رواية هداية البدر الفصل السادس 6 - بقلم رنوشة

يوستينا بجمود: عايزه اعمل محضر جريمة قتل وأنا القاتلة. الظابط: احكيلي بالظبط اللي حصل. بعد نص ساعة، كانت يوستينا حكت كل حاجة. الظابط: افتحلي يبني محضر واكتب ورايا اللي هقولك عليه. بدر اتخنق من كل اللي حواليه وكان عايز يهرب، يروح أي حتة عشان يبعد عن الكل. ركب عربيته وراح اسكندرية وقعد ع البحر. فضل باصص للبحر كتير وهو بيفكر إزاي كريم أخو البنت دي، وإزاي كريم يمد إيده على أخته.

بدر قام وراح للشقة بتاعته اللي بتطل ع البحر. دخل أوضته ورمى نفسه ع السرير وحط إيده ع شعره واتنهد بتعب. بعد فترة من التفكير في يوستينا وهدي والموقف اللي حصل معاهم، وأهله اللي ليهم فترة مضايقين منه، كل حاجة بتتخبط عليه من كل حتة. نام بدر عشان يرتاح شوية من التفكير، لكن أحلامه مكنتش سايباه. صحى من النوم وهو بيصرخ: لا يا يوستينا… ماتسبينيش. عادل خد محسن وطلعوا شقة أم أحمد يظبطوا اللي باظ منها ويبدلوا العفش اللي اتحرق.

محسن: شيل دي معايا يا عادل. عادل كان تعب وجاب آخره، رمى نفسه ع الكنبة: لا أنا استوب لحد كده. محسن قعد جنبه وهو بيضحك عليه: صحتك عاملة زي الست الحامل. عادل رمى عليه المخدة: بقى أنا بتشبهني بست حامل. محسن انتبه مرة واحدة وكأنه افتكر: صحيح، انت كلمت بدر؟ برن عليه من بدري مش بيرد، ولا حتى الواد كريم. عادل هز راسه بيأيده: أيوه فعلاً. أنا رنيت كتير ع بدر ومردش… بس كريم مكلمتوش. محسن: مش عارف في إيه معاهم.

كريم طلع يجري بعد ما قفل مع أخته ع المستشفى. وبدر من وقت ما ودا أحمد المستشفى وهو مختفي. كريم بص لهدي وهو مستغرب كلام بدر: كان قصده إيه بالكلام ده؟ كان يقصد إيه إن أنا بس اللي ضهرك؟ ما أنا وماما ضهرك من زمان. هدي بصت لكريم وعيونها مليانة دموع: انت عمرك ما كنت ضهري يا كريم، ولا هتكون. عايز تعرف كان قصده إيه؟ كان قصده يقولك إن ماما ماتت. مبسوط دلوقتي؟! كريم قرب من هدي عايز

يحضنها وهو مش مصدق كلامها: هدي انتي بتقولي إيه؟! هدي صرخت بصوت عالي: ابعد عني متلمسنيش…