهو ايه اللي بيحصل؟

علي: انت اكيد عارف ايه اللي بيحصل

سليم: ههههههه روح لحبيبتك يالا ووريني هتعمل ايه معاها

اه روح الحقها لان زمانهم بيطردوا في الشارع

جري علي وفعلا لقاهم بيطردوا في الشارع

ومفهمش ايه اللي بيحصل

علي: امل في ايه؟

امل: انا مش عارفه في ايه؟

انا واتطردت وخالي اتطرد وحتي عياله اتطردوا من مدارسهم ودلوقتي صاحب البيت بيطردنا ومن غير سبب

ام امل: ربنا يسامحه اللي كان السبب

علي: طيب هتروحو فين كده؟

خال امل محمد عبد الله : ارض الله واسعه

علي: طيب تعالو معايا لحد ما تستقروا

اخدهم شقه خاصه بيه كان واخدها لسهره مع اصحابه ولحياته الخاصه

قعدوا في الشقه دي كام يوم لحد ما في يوم الباب خبط وامل فتحت لقت قدامها تلات رجاله طوال عراض

امل: خير في ايه؟

# انتي امل؟

امل: ايوه انا

دخلو وزقوها خالها طلع علي صوتها

دخل التلات رجاله وضربوا خالها ومراته وامها وحتي هيا كمان

ضربوهم مش جامد بس ضرب اهانه مش اكتر

مشيوا وبعدها دخل سليم

كانو قاعدين في الارض بيعيطوا

سليم: ده اخره اللعب مع الكبار

خال امل: حضرتك مين؟ وبعدين احنا ما لعبناش مع حد كبير ولا نعرف حد اصلا كبير

سليم: بجد امال انتو قاعدين هنا في شقه مين؟

خال ليلي: ده علي ابن صاحب الشغل بتاع امل وبيساعدنا

سليم: وبيساعدكم ليه؟ لله في لله؟؟

خال امل: هو انسان محترم

سليم: متعملش فيها اهبل يا راجل انت

انت عارف انه بيحب امل بنت اختك وعايز يتجوزها وده شيئ مش هسمح بيه ابدا

معدش غير ناس من الرعاع هيناسبوني

امل: هو انت السبب في كل اللي حصلنا؟؟

سليم: برافو وكل اللي حصل ده عينه بس من اللي هعملو فيكم لو ما نهيتيش العلاقه دي

امل: انا بحب علي

سليم: خلاص حبيه براحتك بس علي هطرده من بيتي وهحرمه من كل حقوقه وانتو هتترموا في الشارع وعيال خالك دول هخليهم يسرحوا في الشوارع يبيعوا ورد ومناديل

وابقي خلي علي ينفعك

يا تبعدي عنه وهعوضكم يا تفضلي معاه وتتشردوا كلكم في الشارع

سابهم ومشي وهما محدش فيهم نطق او كلمها

علي اول ما راحلهم وشاف اثار الضرب عليهم وعرف اللي حصل

قرر انه يفضل مع حبيبته مهما يكون التمن ورجع اتخانق مع ابوه ولم هدومه ومشي وقرر انه يشتغل ويصرف عليهم

حاول يشتغل بس اول ما يعرفوا اسمه يرفضوه علي طول

ابوه حرص انه ما يلاقيش شغل ابدا

علي حاول يشتغل في اي مجال بس ما عرفش وصل بيه الحال انه اشتغل بني يشيل طوب علي ضهره ويرجع بالليل مهدود ومتعور في كل جسمه وامل بتشوفه تعيط بصمت

وهو يحاول يخفف عنها ويقولها ان اهم حاجه يفضلو مع بعض

بس حتي الشغل ده اتطرد منه

اشتغل جرسون واتطرد اشتغل صبي في قهوه واتطرد

في اي شغل بيشتغل فيه يومين او تلاته بالكتير ويطرد

اتقفلت كل الابواب في وشه والحمل كتر عليه

وخال ليلي عياله اتشردوا بسببه وامهم بتبصله باتهام صامت

وامل حزينه عل عيلتها اللي بتتشرد بسببها

امها تعبت واخدها المستشفي وملقاش ثمن علاجها فاضطر يروح لابوه

علي: ارجوك كفايه ساعدني اعالج امها

سليم: واساعدك ليه؟ روح انت وريني شطارتك

مش راجل وتعرف تحمي حبيبتك يالا روحلها حب فيها ووريني الحب هيواجه ايه ولامتي هيفضل؟

علي: انت بتقفلها في وشي ارجوك انا مستعد لاي شيئ

سليم: هعالجها واشغل خالها وارجع عياله المدارس وحتي امل كمان هشغلها بس بشرط

علي كان عارف ايه هو الشرط بس خلاص مش بايده حاجه

علي: انا موافق علي شرطك

سليم: روح ودعها وارجع

علي راح لحبيبته اللي اول ما شافته عرفت من وشه انه خلاص انتهي

امل: ما تقولش اي حاجه! قولتلك انت فين وانا فين؟ وانا ما ارضهالكش انك تتمرمط بسببي انت مش بني ولا صبي انت راجل كبير قد الدنيا دي فارجوك ما توطيش علشاني

وكفايه عليا قوي انك حبتني بجد

علي: وهفضل احبك لاخر يوم في عمري هحبك كل حاجه هتتصلح اول ما انا ابعد

امل: عيش نيابه عني وعنك. عيش لينا احنا الاتنين مع السلامه

########################)))

فاق من ذكرياته ومسح دمعه نزلت غصبا عنه

وقرر ان كفايه كده قبل كده كان صغير وقليل الحيله ومعرفش يدافع عن حبيبته

بس دلوقتي مش هيسمح ان ابنه يعيش كسره القلب والعجز وقله الحيله

لازم يوقف لابوه

روح بسرعه علي بيته كان هدوء مسيطر علي البيت

طلع جري لاوضه ادهم واتفاجئ من اللي شافه

علي: انت فاكر نفسك بتعمل ايه؟؟؟؟؟؟

ادهم: بصلح غلط عملته

اسف

علي روح بسرعه علي بيته كان هدوء مسيطر علي البيت

طلع جري لاوضه ادهم واتفاجئ من اللي شافه

علي: انت فاكر نفسك بتعمل ايه؟؟؟؟؟؟

ادهم: بصلح غلط عملته

علي: وايه هو الغلط ده؟؟

ادهم: اني رجعت مصر ماكنش المفروض ارجع مصر اصلا

علي: طيب وليلي رايها ايه؟

ادهم: سيبتها خلاص

اتصدم علي من قرار ادهم وحس بوجع جامد في قلبه لانه جرب وجع الفراق قبل كده ولحد النهارده ندمان وقلبه لسه موجوع

على: انت بتهزر صح؟ انت ما ينفعش تسيب ليلي اوعي تفكر انه كام يوم وتنساها ولا كام سنه!!! ليلي هتفضل جرح مفتوح بينزف في قلبك باستمرار

ادهم: عارف

علي بنرفزه وصوت عالي: ممكن تسيب اللي في ايدك وتكلمني عدل

ادهم قفل شنطته وبص لابوه بهدوء شديد

ادهم: افندم

سليم وريهام سمعوا زعيق علي وجم علي صوته

ريهام: في ايه يا علي مالك؟ صوتك عالي ليه؟

علي: اتبسطي يا هانم وروحي اعملي يالا حفله كبيره علي نجاحك انك تفرقي بينهم

ريهام: بكره ينساها وبكره انا اجيبله ست ستها

علي: بكره؟؟؟ هههههه هههههههه بجد

شدها من دراعها ودخلها اوضه ادهم

على: مفيش بكره اصلا ابنك مسافر

ريهام: انت رايح فين؟ هتغير جو يومين وترجع صح؟

ادهم: لا مسافر ومش راجع تاني

انا اتصلت بالكليه اللي كنت شغال فيها وعقدي لسه ساري وطيارتي خلال 6 ساعات بس مش طايق البيت ولا اللي فيه فهروح المطار من دلوقتي ومش راجع تاني

ريهام: كل ده ليه؟ علشانها؟

ادهم: لا مش علشانها؟ علشان ما اتعودت اعيش في جو كله خداع وتخطيط واذيه وكل ده من مين؟ من اقرب الناس ليا

عارفه انا مش فارق معايا موقف سليم باشا هو بالنسبالي غريب لكن المشكله فيكي انتي

انتي بتوجعيني قوي وما ينفعش اخد اي رد فعل معاكي وعلشان كده سايبهالكم خالص

سليم: انت مش هتسافر مكان فاهم؟

ادهم: ايه هتمنعني ولا تحبسني في البيت

مسك شنطته وزق سليم بعيد عن طريقه وباس امه علي راسها ومشي من غير ما يسمع لاي كلمه بيقولوها

علي نزل وراه بصمت

ادهم: مالوش لازمه تيجي معايا اطلع ارتاح اليوم كان طويل النهارده

على: عايز اتكلم معاك اركب هوصلك

ركبوا وفضلو كتير ساكتين محدش فيهم لاقي كلام يقوله

علي وقف بالعربيه وركنها علي جنب ادهم بصله ولما لقاه ساكت سكت هو كمان وبص لبره

الساعه 2 بالليل الجو هادي والشوارع رايقه

اتمني للحظه ان ليلي تشاركه وقت زي ده؟

لا لازم يفوق من احلامه خلاص مفيش ليلي

غمض عنيه علشان يمنعهم انهم يخونوه وينزلو دمعه غصب عنه واتنهد بصوت موجوع

ابوه حاسس باللي جواه ولتاني مره يحس بالعجز مره يوم ما خسر حبيبته والنهارده وهو بيخسر ابنه

فجاه عيط بصوت عالي ادهم اتفاجئ بده وللحظه مش عارف يعمل ايه؟ كبيره جدا بالنسباله ان ابوه يعيط وبسببه

ادهم: انا اسف انا اسف انا اسف ارجوك ما تعيطش ارجوك اسف اسف

على: انا مش بعيط بسببك انا بعيط من عجزي وقهره قلبي

ادهم: وليه كل ده؟ ليلي فتره في حياتي حلوه وجميله بس الحياه بتستمر وبكره تبقي مجرد ذكري

على: لا الحياه ما بتستمرش ولا هتبقي ذكري هتبقي وجع ديما موجود لا بيخف ولا بيتنسي

ادهم: لا ده مجرد كلام بكره تتنسي

على: مش هتتنسي

ادهم: وانت عرفت منين؟ جربت؟ ما تتكلمش في حاجه متعرفهاش

على: معرفهاش هههه؟ انا جربت وجعك ده وعيشته كله لحظه بلحظه واحب اقولك انه الوجع هوهو ولا قل ولا خف قلبي بيوجعني بنفس الطريقه اللي وجعني بيها من 30 سنه

اوعي تضحك علي نفسك وتقول - هتنسي والحياه هتستمر لانك ولا هتنسي ولا الحياه هتستمر صدقني

ادهم: انت حبيت قبل امي؟؟ طيب سيبتها ليه؟

علي: غصب عني _ ربنا يسامح جدك بقي

ادهم: هههه جدي برضه No comments

على: وهو في ايه ممكن يتقال المهم ما تسيبش حبيبتك يا ادهم هتندم( حكاله علي علي حكايته كلها مع امل من يوم مع عرفها لحد ما افترقوا)

ادهم: خساره انك سيبتها بس انا وضعي مختلف انت محسسني ان انا بسيبها بمزاجي

انا مجبر اسيبها زي ما انت اتجبرت تسيب امل

على: انا مكنش بايدي حاجه اعملها

ادهم: وانا بايدي ايه؟ مره هزقوها ومره سجنوها هستني لحد ما ينفذ تهديده ويقتلها ولا يبعتلها بلطجيه يغتصبوها؟؟بايدي ايه؟

علي: اتجوزها وخدها معاك

ادهم: عايزني اتجوزها واخدها من اهلها وبيتها وحياتها واخدها بلد اجنبيه ما تعرفش فيها حد لا طبعا ليلي عمرها ما هترتاح بره ابدا

انت ليه ما اخدتش حبيبتك بره وسافرت؟؟

على: مكنش وضعي زيك

مكنش عندي شغل او فلوس كل حاجه كانت بتاعت ابويا وانا كنت الشاب الروش المتكل علي ابوه لسه ما اشتغلتش ومن غيره ولا حاجه

ادهم: وما اشتغلتش ليه واعتمدت علي نفسك؟

علي: لانه قفلها في وشي حاولت واشتغلت فعلا بس اكتر شغله فضلت فيها كانت 3 ايام وبعدها بتطرداشتغلت كل شيئ بني جرسون صبي قهوه صبي ميكانيكي كل حاجه ممكن تخطر في بالك

ادهم: كنت اخدتها وسافرت بعيد عنه زي ما انت بتتطلب مني انا دلوقتي

على: سبق وقلتلك انها كانت مرتبطه بخالها

خالها هو اللي تولاها بعد موت ابوها وفتحلها بيته هيا وامها وابويا لما اتدخل اذاه هو كمان طرده من بيته وشغله وشرد عياله

فلو اخدتها هيا هما هيتبهدلو لان ابويا مش هيسيبهم في حاله وفي نفس الوقت مكنتش اقدر افتح بيت واخدهم كلهم

لو انا وهيا بس مكنتش اترددت ابدا حتي لو هناكل طقه ونجوع طقه لكن خالها وعياله ذنبهم ايه؟

كانت هتبقي انانيه مني ساعتها

كان لازم ابعد علشانهم كلهم

ادهم: وده نفس اللي انا بعمله لازم ابعد

انا اسف انك افترقت عن حبيبتك بس انا غيرك وماتحسش بتانيب ضمير انا مش زعلان منك في حاجه

علي: ادهم انا

قاطعه: ما تقولش حاجه تاني كفايه يالا هسيبك انا وانزل ابقي تعال زورني لاني مش هنزل هنا تاني سلام

نزل من العربيه ودخل المطار يستني طيارته

انتظار طويل وممل

علي مش عارف يعمل ايه او يتصرف ازاي؟

الساعه قربت علي 4 الفجر ابنه هيسافر

مفيش غيرها ممكن تقنعه انه ما يسافرش لازم يروحلها بسرعه ازاي مفكرش فيها لحد دلوقتي؟

راح خبط علي بابهم وكله قام مفزوع من نومه

قام خالد بسرعه يفتح الباب واتفاجئ لما لقي علي قدامه

علي: اسف يا ابني اني باجي في وقت متأخر بس الموضوع ما يحتملش التاخير

خالد: يعني ما يتاخرش ساعتين تلاته لحد ما النهار يطلع؟

علي: لا ساعتها هيكون خلاص فات الاوان

عم فتحي: يا ابني اتعلم الذوق وافتح الباب اتفضل يا سعاده البيه اتفضل

علي: متشكر واسف مره تانيه

عم فتحي: لا ولا يهمك خير؟

علي: عايز اتكلم مع ليلي بسرعه

ليلي خرجت من اوضتها وشكلها يغني عن اي كلام

ليلي: عايز مني ايه؟ سيبوني في حالي بقي

خالد: اديك سمعت اهوه

على: ادهم مسافر ومش هيرجع تاني وانا عارفه لو سافر يا ليلي فعلا مش هيرجع ساعديني اخلي ابني جنبي ارجوكي

خالد: وهيا هتعمله ايه يعني ماهو رمالها دبلته ومشي؟؟؟

علي: انتي الوحيده اللي تقدر تمنعه

انتي الوحيده اللي ممكن يسمعلك

ليلي: بيتهيألك انا قلتله خليك وما تسيبنيش بس ما سمعليش

على: لانه خايف عليكي مهزوز وفاقد ثقته في نفسه وانتي لمتيه علي اللي حصلك كلكم لمتوه مع انه حصل غصب عنه

حسستيه انك فقدتي ايمانك وثقتك فيه

حسستيه انك فقدتي الامان وده مفيش راجل هيقبله ابدا

لو هو مش هيقدر يحسس شريكته بالامان ويقد يحميها يبقي ساعتها لازم يمشي

خالد: ماهو ده اللي حصل هو معرفش يحميها

ومش هينفع يقف قصاد امه وجده ويعلنها حرب فقراره صح

على: بمجرد ما يتجوزا كل الحروب دي هتقل واول ما يخلفوا هتنتهي كل العداوات ومش هيبقي غير الحب وبس

صدقيني يا ليلي ما تضيعهوش من ايدك

انتو الاتنين هتتعذبوا كتير بعيد عن بعض

ليلي حبيبك محتاجلك اكتر من اي حد

ليلي: لو محتاجلي كان فضل جنبي مش يسيبني وكمان هيسافر

لو ده قراره يبقي خليه يسافر

على : انت سمحتيله يمشي

ليلي: لأ هو مشي لوحده

على: لما يشوف في عنيكي خوف ولوم لازم يمشي

ليلي: كنت عايزني اعمل ايه؟ ؟

علي: كان المفروض تفضلي في حضنه وتضميه وتقوليله انكم مع بعض مهما يحصل وانكم اقوي طول ما ايديكم في ايدين بعض

كان لازم ترجعيله ثقته في نفسه

كان لازم تقوليله انه هو الامان بالنسبالك

كان لازم تفهميه ان ثقتك فيه عمرها ما اتهزت

ابدا ومهما يحصل هتفضلي معاه

ده اللي كان لازم تعمليه

الوقت بيعدي قرري هتسيبيه يمشي ولا هتتمسكي بيه؟؟؟

في المطار بينادوا علي الطياره بتاعت ادهم

اخيرا وقت الانتظار خلص وهيسافر من تاني

مسك شنطته وقام بكسل رايح يدخل

لسه قدامه اجراءات يخلصها

بقاله ساعتين قاعد ليه ما دخلش جوه وفضل بره في صاله الانتظار؟؟؟ ليه مستني لاخر لحظه؟؟؟ قلبه مستني مين يجيله؟؟ ليلي ما تعرفش انه مسافر اصلا طيب مستني ليه؟

لازم يقوم ويدخل لازم

قام ومشي ووقف قدام الباب خلاص مفيش رجوع خلاص حياته هنا انتهت

ادهم ____ ادهم ______ ادهم

معقوله ده صوتها ولا بيتهياله؟؟؟

اكيد بيتهياله اكيد لا زم يكمل وما يبصش وراه

ادهم هتسيبني بجد؟؟؟

لا ده بجد مش حلم بص وراه وشافها

ليه جيتي يا ليلي كده صعب انه يمشي؟ ليه بتصعبيها قوي كده؟ ؟

وقف مكانه ولا قادر يمشي ولا قادر يروحلها ومش عارف يعمل ايه؟؟؟

### اباشا هتعدي ولا ايه؟؟ افتح الطريق لو سمحت

ادهم اتضطر يتحرك من مكانه

ادهم: ايه اللي جابك يا ليلي وجيتي ليه؟

ليلي: انت بجد مش عايز تشوفني تاني؟؟؟ بتروح لبعيد قوي كده ليه؟ ؟ علشان معرفش اوصلك؟؟ ليه بطلت تحبني؟؟

ادهم: انا عمري ما بطلت احبك ابدا ولا هبطل

ليلي: طيب بتسيبني ليه؟

ادهم: لاني مش عارف افضل! خايف عليكي تتاذي بسببي مش هستحمل لو جرالك حاجه ومش هخاطر بيكي

ليلي: انا هموت لو سيبتني دي مش اذيه؟؟؟ وبايدك انت

ادهم: كده ارحم صدقيني

ليلي: انا عندي اموت ولا اني اعيش من غيرك انت فاهم؟؟ يوم واحد في حضنك احسن عندي من مليون سنه بعيد عنك

ادهم: ما تصعبيهاش يا ليلي اكتر ماهي صعبه

ليلي: خليك في حضني خليك معايا

ارجوك ما تحرمنيش منك ومن حضنك

ادهم: ارجوكي انتي سيبيني امشي وانسيني

ليلي: حد بينسي روحه؟؟ انت روحي وعقلي وكياني كله انت الاول والاخير

ادهم: ارجوكي يا ليلي كفايه

انا بحبك وهفضل احبك علي طول

ودلوقتي مع السلامه ارجعي بيتك وعيشي حياتك وانسيني

ليلي: اد

ادهم: هششش خلاص انسيني سلام

لف وشه ومشي ودمعه فرت غصب عنه مسحها بسرعه قبل ما يعترف هو بيها

مرضيش يبص وراه لانه لو بصلها هيرجع

مشي وهو ماشي سمع

ادهم لف وشه ومشي ودمعه فرت غصب عنه مسحها بسرعه قبل ما يعترف هو بيها

مرضيش يبص وراه لانه لو بصلها هيرجع

مشي وهو ماشي سمع حد بينادي عليه

يا استاذ انت يا استاذ كابتن

ادهم بص لظابط الامن

ادهم: افندم

الظابط: الانسه اللي كانت معاك

ادهم بص ناحيتها ويدوب هيقول مالها لاقاها واقعه في الارض والناس بدؤا يتلموا عليها

جري عليها حاول يفوقها

ادهم: ليلي ليلي فوقي فوقي علشان خاطري

بيبص حواليه لمح ابوه داخل واول ما شافه جري عليه

علي: ايه اللي حصل مالها؟؟

ادهم: معرفش مالها وقعت مره واحده

علي: طيب شيلها مستني ايه نطلع بيها علي اقرب مستشفي __ اه صح طيارتك! طيب حطهالي في العربيه وانا هاخدها وانت الحق طيارتك

ادهم شالها واخدها لعربيه ابوه حطها علي الكنبه وري وبيبصلها

على: ادهم مش هتلحق طيارتك سيبها خلاص انا هخلي بالي منها

ابوه شد الباب من ايده وقفله وادهم واقف مش مستوعب ايه اللي بيحصل

علي: ادهم

ادهم بص لابوه بنظره تايه

علي: طيارتك روح انت سامع النداء الاخير

ادهم وقف لحظه: في داهيه الطياره يالا علي المستشفي لازم اطمن عليها الاول مش هينفع امشي واسيبها كده

ابوه ابتسم وركب العربيه وعجبته فكره ليلي وطريقتها انها تخلي ادهم موجود

ادهم ركب واخد ليلي سندها عليه

وابوه ركب وبيسوق

ادهم: بسرعه يا بابا لو سمحت هيا مش بتفوق نهائي

علي: عايز يطمنه انها ممكن تكون عملت كده علشان يفضل وبس

ادهم: فين شنطتي؟؟

علي: شنطتك؟؟ اهي علي الكرسي جنبي

شدها ادهم وطلع منها البرفان بتاعه وحاول يفوق ليلي بس مش بتفوق

هنا علي قلق هو كان فاكر انها بتمثل مش بجد

علي: هيا مش بتفوق ليه؟

ادهم: معرفش هيا كانت تعبانه وانت جايبها؟؟

علي: لا كانت بس منهاره من بعدك عنها لكن مش تعب معرفش يا ادهم

ادهم: طيب بسرعه وحياتك وكلم المستشفي قولهم ان احنا علي وصول

ادهم: نتصل باهلها نقولهم؟؟

علي: لا نقولهم ايه لما حتي نوصل ونطمن عليها الاول

اخيرا وصلوا المستشفي ادهم شالها ونزل والدكاتره قابلوه واخدوها منه

وقف ادهم وابوه في قلق وخوف وترقب مستنين حد يطلع يطمنهم عليها

اخيرا طلع دكتور جريو عليه

ادهم: مالها في ايه اللي حصلها!!؟ اتكلم

علي: ادهم اهدي واديله فرصه يتكلم اصلا

الدكتور: الاول لازم نعرف منكم ايه اللي مرت بيه اليومين اللي فاتوا وايه اللي وصلها للمرحله دي؟؟

ادهم: مرحله ايه وحالتها ايه؟؟ ما تتكلم علي طول

الدكتور: اولا اغمائها نتيجه لعدم تغذيه يعني بقالها يومين علي الاقل ما اكلتش حاجه بمعني ما اكلتش نهائي ده غير انها حالا في حاله صدمه ودخلت في انهيار عصبي

ايه اللي حصلها وصلها لده؟

ادهم بعد خطوه ووقعد علي اقرب كرسي وحط راسه بين ايديه هو عارف ان هو اللي وصلها للمرحله دي

هو بيقضي عليها بايده

على: طيب هيا فاقت؟؟

الدكتور: لا احنا ركبنالها محاليل علشان نغذيها ونعملها ارواء لانها داخله في مرحله جفاف وده لو استمر هيأثر علي الكلي لانها تقريبا وقفت عن العمل بتاعها ولازم تشتغل تاني علشان ما يحصلش مضاعفات اكتر

اما الانهيار بقي فلازم نعرف سببه علشان نقدر نعالجها

هيا حالا مستقره ومخدره واول ما النهار يطلع هيجوا دكاتره الطب النفسي وهيحتاجو يتكلموا معاكم الاول

حضرتكم علا قتكم بيها ايه؟

علي: ابني خطيبها وانا والده

الدكتور: امال اهلها فين؟

علي: هبلغهم حالا انا قلت بس نطمن الاول عليها

علي اتصل بخالد وبلغه باللي حصل وخلال نص ساعه كان خالد ومحمد موجودين ورفضوا يبلغو حد من البنات في الفجر ده

خالد اول ما شاف ادهم جري عليه ومسكه من هدومه

خالد: عملت فيها ايه تاني؟؟؟ ارتحت دلوقتي ارتحت؟؟ انت طلعتلنا منين هاه؟؟

ادهم سايبه ومش بيحاول يدافع عن نفسه او يرد حتي

محمد وعلي شدوا خالد بعيد عنه

على: اهدي بس شويه يا خالد ومش وقته الكلام ده مش وقته

محمد: مالها وايه اللي حصل؟؟

علي: اغمي عليها واحنا في المطار وجبناها علي هنا والدكتور قال انها ما بتاكلش ومفيش اي غذا وصلها نهائي وده سبب الاغماء

خالد: تاكل؟؟ تاكل ازاي وفي حد سادد نفسها عن الاكل وعن الدنيا كلها

محمد: لازمته ايه الكلام ده اسكت بقي شويه

وبعدين مش هو اللي قالها تعمل في نفسها كده ( بص لعلي) وايه كمان؟؟ حاسس ان لسه في باقي لكلامك

على: عندها انهيار عصبي

خالد: ومين اللي جابهولها؟؟؟ حاجه ما سمعتش عنها غير في المسلسلات

ادهم: هو انت متخيل ان انا مش بتعذب وبموت من جوايا بسبب اللي حصل ده؟؟ انت متخيل ان مش موجوع زيهاويمكن اكتر؟؟؟ بايدي ايه اعمله وما عملتوش؟؟؟ قولتلي ابعد عنها واديني سمعت كلامك وبعدت ودي النتيجه اهي

خالد: يعني ده بسببي انا دلوقتي هاه!!؟؟

علي: انتو بتتكلموا في ايه؟؟؟ هو يهم مين السبب دلوقتي ولا هيفرق في ايه؟؟؟ السبب الظروف اللي احنا كلنا فيها كل الموجودين هنا ليلي مهمه بالنسبالهم وده المهم

خناقكم مش هيحل حاجه بالعكس لو فاقت وسمعتكم هتتدهور زياده__ده اللي عايزينه؟؟

سكتوا هما الاتنين وكل واحد قعد في مكان بعيد عن التاني

اول ما النهار طلع بلغ اخواتها وابوها وجم كلهم المستشفي وقعدوا جنبها مستنينها تفوق

ادهم فضل قاعد بره ومرضيش يدخل عندها اوضتها ابدا

ادهم خلي ابوه يروح يرتاح شويه واول ما وصل البيت وشاف ريهام وسليم قاعدين

ريهام جريت عليه

ريهام: ابني سافر خلاص؟؟!

على: وانتي ابنك يفرق معاكي ولا بتهتمي بيه حتي؟؟

ريهام: ايوه طبعاانا بعمل كده علشان مصلحته مش عايزاه يندم ابدا

علي: والله لما يعمل اللي هو عايزه ويطلع غلط احسن مليون من اننا نحاربه بالشكل ده ونهدله احلامه ونكرهه في الدنيا واللي فيها

سليم: انت لما تشوف ابنك بيعمل حاجة غلط لازم توقفه

على: لو ابني بيعمل غلط هنصحه واقوله ان ده غلط وهسيبه يجرب بنفسه وبعدين ده لما اكون بجد بميز بين الغلط والصح مش قاعد في برج وببص للناس من فوق وبصنفهم زي ما انا عايز كأن الناس مخلقوين عبيد وانت حاجه تانيه

سليم: انت تقصد ايه بالكلام ده؟؟؟

علي: انت فاهم اقصد ايه كويس!!! معترضين ليه علي ليلي علشان بنت عاديه وفقيره؟ وايه يعني بس هيا دي اللي هتعرف تحافظ عليه وتسعده؟؟

سليم: زي ما انت كانت هتحافظ عليك الشحاته اللي كنت تعرفها؟؟؟

علي: انت زي ما انت مش هتتغير ابدا

سليم: واتغير ليه انا كده كويس

على: طالما انت كده كويس يبقي لو سمحت روح بقي بيتك ومالكيش دعوه بيا او بابني

سليم اتصدم بالكلام اللي سمعه وريهام كمان

ريهام: عيب كده انت بتقول ايه يا علي؟؟؟ عمي هو مش قصده هو بس تعبان علشان ابنه

علي: لا مش تعبان وعارف انا بقول ايه وكلمه زياده منك هتخرجي معاه فاهمه؟؟ الظاهر ان سكوتي واحترامي ليكي نساكي نفسك وخلاكم افتكرتم اني ضعيف وشخصيتي ضعيفه لا فوقوا بقي انتو الاتنين

انت النهارده اخر يوم ليك هنا اتفضل روح بيتك ومالكيش دعوه باي شيئ يخص ابني لا من قريب ولا من بعيد وقسما بالله لو اتدخلت في شيء يخصه ولا عملت حاجه تضايقه

لاحجر عليك واضربلك كام شهادة انك مجنون احبسك في دار مسنين ولا مستشفى مجانين

انا سكتلك كتير بس زمان كنت فعلا ضعيف لكن دلوقتي لا

وانتي لو ما اتلميتيش وقمتي بدورك كأم وبس فرحانه لابنها قسما بالله لاطلقك بالتلاته وابعتك بيت ابوكي

ولعلمك ادهم ما سافرش وهو حاليا جنب ليلي وهيتجوزها فاهمين ولا افهمكم؟؟؟

وانتي لو مش عاجبك سيبي البيت واهي عروسه ادهم تيجي مكانك وتبقي هيا هانم البيت يا اما تتلمي وتجهزي لابنك فرح محصلش

وزي ما ابنك سبق وقالك اختاري بنفسك

ودلوقتي انا طالع انام ومحدش يصحيني فاهمه؟؟ اصحي الاقيك مشيت علي بيتك

سابهم وطلع فعلا نام بس النوم لمرتاحي البال

ليلي لسه ما فاقتش وماجده قاعده جنبها وادهم بره الاوضه رايح جاي ولا بيهدي ولا بيقعد هيتجنن من القلق عليها

ماجده خرجتله بره

ماجده: طيب ادخل جنبها واقعد

ادهم: معلش انا كده كويس ادخلي انتي ارتاحي شويه ولو عايزه تقفلي ستاره الشباك علشان ترتاحي اقفليها

ماجده: وانت هتتطمن عليها ازاي لو قفلتها؟

ادهم: ما تشغليش بالك بيا

ماجده: وانت كمان ما تشغلش بالك بيا

قربت منه ماجده ومسكت ايده

ماجده: ما تلومش نفسك علي اللي حصل انت مالكش ذنب

ادهم: امال الذنب ذنب مين بقي؟؟؟؟ انا كان لازم ابص لبعيد بس كنت اناني مفكرتش غير في نفسي وبس

ماجده: والحب ايه غير انانيه؟؟؟ انت بتحبها وعايزها مهما يكون الثمن وهيا كمان

تبقي انانيه فعلا لو الحب ده من طرف واحد لكن انتو الاتنين بتحبوا بعض

ادهم ما تخافش عليها ليلي قويه وهتلاقيها فاقت وتصوت علشان نخرجها انت عارف انها مجنونه انت بس هاتلها علبه شوكولاته زي اللي جبتهالها قبل كده وهيا هتقوم تتعلق في رقبتك

صح مش انت غني؟؟؟

ادهم: اه وبعدين؟

ماجده: من ساعت ما اكتشفنا انك غني وانت مجبتلهاش شوكلاته خالص ليه؟ ولا كان في الاول علشان المفروض بقي انك فقير بس مش مستخسر حاجه في حبيبتك؟

ادهم: لا والله ابدا بس انت شايفه الظروف عامله ازاي الحادثه بتاعتي وبعدها خلافها مع ماما والمشكله اللي حصلت واهو دلوقتي اهو

تتطلع بس وانا هفرشلها الارض شوكولاته مش علبه بس

حست فعلا ان هو بيحب اختها سابته ودخلت جنب اختها

علي راح شغله الصبح ورجع اخر النهار البيت يغير وينزل لادهم يطمن عليه

اول ما دخل البيت شاف سليم وريهام

علي: انت لسه قاعد ليه؟

ريهام: وبعدين يا علي معاك؟؟

علي: ما تدخليش في اللي مالكيش فيه واتفضلي اطلعي اوضتك

ريهام: افندم؟

علي: ايه ماسمعتيش؟؟ اطلعي اوضتك وبسرعه اتفضلي

اول مره علي يزعق في ريهام وهيا خافت وطلعت فعلا اوضتها

سليم: عايز تقول ايه ومش عايز مراتك تسمعه؟؟

علي: عايز اقولك ان انت كنت غلط ولسه لحد النهارده مازلت مصر تغلط هديت حياتي قبل كده وجاي دلوقتي تهد حياه ابني

سليم: انا بعمل اللي انا شايفه صح؟ والبنت دي مكنتش هتسعدك وانت متجوز ستها

علي: مين قالك انها مكنتش هتسعدني؟؟؟ تعرف انا لسه لحد النهارده بحبها ومفتقدها في حياتي ومعرفتش احب غيرها ابدا

الحياه بيني وبين ريهام بارده عمري ما حبتها ابدا وحتي هيا كمان ماحبتنيش وبعدين عمرنا ما اتفقنا ابدا

سليم: انت معرفتش تحبها ما تجيبش الغلط عليا وبعدين عيبها ايه ريهام هاه؟؟؟

علي: انها من نوعيتك النوعيه اللي بتبص للناس من فوق، النوعيه اللي كل همها لبست ايه وده من تصميم مين؟ النوعيه اللي كل يوم والتاني حفله وسهر وبس! النوعيه اللي مرضتش تخلف تاني بعد ادهم علشان تخنت كام كيلو وجسمها هيبوظ؟ تعرف انا كان نفسي يبقي عندي كذا عيل مكنتش عايز ادهم يبقي وحيد زيي انا بس للاسف اختيارك خلي ابني وحيد ودلوقتي جاي تعيده من الاول وجديد وتختارله واحده نفس نوعيه ريهام؟؟؟؟؟ ده مش هسمح بيه ابدا فاهم؟

ودلوقتي اتفضل السواق بره هياخدك لبيتك

حسين يا حسين

حسين جه يجري: ايوه يا افندم

على: سليم باشا رايح بيته وصله

حسين: حاضر يا افندم حضرتك اتفضل

سليم: علي انا عملت كده حب في حفيدي

على: انت ما تعرفش تحب اصلا

سليم: انت حرمتني منه طول عمره وسافرته بعيد عني كتير ما تحرمنيش تاني منه

على: ايوه بعدته عنك علشان ما تربيهوش علي الفوارق وانه فوق البشر واديني اهوه رجعته وخليته يقف جنبي واخيرا حب وهيستقر جيت انت هديت كل حاجه

سليم: ادهم حفيدي ومعنديش غيره ارجوك خليني جنبه

علي: اسف انت ما بتعرفش تفضل جنب حد انت بس بتعرف تدمر كل حاجه جميله

سليم: لا يا علي انا بحبه وعايز مصلحته وانت كمان بحبك وعملت اللي عملته بدافع الحب

على: حب؟؟؟ اللي بيحب ما يأذيش انت دمرتني ودمرت امل وبهدلت عيلتها وشردتها

حب ايه اللي بتعمل بدافعه اوعي تظلم الحب معاك اتفضل امشي وياريت ما تجيش تاني

ادهم لو حب يشوفك هيجيلك بس ما اعتقدش انت هتموت وحدك لانك معندكش حد بيحبك بصدق كل اللي حواليك عايزين فلوسك

هو ده الوسط اللي انت محاوط نفسك بيه خليه ينفعك لكن سيبني انا وابني في حالنا

وسيب ادهم يعيش في حضن حبيبته اللي حبته وهيا فاكره انه فقير وراضيه تعيش معاه في عشه حتي

اتفضل روح مملكتك واشبع بيها

سابه وطلع وهو مشي مع حسين يوصله وحس انه عجز قوي وانه فعلا وحيد قوي

اخر النهار الكل اتجمع عند ليلي اخواتها خالد ومحمد وناديه وماجده وحتي كمان اصحابها سمر وهبه وشرين ووفاء

وادهم مازال مصر يفضل بره مش عايز يدخل

الدكتورة النفسيه جت وطلبت ان الكل يخرج ويسبوها ترتاح بس رفضوا وقالولها ان هما هيخرجوها من حالتها بس تفوق

ليلي هنا بدأت تفوق والدكتوره جنبها بتكلمها

ليلي فتحت عنيها وبصت لكل اللي حواليها بذهول كانها متعرفهمش او اول مره تشوفهم

كله بيكلمها وبيعرفها بنفسه وهيا بتبصلهم

الدكتورة: ليلي انا الدكتوره هاله سامعاني؟

قولي اي حاجه

ادهم طبعا واقف علي الشباك هيتجنن عليها

ليلي دموعها نزلت واحده واحده

ليلي: سافر ___ سابني وسافر ___ سابني لوحدي

الدكتورة: مين؟؟؟ بتتكلمي عن مين يا ليلي؟؟

الدكتورة قربت وحاولت تمسك ايديها بس ليلي مره واحده صرخت

ليلي: ابعدي عني انتي عايزه ايه مني؟؟؟ ابعدوا كلكم عني مش عايزه حد هنا ابعدوا

الدكتوره طلبت حقنه مهدئه والممرضه جابتها

وحاولو يكتفوها علشان يدوها الحقنه بس مقدروش وهيا بتصرخ اكتر واكتر اخواتها كمان بيساعدوهم يكتفوها

ليلي بتصرخ وبتنادي علي ادهم وبتنادي عليه

وبتقاومهم البنات دموعهم نزلت عليها

ليلي: ادهم؟؟ ادهم سيبتني ليه لوحدي؟؟؟؟ سيبتني ليهم؟؟؟ ادهم ادهم

هنا ادهم ما استحملش تكتفيهم ليها كده ودخل عندهم

ادهم: ابعدوا عنها كلكم ابعدوا

زقهم بعيد كلهم وهو اخدها في حضنه

الدكتورة: احنا لازم نديها الحقنه وبعدين انت انت مين انت؟؟؟

ماجده: ده ادهم

ادهم: هششششش اهدي يا ليلي انا اهو جنبك انا ما سافرتش يا حبيبتي انا جنبك

ليلي بتعيط: ادهم عايزه ادهم هاتولي ادهم

ادهم: ليلي انا اهوه جنبك

ليلي: انتو مش عاييزني اروحلو ليه انا عايزه ادهم

ادهم بص للدكتورة باستفسار

الدكتورة: لازم تاخد الحقنه المهدئه

ادهم وافق وهو بنفسه مسك ايد ليلي اللي استسلمت تماما بين ايديه وكان عقلها الباطني حس بالامان بين ايديه

الممرضه اديتها الحقنه وبدات ليلي تغيب عن الوعي وهيا بتنادي علي ادهم

ادهم حطها في السرير براحه

ادهم: هيا مش عارفاني ليه؟ ؟

الدكتورة: لانها مش شايفاك حاليا بس هيا سكتت معاك وده معناه ان جزء منها حاسس بيك. دلوقتي انا لازم اعرف كل حاجه حصلت وصلتها للحاله دي وليه بتنادي عليك

ادهم: انا مش هسيبها لوحدها

الدكتورة: هيا مش لوحدها وبعدين مش هتفوق قبل 4 ساعات علي الاقل وبعدين دي خطوه مهمه في علاجها

ادهم حكي للدكتوره كل اللي حصل ورجع لليلي تاني ومستنيها تفوق

طلع النهار وهيا لسه نايمه الكل روح وهو اللي فضل جنبها وبدري ماجده جتلها لقتها لسه نايمه وادهم جنبها علي الكرسي نايم

استغربت من كميه الحب اللي جواه

ليلي بتفوق اهوه ولسه بتنادي علي ادهم

ادهم صحي علي صوتها

ادهم: ليلي حبيبتي انا جنبك اهوه انا اسف اني مشيت كنت غلطان بس اوعدك مش هسيبك تاني بس انتي قومي وارجعيلي

ليلي بصتله وهيا ساكته وهو بيسال نفسه اذا كانت عرفاه ولا زي امبارح هتقوم تصرخ...

ليلي بتفوق اهوه ولسه بتنادي علي ادهم

ادهم صحي علي صوتها

ادهم: ليلي حبيبتي انا جنبك اهوه انا اسف اني مشيت كنت غلطان بس اوعدك مش هسيبك تاني بس انتي قومي وارجعيلي

ليلي بصتله وهيا ساكته وهو بيسال نفسه اذا كانت عرفاه ولا زي امبارح هتقوم تصرخ

ليلي: انت هتجيبلي ادهم؟؟؟

ادهم: ليلي انا ادهم

ليلي: لو تعرف مكانه خدني عنده ارجوك

ادهم: ليلي بقولك انا ادهم اسمعيني بقي

انتي بتعذبيني كده ليه؟؟؟ انا ادهم ادهم سامعه

ليلي بتعيط بصوت اعلي وحطت ايديها علي ودانها وبتنادي علي ادهم بصوتها كله

الدكتوره جت وشافت ادهم ما سكها بيشيل ايديها من علي ودانها وبيقولها انا اهوه وهيا بتصرخ وتنادي عليه

الدكتوره: اطلع بره انت اطلع بره

ادهم: انا عايزاها تشوفني انا قدامها اهوه

الدكتورة: وكده هتشوفك؟؟؟ اطلع بره سيبها ترتاح وهيا هتفوق لوحدها

عطوها حقن مهدئه تاني ونامت تاني

ادهم هيتجنن عليها ومش عارف يعمل ايه؟

الكل بيجي ويمشي الا هو مش عايز يتحرك ابدا من جنبها

علي: ادهم روح ارتاح شويه

ادهم: انا مش تعبان ما تشغلش بالك انت بيا

على: طيب يا ابني روح بس غير هدومك ات بقالك 4 ايام لابسها وبصراحه ريحتك لا تطاق

ادهم: انا بغير هدومي ومعايا شنطتي ولا ناسي اني جاي من المطار علي هنا

علي: شكلك علي بعضك مش حلو روح احلق وغير ونام وتعالي فايق حتي البت لو فاقت ما تتطفش منك

مع اصرار الكل ادهم روح فعلا

ريهام: حبيب قلبي وحشتني

جريت عليه بس هو تجاهلها وطالع علي السلم

ريهام: ادهم استني

ادهم: عايزه ايه؟

ريهام: ليلي عامله ايه؟

ادهم: وتهمك في ايه؟ ولا بتتطمني هتخلصي منها ولا لأ؟

ريهام: لا ابدا بطمن عليها انت بتحبها خلاص براحتك وانا هحب حبك ليها

ينفع ازورها؟

ادهم: لأ ما ينفعش وبعدين لسه ما فاقتش اصلا

سابها وطلع وهيا ابتسمت انها ما فاقتش واتمنت انها ما تفوقش اصلا

ادهم فعلا مجرد ما دخل اوضته ولمس السرير نام ونام كتير جدا نام لتاني يوم وصحي استغرب هو ازاي نام كل ده؟

ادهم حلق واخد شاور وراح لليلي واول ما وصل اتفاجئ بيها فايقه وبتتكلم مع ماجده

ادهم: ادخل؟

ماجده: طبعا ادخل اهو جه اهو يا ستي _ سالت عنك مليون مره

ادهم: وما اتصلتيش بيا ليه؟

ماجده: علشان ترتاح هقوم افطر انا وانت اهو معاها

خرجت ماجده وهو بصلها

ادهم: عامله ايه؟

ليلي: كويسه

ادهم قرب وقعد جنبها علي السرير قصادها

ادهم: انا اسف اني مشيت

ليلي: لا عادي قالولي انك فضلت جنبي الاربع ايام اللي فاتو

ادهم: في ايه مالك؟ مش طبيعيه ليه؟

ليلي: لا عادي متهيألك

ادهم قرب ايده من ايدها واول ما لمسها شدت ايدها بسرعه

ادهم: في ايه؟

ليلي: ما فيش تعبانه وعايزه ارتاح ممكن؟

ادهم: انتي بتتطرديني؟؟

ليلي: لا بس بقولك تعبانه

ادهم: مالك يا ليلي؟؟؟ قولي علي طول في ايه؟

ليلي: ما فيش انا بقيت كويسه اهوه ممكن تمشي

ادهم: امشي فين؟

ليلي: ماطرح ما كنت ماشي روح مش هوقفك

ادهم: ليلي

ليلي: ليلي ايه؟ مش كنت ماشي قوم اتفضل امشي يالا روح __

ادهم: ممكن تهدي؟

ليلي: لا مش ههدي انا مجنونه _ اتفضل بقي امشي وسيبني اتفضل

قامت ليلي وحاولت توقف وبتقع وهو بيحاول يهديها او يسندها وبتزقه وتزعق فيه وتقوله يمشي وبتضرب فيه

الكانوله شدتها من ايديها والدم بينزل من مكانها وهو بيحاول يمسك ايدها وهيا بتضرب فيه وتقوله يمشي

اخواتها جم علي صوتها وخالد هيدخل مسكته الدكتورة: سيبها تفضي كل اللي جواها سيبها تقول اللي هيا عايزاه

خالد: بس هو ممكن

الدكتورة: ممكن ايه؟ هيا بامان معاه

لازم يتصافو وما تخافش هو هيستحملها

جوه عندهم هيا بتضربه علي صدره وهو بيمسكها ويهديها ويمسك ايدها اللي بتنزف مكان الكانوله

ليلي: امشي وسيبني لوحدي واهرب يالا

امشي وما تبصش وراك ابدا

امشي يالا وما تفكرش فيا امشي

عيطت جامد وهو كتفها ومسك ايديها الاتنين

كتفها تماما ومقدرتش تتحرك فعيطت جامد

هو شدها لصدره وضمها وايده علي شعرها بتهدهدها زي العيله الصغيرة

ادهم: انا استاهل اكتر من كده بس ارجوكي اهدي _، حقك عليا اسف يا قلبي وروحي وكياني كله __ اسف بجد اني فكرت للحظه ابعد عنك... كنت غبي ومتخلف

ليلي: ايوه انت متخلف

ادهم: عارف وده مش هيحصل تاني ابدا مش هبعد تاني ابدا

ادهم شالها وحطها علي السرير وغطاها

ادهم: ارتاحي وحاولي تسامحيني غبي بقي تعملي ايه؟ ارتاحي

ليلي: ولو انت مشيت؟؟

ادهم: مش همشي ابدا ابدا هتفتحي عينيكي هتلاقيني جنبك اوعدك

ليلي اتحسنت تماما وخرجت من المستشفي

وريهام بتجهز لفرح ما حصلش لابنها

ادهم عملها حفله خطوبه في النايتكلب اللي مكنش عاجبها وعرفها انه بتاعه

لبست فستان تحفه وادهم عزم بس الحبايب وكانت حفله خطوبه صغيره جميله

اتحدد معاد الفرح وكل حاجه جهزت

ريهام جددت الفيلا كلها علشان تستقبل العروسه

اتعمل فرح الكل بيحكي ويتحاكي عليه

ليلي كانت اميره من الاميرات وادهم هيطير من السعاده

حسين واخد ادهم ورايحين لليلي وهما في الطريق حسين وقف علي جنب وبص لادهم

ادهم: انت وقفت ليه هنتاخر

حسين: عايز اقولك كلمتين الاول

ادهم: اهم الوصايا العشر علي قالهملي انجز

حسين: لا ما اعتقدش ان ابوك قالك اللي انا عايز اقولهولك ابوك تقريبا زيك

ادهم: انجز يا عم حسين مش عايز اتاخر قول اللي عايز تقوله

حسين: طبعا انت عارف اني بعتبرك زي ابني وعلشان كده هتكلم معاك بحريه شويه

ادهم: من غير مقدمات لو سمحت وبعدين انت من يومك بتكلمتي بحريه ما تعش بقي انجز

حسين: ليلي انت عارف ان انت اول حد في حياتها وهيا من وسط مختلف

قاطعه: عارف وهخلي بالي منها واكسترا اكسترا وبعدين

حسين: اسمع واسكت الموضوع اصلا محرج بما فيه الكفايه

ادهم: اتكلم علي طول لاني صبري بدا ينفذ

حسين: ليلي غير البنات اللي انت عرفتها

ادهم: يا صبر ايوب عارف

حسين: ممكن تسكت لتلات دقايق؟

ادهم: ماهو انت بقالك ربع ساعه بتلف وتدور حسين: اوك ليلي هتبقي ابيض النهارده ما تتوقعش منها اي حاجه

هيا مختلفه عن البنات اللي انت كنت معاهم قبل كده

ادهم: انت بتقول الكلام ده ليه انا عارف ان ليلي مختلفه

حسين: علشان ما تتصدمش لما تبني امال لليله طويله هتقضيها كلها حب وشوق وتتفاجئ بواحده واقفه قدامك مش عارفه تعمل ايه؟

ادهم: انا مش متوقع من ليلي حاجه ده اولا وبعدين انا مش جاهل قوي كده واعرف اميز بين البنات وعارف ان ليلي انا اول واحد في حياتها

حسين: عارف انها بنت وانها هتكون خايفه ومرعوبه منك

ادهم: خايفه ومرعوبه؟؟؟ ليه ان شاءالله؟؟

حسين: لان مجتمعنا هنا في حاجات كتيره بيعتبرها غلط فبالتالي البنت بتتجوز وهيا معندهاش اي فكره عن الحياه الزوجيه وعن متطلبات الراجل واعتقد ان ليلي من النوعيه دي اول ما هتكونوا لوحدكم هتلاقي قدامك انسانه مرعوبه منك وهتتصورك قدامها وحش هتغتصبها فاهم؟؟ في رجاله فعلا بتكمل الصوره وبيعتبر ان له وظيفه لازم يقضيها ولازم يثبت رجولته وفي رجاله بتفهم وتتفهم خوف البنت وبتتعامل معاه بحكمه وبيكسبوا مراتاتهم العمر كله

ادهم: وانت بتصنفني من اي نوع؟؟

حسين: انت في المجمل من النوع العاقل واللي مش محتاج يثبت رجولته لحد ومابتهتمش بعادات وتقاليد وبتحب ليلي

ادهم: طيب ده شيئ كويس

حسين: بس من ناحيه تانيه انت متربي بره وليك علاقات كتيره قبل كده وبالتالي متوقع من مراتك انها المفروض تبقي اراجوز علشان تتغلب علي كل اللي انت عرفتهم قبل كده وده مش موجود في مراتك فخايف انك تتصدم

ادهم: شوف يا عم حسين انا مقدر خوفك وقلقك عليا وانت عارف كويس اني بعتبرك زي ابويا ومتشكر جدا لنصايحك دي بس ماتخافش عليا انا عارف ليلي كويس

وعارف هيا متوقعه مني ايه وماتخافش انا مش متوقع منها اي حاجه

ليلي يوم خطوبتنا باستني في خدي فانا عارف هيا مدي خبرتها ايه؟ وما تقلقش عليا انا عارف انها كتاب ابيض ولسه هيتكتب عليه ونوعا ما الموضوع ده عاجبني ان انا اكتب اللي انا عايزه منها بالطريقه اللي انا عايزها

وبعدين مع اختلاف الثقافات ديما الراجل بيحب اللي يتجوزها تكون ابيض وهو يعلمها فماتخافش عليا ممكن بقي ابوس ايدك توديني عندها

حسين: دقيقتين وهنبقي هناك ومبروك لاحلي عريس في الدنيا

ادهم اول ما شاف ليلي اتلجم ومعرفش ينطق او يتحرك او يتكلم لحد ما ابوه زقه وقاله يروحلها

ادهم: انتي عامله كده ليه؟ ؟

ليلي بخوف: مش عجباك وحشه؟؟؟ انا قلتلهم شكلي غريب محدش

قاطعها ادهم: انت اجمل واحده شفتها في حياتي

ليلي ابتسمت واتكسفت

ادهم: لفيت تقريبا العالم شرق وغرب بس عمري ما شفت اجمل منك

ليلي: بجد شايفني جميله؟؟

ادهم: انتي بجد بتسالي؟ مش شايفاني متنح ازاي؟؟ مش باين عليا؟؟؟

ليلي ضحكت وبصت للارض وهو باسها في راسها ومد ايده ليها والمره دي شبكت ايديها في ايده

ادهم: هتسيبيها تاني؟؟؟

ليلي: عمري

ابتسموا الاتنين لبعض ويدوب بصوا لقدام وهيتحركوا علي خطف صوره ليهم بسرعه

ادهم: طيب قول انك هتصور

على: لا كنت عايز الابتسامه الصافيه مش مصطنعه

قرب لابنه وبصله ودمعه في عينه

ادهم: اوعي تقلبها دراما

علي حضن ابنه جامد

على: مبروك يا اجمل حاجه حصلت في حياتي انت اللي صبرتني في الدنيا دي وعطيتني امل وسبب اعيش علشانه

والنهارده اسعد يوم في عمري كله انك انت وحبيبتك اتجمعتوا اخيرا

اوعي يا ادهم تفرط فيها او تسيبها تضيع منك فاهم يا حبيبي؟

ادهم: فاهم يا اجمل اب في الدنيا دي كلها

وبعدين ( قرب لودنه وهمسله) كان لازم حد فين يطول حبيبته ولا ايه؟

ضحكوا الاتنين

علي: طيب الحمدلله انه انت ( بص لليلي) مبروك يا اجمل عروسه في الدنيا

خلي بالك من ادهم وافضلي حبيه ديما

ليلي: الله يبارك فيكي يا عمي وادهم جوه قلبي

ريهام سلمت عليهم وباركتلهم

طول الفرح بيرقصوا مع بعض

ادهم طلع علي الاستيج وبدا يحكي

ادهم: كله يسيب اللي في ايده ويركز معايا

( قالها زي احمد حلمي في اغنيته فكتير ضحكوا)

لا مش هقلد احمد حلمي

المهم انا عايز اقول حاجه بسيطه لليلي

ليلي انتي اجمل حاجه حصلت في حياتي

اول يوم شفتك فيه عرفت انك هتغيري حياتي كلها وفعلا شقلبتي كياني كله

واللي كان قريب مننا هيعرف انها بهدلتني كتير جدا وان حبها كان صعب قوي

طبعا اكتر واحد شاهد هو عمي حسين

انا مديونلك يا عمي حسين بالنهارده

متشكر قوي علي وقفتك معايا وعلي وقفتك ضدي لما كنت بطلع عن الطريق الصح

في ناس كتيره وقفوا جنبنا لحد ما وصلنا للنهارده وفي برضه وقفوا ضدنا وبرضه بشكرهم لان كل مشكله سببوهالنا كانوا بدون قصد بيقوا علاقتنا ببعض

كل مشكله قابلتنا خرجنا منها انا وليلي اقوي من الاول وحبنا اقوي

ليلي انا بحبك وبعشقك وعايزه علي طول جنبي وفي حضني وما تبعديش عني ابدا

ويالا كله يقوم ويهيص النهارده عايز الكل فرحان

كله يهيص

الكل فعلا هاج وهيص والموسيقى اشتغلت وادهم غني اغنيه جرالي ايه لعمرو دياب

وكان بيتنطط طول الاغنيه

وهما بيرقصوا مع بعض ادهم حاول يبوسها بس هيا بعدت

ادهم: ايه ده بقي؟

ليلي: ممكن لما نبقي لوحدنا؟

ادهم: وليه بقي ان شاءالله؟

ليلي: اول بوسه ليا في حياتي من حبيبي هفتكرها عمري كله وعايزاها مميزه

ادهم: وايه بقي اللي مش هيخليها هنا مميزه؟؟

ليلي: مش قدام الناس كده؟ مش قدام بابا وخالد وجيراني! عايزه اكون انا وانت لوحدنا مش عايزه اكون بفكر في اي شيئ تاني عايزه انا وانت وبس

مش عايزه اكون مكسوفه من حد او خايفه من حد

لكن دلوقتي هبقي مكسوفه وخايفه ومتوتره ومش هيكون ليها معني كبير بالنسبالي

ادهم: خلصتي الخطبه الطويله قوي دي؟ حفظتيها ازاي دي؟

ليلي ضربته علي صدره

ليلي: اخص عليك مش خطبه ده احساس جوايا

ادهم: خلاص يا عم ما تزوقش اللي صبرني الشهور اللي فاتت دي كلها يصبرني الكام ساعه دول بس الباقي كله متاح اتفقنا؟

ليلي: اتفقنا

ادهم بيرقص معاها وباسها جنب شفايفها برقه

ليلي: انت وعدتني

ادهم: اولا انا ما وعدتش ثانيا انا ما لمستش شفايفك مش اتفقنا ان الباقي متاح ولا بتنسي

شالها وفضل يرقص معاها وهو رافعها عن الارض

ادهم لبسها خاتم الجواز

الليله كانت الف ليله وليله

محمد شايف وفاء قرب منها

محمد: عقبالنا

وفاء: ايه؟ بتقول ايه؟

محمد: بقولك عقبالنا ولا ايه؟

وفاء: لا مفيش ولا ايه عقبالنا

ابتسمت ومسك ايديها قدام الكل ونظره طويله لامها بيوعدها فيها انها جوه عنيه

ليلي بترقص مع ادهم

ادهم: انتي بتبصي علي ايه؟ مش مسموحلك تبصي علي حاجه غيري فاهمه؟

ليلي: حاضر بس بص انت كمان هناك

ادهم بص: ابص علي ايه بالظبط؟

ليلي: محمد ووفاء

ادهم: اخيرا اخوكي اتحرك ده زهق البت

ليلي: اخويا ما اتكلمش الا لما بقي مستعد يمسك ايدها في النور وقدام الكل ولا كدب ولا لف ودوران

ادهم: انتي بتلمحي لايه سيادتك؟

ليلي: لا ولا بلمح ولا بتنيل

ادهم: ايوه اتعدلي بقي بدال ما اعدلك انا ظروفي كانت مختلفه تماما عن اخوكي ووضعي مختلف

فلو سمحتي ما تقارنينيش بحد

ليحست انه هيضايق راحت لفت ايديها حوالين رقبته

ليلي: عمري ابدا ما اقارنك بحد ابدا انا بحبك انت زي ما انت كده فاهم بعشقك وبموت فيك

ادهم: طيب مش كفايه بقي نروح

ليلي: عايز تروح يالا

فعلا ادهم وليلي روحو وطبها اللي زفهم كان عم حسين اللي كان فرحان جدا

ادهم: ايه يا عم حسين ساكت مش عوايدك؟؟

حسين: الفرحه ملجماني مبروك ليكم انتو الاتنين

ياه اخيرا اتجوزتو اخيرا

ادهم: يعني لما انت تقول اخيرا كده انا اعمل ايه؟ اخرج من هدومي؟

حسين: لا خليك جوه هدومك لحد ما تروح

ادهم ضحك هو وحسين وليلي اتكسفت جدا

وصلوا البيت وادهم طرد الكل ورفض اي حد يدخل جوه عتبه الباب حتي

قفل الباب ودخل لحبيبته

ادهم: ايه باصه للارض كده ليه تعالي

ليلي: ادهم انا

ادهم: ايوه انتي

هو بيقرب وهيا بترجع لورا

ادهم: السلم وراكي هتوقعي

ليلي: مش هقع وانت موجود

يدوب نطقتها وكانت هتقع فمسكها هو وشدها عليه

ليلي: مش قلتلك مش هقع وانت موجود

ادهم ابتسم: هو انا قلتلك قبل كده قد ايه بحبك

ليلي: قول تاني

ادهم قال بطريقه مختلفه عن الكلام

ادهم: تعرفي عمري ما تخيلت ابدا ان ممكن تكون مجرد بوسه ممتعه كده

كويس انك منعتيني ابوسك قبل كده لاني لو كنت بوستك مكنتش هكتفي بيها

قالها وشالها وطلع بيها لفوق واول ما فتح اوضه النوم ليلي صوتت

ليلي: ايه ده؟ مجنون؟؟ كل ده ليا؟؟

ادهم: فكرت افرشلك الارض ورد بس فكره تقليديه فقلت ايه اكتر حاجه بتحبيها اكتر مني

ليلي: مجنون تقوم تفرش الارض شوكولاته

ادهم فرش الارض بقلوب من الشوكلاته كل الانواع اللي ليلي بتحبها

ادهم: مش بتحبيها

ليلي: انا بعشقك انت يا مجنون

يعني ماتزعلش مني بقي لو سيبتك وفضلت افتح في الشوكلاته دي كلها

ادهم: نعم يا اختي

ليلي: هههههه حد قالك تفرش الارض والسرير شوكولاته

ادهم: تصدقي انا غلطان

دخل ادهم ويدوب هينفض كل الشوكلاته عن السرير

ليلي صرخت: استني ( بصلها) عايزه اتصور الاول معاهم

ادهم: انا كنت عارف انها ليله مش معديه

ليلي قعدت علي السرير: صورني بقي مع الشوكولاته دي كلها

ادهم: يا صبر ايوب

طلع موبيله وهيا بتتضحك وصورها وسط الشوكولاته

اصرت تبعت الصور لاخوها خالد

خالد مع اخواته ووراهم الصور واتفاجؤا بيها بتكلمهم

ماجده: يا بت يا بارده روحي لجوزك

ليلي: شوفتي يا ماجده فرشلي الارض شوكولاته

ماجده: طيب روحيله بقي

ليلي: انا بحبه قوي

ماجده: ولما انتي بتحبيه روحيله بقي

قفلت ليلي وبصت لجوزها اللي مستنيها

ادهم: نفسك في ايه تاني؟ شاوري

ليلي: فيك انت بقي

سكتت شهرزاد عن الكلام المباح

الصبح ريهام وعلي جم الفيلا هما والشغالين وحاولو بقدر الامكان ما يزعجوش العروسين

على: ريهام جهزيلهم فطار بقي وطلعيه عندهم وسيبيهم براحتهم اوك انا رايح مشوار كده

ريهام: روح انت وما تقلقش

علي مشي وريهام دخلت المطبخ مع خدامتها المقربه كريمه

كريمة: هنعملهم فطار يا هانم ولا ايه؟ اهي جت اهي وهتبقي الكل في الكل

ريهام: اخرسي معدش غير بتاعت الشوارع دي اللي تبقي الكل في الكل

كريمة: هتعملي ايه يا هانم؟

ريهام: خليها بس الاول تدلع ابني شهر العسل وبعدها لو ادهم ما رماهاش هخليها تقول حقي برقبتي هعلمها ازاي تبص لاسيادها

خليه بس يعيشله يومين واهي بنت يتمتع بيها شويه جهزيلهم الفطار وطلعيه

ادهم صحي علي الباب بيخبط فتح عنيه كانت ليلي نايمه في حضنه جميله رقيقة ناعمه

صحيت هيا كمان علي الخبط فتحت عنيه لقته بيبصلها

ليلي: صباح الخير

ادهم: صباح الحب والجمال والرقه

ليلي بكسوف: الباب بيخبط

ادهم: ما يخبط

ليلي: قوم افتح

ادهم: مش عايز اقوم

ليلي: قوم بقي ممكن يكون حد جايبلنا اكل

ادهم: انتي جعانه؟؟

ليلي: لا مش جعانه انا ميته بس

ادهم ضحك : لا يبقي كده اقوم

قام ولقاه الفطار

ادهم: تسلمي يا كريمه حطيه وروحي

كريمة: حاض يالهووي الاوضه اتبهدلت بالشوكولاته

ادهم: وانتي مالك يا وليه انتي حطي الاكل وروحي

كريمة: بس دي كل حاجه اتوسخت شوكولاته

ليلي غطت وشها من كسوفها

كريمة: السجادة الارض المرايه مفرش السرير الجديد يا لهووي

ادهم: خلصتي لطم ولا لسه عندك باقي؟؟؟

لو خلصتي اطلعي بره علشان لسه في شوكولاته ما اتفتحتش واماكن عايز ابهدلها ده لو مش عندك مانع يعني؟؟

كريمه: بس يا بيه

ادهم بصوت عالي: بره يا كريمه بره يالا

ادهم خرجها وقفل الباب

ادهم: ايه الوليه دي؟

ليلي كشفت وشها وهيا ميته من الضحك

ليلي: هيا عندها حق الاوضه باظت

ادهم: بس غريبه ما اديتينش درس في التوفير والفلوس والمحافظه

ليلي: عايز الحق؟ الاوضه مش عجباني كئيبه

ادهم: اممم بقي كده هقول لحماتك

ليلي: لا يا ادهم اخص عليك

ادهم: هههههههه مش هقولها بس تدفعي كام؟

ادهم بيتكلم وبيقرب وهيا بتتغطي

ليلي: انت عايز ايه؟

ادهم: عايز كل خير

ونسيبهم يبدؤا حياتهم مع بعض

الصراحه ديما جميله مهما كانت صعبه

والكدب عواقبه مش حلوه ابدا

ادهم وليلي تخطوا الصعوبات لحد ما اتجوزا بس هل الحياه هتفضل وردي ليهم؟

ادهم اخد ليلي وسافر بيها وقضوا احلي شهر عسل في الدنيا

سافر بيها بره مصر فسحها في كل مكان سبق وراحه وعجبه وحب يشوفه بعيون حبيبته

ليلي كانت مبهوره بكل حاجه بتشوفها وحست ان الحياه اجمل من انها تكون حقيقه

عايشه زي اجمل حلم ممكن تتخيله

فسح لعب حب رومانسية ضحك كل شيئ ممكن اي واحده تتمناه

ادهم كمان عرف معني الحب الحقيقي ايه

وداق طعم الحلال ولقاه احلي بكتير من الف متعه رخيصه او سهره مع كاس

اتعلم مع ليلي حاجات جميله وزي ما هيا بتتعلم اداب واتيكيت التعامل مع الطبقه دي بتعلمه هو كمان اخلاق وقيم هو مفتقدها

الاتنين بيكملوا بعض

وطبعا الحياه ما بتفضلش وردي علي طول

وكل حلم لازم نصحي منه مهما يطول

رجع ادهم وليلي لمصر وطبعا مع اصرار ابوه وامه اضطرا ادهم يوافق انه يستقر معاهم وليلي وافقت انها تفضل معاهم ومكنتش عارفه ايه مستنيها

ادهم بينزل شغله خفيف وباقي الوقت مع مراته سواء في البيت او بياخدها ويخرج

اول مره خرجوا فيها راحو النايتكلب بتاعه

واول ما وصلوا ونزلت ليلي من العربيه وقفت

ادهم: وقفتي ليه المره دي؟؟ خايفه من ايه؟

ليلي: مش خايفه بس ليا ذكريات مش حلوه هنا

ادهم شدها من ايدها: تعالي نعمل ذكريات جديده حلوه

ضمها ودخل بيها واول ما دخل كل الشغالين جم وباركوله

اخدها وقعد وسط دهشتها في نفس المكان اللي قعدوا فيه

ادهم: مالك بتبصيلي كده ليه؟

ليلي: الكل عارفك هنا ليه؟ والمره اللي فاتت محدش اتكلم

دخل جرسون

الجرسون: تامرني بايه يا افندم؟؟

ادهم: سيبنا دلوقتي ولا اقولك هات عصير مانجه فريش

سابهم الجرسون

ادهم: مش دي اكتر حاجه بتحبيها

ليلي: ________،،

ادهم: مالك في ايه؟؟ عايزه تتخانقي؟؟؟

ليلي: مش حكايه عايزه اتخانق انا سالتك سؤال ومستنيه اجابتك

ادهم: سوري ايه هو السؤال بقي؟؟؟

ليلي: ليه المره اللي فاتت اتصرفوا كده؟ لما الكل هنا عارفك

انت مخبي ايه عليا؟؟ كنت بتجيب صحباتك هنا؟؟؟ وكل مره ببنت شكل صح؟؟؟

ادهم: خلصتي افتراضات ولا لسه؟ اولا لأ مجبتش بنات هنا

ثانيا انا جايبك هنا لاني عايز اوريكي المكان ده لانه مهم بالنسبالي واتضايقت جدا انه معجبكيش فقلت نيجي تاني تشوفيه بطريقه مختلفه

ثالثا هما اتصرفوا كده لاني طلبت منهم ده

ليلي: ليه مهم؟؟

ادهم: لانه بتاعي وبحبه جدا وبهتم بيه جدا

ليلي :علشان كده قلبتها نكد معايا

ادهم: انا مقلبتهاش نكد انتي اللي كنتي محبكاها قوي

ليلي: انا محبكاها؟؟؟ تاني يا ادهم؟؟

ادهم: ولا تاني ولا تالت المهم ايه رايك في المكان؟؟

ليلي: انا مفهمش في الحاجات دي

ادهم: ليلي قولي رايك وبلاش لف ودوران

ليلي: مناسب للوسط بتاعكم

ادهم: تاني الوسط بتاعنا وبتاعكم؟؟؟

ليلي: سوري مناسب للطبقه الغنيه كده احسن

ادهم: اسعاره مش غاليه قوي

ليلي: بالنسبالك اه

ادهم: قصدك ايه؟

ليلي: بالنسبالك انت مش غاليه

انت عندك استعداد تدفع الف او اتنين في غدوه عادي غيرك الالف دي ممكن يحوش فيها كذا شهر علشان عمليه مثلا او يشتري حاجه مهمه في بيته مثلا

هنا مثلا ( مسكت المانيو) اقل حاجه فيها ب 50 جنيه وده تمن كوبايه شاي ☕

ال 50 جنيه دي بالنسبة للناس العاديه تغدي عيله كامله يومين

ادهم: خلصت درس الفروق الاجتماعيه؟؟؟ و فرق الطبقات؟؟؟

ليلي: لا مخلصتش ده بالنسبه للاسعار

المكان ظلمه قوي والخصوصية اللي انت بتتكلم عنها دي شيئ مش حلو لان انت عارف كويس انك كل واحد معاه واحده داخلين هنا بيبقوا داخلين لسبب واحد الخصوصيه دي

وانت فاهم كده كويس زي ما انت ما جبتني هنا وكنت عايز تاخد راحتك معايا صح؟

ادهم: انا مكنتش جايبك هنا علشان كده

ليلي: امال جبتني ليه؟ وقفلت الستاره ليه؟

ادهم: وبعدين عايزه توصلي لايه؟ اخره الكلام ده ايه؟

ليلي: انت سالت عن رأيي وانا جاوبتك يبقي ما تزعلش منه

ادهم: تصدقي اني غلطان اني سألتك

ليلي: وعلي فكره كل اتنين بيدخلو هنا وبيعملوا حاجه غلط سواء مسكه ايد او بوسه او حضن انت بتاخد ذنب عليه

تخيل بقي خصوصيتك دي بتركبك ذنوب قد ايه كل ساعه وكل لحظه!!!!!

ادهم: ليه بقي انا مالي؟؟؟

ليلي: انت هيأت المكان لكده،،،، سوري يا حبيبي بس انت عامل زي اللي فاتح بيت دعاره ويقول انا مالي

ادهم: انا زي قواد يا ليلي

ليلي: انا اسفه ان

ادهم: لا خلاص اقفلي الكلام لحد هنا

يالا بينا

ليلي: تاني هنمشي بنفس الطريقة تاني؟ ؟

ادهم: يالا قومي

قام وقف

ليلي: مش هقوم اسفه لو كلامي ضايقك بس كان لازم اقوله

ادهم: قومي

ليلي: اقعد لو سمحت

ادهم: هتقومي ولا لأ؟

ليلي: لأ اقعد انت

ادهم: خلاص براحتك وقت ما تحبي روحي انتي عارفه عنوان البيت ؟

سابها ومشي ومردش عليها وهيا بتحاول تكلمه

ادهم طول اليوم مخنوق ومتضايق منها ومن رأيها في مكانه المفضل

ليلي روحت وحبست نفسها في اوضتها

ادهم رجع البيت اخر النهار وبغير عوايده ما طلعش لاوضته جري زي كل يوم

كريمه جريت للهانم ريهام اوضتها

كريمة: يا هانم مش قولتلك انهم متخانقين

ريهام: مين قالك؟؟

كريمه: هيا حابسه نفسها في اوضتها وشكلها معيط والبيه رجع وقاعد تحت ماطلعش عندها زي كل يوم

ريهام: كويس يبقي احنا نبدأ بقي

ههههههههه ايامك بقت معدوده يا بنت الساقيه

__________________________________

ريهام نزلت وجهزت السفره واتلموا كلهم ياكلوا

ريهام: ادهم حبيبي مش هتنادي علي مراتك؟

ادهم: ابعتيلها حد ينادي عليها

علي: مالك؟ انتو متخانقين ولا ايه؟

ادهم: ولا متخانقين ولا متنيلين

ريهام: كريمه كريمه __ نادي علي ليلي

طلعت كريمه لليلي

كريمة: يالا يا هانم السفره جاهزه وكلهم مستنينك

ليلي: لا هستني ادهم

كريمة: سي ادهم بيه تحت معاهم

ليلي: ادهم تحت؟؟؟ طيب مطلعش ليه؟

كريمه: معرفش تحبي اسألهولك؟؟

ليلي: لا انا نازله روحي انتي

ليلي زعلت لان دي اول مره ادهم ما يجليهاش

هو معقول زعلان كده؟؟ لازم تصالحه بسرعه

نزلت وقعدت مكانها

ليلي: حمدلله علي السلامه جيتو امتي؟؟

ادهم مردش فاضطر علي يرد

على: يدوب واصلين بس واقعين من الجوع وعلشان كده دخلنا علي السفره علي طول ولا ايه يا ادهم؟؟

ادهم: اه

ليلي: مالك حبيبي؟؟

ادهم بصلها: ماليش

اكل معلقتين وساب الاكل وقام

ادهم: كملوا انتو انا مش جعان بعد اذنكم

طلع لفوق

ريهام: ليلي حبيبتي انتي مزعله ادهم؟؟؟

علي: ريهام سيبيهم في حالهم

ليلي: انا مكنش قصدي ازعله هو اخدني المطعم بتاعه وسألني عن رايي وقلتهوله وهو زعل

على: sun rise ده ادهم بيعتز بيه جدا ايه اعتراضك عليه؟؟

ليلي: ما اعترضتش علي المكان اعترضت علي الخصوصية قوي دي

علي: ماهو ده اكتر حاجه بتميزه

ليلي: ودي اكتر حاجه غلط هو بيشوف بطاقات الناس اللي داخله وعايزين الخصوصية دي ولا هيا ذنوب وخلاص بيكسبها

على: والله يا بنتي عندك حق انا مبصتلهاش كده خالص بس فعلا وجهه نظر تحترم جدا

علي العموم سيبيه يهدي وهو هيسمع كلامك وهيعرف انك بس خايفه عليه اطلعيله بس ما تتكلميش في الموضوع ده

ليلي طلعت لادهم اللي كان بياخد شاور

ريهام: ماعدش غير دي اللي هتعدل عليكم

ما تخلوها تقف علي الاستيج وتخطب احسن

على: هيا بتتكلم صح ايه مشكلتك؟؟

ريهام: انا؟؟ انا معنديش مشاكل بعد اذنك

ليلي خبطت علي ادهم ومردش عليها

فتحت الباب وبصتله كان راقد في البانيو ومغمط عنيه

دخلت وقعدت جنبه علي الدرجه اللي جنبه

ليلي: حبيبي ما تزعلش مني اسفه لو ضايقتك

ادهم: ___________

ليلي: ميبقاش قلبك اسود بقي

ادهم: خليه اسود علشان يبقي لايق مع القواد

ليلي: انا مقلتش كده انت اللي قلت كده

ادهم: ومعناه ايه لما ابقي فاتح مكان للدعاره؟؟؟

ليلي: برضه مقلتش كده

ادهم: امال قلتي ايه؟

ليلي قربت منه ومسكت وشه بايديها وبصتله

ليلي: قلت اني مش عايزه اغلي انسان عندي يشيل ذنب حد من غير قصد

المكان جميل بس نوره وشيل الستاير دي

خلي اللي يقعد يقعد في النور وبس

اسفه لو خاني التعبير مش قصدي

ادهم: انا لما اخدتك مكنش قصدي اللي قولتيه

اه فكرت اعمل ده بس ما اخدتكيش هناك علشان كده

ليلي: عارفه

ليلي قربت اكتر منه

ليلي: صافيه لبن؟؟؟

ادهم: المفروض اقول ايه؟

ليلي بضحك: حليب يا قشطه

ادهم: ماشي حليب يا قشطه

ليلي: في مكان ليا؟؟

ادهم جاوبها بابتسامه

وتاني يوم نزلوا الاتنين ايديهم في ايدين بعض

علي شافهم وابتسم لانه عارف صلح العشاق بيبقي اجمل ما يكون

ريهام النار ولعت جواها

نزلوا الرجاله علي الشغل وليلي وريهام فضلوا مع بعض

ريهام: حبيبتي يا ليلي انت بتعرفي تتطبخي صح ولا ايه؟

ليلي: ايوه طبعا بعرف

ريهام: ينفع اطلب منك طلب وبراحتك لو مش عايزه براحتك طبعا

ليلي: لا يا ست الكل انتي بس تشاوري

ريهام: تسلمي يا قلبي بس كنت عازمه صحباتي علي العشا النهارده وانا كنت وعدتهم باكله محشي معتبره وصراحه كريمه ملهاش فيه بتعمله بس اجارك الله ما يتاكلش اوعي تقوليلها هههههه

ليلي: بس كده من عنيا هعملك اكله محشي يحلفوا بيها

ريهام: تسلميلي يا قمر يعني اتكل عليكي؟

ليلي: طبعا واهو الوقت بدري هلحق ما تقلقيش بعد اذنك ابدا انا بس هيكونوا كام واحده كده؟

ريهام: مش كتير 10 او 15

ليلي : حاضر

ليلي يالهووي كل دول مش كتير امال لو كتير كانت عزمت كام؟

يالا ابدا بقي خليني اخلص

دخلت ليلي المطبخ ولقت كريمه ومعاها بنتين كمان مريم ونجاه

كريمة: يالا يا مريم اطلعي نضفي الدنيا وجهزيها علشان الناس اللي جايه ونضفي بزمه وانا هساعدك

مريم: حاضر

كريمة: وانتي يا نجاه خدي الواد صبحي واطلعي هاتي الطلبات كلها واوعي تنسي حاجه يالا وما تتاخريش

مشيوا البنتين وفضلت ليلي وكريمه

كريمة: هاه قوليلي هتحتاجي ايه؟

ليلي: حاجه المحشي وخضره وطماطم وبصل وتوابل يعني الحاجات دي

كريمه: حاجه المحشي اهي

( اتفاجئت ليلي بالكميه وان تقريبا كل انواع المحشي هتتعمل)

ليلي: كل ده؟

كريمه: امال انتي فاكره ايه المهم

هنا التوابل وهنا وهنا

عرفتها كريمه مكان كل حاجه وجهزتهالها

كريمة: اسيبك بقي واطلع اشوف اللي ورايا ولو احتجتي حاجه اطلبيها

سابتها كريمه ومشيت لريهام

ريهام: عملتي ايه؟

كريمه: اهي في المطبخ

ريهام: لوحدها؟؟؟ مش عايزه حد يساعدها عايزاها اخر الليل تبقي مهدوده وعلي اخرها

كريمة: دي اخر النهار هتلاقيها خلصت خالص ماتخافيش والبنات وزعتهم

ليلي في المطبخ اتصلت بماجده وحكتلها اللي حصل

ماجده: اجيلك اساعدك؟؟

ليلي: لا طبعا دي اول مره تتطلب مني حاجه ااقوم اجيب اخواتي يعملوها لا لازم اثبتلها اني اقدر اعمل اي حاجه ادعيلي

بدأت ليلي رحله عذابها واخدت النهار كله في المطبخ تجهز لعزومه ريهام

ادهم رجع اخر النهار واول ما دخل بعادته بينادي على ليلي

ريهام سمعته ونزلت بسرعه وليلي كمان سمعته وخرجتله

الكل هنا اتفاجئ

ليلي اتفاجئت باصحابه الموجودين

و ادهم اتفاجئ بمنظر ليلي بشعرها المنكوش والمريله وريحه البصل والخضار اللي جايبه اخر الدنيا

كان معاه اتنين من اصحابه او بمعني اصح منافسيه في الشغل وعايز يعرفهم علي مراته

و ريهام مبسوطه لان خطتها ماشيه بالظبط زي ماهيا عايزه

رجل الاعمال كريم: الظاهر ان مرات حضرتك ست بيت شاطره؟؟

ادهم: الظاهر كده،،، هناكل النهارده من ايدك؟؟

ليلي: هتتعشي احلي عشوه في حياتك اصبر

اتفضلوا كلكم

دخل ادهم واصحابه وهما بيبصوا لبعض

وادهم اعتذر منهم وسحب مراته وطلع وهو طالع لمح امه

ادهم: لو سمحتي يا ماما شوفي ضيوفي وقابليهم

ريهام: من عنيا حبيبي،،، مراتك اصرت تاكلك النهارده من ايديها

ريهام بصت لليلي بصه رجاء وتمثيل طبعا انها ما تقولش لادهم الحقيقه

ادهم اخد مراته وطلعوا اوضتهم واول ما دخلوا قفل الباب وزقها لجوه بعنف

ليلي: في ايه مالك؟

ادهم: انتي اللي في ايه؟

ليلي: مالي في ايه؟ مش فاهمه

ادهم: مش فاهمه؟؟؟ انتي مرات اكبر رجل اعمل في الشرق الاوسط كله وده منظرك

ليلي: ماله منظري؟؟؟

ادهم: مش عارفه ماله

ادهم شدها ووقفها قدام المرايه

ادهم: اتفرجي شوفي ماله شعرك لبسك المريله دي ولا ريحتك ايه ده؟

ليلي زقته بعيد

ليلي: انا مش فاهمه انت متضايق ليه؟ حبيت اعمل لجوزي اكل ارتكبت جريمه؟

ادهم: محدش طلب منك تعملي اكل وانا بطبيعتي ماليش في الاكل علي قد كده

وبعدين في شغالين في البيت ممكن تقوليلهم يعملوا اللي انتي عايزاه

ليلي: انا عايزه اعمل بايدي

ادهم: ولا تعملي بايدك ولا برجلك اتفضلي غيري القرف اللي انتي لبساه ده اتحركي واستحمي علشان ريحتك دي اتفضلي

ليلي: كل ده ليه علشان اصحابك انت جايبهم يتفرجوا عليا؟؟

ادهم: يتفرجوا؟؟؟ مش هرد عليكي لاني لو رديت هتزعلي اتفضلي عشر دقايق وتنزلي

سابها ونزل وهيا عيطت لوحدها

وفكرت انها ما تنزلش وتفضل كده

الباب خبط ودخلت ريهام

ريهام: اسفه اسفه حقك عليا انا

ليلي: لا وحضرتك ذنبك ايه؟

ريهام: انا قلتلك تعملي اكل واسفه اني خليتك تخبي عنه بس هو لو عرف اني طلبت منك هيعملهازعله كبيره وهيقول ان انا قصدي ايه وايه لكن كده انتي مجرد زوجه وعايزه تاكل جوزها من ايديها

ليلي: بس هو زعل قوي

ريهام: علشان بس اصحابه قومي شاور كده والبسي وانزلي واول ما يدوق الاكل هيجي يبوس ايديكي قومي يا حبيبتي

ليلي سمعت كلامها لبست واتشيكت ونزلت وقامت بدور المضيفه وعدت اول حفله بامان

الكل اتعشي وشكر جدا في الاكل

اما ادهم فكان عادي مش فارق معاه ابدا

علي شكر ليلي جدا علي الاكل

كريم ونادر اصحاب ادهم شكروا ليلي بصفة شخصيه بس ادهم طول الوقت متضايق ومخنوق

ريهام بتتبع اسلوب تضرب وتلاقي

الساعه وصلت يدوب 10 وليلي قاعده متوهه وبتتاوب كل شويه

علي: ادهم اسحب مراتك كده بلطافه وطلعها لاحسن دي هتنام علي نفسها وشكلها هيبقي وحش قوي

ادهم وصل لقمه غضبه بس قام بكل هدوء واعتذر واخد مراته وطلعها اوضتها

ليلي: عملت ايه المره دي؟

ادهم: بجد بتسالي؟؟؟ مش هرد عليكي

اتفضلي نامي واشبعي نوم

سابها ونزل وهيا فضلت تعيط لحد ما الحفله خلصت وهو طلع لقاها قاعده وبتعيط بس هو كان جايب اخره

بصلها ودخل الحمام غير هدومه وطلع سريره

ليلي: ادهم انا

ادهم: انا تعبان وعايز انام

عطاها ظهره وطفي النور وسابها مع دموعها

تاني يوم ادهم قضاه في شغله وريهام اخدت ليلي طول النهار تلف بيها علي الاسواق بحجه انها تشتريلها لبس وطبعا خلت ليلي طول الوقت تمشي وراها تشيل شنطها وخلتها مهدوده تماما

اخر النهار روحو

ريهام: اطلعي يا حبيبتي قيسي الحاجة اللي اشتريناها ونقي فستان حلو كده البسيه لجوزك زمانه جاي يالا قومي وصالحيه بقي

ليلي طلعت فعلا لبست وبقت قمر بس قمر بينام

ليله امبارح قضتها عياط واليوم اللي قبله كان كله شغل واليوم ده كانت علي رجليها النهار كله

ادهم وصل واتعشوا كلهم وقعدوا مع بعض

ريهام: ينفع يا ليلي تعمليلنا قهوه ده طبعا بعد اذن ادهم

ادهم: اذني انا!!! ليه اذني هيا دي محتاجه اذن طبعا يا ست الكل تعملك... ممكن يا ليلي؟؟

ليلي: طبعا

دخلت ليلي تعملهم قهوه وكوبايتها حطت فيها قهوه كتير علشان تعرف تصحي

ريهام بره: مراتك تنفع ست بيت ايه ميه ميه

ادهم: وانا مش عايزها ست بيت ما تدخليهاش المطبخ

ريهام: واحده عايزه تعمل لجوزها اكل اضربها؟؟

ادهم: لا متضربيهاش

ريهام: ايه رايك في فستانها اخدتها النهارده وجيبتهولها هو وشويه حاجات

ادهم: اه حلو تسلمي يا ست الكل

بقولك يا ماما

ريهام: قول يا قلبي

ادهم: حاولي تعلمي ليلي اذاي تتصرف وازاي تتكلم يعني خليها تتعلم منك

ريهام ؛ من عنيا حبيبي بس انت متخيل ان بنت زيها ممكن تبقي زيي

ادهم: لا طبعا عمرها ما هتبقي زيك بس معلش حاولي

ريهام: هحاول بس هيا توافق النهارده بالعافيه اخدتها معايا

ليلي طلعت بالقهوه وشربوها وهيا حاولت تفوق بس للاسف النوم غلبها

على: ادهم مراتك شيلها والنبي وطلعها

ادهم متغاظ جدا منها بس اضطر علشان ابوه يشيلها وطلعها فوق وحطها علي السرير وكل ده وهيا مصحيتش

حاول يصحيها بس للاسف هيا مقدرتش تصحي

الصبح ادهم نزل قبل ما هيا تصحي

ليلي صحيت ونزلت لقت ريهام في الجنينه طلعتلها كانت عامله نفسها بتزرع ورد

ليلي: اساعدك؟؟

ريهام: تعالي

شرحتلها ريهام بتعمل ايه وخلتها تقعد تزرع وطبعا هيا بتقعد مرتاحه وتشغل ليلي

ادهم رجع كانت ليلي طلعت بس ملحقتش تغير

اول ما شافها هدومها طينه وحتي وشها فيه طينه يدوب هتتكلم

ادهم رجع كانت ليلي طلعت بس ملحقتش تغير

اول ما شافها هدومها طينه وحتي وشها فيه طينه يدوب هتتكلم

ادهم: مش عايز اسمع

سابها ودخل غير هدومه وخرج يسهر بره

هيا عرفت من علي ان عنده عشا بره شغل

كل يوم ريهام بتخترع شغله شكل لليلي بحيث تشغلها بيها طول النهار وادهم يرجع اخر النهار يلاقي مراته مش مستعده نهائي لاستقبال جوزها

لابقي عارف يتكلم معاها ولا يقعد معاها ولا حتي ياخد حقوقه الشرعيه منها لانها بتنام بدري جدا

وبدا يسال نفسه هو اتجوزها ليه؟

يوم وري يوم المسافه بتبعد بين ادهم وليلي

ليلي ساكته ومش عارفه تقول لادهم ان امه بتشغلها طول النهار

وادهم بدا يندم علي قراره وتحديه لامه وجده3

علي مع ادهم في الشغل

علي: مالك يا ادهم في ايه؟

ادهم: في ايه مالي!؟؟

علي: انت وليلي مالكم؟؟؟

ادهم: انا وليلي ملناش مالك انت؟

علي: حاسس ان في حاجه مش مظبوطه

مفيش الحب والشعله اللي بينكم وانت بتهمل مراتك جامد

ادهم: انا بهملها؟؟؟؟؟ هههههههه بجد؟

علي: ايه اللي يضحك؟؟

ادهم: كلامك قال انا بهملها قال!!! هو انا لاقيها اصلا

انا مش عارف اصلا انا اتجوزتها ليه

على: علشان بتحبها وبتعشقها كمان... اوعي تنسي ده

ادهم: وهو فين الحب ده؟ ليلي زرعت نفسها في شغل البيت ومهما اقولها مفيش فايده

على: اصبر عليها النقله كبيره برضه يا ادهم

وبعدين انت بتحاول تخليها تنسي عمرها كله وده مش سهل هتاخد وقت لحد ما تتطبع زينا وتتعلم، انت حاول معاها تخرجها تاكلوا بره تعلمها يا اخي انجليزي خليها تاخد كورسات بحيث تسافر معاك وتشاركك اهتماماتك

ادهم: وانت متخيل ان انا ما بحاولش اعمل كده؟

قلتلها علي الكورسات وطنشت وحجزتلها كمان واعتذرت مره وري مره

مش عارف اصلا اعمل معاها ايه؟

علي: اصبر عليها

ادهم: اديني صابر انت شوفتني عملت ايه يعني؟

ادهم روح بدري واخد ليلي يتغدوا بره

اتصل بيها وقالها تجهز بسرعه قدامه دقايق ويوصلها تنزله

ليلي كالعاده في المطبخ طلعت تجري وريهام عطلتها شويه

ليلي غيرت هدومها بس ملحقتش تاخد شاور

حطت برفان ونزلت لادهم بسرعه اللي كان بدا يضايق من تاخيرها

اول ما ركبت معاه

ادهم: متصل بيكي من بدري علشان تجهزي بتعملي ايه كل ده؟

ليلي: اسفه معلش

ادهم: ما علينا المهم عاملك مفاجاه وحبيت انك اول واحده تشوفيها

ليلي: بجد مفاجأة ايه؟

ادهم: هتبقي مفاجأة ازاي لو قلتهالك

اخدها علي مطعمه sun rise وقبل ما يدخلوا غمي عنيها

ليلي: تاني المكان ده؟

ادهم: اصبري عليا

مسك ايديها ودخلها وبعد ما دخلو شال الغمامه من علي عنيها واتفاجئت ليلي باللي شافته

المكان اختلف تماما

النور في كل مكان والديكور اتغير وموضوع الخصوصيه اتشال تماما

ليلي فرحت جدا وادهم فرح بفرحها ده

اتغدوا مع بعض وفضلوا يدردشوا واكتشف ادهم انها وحشاه جدا دي ليلي حبيبته اللي حبها واتجوزها مسك ايديها بحب

ادهم: تعالي معايا

ليلي: فين؟

ادهم: هتشوفي

اخدها ادهم لمكان معزول جوه المطعم زي اوضه ديكورها رائع معزوله ومفتوحه علي النيل والمنظر منها تحفه

ليلي عجبتها الاوضه جدا

ادهم: الحمدلله انها عجبتك بس قبل تسمعيني درس الخصوصية انا قلت للعمال هنا ان اي حد يحجز حاجه من دول لازم يكونوا متجوزين غير مسموح لاي حد تاني

ضحكت ليلي: انا بحبك قوي

ادهم قرب منها ومد ايده: تسمحيلي بالرقصه دي؟

ليلي: طبعا

ادهم شدها لحضنه جامد وبدؤا يرقصوا مع بعض

ادهم اول ما ضمها جامد اتضايق جدا وبدا يتخنق وبعد شويه ما قدرش يسكت فبعد عن ليلي وبصلها باستغراب

ليلي: ايه مالك؟

ادهم: انتي ريحتك ايه؟

ليلي: ريحتي ايه؟

ادهم: انتي بتساليني انا معرفش ريحتك غريبه انا جايبلك برفانات من باريس ريحتها فوق الرائعه

ليلي: وانا حاطه منها

ادهم: ريحتك غريبه

ليلي: اوكي يا ادهم كنت في المطبخ لما كلمتني واتعطلت واتاخرت عليك وملحقتش اخد شاور فغيرت هدومي بسرعه ونزلت

ادهم: وبعدين؟؟

ليلي: وبعدين ايه؟؟

ادهم: لحد امتي؟

ليلي: لحد امتي ايه؟

ادهم: هتفضلي في المطبخ؟؟؟ ريحتك علي طول بصل انا مش عايز طباخه انا عايز زوجه يا ليلي عايز حبيبه عايز واحده افضفض معاها لما ابقي مخنوق عايز واحده ارمي نفسي في حضنها وانا تعبان مش عايز طباخه عندي بدل الواحده 4 ولو عايز تاني هجيب لامتي بقي انا زهقت وتعبت

ليلي: مش بايدي

ادهم: نعم ياختي امال بايد مين؟ هاه؟ حد بيطلب منك تدخلي المطبخ؟؟؟

ليلي :______

ادهم: ردي عليا (بصوت عالي)

ليلي: مامتك بتتطلب مني اساعدها

ادهم شدها من ايديها وواخدها لبره

ادهم: طيب انا هتصرف معاها

ليلي طول الطريق بتحاول تهدي ادهم او تقنعه ما يتخانقش مع مامته وهو مش بيرد لحد ما وصلو البيت دخل زي المجنون وفضل ينادي علي امه وليلي بتعيط جنبه

ريهام: في ايه بتزعق كده ليه؟

ادهم: هو سؤال واحد؟ انتي بتجبري ليلي تدخل المطبخ؟؟؟

ريهام: ايه بجبرها؟؟؟ بجبرها؟؟؟ تصدق بعلقلها المشنقه كل يوم بعد ما تنزل وبمسكلها الكرباج

ادهم: من غير تريقه لو سمحتي

ريهام: علشان طلبت منك مره تساعديني في تجهيز الحفله بقيت بجبرك!!!!

ليلي بصتلها بذهول بقي كل ده مره

ريهام: انتي عايزه توقعي بيني وبين ابني؟؟

ليلي: لا ابدا والله

ريهام: لا يا ادهم مراتك مش عارفه تقوم بواجبها معاك ما تحطش السبب عليا

ويا سيدي مش هكلمها خالص ولا لساني يخاطب لسانها ده يعجبك

ليلي: ماما انا مش قصدي

ريهام: ماما ايه وزفت ايه انتي خليتي فيها ماما؟؟ خلاص يا ستي لو ناديتلك حتي ما ترديش عليا اتفقنا واهو قدام جوزك اهو مبسوط __ خد مراتك وطلعها اوضتها اشبع بيها

ريهام عيطت وقعدت علي الكرسي بتمثل انها مجروحه

ادهم: خلاص يا ست الكل اسف اني عليت صوتي اسف

ريهام: انت بتتهمني ان انا السبب في بعد مراتك عنك وانها مش عارفه تقوم بدورها كزوجه... اهئ اهئ انا مش عارفه اعمل ايه قولي انت اعمل ايه وانا اعمله

ليلي: انا اسفه مش اقصد ادهم مفهمنيش وما سمعنيش للاخر

ادهم: اطلعي اوضتك لو سمحتي

ليلي: بس يا ادهم

ادهم: اطلعي اوضتك

ليلي طلعت وسابتهم وريهام فضلت تزن في ودان ادهم

ريهام: حاولت اقرب منها واخليها زي بنتي بس معرفتش هيا بتحب شغل البيت اعملها ايه

نادت علي كريمه

ريهام: كريمه انا كام مره اطلع ليلي من المطبخ واقولها تجهز قبل ما جوزها يجي

كريمه: علي طول يا بيه وانا كمان اقولها قوليلي عايزه تعملي ايه وانا اعمله بس هيا مترضاش وتقولي عايزه اعمل بنفسي

ادهم: روحي انتي خلاص

ادهم طلع لمراته

ادهم: لو سمحتي ما تحاوليش توقعي بيني وبين امي

ليلي: انا محاولتش انا

ادهم: امال لما تقوليلي بتجبرك يبقي ايه؟ هيا بتجبرك ولا لأ؟

ليلي: اسمعني

ادهم: بتجبرك ولا لأ؟

ليلي: لأ بس ب

قاطعها: مش عايز اسمع اكتر من كده

سابها ومشي والعلاقه بينهم بقت متوتره

طبعا ريهام مش عارفه تتطلب حاجه من ليلي فلازم تشوف طريقه تانيه

جهزت لحفله كبيره ويوم الحفله الصبح بعد ما الرجاله مشيوا ليلي اتفاجئت بابوها جاي جريت وسلمت عليه وقعدت معاه يدردشوا

ريهام نزلت: اهلا بعم فتحي

عم فتحي: اهلا يا هانم

ريهام: هاه جاهز نبدأ

ليلي: جاهز لايه بالظبط؟

عم فتحي: الست هانم عايزاني اجهز لعشا النهارده

ليلي اتصدمت: ايه؟ لأ طبعا

ريهام: لأ ليه مش ده شغله ولا ايه؟ لو مش عايز يا عم فتحي براحتك

عم فتحي: لا يا هانم انا اتفقت مع حضرتك

ليلي: بس يا بابا

عم فتحي: ما بسش

ريهام نادت علي كريمه تدخل عم فتحي المطبخ

وليلي دخلت وراه وبدات تفهم ريهام عايزه توصل لايه؟ اخيرا عقلها بدا يستوعب خطتها

بس مفيش في ايدها حاجه تعملها

ليلي: بابا ليه بتقبل؟؟

عم فتحي: وانا من امتي برفض شغل؟

ليلي: ماشي بس هنا لأ

عم فتحي: وهنا لأ ليه!؟؟

ليلي: ده بيت جوزي ما ينفعش تيجي تشتغل هنا وانت مش محتاج شغل اصلا انا ممكن

قاطعها ابوها: انتي ممكن ايه؟ تصرفي عليا؟

ليلي: مش قصدي بس

عم فتحي: ولا بتستعري من ابوكي دلوقتي

ليلي: لا طبعا عمري ابدا

عم فتحي: يبقي تسكتي واطلعي يا ستي انتي بره واعملي هانم

طبعا ليلي رفضت تسيب ابوها لوحده وفضلت النهار كله تساعده ايدها بايده في كل حاجه

اخر النهار طلعت جهزت للحفله وكانت ملكه جمال بس مطفيه

ادهم جه وعجبه شكلها ومبسوط بس هيا من جواها مخنوقه وهو حس بده

وفي وسط الحفله ريهام اعلنت ان العشا جاهز

الكل بيتعشي وصحبات ريهام

_ الاكل تحفه يا ريري

_ كريمه اخدت كورس ولا ايه؟

_ للازم تقوليلنا السر

كل واحده بكلمه وليلي هتولع وادهم مراقبها وساكت

ريهام: السر في الطباخ الجديد

_ لازم تعرفينا عليه

ريهام: بس كده من عنيا

ليلي اتوترت فادهم مسك ايدها وهمس: اهدي مالك؟

ليلي: مفيش

ريهام نادت كريمه وقالتلها تنادي الطباخ

وطبعا الطباخ خرج __ ادهم اول ما اتلفت وشافه اتنفض ووقف وبص لليلي اللي حطت وشها في الارض

ريهام: اعرفكم باللي عمل الاكل ده كله ده عم فتحي ابو ليلي حمي ابني

الكل استغرب وبيوشوشوا بعض وادهم بص لامه وبص لليلي ولعم فتحي

ادهم: اهلا بعمي اخبارك ايه؟ طيب يا ليلي مش تعرفيني ان ابوكي هنا؟ تسلم ايدك يا عمي الاكل فعلا خرافه بس تعال اتفضل معانا ما ينفعش تعمل كل ده وما تشاركناش اتفضل

علي: اتفضل يا راجل انت غريب ولا ايه؟

قام علي بنفسه وقعد عم فتحي جنبه وعالج هو وادهم الموقف وريهام ولعت زياده

الحفله خلصت والكل مشي وعم فتحي كمان مشي بس قبل ما يمشي ريهام اتعمدت تحاسبه قدامهم وهو مكنش راضي ياخد فلوس بس هيا اصرت وفضل الاربعه

ليلي وادهم وعلي وريهام

ادهم: قصدك ايه باللي عملتيه النهارده؟

ريهام: عملت ايه؟

ادهم: مش هنلف وندور

ريهام: مش فاهمه عملت ايه؟ عم فتحي طباخ واكله رائع وانا طلبت خدماته وحاسبته عليها وقدامكم مش ده شغله؟

ادهم: ومفيش طباخين غيره صح؟

ريهام: عجبني مالك انت بقي؟ متضايق ليه؟ لو متضايق ان حماك طباخ فدي مش مشكلتي

اديله قرشين وقعده بس طول ماهو طباخ انا حره

ليلي جريت علي فوق وسابتهم

ريهام: محدش قالك تتجوز واحده ابوها طباخ

انا النهارده جبته بكره كل زمايلك واصحابك ومعارفك يجيبوه وريني هتعمل ايه؟

سابته ريهام وطلعت وادهم هيولع

على: ما يهمكش منها ومن كلامها اطلع لمراتك حايلها

ادهم: احايلها اقولها ايه؟

علي: ما تقولش خدها في حضنك وبس تعرف ولا ما تعرفش

ادهم طلع لمراته وعمل زي ما ابوه قاله بس من جواه حاسس ان الموضوع هيكبر

تاني يوم راح لابو ليلي البيت وقعد معاه

ادهم: عمي بص انا مش عايزك تفهمني غلط

عم فتحي: عايز ايه يا ادهم؟ وقول علي طول

ادهم: انت حاليا مش محتاج تشتغل

عم فتحي: اهم وبعدين لما ما اشتغلش افتح بيتي ازاي؟

ادهم: انا موجود

عم فتحي: تصرف عليا انت؟؟

ادهم: مش كده مش قصدي انا بس

عم فتحي: انت ايه؟ لما تيجي بيتي وتقولي ما تشتغلش وانت موجود يبقي ايه؟ لو انا عايز خالد ومحمد موجودين هما اولي يصرفوا عليا بس لأ الحمدلله انا بصحتي وطول ما صحتي موجودة هشتغل انا ربيت عيالي من شغلي ده

انت بقي بتستعر من حماك دي مشكلتك مش مشكلتي وشوف عايز تعمل ايه اعمله؟؟

ادهم: مش حكايه بستعر حكايه انك حاليا مش محتاج الشغل ده وانا مركزي و

قاطعه: مركزك!؟؟ خلاص يبقي طلق مراتك وهاتها او خليها تتبري مننا

ادهم: يا عمي

عم فتحي: انا كلامي خلصته شغلي مش هسيبه اللي يريحك انت اعمله

ادهم مشي وهو هيولع من حماه ومراته

ريهام طلبت من كل اصحابها انهم يطلبوا فتحي وعطيتهم تليفونه

ليلي ماشيه جنب ريهام فتعمدت تسمعها وهيا بتديهم الرقم

ليلي: ده رقم بابا بتديه لمين؟

ريهام: لهيام صحبتي عندها حفله وعجبها طبخه

ليلي: انتي بتعملي كده ليه؟

ريهام: بعمل ايه؟ بخلي ابوكي يسترزق

ليلي اتنرفزت وعلت صوتها: ابويا مش محتاج يسترزق منك فاهمه؟

من حظها جملتها جت في وقت دخول ادهم

ادهم: صوتك ما يعلاش كده تاني فاهمه؟؟

ليلي: ادهم مش قصدي ان

ادهم: اتاسفي لامي واطلعي اوضتك

ليلي واقفه مكانها وساكته

ادهم: حالا

ليلي اتاسفت وطلعت جري لاوضتها

ادهم: اسف يا ست الكل لو ضايقتك

امه عيطت: ماهي دي اخرت انك تجيب واحده زيها هنا

ادهم: اسف حقك عليا

ادهم نزل شغله وليلي مش عارفه تعمل ايه؟

حاولت تكلم ابوها بس رفض يسمعها

ريهام بدات تجبر ليلي فعلا انها تشتغل في البيت واتطمنت انها مش هتقول لادهم تاني وادهم كمان مش هيسمعها

بتخليها تنظف وتروق وتتطبخ وتشتغل كل حاجه وادهم يرجع بالليل يلاقيها نايمه زي القتيل

ادهم بدا يتعود علي عدم وجود ليلي في حياته واستغرب هو فعلا حبها؟؟

علي قرر انه ياخد اجازه هو وابنه ويسافروا كلهم يغيروا جو في شرم

وفعلا سافروا كلهم وليلي فرحت جدا لانها اخيرا هتعرف تقرب من جوزها تاني

ادهم كان الموضوع بالنسباله سيان مش فارق كتير

وصلوا الفندق وحطوا شنطهم وطلعوا يتغدوا وهناك في المطعم كلهم اتفاجؤا بدولي موجوده واول ما شافتهم جريت تسلم عليهم

وطبعا قعدت تتغدي معاهم

ليلي قاعده وساكته وعلي شاكك ان مراته اتعمدت تقول لدولي تيجي

عدي اول يوم الكل كان تعبان ومرهق وتاني يوم ادهم صحي بدري ونزل يتمشي علي الشط ليلي حست بيه وقامت لحقته

ليلي: ينفع اتمشي معاك؟

ادهم: تعالي

مشيت جنبه بصمت وكل واحد في ملكوت خاص بيه

فكرت ليلي انها تقول لادهم ان امه بتتعبها النهار كله بس خافت من رد فعله او يحصل زي اخر مره

ادهم ساكت لانه مش لاقي حاجه يتكلم فيها

هو مش فاكر اصلا امتي اخر مره قعد معاها او اتكلم معاها او حتي نام معاها

ادهم وليلي مع بعض: بقولك

ادهم: قولي عايزه تقولي ايه

ليلي: قول انت الاول

ادهم: كنت هقولك يالا نفطر وانتي؟

ليلي: وانا كمان يالا

لا ادهم كان عايز يقول كده ولا هيا كمان

بس حتي الكلام بينهم بقي صعب جدا

ادهم كان عايز يقولها انه مفتقدها جدا ونفسه يلاقيها تاني

ليلي كانت عايزه تقوله انهم يبعدوا ويعيشوا لوحدهم

وللاسف محدش فيهم اتكلم فطروا في صمت وقعدوا علي الشط وشويه ودولي جت

دولي: صباح الخير عاملين ايه؟

ادهم: تمام

دولي فضلت تتكلم وتهزر مع ادهم طول الوقت وادهم كان بيضحك معاها

كانت بتتدلع وهيا بتتكلم وبستعرض اللغات بتاعتها شويه انجليزي وشويه فرنساوي

طلبوا عصير فريش وهما بيشربوا العصير وقع حبه علي دولي او هيا اتعمدت وقامت تجيب مناديل اللي كانت جنب ادهم

كل واحد فيهم نايم علي شيزلونج علي البحر

هيا قامت ووطت فوق ادهم علشان تطول المناديل واتعمدت انها توطي عليه جامد قوي

وبصتله باغراء رقبتها تقريبا في وشه واتعدلت ورجعت مكانها

في الطبيعي الحركات اللي ذي كده ما بتفرقش نهائي مع ادهم بس حاليا في وضعه في حرمانه من حبيبته استغرب ان مشاعره اتهزت من قرب دولي ريحتها شكلها دلعها كل الحاجات دي مفتقدها من مراته

ادهم: حلو قوي برفانك ده يا دولي

دولي: مرسي قوي لذوقك انت عارفني بحب اكون ديما مميزه

ليلي سمعاهم وحست انها هتعيط لانها فعلا ديما ريحتها طبيخ وبصل او ديتول ومنظفات

حست انها مهدده من دولي دي

دولي بتتكلم مع ادهم عن حد يعرفوه في باريس

ادهم: معقوله انتي لسه علي علاقه بيها؟

دولي: طبعا علي طول انا مش بنسي حبايبي ابدا استني اكلمهالك

اتكلمت مع واحده بالفرنسي وعطت ادهم الموبيل وهو كمان فضل يتكلم ويضحك ويهزر خلص وقفل التليفون وهو بيديه لدولي اتعمدت انها تمسك ايده وعنيها في عنيه

ادهم مسك ايدها بدون قصد بس قد ايه كانت ايدها ناعمه وطريه غير ايد مراته الناشفه

وبعد ما خلص بص لليلي اللي دموعها بتهدد وقالها: دي ماري صحبتنا من ايام الكليه

ليلي: امم كويس

ادهم ملقيش كلام يقوله فكمل مع دولي وشويه وقام وقف

دولي: وقفت ليه؟

ادهم: هنزل الميه عايز اعوم شويه مسافه طويله

دولي: تتضايق لو شاركتك؟

ادهم بص لليلي اللي كانت باصه للارض

ادهم: البحر واسع انتي حره

دولي: ليلي هتيجي؟

ادهم: لا ليلي مش بتعرف تعوم

دولي: ايه ده بجد؟ انتي لازم تتعلمي ادهم بيعشق السباحه،،، مش تعلمها يا ادهم؟؟

ادهم افتكر في شهر العسل لما حاول يعلمها بس هيا رفضت وطول الوقت لو عايز ينزلها الميه كان بيشلها

دولي: ااايييه روحت فين؟

ادهم: لا ما رحتش انا نازل سلام حصليني لو قدرتي

جري ادهم ودولي وراه وصوت لعبهم وضحكهم واصل للكل

ليلي بتراقبهم من بعيد ودموعها نزلت في صمت

ريهام جت واول ما شافتها: ادهم فين؟

ليلي: نزل الميه

ريهام: اه ودولي معاه صح؟

ليلي: انتي اللي قولتي لدولي تيجي صح؟

ريهام: اه صح ادهم لازم يفوق ويشوف هو مفتقد ايه سبق وقولتلك انك مجرد لعبه جديده هيفتحها ويشوفها ويتسلي بيها وبعد كده تتركن علي الرف

سابتها ومشيت وسط دموعها. وفجأه سمعت صوت وراها

" ما تخافيش زي ما كان بيرجع كل مره هيرجع لحضنك تاني """

"

بصت لقته حماها

ليلي: ادهم بيضيع مني

علي: ادهم هيلف ويدور ويرجع وهتقولي علي قال بس انتي ما تسمحيش لواحده رخيصه زي دولي تاخده منك اتمسكي بجوزك

البسي احلي منها انتي اجمل منها مليون مره عامله في نفسك كده ليه؟

نصحها علي ومشي بس هيا مكسوره من جواها

دولي ما بتسيبش ادهم نهائي وهو نوعا ما مستمتع بصحبتها

ليلي واخده جنب تماما وسيباه طول الوقت معاها بيسهروا مع بعض ويناموا لمتاخر ويصحوا يفضلوا برضه مع بعض

علي: وبعدين يا ادهم

ادهم: وبعدين ايه؟

علي: فين مراتك؟

ادهم: معرفش

على: انت بتعمل كده ليه واوعي تقولي ان دولي عجباك او حبتها

ادهم: لا طبعا دولي لا عمري حبتها ولا عجبتني

على: امال طول الوقت معاها ليه؟ وبتتغزل في جمالها

ادهم: علشان ليلي

على: ازاي بقي؟

ادهم: بتغزل في فستان دولي ميكب بتاعها ريحتها يمكن ليلي تغير منها وتحاول تعمل زيها بس للاسف لا حياه لمن تنادي ليلي استسلمت واخدت جنب

على: طيب ما تاخد مراتك في حضنك وتقولها انت عايز ايه؟

ادهم: عملت الكلام ده وقولت مليون مره وما جبش نتيجه ولو ده برضه مجبش نتيجه يبقي مالوش لازمه نكمل

على: انت بتقول ايه؟

ادهم: اللي سمعته بابا انت مش عارف حاجه

انا تقريبا ما عشتش مع ليلي غير شهر العسل

علي طول بعيده،، ارجع اخر النهار الاقيها متبهدله.. يوم اكل! يوم منظفات! يوم طينه!

هو انا متجوز خدامه!!! وكلمتها وقولتلها حد جابرك؟ واتخانقت مع ماما بس اكدتلي هيا والخدم ان ليلي بتعمل من نفسها اعمل ايه بقي؟ ومن الساعه 9 وتنام زي القتيل

انا مش فاكر اصلا اخر مره نمت معاها كان امتي؟ شكلها علي طول متبهدل!شعرها علي طول لماه! عرقان متبهدل! هدومها مبهدله! وكله كوم وريحتها كوم يا اما بصل يا منظفات وانا تعبت اتكلمت مليون مره ومفيش فايده

ومكنتش احب حد يتدخل بينا او اني اتكلم معاك بس انا جبت اخري

اديك اهو عرفت كل حاجه علشان ما تستغربش لو خدت اي خطوه!!!

علي: برضه يا ادهم اصبر عليها قرب منها حاول تاخدها في حضنك __ فين حبك ليها؟

خلصت الاجازه ورجعوا مصر ورجعت ريهام تبهدل ليلي اكتر واكتر وليلي بتتدبل اكتر واكتر والحمل بقي تقيل عليها وادهم رماها تماما

ريهام في يوم بدري بعد نزول علي وادهم نادت ليلي ولما نزلتلها

ريهام: صاحبتي الانتيم صفيه او صافي عامله عزومه النهارده وعيزاكي تروحي تساعديها

ليلي: ايه؟؟ انا؟؟؟

ريهام: اه انتي ايه؟؟

ليلي: لأ انا هنا بعمل اه بيت جوزي لكن بيوت الناس لأ

ريهام: انتي بتقوليلي لأ كده؟

ليلي: اسفه بس مش هشتغل في بيوت الناس اسفه

ريهام: بقي كده؟ طيب انا هخليها تتصل بابوكي وهخليه تهده وتتطلب منه فوق طاقته وكل يوم هخلي واحده من صحباتي تكلمه وحياتك انتي خلال شهر هيكون ابوكي خلص خلاص

ليلي: لا حرام هليكي بابا تعب ومش حمل شغل تقيل

ريهام: ماهو اختاري يا انتي يا ابوكي؟؟؟

ليلي: هقول لادهم

ريهام: روحي قوليله!! قوليله ماما جابت شغل لبابا وانا مش راضيه وقوليله ان انا عايزه ابعتك مكانه وخليه يجي يتخانق معايا وخليه يضربني كمان يالا خلينا نقاطع بعض

هو مش انتي كنتي السبب ان علي طرد ابوه من بيته كملي علي باقي العيله وخلي ادهم كمان يطردني من حياته يالا روحي كلميه

ليلي عيطت وسكتت: ارجوكي

ريهام: خلاص كريمه كريمه ( جت كريمه) اطلبي فتحي وقوليله عنوان صافي خليه يروح

ليلي: لا لا انا هروح بس ادهم هقوله ايه؟

ريهام: انا هكلمه

وفعلا اتصلت بادهم وقالتله ان ليلي هتخرج معاها يعملوا شوبنج

وخرجت ليلي تشتغل في بيوت اصحاب ريهام وترجع بالليل مكسوره مهدوده مش قادره تقول كلمه لجوزها اللي بيبصلها ويسكت

وفي يوم وحسين بيوصلها لبيت واحده من صحبات ريهام

حسين: انا عايز اعرف انتي بتعملي ايه في بيوت الناس دي؟؟

ليلي: ما تشغلش بالك يا عم حسين

حسين: انتي بتدبلي وعلاقتك بادهم مش اللي هيا ودولي طول الوقت مع ادهم ايوه هو مغلطش معاها بس علي الوضع ده هيغلط ومحدش هيلومه

ليلي: وانا اعمل ايه؟

حسين: خدي جوزك في حضنك وقوليله اللي بيحصل معاكي مخبيه عنه ليه؟ ادهم بيفتكر انك مع مامته مش في بيوت اصحابها الله اعلم بتعملي ايه؟ اوعي تكوني بتعملي حاجه غلط؟؟؟

ليلي: لا لا لا ابدا والله لا

حسين: امال بتروحي ليه؟

ليلي: ماهو يا انا يا ابويا

حسين: انتي بتشتغلي في بيوتهم!؟؟؟ انتي اتجننتي؟؟؟ انت مرات اكبر رجال الأعمال وتشتغلي خدامه في البيوت؟؟؟ قولي لادهم وانهي المهزله دي؟

ليلي: وبعد ما ينهيها هيعمل ايه؟

حسين: يعني ايه؟ هتنتهي

ليلي: وعلي حساب مين؟ ادهم هيقاطع امه ومش هيسامحها

حسين: هيا غلط تستاهل امال تستني لحد ما يطلقك؟؟؟

ليلي: لو طلقني ارحم عندي مليون مره انه يقاطع امه بسببي علي العموم ربنا يعمل الخير ليا وليه اوعدني ما تقولش لادهم اي حاجه اوعدني

وبكده استمرت ليلي في شغلها

ادهم في يوم رجع بدري تعبان جدا من شغله واستغرب ان امه موجودة وليلي لأ

طلع يرتاح وامه بعتت جابت ليلي اللي اول ما عرفت ان ادهم تعبان جريت عليه كان راقد في سريره واول ما شافته جريت عليه وحطت ايدها علي وشه

ليلي: انت سخن جدا حاسس بايه حبيبي

ادهم: انتي علي طول ريحتك كده ابعدي عني ابعدي عني خالص ابعدي

ادهم مش طايق ليلي نهائي

ليلي نزلت لريهام

ريهام: عايزه ايه؟

ليلي: ادهم تعبان جدا وسخن جدا هاتيله دكتور بسرعه

فعلا جه الدكتور وكشف عليه وكتبله ادويه

بس يرتاح تماما

ليلي فضلت جنب ادهم وهو نايم عدت ليله طويله وصعبة وهيا طول الليل تعمله كمادات وتديله دواه وادهم بيفوق يشوفها وينام

فاق لحظات: ليلي حبيبتي خليكي معايا ارجعيلي يا ليلي وحشتيني

قالهم ونام وهيا دموعها نزلت بصمت لانها نفسها ترجعله وتفضل في حضنه

عدت مرحله السخونه وبدا يفوق وطبعا دولي جت وقعدت جنبه

الكل كان جنبه علي وريهام وليلي ودولي

ريهام طلبت من ليلي تعمل لادهم اكل وادهم رفض وقال مش عاوز بس ريهام اصرت ان ليلي تعمله شربه خضار وفعلا ليلي نزلت غصب عن ادهم اللي حس انها اول ما ترجع يرمي الاكل في وشها ويقولها انه عايزها هيا تفضل جنبه مش دولي

ليلي جابت الاكل وجت وادهم رفض ياكل منها وعلشان يضايقها اكل من ايدين دولي

اتحسن ادهم ورجع شغله

علي: ادهم النهارده ما تنساش العشا مع العميل الجديد

ادهم: مش ناسي

على: عرفت ليلي

ادهم: ليلي ليه؟

علي: الراجل معاه مراته وانت كمان اتصل بيها وقولها

ادهم: ولما تنام واحنا قاعدين؟؟

علي: اتصل بيها دلوقتي وعرفها تنام لحد بالليل

ادهم اتصل بليلي وقالها وريهام سمعت وعملت حسابها ان ليلي ما تنامش نهائي لدرجه انها قامت تشتغل بنفسها علشان تشغل ليلي معاها

والليل جه وليلي لبست وجهزت ادهم اول ما جه وشافها ابتسم لانها كانت فعلا جميله

ادهم: يالا بينا طالما جاهزه

ليلي مشيت معاه وقعدت جنبه بصمت

وصلوا واتعشوا مع الناس وقام يرقص معاها واكتشف انها وحشاه جدا وان لسه قلبه بيدق لما يقرب منها او يلمسها

ادهم: وحشتيني

ليلي: وانت كمان واحشاني

ادهم: ليلي انتي بعيده عني ليه؟ انا عايزك جنبي تشاركيني كل حاجه

ليلي: انا جنبك

ادهم: لا يا ليلي انتي بعيده تماما

ليلي حطت راسها علي صدره وسكتت وهو كمان سكت

قعدوا وفضلوا يرغو في الشغل وللاسف ليلي النوم بيهاجمها وهيا مش عارفه تبعده

قامت وغسلت وشها ومكياجها اتبهدل وحاولت تظبطه علي قد ما تقدر

اول ما خرجت باين عليها انها تعبانه ومرهقه وادهم خلاص علي اخره

خلاص ليلي مش قادره تفتح عنيها نهائي وباين عليها جدا انها بتتخانق مع النوم

العميل اعتذر من ادهم انهم يكملوا كلامهم وقت تاني علشان مراته تعبانه

ادهم اخد ليلي علشان يروحها حاولت ليلي تعتذر بس ادهم باشاره وقفها

طول الطريق ليلي بتحاول تتكلم وادهم بيسكتها واخيرا وصلوا البيت وطلعوا اوضتهم

واول ما دخلوا وقفلوا الباب ادهم بص لليلي وقالها جمله واحده

ادهم: اول ما النهار يطلع مش عايزك في البيت فاهمه؟؟ عايزك بره البيت وبره حياتي؟؟

طول الطريق ليلي بتحاول تتكلم وادهم بيسكتها واخيرا وصلوا البيت وطلعوا اوضتهم

واول ما دخلوا وقفلوا الباب ادهم بص لليلي وقالها جمله واحده

ادهم: اول ما النهار يطلع مش عايزك في البيت فاهمه؟؟ عايزك بره البيت وبره حياتي؟؟

قال جملته وخرج وما رجعش غير الصبح

ليلي الليل كله تعيط لمت هدومها وحاجتها وسابت اي حاجه هو جبهالها غاليه

دهب مجوهرات شبكتها ما اخدتش غير خاتم جوازها وبس

والصبح بعد ما علي نزل شغله هيا نزلت ومعاها شنطه صغيره

ريهام: سيادتك فاكره نفسك رايحه فين؟

ليلي: اللي حضرتك عايزاه اتحقق وادهم طردني وماشيه بيت ابويا بعد اذنك

ريهام الفرحه مش سايعاها وجهزت لحفله كبيره اليوم ده

ادهم رجع البيت وطلع اوضته واستغرب ان ليلي مش موجوده

كل حاجتها موجوده امال هيا فين؟

نزل لامه اللي كانت مشغوله بتجهيز الحفله

ادهم: بتعملي ايه؟

ريهام ؛ عامله حفله صغننه كده وانت لازم تكون موجود

ادهم: ان شاءالله بس ليلي فين؟

ريهام سابت اللي في ايدها وبصتله

ريهام: ليلي؟؟ هو مش انت طردتها؟؟؟ هيا قالت كده ومشيت

ادهم افتكر كلامه بس ماتخيلش ابدا انها هتمشي بجد

كان متخيل انها هتحارب علشان تفضل جنبه!!

كان متخيل انها هتحارب علشان حبيبها؟!

بس هيا استسلمت ومشيت زي ما تكون ماصدقت تمشي

هيا حره هيا اختارت تمشي

ريهام: ادهم ايه؟

ادهم: لا مفيش حفلتك هتبدا امتي؟

ريهام: الساعه 9 هتبدا الناس تيجي

ادهم: هكون موجود

وفعلا خرج ادهم لشغله وكأن شيئا لم يكن

بس تفكيره كله في ليلي اللي استغنت عنه ومشيت

علي: هاه قولت ايه؟

ادهم :_________

على: ادهم انت سامعني؟؟؟ ادهم؟؟

ادهم: هاه سوري قولت ايه؟

علي: في ايه مالك مش مظبوط النهارده؟؟؟

ادهم: ليلي مشيت

علي: مشيت ايه؟ فين؟

ادهم: سابت البيت ومشيت

على: كده من غير سبب؟؟؟ ببساطه؟؟؟

ادهم: اه ببساطه

على: قولتلها ايه انت؟؟

ادهم: انا؟؟؟ قولتلها تمشي بس ما تخيلتش ابدا انها هتمشي بجد!!!

علي: امال تخيلت ايه؟؟؟ واحده عايشه في بيت غريبه فيه مكروهه فيه وجوزها مطنشها وطول الوقت حاسه انها عبء عايز لما تقولها تمشي تقولك ايه؟؟؟ لا والنبي خليني؟؟؟

ادهم: كلامك مش مظبوط انا بحبها وانت بتحبها وامي بتحاول علي طول تقرب منها يبقي عذرها ايه هاه؟؟ لو كانت بتحبني كانت فضلت بس هيا ندمت وما صدقت قولتلها امشي مشيت

علي: انت سامع نفسك؟؟؟ انت قولتلها تمشي ليه اصلا؟؟

ادهم: كنت متغاظ منها ومعرفتش اطلع غيظي ده في ايه وبدال ما امد ايدي عليها قولتلها تمشي

على: وليه متغاظ؟؟؟

ادهم: امبارح مش كلمتها من بدري وقولتلها علي السهره جات الهانم ومفيش نص ساعه وفضلت تتاوب وتنام وهيا قاعده لدرجه ان الناس قالولي روح مراتك

ايه مش قادره تسهر ليله واحده ولا اصلا مش مهتمه بيا او بشكلي او اي حاجه تهمني؟؟

علي: علشان نامت قولتلها تمشي؟؟؟

ادهم: مش النوم في حد ذاته

ليلي بعيده تماما عني! مفيهاش اي شيئ يشد! انسانه معدومه المشاعر او الاحاسيس! اقصي اهتمامها هتطبخ ايه؟ وده اخر اهتماماتي ورافضه انها تتغير

انا بحبها بس مش لاقي اي طريق ااقابلها فيه

على: وهتعمل ايه؟

ادهم: هنهي العلاقه دي كفايه كده؟

ادهم في الحفله كان بيهيص ويرقص مع كل بنت تقرب منه

حسين شايفه وهيتجن منه وحاسس انه متكتف بوعده لليلي

ليلي روحت بيتها ورفضت تحكي لاي حد حاجه ولما سألوها جايه ليه قالتلهم عادي وحشينها مش اكتر

بس طبعا باين علي شكلها الدبلان والزعلان ان في مشكله او زعل بينهم

اخر الليل حكت لمحمد كل اللي حصلها لانها بتثق في اراؤه وهدؤه

محمد: اللي انتي عملتيه ده غلط

ايوه مش حلو انك تفرقي ابن عن امه بس انتي ليه سكتي من الاول؟؟؟ كان لازم جوزك يعرف؟؟ وخروجك بره البيت ده كان اكبر غلط؟؟؟ كان المفروض تقوليلي او تقولي لخالد واحنا ساعدناكي

انتي ضيعتي جوزك من ايديك وياريت علشان حاجه ليها لازمه

امه هتفضل تتدخل في حياته وبعدين ادهم عاقل كان هيسمعك وهيتصرف صح

عارفه لو هو زي خالد مثلا عصبي كنت عذرتك لكن ادهم عاقل وبيوزن الامور

علي العموم سيبيه فتره كده يهدي وقابليه واحكيله كل حاجه حصلت وخليه هو يتصرف

بهدوء

يوم وري يوم بيعدي وادهم بيحاول يبين للكل ان حياته احسن وليلي مش موجوده

بس الحقيقه ان الاول حتي وهيا مهملاه بس كان كفايه عليه اخر الليل تكون جنبه قدام عينه

الليل بالنسباله عذاب ما بينتهيش مكانها الفاضي بيعذبه

للدرجه دي بيحبها!! بس هيا مشيت! هيا بعدت!

وفي يوم ادهم مع دولي بيوصلها بيتها وبتحاول تقنعه يدخل معاها البيت

حسين نزل من العربيه وراح ناحيتهم

حسين: ادهم باشا سعاده البيه الكبير اتصل وعايزك حالا في المكتب

ادهم بصله نظره طويله لانه عارف ان لو ابوه عايزه هيكلمه هو مش حسين

ادهم: اوك رايحله سلام يا دولي وقت تاني

سابها ومشي واول ما ركب العربيه

ادهم: مش هتبطل تتدخل في اللي مالكش فيه!؟؟

حسين: لا ليا فيه!! يوم ما خلتني شريك في لعبتك خليت يبقي ليا فيه

ادهم: لعبتي!!! برضه مسميها لعبتي؟؟

حسين: طول ما كل ما بتزهق ترميها تبقي لعبه

ادهم: تاني يا حسين؟؟؟ لتاني مره هقولك انها هيا اللي بتختار

حسين: ومسألتش نفسك هيا اختارت تبعد ليه!؟

ادهم: علشان ما بتحبنيش

حسين: انت مصدق كلامك ده؟؟!

ادهم: انت مش عارف احنا كنا عايشين ازاي؟؟

حسين: وانت عارف هيا كانت عايشه ازاي؟؟

ادهم: اه كانت في المطبخ عايشه دور الخدامه

حسين: وما سالتش نفسك مره واحده ايه اللي يخلي واحده بتعشق جوزها تبعد عنه كده! وما تسمعش كلامه؟ وتوصل لمرحله انها تشوفه مع بنات تانيه وتسكت وتستحمل

ادهم: لما الواحده ما تحبش جوزها تعمل اللي انت بتقوله ده ومايبقاش فارق معاها

حسين اخد فرامل وبص لادهم

ادهم: انت اتجننت؟؟

حسين: انا اتجننت ولا انت؟؟؟ احلف كده انك مصدق ان ليلي ما بتحبكش

ادهم: طيب مشيت ليه لو هيا بتحبيني؟؟؟

حسين: _____،،

ادهم: ايه اللي خلاها بعيد عني؟؟

ايه اللي خلاها تركني علي الرف؟؟

ايه اللي خلاها ما تسمعش اي كلمه اقولهالها؟؟

وايه وايه وايه؟؟ ليلي اختارت انها تبعدني بره حياتها

ايه ساكت دلوقتي؟؟

حسين: اكيد في سبب؟؟حاولت تسمعها؟؟

ادهم: هاه وايه هو السبب؟؟

حسين: السبب ده هيا تقولهولك

ادهم: انت عارف حاجه ومخبيها عني؟؟

حسين: انا كنت شايف ليلي عايشه ازاي؟؟ اسالها وانت تعرف

ادهم: تعرف حاجه انا مش عارفها؟؟؟

حسين: اسالها

ادهم: حسين اتكلم بقي

حسين: اسف بس وعدتها ما اتكلمش

ادهم: وعدت مين؟؟؟ ليلي؟؟ حسين ايه اللي بيحصل من ورايا؟؟

حسين: اسف عايز تعرف اعرف بنفسك!! اسال مريم ونجاه وصبحي ولا كريمه!؟؟ او اسال والدتك؟؟ وشوف هيجاوبوك ولا هيخبوا عنك عمايلهم؟؟ اكتر من كده مش هتكلم؟؟ قبل ما تقول مراتك مش بتحبك اعرف الحقيقه كامله؟ وقبل ما ترمي نفسك في حضن واحده رخيصه شوف حضن مراتك الاول

ادهم راح علي البيت وامه مكنتش موجودة

وهو داخل لقي عم منعم في الجنينه بيظبط فيها وافتكر ليلي لما كانت كلها طينه راحلوا

ادهم: ازيك يا راجل يا عجوز

منعم: اهلا بسيد الناس

ادهم: اخبارك ايه؟

منعم: انا الحمدلله: الا الهانم الصغيره هتيجي امتي يا باشا!!

ادهم: هيا مش هتيجي تاني

منعم: ليه بس دي حته سكره والله ما هتلاقي ضفرها ولا حنيتها ولا طيبتها

ولا حد هيستحمل اللي هيا استحملته علشان تفضل جنبك

ادهم استغرب ايه اللي هيا استحملته؟؟

ادهم: الا قولي هيا ليلي كانت بتحب تزرع؟؟

كذا مره تبقي هدومها مطينه؟؟ للدرجه دي بتحب الزرع

منعم: الهانم كانت بتخليها تزرع الورد بتاعها المفضل وحتي كنت بقولها انا ازرعه بس الهانم بترفض وتشغلني اي حاجه بعيد

ادهم: وليلي مكنتش بتقولها لأ مثلا مش هزرع؟؟

منعم: هو حد يعرف يقول للهانم لأ يا بيه؟؟

ادهم مشي وقابل صبحي المسؤل انه يشتري طلبات البيت كلها

ادهم: صبحي عايزك تعال

صبحي: افندم يا بيه؟؟

ادهم: كنت عايزك تجيبلي شويه حاجات كده بس انت كنت مختفي فين الفتره اللي فاتت دي؟

صبحي: بجيب حاجات وهنا وبعدين طلبات البيت كانت كتيره قوي لدرجه ان الهانم كانت بتبعت معايا نجاه

ادهم: امال مين بيطبخ بقي ويشوف شغل البيت ؟؟

صبحي: مش عارف يا بيه

ادهم: صبحي!! جاوبني

صبحي: الهانم مرات حضرتك

ادهم: وكريمه ومريم؟؟

صبحي: يا بيه انا بكون بره ما اعرفش

ادهم: لو مش هتجاوبني بصراحه يبقي ما تلزمنيش هنا خد حسابك واتفضل

ويدوب هيمشي ويسيبه

صبحى: يا باشا كل اللي اعرفه ان البت نجاه قالتلي ان كريمه بتوزعهم هيا ومريم علشان الهانم الصغيره تعمل كل حاجه لوحدها ومش مسموح لاي حد يساعدها سواء في طبخ ولا تنظيف ولا اي شغل

الهانم الصغيرة كانت بتعمل كل حاجه

اما خروجها كل يوم والله ما اعرف حاجه عنه

ادهم: خروجها؟؟؟

ادهم لازم يعرف كل حاجه بتحصل

ادهم بدا يشك ان امه فعلا بتجبر ليلي

دخل علي المطبخ

لقي كريمه ومريم ونجاه

كريمة: خير يا بيه عايز حاجه؟؟ الهانم في النادي

ادهم: هو انتو كنتو بتبقوا فين وليلي في المطبخ كل يوم؟؟

كريمه: بنبقي هنا وبنساعدها

ادهم: امم مريم كنتي بتساعديها؟؟؟

مريم اتلجلجت ومش عارفه تقول ايه؟

كريمه: ايوه يا باشا

ادهم عارف ان كريمه من يوم ما اشتغلت وهيا جاسوسه امه وايدها اليمين

ادهم قرب من كريمه واخد السكينه اللي بتقطع بيها الخضار ومسكها من وشها

ادهم: اخرسي يا كريمه انتي لاحسن بالسكينه اللي بتقطعي بيها دي هقطعلك لسانك

بص لمريم

ادهم: كنتي بتساعديها ( بصوت عالي)

مريم: لا يا بيه

ادهم: ليه؟

مريم بصت لكريمه فادهم زعقلها

ادهم: ليه؟؟

مريم: كانت ستي كريمه بتخليني اعمل حاجه تانيه او اروح البيت

ادهم بص لنجاه: وانتي؟؟؟ كنتي بتهربي من الشغل مع صبحي صح؟؟

نجاه: ابدا والله ستي كريمه اللي بتقولي اروح

ادهم مسك كريمه وبيهددها بالسكينه شدها لبره واخدها وجرجرها علي البدروم تحت

ادهم: انتي بقي كنتي عامله هانم علي مراتي!!! قسما بالله لاخليكي تندمي علي اليوم اللي دخلتي فيه هنا

كريمه بتصوت وادهم جرجرها لحد تحت

علي دخل البيت سمع صويت كريمه جري عليهم

علي: انت اتجننت بتعمل ايه؟

ادهم: الهانم كانت بتعذب ليلي

كريمه: ابدا والله ما انا!! انا ماليش دعوه

على: مين قالك بس يا ادهم الكلام ده؟؟ نزل السكينه دي

ادهم: انزلها ده انا هشرحها حتت حتت واخليها تلعن اليوم اللي ضايقت ليلي فيه ابعد انت

اطلع فوق انت وسيبهالي

على: يا ادهم اهدي

ادهم زعق جامد: يا تطلع يا تسكت

على: يا زفته انتي عملتي ايه في مراته؟؟

كريمه: انا بنفذ اوامر الهانم وبس

هيا كانت بتشغلها مش انا!! انا كل وظيفتي اني مخليش حد من البنات يساعدها

الهانم مكنتش عايزاها هنا وكانت بتحاول تبعدها عنك وطول اليوم تشغلها وماتخليهاش تريح ابدا ابدا علشان تتهد باليل وتنام زي القتيله وانت تزهق منها وتسيبها

والله انا ما قلتلها حتي كلمه تزعلها

ادهم: طيب وليلي كانت بتخرج كل يوم تروح فين الفتره الاخيره دي؟؟

كريمه: ما اعرفش

ادهم: ما تعرفيش يبقي لسانك ده مالوش لازمه

ويدوب هيقرب منها

كريمه: الهانم بتبعتها بيوت صحباتها تشتغل هناك

ادهم وعلي اتفاجؤا وادهم اتصدم

ادهم: وازاي ليلي توافق؟؟

كريمه: هددتها الهانم لما رفضت انها هتخلي صحباتها يشغلوا ابوها فوق طاقته واللي اعرفه ان ابوها تعبان ومش هيرفض الشغل وصحته مش قد كده وليلي خافت علي ابوها ونزلت مكانه لان الهانم قالتلها يا انتي يا ابوكي

انا مليش ذنب يا بيه

ادهم: ليلي مقالتليش ليه؟

كريمه: ماهي سبق وقالتلك وانت جيت وسالت مامتك واول ما عيطت قدامك زعقت لمراتك وخليتها تتاسف وطلعتها اوضتها

والمره التانيه لما مراتك قالتلها لأ انت جيت سمعت صوتها عالي برضه زعقتلها وطلعتها اوضتها مامتك بقي عرفت انك مش هتصدقها لو قالتلك وان مراتك اصلا مش هتجرب تقولك تاني وعلشان كده كانت متطمنه

وكمان الهانم قالتلها ان هيا السبب ان سيدي علي طرد ابوه من بيته وانها هيا كمان هتكون السبب ان سيادتك تطرد امك من حياتك

وقالتها انها هتكون خراب البيت

والله ده كل اللي حصل ما اعرفش حاجه تانيه

فضلت تعيط كريمه

علي شد ادهم وخرجوا

علي مش مستغرب عمايل مراته بس ادهم عنده حاله ذهول

للدرجه دي امه عندها استعداد تعمل لمجرد ان ليلي مش عجباها؟؟

علي: ادهم اتكلم

ادهم: طيب هيا ما بتحبش ليلي وانا؟؟ سعادتي انا؟؟ مش فارق معاها،؟؟

علي: طالما مش علي هواها يبقي لأ مش هتفرق معاها؟ امك كل اللي يهمها الشكل والمنظر ما تعرفش يعني ايه حب فبالتالي عادي بالنسبالها انها تبعدك عن ليلي طالما مش شايفاها مناسبه

ادهم هيتجنن: امي كانت بتشغل ليلي في البيوت انت فاهم؟؟ مكفهاش هنا فشغلتها في بيوت اصحابها؟؟ ( علي صوته قوي) انت فاهم يعني ايه مراتي تشتغل في بيوت الناس؟

علي: فاهم والله بس اهدي

ادهم: اهدي؟؟ اهدي؟؟ انت فاهم يعني ايه مراتي تبقي خدامه؟؟؟ انت عارف انا كام مره هنتها وجرحتها وزعلتها؟؟ انت عارف انا كام مره هنتها علي هدومها ولا شكلها ولا ريحتها ولا نومها حتي؟؟ انا طردتها علشان نامت؟؟؟؟ ههههههه فاهم انا طردتها علشان من التعب نامت؟؟؟ انا ازاي ماشفتش تعبها ده؟؟؟ انا اتهمتها انها ما بتحبنيش؟؟؟

علي: اهدي اللي انت بتعمله ده مالوش لازمه اهدي

ادهم: بس كان لازم اعرف ان امي مش هتتقبلها انا غبي؟؟ كان لازم افهم انها اصرت ان احنا نقعد هنا علشان تتطفشها مني

علي: اهدي يا ادهم صلح اللي حصل ده المهم

ادهم: طيب وليلي خبت كل العذاب ده عني ليه؟؟ ليه ما قالتليش؟؟ ليه سابتني اهينها واغلط فيها مره وري التانيه؟؟ ليه سابتني اجرحها كده؟ ؟

علي: لانها مش عايزه تكون سبب في خراب البيت ومقاطعتك لامك

روحلها يا ادهم... روح وصلح الامور روح

ادهم: وهيا هتقبلني؟؟؟ وانا هسامحها انها خبت كل الامور دي عني؟؟

علي: روحها ورجعها وبعدين عاتبوا بعض زي ما تحبوا المهم مراتك تبقي في حضنك روح لمراتك روح

ادهم مشي وطول الطريق بيفتكر كل مره كانت بتنام قدامه وهو بيتريق عليها

كل مره زعقلها ان هدومها مش نظيفه!

كل مره بصلها بقرف؟

كل مره وجعها بكلمه او نظره؟

كل مره قرب فيها من دولي علشان يضايقها؟؟

كل مره عايرها بريحتها؟؟؟

يااااه قد ايه كان بيجرحها ويوجعها

واكبر حاجه انه اتهمها انها ما بتحبوش

دي بتحبه لدرجه انها ضحت بيه علشان ما تأذيهوش

كان في طريقه لليلي بس لقي نفسه قدام النادي، جواه غضب لازم يفضيه الاول

دخل النادي يدور عليها

ريهام قاعده مع اصحابها مبسوطه وفرحانه بانتصارها الصغير

وقفت ورافعه كاس في ايديها

ريهام: واخيرا قدرت اني اطرد الحشره دي بره بيتي وخليتها ترجع تزحف للجحر اللي خرجت منه،، يااااه كابوس وانزاح،.. المهم حاليا ابني بقي متاح لاي واحده

لاحظت انهم متنحين وبيبصوا وراها اتلفت واتفاجئت بادهم وراها

ادهم: خلصتي خطبتك ولا لسه؟

ريهام: حبيبي انا كنت بتكلم عن واحده كانت هنا في الجمعيه بتاعتنا و

ادهم قاطعها: مش كفايه كده بقي ولا ايه؟؟؟؟

ليلي اللي انتي بتقولي عليها حشره دي انظف من مليون واحده زي اللي حواليكي دول

ليلي دي ضفرها برقابكم كلكم

ليلي دي اللي شغلتيها عند اصحابك مراتي اللي انتي..،.،

انتي ازاي قدرتي تعملي فيا كده؟

ازاي جالك قلب تجرحيني بالشكل ده؟؟

بس زي ما بابا قال انتي معندكيش قلب اصلا تحبي بيه ولا تعرفي يعني ايه حب فعمرك ما هتحسي بيا

علي العموم احتفالك بانتصارك انتي لانك خسرتي وفشلتي وخسرتي كتير قوي

ليلي مراتي وهتفضل مراتي هاخدها بره بيتك اشبعي بيه لوحدك

خليكي ملكه علي امبراطوريه فاضيه وخلي حواليكي شويه المنافقين دول اللي بيسقفولك علشان خسرتي ابنك وخربتي بيته

بس احب اقولكم ان ليلي مراتي وهتفضل مراتي وهيا اللي هتتربع علي العرش وهيا اللي هتبقي الهانم هنا وهيا مرات صاحب شركات الخطاب وهيا شريكته وحبيبته ومراته

انتي خسرتي

سابها ومشي وراح لمراته

وصلها وخبط باب بيتهم وهيا فتحت واتفاجئت بيه قدامها