رواية حكاية حنين الفصل الرابع 4 - بقلم هاجر العفيفي

حنين بانهيار: طلقني الندل طلقني بعد كل اللي عملته علشانه، أنا بكر"ه. حسام بغضب: اللي زيك ميستاهلش دمعة واحدة منك، بطلي عياط. ده عيل واطي. حنين بدموع: أنا مش بعيط علشانه، أنا بعيط على عمري اللي ضيعته معاه. أنا كنت بعمل أي حاجة قبل ما يطلبها مني، أنا مكنتش بعترض أبدًا على حاجة يقولها، كل حاجة حاضر ونعم. أنا وقفت جنبه في أصعب أيام حياته لما شركته كانت هتروح. دلوقتي يضحي بيا كده؟

أنا فعلاً إنسانة معنديش كرامة. أنا ضيعت حياتي مع واحد ميستاهلش. كانت بتتكلم وهي دموعها نازلة بشدة. حسام وأمها كانوا واقفين جنبها مش عارفين يعملوا إيه، بس حسام قرب منها وضَمّها وقال بحنان: هجيب لك حقك يا حبيبتي، صدقيني. حنين بدموع: أنا كنت بحبه أوي يا حسام، أوي. دمر"ني في ثانية.

حسام: قولت لك اللي زيك ما يتبكيش عليه أبدًا. ده إنسان ضعيف ماشي ورا كلام أمه. طاعة الأم حاجة وكسر أولاد الناس حاجة تانية خالص. صدقيني هو ميستاهلش حبك ده كله، انتي إنسانة نضيفة من جوه وهو خبيث ومش مقدر النعمة. هدى بحنان: يا بنتي احمدي ربنا إنه كشفهولك على حقيقته وخلصك منه. انتي مش ضعيفة، إحنا معاكي. البيبي اللي جاي ده هيكون دافع ليكي تكملي، صدقيني أول ما تشوفيه وتشيليه بين إيديكي هتنسي الدنيا كلها.

حنين حطت إيدها على بطنها وقالت بإصرار وهي بتمسح دموعها: فعلاً أنا لازم أعيش عشان ابني، لازم أنسى عشانه، لازم أدوس على قلبي عشان أعرف أكمل. حسام ابتسم وقال: وأنا واثق إن أختي قوية وهتقدر تتخطى كل حاجة بقوة. *** بعد يومين. عمر بضيق: عملت اللي قولتيلي عليه ومفيش جديد. دي حتى مكلمتنيش من وقتها. أنا مستغرب، حنين مكانتش بتقدر تعدي ساعة من غير ما تكلمني، إنما بعد ما بعت ورقتها مفيش كلام خالص.

كريمة ببرود: معرفش، يمكن في المستشفى ولا حاجة. أصل هي بتحب تمثل كتير. عمر: مستشفى ليه؟ كريمة: يمكن مش قادرة على فراقك. بقولك إيه، مش كل شوية حنين حنين، زهقتني. غير الموضوع بقى. أقولك روح لمراتك. عمر: هو مش إنتي اللي قولتيلي أعمل كده؟ بقولك أنا عايز حنين. كريمة بعصبية: امشي من وشي يا عمر، أنا ضغطي عالي ومش فايقة. ما تغور في داهية حنين وأهلها، هتشغلني بيها ليه؟ قالت كلامها ودخلت الأوضة ورزعت الباب بغضب.

عمر تنهد بعصبية وخرج من البيت بأكمله. *** رحاب: لسه بدري. عمر بعصبية: رحااااب، اطلعي من دماغي، أنا مش فايقلك. رحاب قربت عليه وقالت بخبث: مالك بس يا حبيبي متضايق ليه؟ عمر بصلها بضيق وقال: انتي بتسألي؟ أنا عايز أعرف انتي مبسوطة بالجوازة دي؟ رحاب: أيوه، وهزعل ليه؟ عمر: أنا أخو جوزك. رحاب ببرود: ودلوقتي جوزي، تفرق كتير. عمر: فين العيال؟ رحاب: بيذاكروا. صحيح، بخصوص الولاد كنت عايزة عشر آلاف مصاريف مدرسة وباص.

عمر بصدمة: ليه ده كله؟ رحاب: هتستخسر في عيال أخوكي عيشة كويسة بدل الفقر اللي كانوا فيه؟ عمر: لأ، بس... قاطعته رحاب وقالت: مفيش بس. عيالي ميبقوش أقل من حد. متبقاش إنت موجود وهما يتعبوا. عمر بنفاذ صبر: حاااااضر. *** بعد أسبوع. حسام: حنين، أنا كلمت المحامي عشان يخلص كل حاجة قانوني وتاخدي كل حقوقك. حنين بهدوء: تمام. حسام باستغراب: حنين، انتي كويسة يا حبيبتي؟ حنين بهدوء: حسام، أنا عايزة أشتغل. حسام بصدمة: تشتغلي؟

هو أنا قصرت معاكي في حاجة عشان تقولي كده؟ حنين مسرعة: لأ والله، بس أنا مش هفضل كده. أنا عايزة حاجة أنشغل فيها. حسام: والحمل؟ حنين برجاء: هحافظ عليه والله. انت عارف من زمان أنا نفسي أفتح حضانة وأكون مع الأطفال دايمًا، بس جوازي من عمر ألغى الفكرة. ودلوقتي أنا نفسي أحقق حلمي. حسام: حنين، بلاش. أنا عايزك ترتاحي لحد ما تولدي على خير وبعدين نفكر في الموضوع ده.

حنين: عشان خاطري يا حسام، ده حلمي. ساعدني أحققه. أنا بجد نفسي أتغير. حسام بابتسامة: حاضر، عيوني. حنين ابتسمت بفرحة. *** عمر كان قاعد في مكتبه وبيتجنن. إزاي حنين متكلمتش معاه خالص ولا مرة؟ وكمان محاولتش ترجعله؟ طلع تليفونه وطلب رقمها واستنى الرد. عمر: حنين. حنين: مين؟ عمر بصدمة: مين!! انتي مسحتي رقمي؟ أنا عمر. حنين: خير؟ عمر بضيق: حنين، مالك كلامك معايا كده ليه؟ ماتتعدلي. حنين بغضب: وهو انت مين عشان أكلمك أصلاً؟

عمر: جوزك. حنين بعصبية: طليقي، مش جوزي. خلي بالك من كلامك. عمر كان مصدوم من أسلوبها وقال: حنين، مالك. على فكرة أنا طلقتك عشان... قاطعته حنين وقالت ببرود: مش فارقة دلوقتي. حقوقي كلها تجيلي عشان أبتدي أعيش حياتي. عمر بغضب: حنين، انتي نسيتي إنك حامل في ابني، يعني مستحيل تقدري تبعدي عني. حنين ببرود: كنت حامل. عمر بصدمة وعدم استيعاب: نعم!!!! حنين ببرود: زي ما سمعت. مبقاش فيه بيبي. خلصت منه عشان مفتكرش واحد زيك.

عمر بصدمة وعصبية: نعمممم!!! انتي بتقولي إيه؟