رواية حكاية قمر الفصل الأول 1 - بقلم ياسمين علي

قمر بتفتح عربية الكبدة: يافتاح ياعليم يارزاق ياكريم.. استعنا ع الشقا بالله. "صباح الخير ياقمر الحتة." قمر: صباح الخير يا عم سيد.. نازل بدري يعني مش عوايد. سيد: والله ياقمر المصاريف كترت.. قولت انزل افتح الدكانة.. اهو واللي يجي كله رزق ربنا. قمر: يا عم سيد انت راجل طيب وربنا هيكرمك بإذن الله.. وسع كدا ارفعلك باب الدكانة. سيد: لا خليكي مش عاوز اتعبك. قمر: تعبك راحة.. معاوزش حاجة تانية اعملهالك.

سيد: كتر خيرك ياقمر.. روحي ع عربيتك يلا علشان ف زباين مستنينك. قمر: وشك حلو ياعم سيد والرزق جه اهو.. عن اذنك بقا. سيد: اتفضلي يابنتي. *** في فيلا الألفي أحمد: صباح الخير يا ولاد. نور: صباح الخير يا بابي. أحمد: صباح النور ياحبيبت بابي.. انتو بس اللي صحيتوا.. اومال فين الباقي. نور: آسر نايم كالعادة يابابي.

أحمد: نايم لحد دلوقتي.. هو مش عنده كلية انهاردة.. ولا هو ناوي يسقط السنة دي كمان زي كل مرة.. استغفر الله العظيم واتوب اليه.. اطلع ياكريم صحي اخوك. نور: بابي خلي كريم.. انا هطلع اصحي. أحمد بنظرة حزن ع كريم: ماشي يابنتي.. وشوفي زين صحي ولالا. زين بيلبس الچاكيت ونازل ع السلم: انا صحيت اهو. زين: صباح الخير يا بطل. كريم بابتسامة لزين ك رد ع كلامه. زين: يلا بينا يابابا ع الشركة. أحمد: مش هتفطر الأول يا بني.

زين: ف الشركة علشان منتأخرش بقا. أحمد: ماشي يابني يلا بينا.. وبص ل كريم اللي قاعد يرسم وساكت ورجع بص للدادة.. خلي بالك منه يا نجلاء. نجلاء: ف عيوني متقلقش. *** قمر: خد دول السندوتشات اللي طلبتهم. الزبون: كام كدا. قمر: كدا خمستاشر جنية. الزبون: اتفضلي. قمر: تسلم.. الف هنا. "ايدك ع المصروف." قمر بخضة: تف تف تف.. ف ايه ياليل ماتكحي ياحبيبتي خضتيني.. وبعدين الناس تصحا تقول صباح الخير.. مش ايدك ع المصروف.

ليل: متتوهيش ع الموضوع ياقمر.. ايدك ع المصروف يلا مش عاوزة اتأخر ع المحاضرات. قمر بفرحة: فرحانة بيكي كبرتي وبقيتي ف كلية ياليل.. اللهم صلي علي النبي.. اللهم صلي علي النبي.. استني اجيب البخور وابخرك.. قل أعوذ برب الفلق.. من عيون الحارة كلها ومن عين ذكية المستقوية. ليل بتكح جامد: كفاية بخور مش قادرة اخد نفس. قمر بعدت البخور عنها وجريت عليها: ياحبيبتي خلاص شيلته.. انتي كويسة.

ليل بتاخد نفسها: ااه.. ايه لازمة كل دا.. هو انا اول واحدة ادخل كلية. قمر: ومش اي كلية.. دي كلية الهندسة.. حلمي اتحقق.. اللي مكملتهوش انتي كملتيه وهتوصلي بإذن الله.. خلي بالك من نفسك ياليل واي حد يقربلك ارقعي بالصوت ولمي عليه الناس.. او اقلعي اللي ف رجلك وع قفاه.. ولا اقولك بلاش انتي خليكي بهيبتك وحلاوتك.. واندهيلي انا اجي اديلو علي قفاه هو وعيلته نفر نفر.

ليل بتضحك: متخافيش محدش هيقربلي طول مانتي اختي.. يلا بقا هاتي المصروف. قمر: خدي ياحبيبتي الخمستاشر جنية دول. ليل: ايه دا ياقمر حرام عليكي.. انا لازم مصروفي يزيد انا بقيت ف كلية. قمر: ليه يابت ماهما حلوين اهم.. اجرة اتوبيس رايح جاي وهاتيلك واحدة ببس بلي ريقك وحوشي الباقي. ليل: بيبس واتوبيس! لا لا ياقمر ماليش دعوة افرضي جوعت اعمل ايه. قمر: اصبوري اعملك سندوتشات كبدة تاخديها معاكي.

ليل بزعل: كبدة ايه بس.. آخر كلام لو المصروف مزدش مش رايحة هاا. قمر: خلاص متزعليش ياليل.. زعلك غالي عندي.. خدي ياحبيبتي دول كمان وهاتي اللي نفسك فيه. ليل بفرحة: ربنا يخليكي ليا. قمر: ويخليكي ليا ياحبيبت اختك.. تعالي ف حضني. تونة طالعة منكوشة من الشباك: الله الله احضان ع الصبح وانا كمان عاوزة المصروف. ليل: ام لسانين صحيت اخلع انا بقا. قمر بضحك: طب روحي ربنا معاكي.. خلي بالك من نفسك ياليل.

تونة: سمعتك والله لما ترجعيلي ماشي.. هتروحي مني فين يعني. قمر: شش عيب كدا. تونة: بتقول عليا بلسانين يرضيك. قمر: لا غلطت علشان انتي بأربعة مش باتنين. تونة بطلع لسانها: واحط بش ااوه وهلهيه. قمر: بتقولي ايه انتي. تونة دخلت لسانها: بقولك عندي لسان واحد بس اهو والله. قمر: لا في تاني مستخبي.. صح افتكرت يالي جيبالي الكلام من اللي متسواش.. كدا تخلي ذكية ام أربعة وأربعين صوتها يعلي عليا امبارح بسبب اللي عملتيه ف ابنه.

تونة: ما قولتلك اخزقلها عينيها الاتنين مسكتيني. قمر: تخزقي ايه يخربيتك.. دانتي فاتحة دماغ ابنه. تونة: هو السبب حد قاله يتحمرش بي. ليل: يتحمرش بيكي ايه يامفعوصة انتي. تونة: ونبي لاطلع اكيبك من شعرك يابت ايتي علشان غيظاني. قمر: بس ياتونة عيب قولت.. وانتي ايه رجعك. ليل: نسيت السندوتشات. قمر: ماشي خديهم وروحي ع كليتك يلا علشان متتأخريش. ليل: حاضر ياقمر.. وبتطلع لسانها لتونة.. سلام يامفعوصة.

تونة بعصبية: بورصي بقا يا قمر.. والله لاخزقلها عينها لما تيجي. قمر بتضحك: هو انتي كل حاجة كدا تخزيق العين.. او فتح دماغ.. لازم تعملي عاهة مستديمة. تونة: اه علشان يفتكروني بيها. قمر: لا ياشيخة. تونة: انا جعانه اوي.. اعمليلي شندوتش كبدة وشندوتش سجق. قمر: بس كدا عيوني ليكي.. مقولتليش بقا فتحتي دماغ الولا ليه.

تونة: عيل رخم بقولو ركبني معاك العجلة.. يقولي لا.. اقولو علشان خاطري.. دانا حبيبتك.. راح قالي لا انا مبحبكيش.. روحت جبت توبة كبيرة وف دماغه.. لقيت امه بتصوت علشان نزل دم.. غريبة طلع عنده دم. قمر: يلااهوي ياقادرة عملتي كدا ف الولا علشان مركبكيش العجلة. تونة بزعل: لا علشان قال مبيحبنيش.. هو انا وحشة. قمر حضنتها: لا ياحبيبتي هو انتي في فجمالك.. وحلاوتك. تونة حطت رجل

ع رجل وبترفع رأسها لفوق: انا عارفة اني قمر اصلا.. بس ماما مكنتش تعرف انها هتجيب ف حلاوتي ف سميتك انتي قمر.. وسمتني فتون. قمر سرحت ف كلامها. تونة: روحتي فين الكبدة هتتحرق منك. قمر: ها.. ولا حاجة.. خدي ياتونة الشندوتشين اهم كليهم هنا.. متمشيش من قدام عيني. تونة: هاتي مصروفي انا كمان.. عاوزة اجيب جلاطة من عند عم السيد واروح آجر عجلة.. بدل ماافتح دماغ حد تاني.

قمر: خدي مصروفك اهو كملي اكلك.. وروحي آجري عجلة من عند عم شكشك.. متروحيش عند ذكية تاني مش عاوزة مشاكل. تونة: حاضر عاوزة حاجة تانية. قمر ابتسمت: عاوزة سلامتك ياحبيبتي. *** في فيلا الألفي نور: بابي حمدالله ع السلامة.. اومال فين زين. أحمد: هيقعد ف الشركة شوية يخلص كام حاجة كدا وهيجي. نور: طيب هكلم عايدة اخليها تحضر الأكل. أحمد: ماشي وانا هطلع انادي ع كريم. أحمد خبط ع الباب ودخل. أحمد: حبيب بابا عامل ايه.

كريم بصله ودير وشه وكمل رسمه. أحمد بزعل: انا كنت جاي عاوزك تنزل تأكل معايا. أحمد: هتفضل ساكت لحد امتي يابني.. وحشني صوتك نفسي اسمعه. كريم قام خد رسمته وراح عند ابوه ورهالوا وهو ع وشه الضيق والزع. أحمد بص ع الرسمة وهو مصدوم: انا قاتل ياكريم!