رواية حكاية قمر الفصل الخامس عشر 15 - بقلم ياسمين علي

سليم: زين.. يا جدع بقا بعد كل الغيبة دي وتسبني ملطوع كل دا برا؟ زين: وحشني والله يا سليم. قمر سمعت اسم سليم بصت اتصدمت وعينها لمعت وديرت وشها بسرعة. سليم: لا واضح إن وحشك فعلاً. زين: بص خمس دقايق بس.. هوصل قمر بس وهاجي نرغي مع بعض براحتنا.. قمر تعالي.. قمررر بكلمك. قمر بتحاول تستجمع نفسها وراحت لزين وبعدت عينها عن سليم: نعم يا زين. سليم شافها: قمر!! زين: انتو تعرفوا بعض؟ قمر بتوتر: ل...

سليم قطع كلامها: آه طبعاً أعرفها.. قمر كانت زميلتي في المدرسة. زين: بجد.. طب كويس. سليم: أنا مبسوط أوي إني شوفتك تاني من زمان أوي.. معرفش حاجة عنك. قمر: آه. زين: طيب أنا هوصلها وأجيلك نكمل كلامنا. قمر: خليك يا زين مع صاحبك.. أنا عارفة الطريق متقلقش. زين: مش هنتأخر عليه.. أنا هوصلك بس. قمر: خليك يا زين لو سمحت.. عن إذنك. "مشيت" (زين فضل باصصلها وحس إنها اتضايقت أول ما شافت سليم بس مش عارف ليه)

سليم: احم احم.. هنفضل واقفين هنا كتير؟ زين: لا طبعاً اتفضل. *** تونة وهدي قاعدين بيتفرجوا ع فيلم ومندمجين. ليل ف اوضتها صوتت فجأة. هدي اتخضت وطلعت تجري ع الأوضة. تونة بتخبط ع رجلها: استر يا رب.. استر يا رب. هدي: مالك يا ليل في إيه.. حد عملك حاجة؟ ردي في إيه. تونة: دي بتضحك يا ماما.. بتك اتجننت ع الآخر. ليل: أنا نجحت يا ماما.. أنا نجحت. هدي: ألف مبروك يا حبيبتي.. ألف مبروك.

تونة: وهو اللي بينجح بيصوت كدا ويفجع اللي حواليه.. انتي قطعتي خلفي. ليل زقتها: خلف إيه اللي قطعتهولك يامفعوصة.. انتي اسكتي. تونة: صبرني يا رب ع البت دي عشان ممسكهاش أضربها. هدي: اتصلي بقمر فرحيها هي كمان وطمنينا عملت إيه.. إن شاء الله تكون اتقبلت والفرحة تبقى فرحتين. ليل: إن شاء الله يا ماما. *** قمر راكبة العربية وسرحانة. عربي بيبصلها ف المرايا: مالك يا ست قمر شكلك مش مبسوط ليه؟ قمر: ما فيش يا عربي.

عربي: لا إزاي وأنا أول مرة أعرفك يا ست قمر.. انتي ف حاجة مضايقاكي.. لتكوني متقبلتيش ف الشغل الجديد.. متزعليش نفسك دا هما اللي خسروا والله. قمر: لا يا عربي أنا اتقبلت الحمد لله. عربي: اومال زعلانة ليه؟ حد كلمك ولا ضايقك؟ قوليلي. قمر: لا و... "الموبايل رن" قمر: دي ليل. ليل: أيوه يا ليل في حاجة؟ ليل: أنا نجحت يا قمر بتقدير امتياز كمان.

قمر بفرحة: بجد يا ليل.. أنا كنت حاسة إنك هتفرحيني وتجيبي التقدير دا.. ألف مبروك يا حبيبتي ألف مبروك. ليل: الله يبارك فيكي يا قمر.. وانتي عملتي إيه.. ماما قلقانة. قمر: أنا اتقبلت يا ليل الحمد لله.. طمنيها. ليل: بجد.. داحنا لازم نحتفل النهاردة بقا.. متتأخريش يا قمر. قمر: أنا جاية في السكة أهو.. يلا سلام يا حبيبتي. عربي: فينك يا ليل من بدري.. الفرحة اللي ع وشك دي ظهرت ف نجاح ليل مش ف نجاحك انت.

قمر: فرحتي بنجاحها متتوصفش والله يا عربي. عربي: للدرجادي؟ قمر: وأكتر بكتير.. ليل دي بنتي مش بس أختي.. انت مش عارف أنا كنت مستنية نتيجتها دي أكتر منها. عربي: ربنا يخليكم لبعض. قمر: يارب يا عربي.. المهم انت وراك حاجة انهاردة؟ عربي: لا أنا كنت هوصلك وارجع ع الحارة. قمر: طيب حلو.. انت معزوم عندنا بقا انهاردة. عربي: كتر خيرك يا قمر.. بس... قمر: ما فيش بس.. انت قولت موراكش حاجة صح؟ عربي: صح.

قمر: يبقى انت هتتغدى معانا انهاردة وممنوع المعارضة نهائي.. وبالمرة تشوف تونة ولا هي موحشاك؟ عربي ضحك: آه والله وحشتني العفريتة دي. قمر: يبقى تيجي تشوفها بقا. عربي: حاضر يا ست قمر هاجي. *** فاروق داخل الفيلا مفجوع: خير يا نعمة في إيه.. مالها صافي؟ نعمة: الحقني يا فاروق بيه.. صافي عمالة تصرخ وتكسر ف الحاجة.. غلبت معاها ومش عاوزة تفتحلي الباب.. الحقها يا فاروق بيه. فاروق طلع يجري ع أوضة صافي: صافي افتحي الباب.

صافي بتصرخ: مش عاوزة حد.. ابعدوا عني. فاروق: متوجعيش قلبي عليكي.. افتحي بس وأنا هعملك كل اللي انتي عاوزاه. "صافي فتحت الباب وهي عمالة تعيط" فاروق حضنها: أهدي يا حبيبتي.. احكيلي مالك.. حد عملك حاجة.. قوليلي بس وشوفي هعمل فيه إيه. صافي بتعيط: محدش عملي حاجة يا بابا.. أنا لوحدي أصلاً.. هفضل لوحدي لحد امتى.. أنا تعبانة أوي يا بابا. فاروق: وأنا روحت فين يا حبيبتي.. أنا معاكي أهو.

صافي: محدش معايا.. أنا لوحدي.. كلكم سيبوني.. صحابي وسائر.. وماما.. ماما فين يا بابا؟ إزاي تسبني كل دا؟ فاروق: ماما مسافرة يا صافي زي ما قولتلك وقريب هترجع. صافي: لا يا بابا أنا عاوزة تيجي دلوقتي.. أنا محتاجها أوي. فاروق: حاضر.. هكلمها تيجي حاضر بس أهدي انتي ومتزعليش. صافي: أنا سقطت يا بابا. فاروق: ولا يهمك يا حبيبتي.. فداكي ميت سنة. صافي: بس أسر نجح ومش هبقى معاه.. أعمل إيه.. عاوزة أكون معاه.

فاروق: بس كدا.. أنا هكلم المسؤولين ف الكلية وأخليهم ينجحوكي.. إن شاء الله يسقطوا غيرك وتاخدي مكانهم وهدفعلهم اللي هما عاوزينه.. حاجة تانية يا حبيبة بابا؟ صافي: آه.. خليك معايا متروحش الشغل وتسبني. فاروق: حاضر يا حبيبتي.. هكون معاكي.. بس هروح مشوار صغير بس وهرجعلك علطول.. مش هتأخر. *** مني: كلمتي أبوكي.. طمنتيه؟ سارة: آه يا ماما.. لسه قافلة معاه. ريم بتتمطى: صباح الخير. مني: لسه بدري يا هانم. ريم: حاضر.. هخش أكمل نوم.

مني: انتي يابنت تعالي هنا.. افطري وتعالي ساعديني يالا. ريم: أساعدك في إيه.. ما سارة عندك تساعدك هي. سارة: سبيها يا ماما تنام.. هي ف إجازة.. أنا هساعدك.. عاوزة إيه أعمل. مني: لا انتي مش هتساعديني.. انتي هتدخلي تغيري هدومك.. وتظبطي نفسك كدا. ريم وسارة بصوا لبعض. سارة: أغير هدومي وأظبط نفسي ليه؟ احنا خارجين؟ مني: لا جيالنا ضيوف. ريم: ضيوف مين؟ مني: ضيوف وخلاص.. اعملوا اللي بقول عليه يالا.

ريم: واشمعنى هي تلبس وأنا لأ يعني؟ مني بتلقائية: عشان هما جايين علش... *سكتت* سارة: في إيه يا ماما؟ انتي مخبية إيه؟ مني: بصراحة بقا.. أنا عزمت خالتك وابنها انهاردة.. وجايين عشانك. سارة: انتي مقفلتيش الموضوع دا لحد دلوقتي ليه يا ماما؟ مني: أقفلوا ليه؟ وائل كويس وألف واحدة تتمناه. سارة: وأنا مش عاوزة لا وائل ولا غيره.. ولو سمحتي وقفي اللي بيحصل دا. مني: أوقفه إزاي يعني؟ أتصل أقولهم متجوش وأزعل أختي مني.

سارة: لا متزعلهاش يا ماما.. خليهم يجوا بس أنا لا طالعة ولا هقابل حد.. ومتحاوليش تحطني قدام الأمر الواقع.. عشان هتزعلي من رد فعلي.. عن إذنكم. مني: استغفر الله العظيم وأتوب إليه.. أدي آخرة تربية نادر ودلعه ليه. ريم: ماتسبيها براحتها يا ماما.. مش عاوزة خلاص.. هو بالعافية. مني: مالكيش دعوة انتي وخشي نامي.. ولا شوفي كنتي رايحة فين. ريم: أنا غلطانة إني صحيت أصلاً. ***

قمر: احكيلي بقا يا عربي.. الحارة عاملة إيه.. والناس اللي فيها وحشوني والله كلهم. عربي: كويسين كلهم.. ما فيش غير بوز الأخس بس هو اللي قرفنا.. امتى الحارة تنضف منه؟ قمر: قريب يا عربي بإذن الله. هدي: يلا يا حبايبي الأكل جهز. تونة: هييييه.. أخيرا هناكل. هدي: عيب كدا يا تونة. قمر: لا يا ماما متقلقيش.. عربي حافظ تونة.. ما فيش إحراج منه.. يا أما عملت مصايب قدامه. عربي: آه يا أما.. فتحت دماغ الناس وفقعت عين ناسه.

هدي: يلاهوي.. يا تونة انتي تعملي كدا؟ تونة: دول بيفتووا عليا يا ماما.. متصدقهمش. عربي: بنفتري عليكي إيه يا تونة.. دي راس ابن ذكية لسه معلمة. تونة: تصدق بالله.. انت لو ماسكت لقوم أعلم ع راسك انت كمان. هدي: عيب يا تونة.. قولت خليكي بنت مؤدبة وجميلة. تونة: حاضر حاضر.. ممكن نأكل بقا؟ هدي: طبعاً يا حبيبتي. *الجرس رن* تونة: دا مين التنح اللي جاي دلوقتي؟ ليل: قومي شوفي مين.

تونة: لا أنا بأكل مش فاضية.. قومي انتي ولا ع رجلك نقش الحنة. ليل: يباي عليكي.. اسكتي خلاص هقوم. ليل فتحت: مين حضرتك؟ قمر: مين جه ياليل؟ فاروق: انتي ليل؟ ليل: آه.. انت مين؟ هدي: فاروق!! *** كنزي بفرحة: ماما.. ماما.. حازم لسه قافل معايا وقالي إنه اتفق مع بابا الفرح الأسبوع الجاي. نجلاء: بدري كدا ليه؟

مش كان يستنى شوية.. هنلحق نحجز الفساتين والقاعة امتى والحاجات اللي ناقصاكي.. والمعازيم والناس.. هنلحق نعمل كل دا ف أسبوع؟ كنزي: متقلقيش يا ماما.. بابا قالي هييجي انهاردة بدري وهننزل نكمل بقيت حاجتي.. وإن كان ع الفستان والحاجات دي.. هنزل أنا وحازم نحجزها عادي.. والمعازيم بقا ربنا يخلي الموبايل.. هنكلمهم كلهم عادي يا ماما.. متقلقيش. نجلاء بزعل: ماشي يا كنزي.. اللي تشوفيه. كنزي: مالك يا ماما.. انتي مش فرحانة إني هتجوز؟

نجلاء: لا يا حبيبتي فرحانة طبعاً.. بس مش مصدقة إنك هتمشي وتسبيني خلاص. *بكت* كنزي حضنتها: ومين قال إني هسيبك يا ماما.. دا أنا هنطلك كل شوية ومش هبعد عنك أبداً. نجلاء: لا يا حبيبتي.. ماهو أنا مش هخلص منك عشان تجيلي كل شوية. كنزي: الله بقا.. يعني انتي هترتاحي مني؟ زعلانة ليه بقا؟ خلاص مش جاية خالص. نجلاء: بهزار معاكي يا كوكو.. هو أنا ليا غيرك.. تنوري ف أي وقت بيت أبوكي. كنزي: ياحبيبتي يا ماما.. ربنا يخليكم ليا يارب.

*** هدي: خير يا فاروق.. عاوز إيه؟ فاروق: مش تدخلني الأول ولا هنتكلم ع الباب؟ هدي: اتفضل. هدي وقمر قعدوا وليل قاعدة متعصبة ومش طايقة فاروق. تونة: مين الراجل دا يا قمر؟ قمر: روحي كلي يا تونة. هدي: ها يا فاروق.. قول سبب الزيارة دي إيه؟ فاروق: أنا جاي أعرض عليكم عرض. ليل بعصبية: مش عاوزين حاجة منك واتفضل..... قمر مسكتها: استني يا ليل. ليل: استني إيه يا قمر.. ما إحنا عارفين هو عاوز إيه.. عاوز ياخد ماما مننا تاني.

تونة: مين دا اللي ياخد ماما مننا؟ يوريني كدا هياخدها إزاي؟ قمر: ممكن تسكتي انتي وهي.. سيبوه يكمل كلامه. "هدي بصتله ومستغربة" فاروق: شكلك انتي الكبيرة العاقلة اللي هتفهميني.. مع إن عرضي لو ليل سمعته هتغير رأيها. ليل بتريقة: وايه هو بقا العرض اللي هغير رأي لما أسمعه؟

فاروق: عرضي هو.. هخليكي تسافري تكملي تعليمك برا.. وهضمنلك مستقبلك لما تتخرجي وهخليكي تمسكي شركة من شركاتي اللي برا.. والعرض مش ليكي لوحدك.. قمر كمان هكتبلها شيك بـ 2 مليون جنيه.. وبنسبة للصغيرة أنا هدخلها أحسن المدارس وهضمنلها مستقبلها.. ها قولتو إيه؟ هدي: مش موافقين. فاروق: هما اللي يقرروا. ليل: أنا مش موافقة ومش محتاجة مساعدتك. فاروق: قمر بتفكر.. شكلها موافقة.

قمر: أنا بفكر آه.. بس مش ف العرض اللي قولته.. أنا بفكر ف المقابل من كل دا.. فين الاستفادة بتاعتك؟ فاروق: طبعاً ليا استفادة.. مش بعمل كدا لله وللوطن.. لما ليل تسافر وتبعد عن هنا خالص.. بنتي هتقدر ترجع لحبيبها وسعادتها هترجع تاني.. والفلوس اللي انتي هتاخديها مقابل إنك هتسيبي هدي ترجع تعيش معانا وترعى صافي عشان صافي محتاجاها.. وحياتي وأسرتي يرجعوا زي ما كانوا مستقرين.

قمر: يعني انت جاي لحد هنا.. عشان تخلي أختي تسافر وتبعد عن الشخص اللي بيحبها عشان بنتك تعيش مرتاحة وسعيدة.. وهتديني فلوس مقابل إن أمي ترجعلك وترجع لبنتك عشان حياتك تكون مستقرة وتدمر حياتنا إحنا بمقابل 2 مليون جنيه؟ هدي: ع جثتي إني أرجعلك وأسيب ولادي. ليل وقفت: أنا حقيقي مشوفتش ف بجاحتك. تونة: دانا صدقت لما قولت مين التنح اللي جيالنا دلوقتي. فاروق طلع الشيك: الشيك أهو معايا وممضي كمان.. ولو عاوزة أكتر أنا موافق.

"قمر خدت الشيك منه.. الكل بصتله باستغراب وفاروق فرح" فاروق: أنا كنت متأكد إنك هتوافقي.. واحدة تعبت ف حياتها وشقيت طول السنين دي عشان تلقي تأكل أخواتها.. مش هترفض فلوس زي دي عشان أمها. قمر قطعت الشيك ورميته ف وشه: عرضك مرفوض.. ووقتك انتهى.. تقدر تتفضل ومش عاوزين نشوف وشك هنا تاني. تونة صفرت: تعيش قمر.. تعيش.. يلا يا حبيبي ورينا عرض كتافك.. عاوزين نأكل. فاروق: الظاهر إن بُعد أمكم وأبوكم عنكم.. أثر ع تربيتكم.

ليل وقفت قصاده: غريبة دي.. مانت علطول عايش مع صافي.. ومع ذلك صافي مش متربية. فاروق بعصبية: انتي نسيتي نفسك واتجرأتي تتكلمي ع بنتي أنا. "لسه بيرفع إيده يضربها.. قمر مسكت إيده وضربته بالقلم هي" قمر: دا عشان يخليك تفكر ألف مرة قبل ما تقرب لحد من أخواتي.. اطلع برااااا.. اياك أشوفك هنا تاني. عربي أتدخل ووقف قدام فاروق. فاروق بعصبية: اللي عملتيه دا هندمك عليه بقيت حياتك. قمر: أعلى ما في خيلك اركبه..

عربي: يلا بقا يا أستاذ من هنا.. كفاية عليك كدا. فاروق مشي وهو متعصب: أنا هوريكم هعمل فيكم إيه.. مش هسيبك يا هدي انتي وبناتك فاهمة.. مش هسيبك. هدي: ليه عملتي كدا يا قمر.. دا مؤذي يا بنتي. قمر: يعمل اللي يعمله يا ماما.. عاوزني أشوف بيرفع إيده ع أختي وأسيبه يمشي كدا؟ تونة: جدعة يا قمر.. لو كنتوا سبتوني عليه كنت خزقتله عينه. ليل: اقعدي يا أختي.. دانتي بوق وخلاص. تونة: تحبي تجربيه؟ هدي: بس كفاية يا بنات.. يلا قوموا كلوا.

قمر: ماليش نفس.. أنا داخلة أرتاح.. عن إذنكم. *** اسر: أخيرا الواحد خلص من سنة أولى.. والله أنا لحد دلوقتي أبويا مش مصدق إننا نجحنا. وليد مركز ف الموبايل: آه فعلاً. اسر: آه فعلاً.. انت مش مركز معايا أصلاً. وليد بضيق: هي مش بتنزل حاجة خالص ليه؟ اسر: هي مين دي؟ وليد: بقولك إيه.. هي ليل تعرف إيه عملت إيه؟ اسر: مش عارف.. مسألتهاش.. بتسأل ليه؟ وليد: عادي يعني.. مش صاحبتنا ولا انت نسيت؟

اسر: آه صاحبتنا.. ماشي.. أنا هقوم أتصل بـ ليل وأسألها. وليد: ماشي. *من ناحية تانية* سارة قاعدة ف أوضتها بتتفرج ع صور وليد ومبتسمة. مني دخلت: خالتك وابنها برا.. مش هتخرجي؟ سارة سرحانة ومش مركزة. مني: سارررة.. انتي بتضحكي لمين؟ سارة اتفجعت: في إيه يا ماما؟ انتي هنا من امتى؟ مني: من وانتي بتضحكي للموبايل.. اتجننتي ولا إيه؟ سارة: أنا.. لا.. مضحكتش.. أصل أنا شفت حاجة تضحك ف ضحكت.. عادي.. هو انتي كنتي عاوزة حاجة؟

مني: آه.. بقولك خالتك وابنها برا.. مش هتطلعي؟ سارة: لا مش طالعة يا ماما. مني: طب سلمي عليهم حتى.. عيب كدا.. دول جايين يشوفوكي. سارة: يووه يا ماما.. ماشي هطلع بس هسلم بس. مني: ماشي.. أسيبك تغيري هدومك بقا. (سارة مسكت الموبايل وكتبت بوست: "البُعد لا يقلل من المحبة، العزيز يظل عزيز حتى وإن كان بعيد كل البُعد عن الأعين." ❤️.. وشيرته وابتسمت وحدفت الموبايل ع السرير) *** * اسر قالب وشه. وليد: في إيه مالك.. سارة منجحتش؟

اسر: لا نجحت. وليد فرح: طب الحمد لله.. قالب وشك ليه طيب؟ اسر: فاروق راح لـ ليل البيت.. الراجل دا اتجنن زي بنته بالظبط.. أنا مش مصدق بجد.. هو فاكر لما يحاول يسفرها كدا هو بيبعدها عني.. ولا فاكر إني كدا هرجع لبنته مثلاً. وليد: سفر إيه؟ أنا مش فاهم حاجة. اسر: عرض ع ليل تسافر تكمل تعليمها برا.. عشان أرجع لبنته.. وأنا اللي كنت بستغرب تصرفات صافي.. دي عيلة مجنونة والله. "وليد قعد يضحك"

اسر: انت بتضحك ع إيه ونبي.. أنا لازم ألاقي حل.. أنا مش هسمح له يبعدنا عن بعض. وليد جاله نوتيفيكيشن.. مسك الموبايل بسرعة. وليد فرح: دي سارة نزلت بوست. اسر باستغراب: وجاتلك رنة ع الموبايل ليه؟ وليد ماسك الموبايل ومبتسم أوي.. واسر بصصله. وليد: أنا عاوز أشوفها. اسر: تشوف مين؟ وليد: هيكون مين يعني.. سارة. اسر: وليد خليكم كدا أحسن.. عاوز تشوفها ليه طالما مبتحبهاش؟

وليد بتلقائية: ومين قالك إني مبحبهاش.. أنا بحبها.. أنا كنت بفكر غلط لما كانت قريبة مني.. كنت بقول لما تبعد هرتاح وهي هتنساني.. لا أنا ارتحت ولا هي نستني. اسر: مين قالك إنها نستك؟ وليد عطاله الموبايل: بص اقرا كلامها. اسر: ممكن ميكنش عليك.. ممكن متكنش قصدة حد بيه خالص. وليد: أنا متأكد إن البوست دا ليا.. أنا عاوز أشوفها.. أنا عاوزك تساعدني.

اسر: وأنا مش هساعدك يا وليد غير لما تاخد قرار صح ف العلاقة دي.. زي ما انت صاحبي سارة هي كمان صاحبتي.. مش هرضى ليها يتكسر قلبها تاني. وليد: صدقني مش هكسر قلبها.. بس ترجع.. عاوز أتكلم معاها. اسر: طيب أساعدك إزاي؟ وليد: أنا معرفش عنوانها إيه ف اسكندرية.. اعرفلي عنوانها أو كلمها تيجي هي هنا بس من غير ما تعرف إني أنا اللي عاوزها. اسر: ماشي.. هحاول يا وليد.. بس موعدكش يعني. وليد: ماشي يا اسر. *** ريم: لسه مخلصتيش لبس؟

سارة: خلاص.. فضل شعري وطالعة. "موبايل سارة جاله نوتيفيكيشن" ريم بصت ف الموبايل: Walid Saad Reacted to.. سارة شدت الموبايل بسرعة: يلهوي.. وليد عمل لاف ع البوست.. أكيد خد الكلام ع نفسه. ريم: كلام إيه وريني. سارة: استني بس يا ريم.. أعمل إيه.. أنا غلطانة إني نزلت البوست.. اوف.. أنا بحاول أبعد وأبين إني قوية.. وأنا غبية. ريم: في إيه يا مجنونة انتي.. متفهمني.. بوست إيه؟

سارة: بصي.. أنا نزلت البوست دا عادي جداً.. مكنتش أقصد أي حاجة خالص. ريم قرأته: لا والله.. متقصديش حاجة خالص فعلاً. سارة: انتي مش مصدقاني؟ ريم: لا طبعاً مصدقاكي.. كملي. سارة: راح وليد عمل لاڤ عليه.. معنى كدا إنه خد الكلام ع نفسه.. وأنا مقصدهوش. ريم: عادي.. هو كمان عمل لاڤ وميقصدش حاجة خالص. سارة: انتي بتاخديني ع قد عقلي؟ ريم: أنا.. أبداً.. محصلش. سارة: اطلعي برا يا ريم. ريم: أقول لماما إيه طيب؟

سارة: قوليلاها مش طالعة. ريم: أحسن بردك. سارة: يلا اطلعي. ريم: أنا طالعة أهو.. *رجعت خطوتين* بس انتي مقولتليش إن وليد قمر كدا. سارة: اطلععععي براااا. ريم: حاضر.. خارجة أهو.. متزقيش. *** * اسر وصل الڤيلا وكان بيفكر ف طريقة يقرب من ليل بشكل رسمي.. وإزاي هيساعد وليد ف مشكلته.. كنزي شافته راحتله. كنزي: اسر عامل إيه؟ اسر: الحمد لله.. وانتي هنفرح بيكي امتى؟ كنزي: قريب خلاص.. الفرح الأسبوع الجاي.. هي ليل مقالتلكش ولا إيه؟

اسر: لا مقالتليش.. ألف مبروك يا كوكي. كنزي: الله يبارك فيك.. عقبالك. اسر ابتسم وشد كنزي من أيدها: تعاليلييي.. عاوزك ف موضوع مهم. كنزي: استنى بس.. بتشدني ليه؟ فهمني. اسر: اقعدي.. هفهمك. كنزي بتتاوب: بسرعة بس عشان هموت وأنام.. ورايا حاجات كتير بكرة هعملها. اسر: لا فوقي.. الله يباركلك وركزي معايا.. أنا دلوقتي هكلم واحدة و..

كنزي: ينهارك أزرق.. هتكلم واحدة.. هتخون ليل يا اسر.. وجايبني أشترك معاك ف الجريمة.. وأخون ليل أنا كمان؟ لااا.. دا مش ممكن يحصل أبداً. اسر: اسكتتتيي.. أخون إيه.. اديني فرصة أفهمك.. الواحدة دي تبقى سارة. كنزي عليت صوتها: وكماااان اسمها سارررة.. فيها إيه مش ف ليل دي؟ فاهمني.. دي ليل ما فيش زيها أصلاً.

اسر: الله يكون ف عونك يا حازم والله.. اترزعي بقا عشان أفهمك.. سارة دي صاحبتنا وليل عارفاها.. ما فيش بيني وبينها حاجة.. دي زي أختك. كنزي قعدت: آه.. زي أختك.. مالها بقا ست سارة دي؟ اسر: أنا عاوزك تعزميها ع الفرح بتاعك. كنزي: أعزمها.. ماشي.. بس قوليلي. اسر: هفهمك.. ولا إني خايف تفضحيني.. بصي يا ستي.. أنا بصراحة كدا قررت أستغل فرحك.. هتقدم لـ ليل فيه. كنزي بفرحة: بتتكلم جد يا اسر؟

اسر: آه والله.. أنا كنت جاي بالعربية عمال أفكر ف الموضوع لحد ما قولتيلي إن فرحك الأسبوع الجاي.. قولت باااس.. هو دا.. المهم انتي متكونيش مضايقة. كنزي: أضايق إيه بس.. دا أنا فرحانة أكتر ما فرحانة لنفسي.. ربنا يسعدكم ويفرحكم. اسر: يارب. كنزي: بس مفهمتش بردك سارة أعزمها ليها. اسر: ااه.. دانتي غبية وهتتعبيني بقا.. قولتلك سارة صاحبتنا كلنا.. وأكيد هحب إن يكون صحابنا موجودين وبالأخص سارة. كنزي: ليه بقا بالأخص سارة؟

اسر: والله مش عارف.. بس هي صاحبة ليل الوحيدة و.. كنزي: و.. إيه؟ اسر: وبس.. مش عارف.. أنا طالب منك الطلب دا بس إنك تعزميها عشان ترضى تيجي. كنزي: طب هي هتوافق تيجي فرحي وهي متعرفنيش؟ اسر: ما أنا هفهمها اللي فهمتهولك.. إنها هعمل مفاجأة لـ ليل ف الفرح وعاوزها تكون موجود.. ومن ناحية تانية انتي تقنعيها تيجي. كنزي: ماشي ياسيدي.. أي طلبات تانية؟ اسر: لا.. كتر خيرك إنك فهمتيني لحد كدا. كنزي: طيب.. يلا كلمها. ***

سهر: فاروق.. انت مش كنت واخد إجازة تقعد فيها مع صافي؟ فاروق: زهقت من قعدة البيت.. قولت أنزل الشركة شوية وكدا كدا صافي نايمة. سهر: طيب كويس إنك جيت.. ف اجتماع مهم دلوقتي أستاذ أحمد عامله.. بالمرة تحضره. فاروق: طيب.. يلا بينا. "لمح قمر داخلة الاجتماع" فاروق بعصبية راح لقمر شدها من أيديها: انتي إزاي تتجرأي تيجي شركتي؟ قمر زقت إيده: انت اتجننت؟ فاروق: انتي لسه شوفتي جنان.. يااااااااااااااااااااااااااااااااااااامن!

رجالة الأمن: تحت أمرك يا فاروق بيه. فاروق: امسكوا البني آدمة دي وارموها برا الشركة فوراً. الأمن مسك قمر وهي بتحاول تشد نفسها وتزقهم: ابعدوووووا عني. فاروق: مسمعش صوتك.. واحمدي ربنا إني هسيبك تخرجي سليمة. "سهر بتتفرج وفرحانة ف اللي بيحصل ف قمر" قمر: بتتحمي ف شوية أمن.. فاكر نفسك كدا راجل؟ فاروق بيرفع إيده يضربها.. زين مسك إيده. "وسهر واقفة مصدومة"

زين موجه كلامه للأمن: سبوها.. واخر مرة أشوفكم تمدوا إيديكم عليها.. مفهوم؟ الأمن: فاروق بيه اللي طلب مننا كدا. زين بعصبية: بقول مفهوم؟ الأمن: حاضر يا زين بيه. فاروق: إيه اللي بتعملوا دا يا زين.. البنت دي مش متربية.. وأنا أعرف أربي الأشكال دي كويس. زين بعصبية: فاااااااااااااااااااااااروق بيه.. اتفضل نتكلم جوا ف المكتب مش قدام الموظفين!!! *الكل دخل* أحمد: إيه الدوشة اللي كانت برا دي.. إيه اللي بيحصل؟

فاروق: أنا اللي المفروض أفهم إيه اللي بيحصل من ورايا.. البني آدمة دي بتعمل إيه ف شركتي؟ زين: شركتناا.. اسمها شركتنا. أحمد: إيه اللي بتقوله دا.. من امتى ف بينا الكلام دا؟ زين: لما يبقا في حد شغال معايا.. وألاقي فاروق بيه عاوز يطرده وبيحاول يمد إيده عليه.. يبقى لازم أوضحله.. لاحسن يكون ناسى. فاروق: لما تكون واحدة زي دي.. رباية حواري.. يبقى تستاهل أكتر من مد الإيد كمان.

أحمد: أنا مسمحلكش تتكلم عنها كدا.. عملتلك إيه قمر عشان تتكلم عنها بالأسلوب دا؟ فاروق: يرضيك عيلة زي دي تمد إيدها عليا؟ الكل اتصدم وبص لقمر. قمر: اللي يرفع إيده ف وش أختي يستاهل بدل القلم عشرة.. ورفعة إيدك ف وشي لسه محسبتكش عليها.. أنا عاملة احترام للمكان اللي أنا فيه بس. فاروق: سامع الكلام دا يا أحمد.. عجبك كدا؟ بتشغلوا ف الشركة ناس بالأسلوب دا.. ولا إيه رأيك انت يا زين ف الناس اللي مشغلها معاك؟

زين: أنا ماليش دعوة إيه بينكم طالما حصل برا الشركة.. إنما طول ما هي هنا وبتشتغل معايا ف اللي يمسها يمسني. "قمر بصتله وابتسمت.. وسهر بصالهم ومتغاظة" فاروق: وأنا مش عاوزها ف الشركة هنا.. شغلها معاك زي ما انت عاوز بعيد عن شركتي.. مش عاوز أشوف وشها قدامي. زين: والله حضرتك عندك أكتر من شركة تقدر تروح فيهم.. وسهر بتدير الشغل هنا.. وبكدا مش هتشوف وشها. فاروق: انت بتطردني من شركتي؟

زين: لا.. العفو.. أنا بقدملك اقتراح بس.. لأني مش همشيها وهتشتغل معايا هنا. فاروق وقف بعصبية: ابنك هيخلي الشراكة اللي بينا تنتهي. سهر: إيه اللي بتقوله دا يا فاروق!! زين ببرود: شوف فاضي امتى ونجهز العقود وننهي كل حاجة. فاروق بصتله وخرج وراه سهر: فاروق استني. قمر: أنا مكنتش عاوزة الموضوع يوصل لكدا.. أنا آسفة يا أستاذ أحمد والله.. بس هو اللي اعترض طريقي.

أحمد: متتأسفيش يا قمر.. انتي معملتيش حاجة.. هو اللي غلط ف حقك.. وأنا بعتذرلك بالنيابة عنه.. إنسي اللي حصل ووعدك مش هيتكرر. قمر: حاضر.. عن إذنك.. هروح ع شغلي. زين: بابا.. أنا جاهز أشتري نصيبه ف الشركة. أحمد: مش اتسرعت شوية يا زين؟ زين: عاوزني أشوفوا بيمد إيده ع حد شغال معايا وأسكت؟ أحمد: يعني انت عملت كل دا عشان مد إيده ع حد شغال معاك بس؟ زين اتوتر: آه.. وكمان قمر واحدة مننا ولا نسيت.

أحمد: لا منسيتش.. بس مستغرب إن انت اللي بتدافع عنها. زين: عادي يعني.. وبعدين أنا أصلاً مش طايقه من يوم موضوع نور.. زي ما تقول كدا بتلكك. أحمد: ماشي يا زين.. اعمل اللي تشوفه صح.. وأنا معاك. *** * يوم الفرح. قمر: ياماما والله متقلقي.. مش هتأخر.. هروح بس مشوار اللي قولتلك عليه وهاجي.. مش هغيب.. أنا هقفل بقا عشان أشوف عربي فين.. ماشي ياماما.. سلام يا حبيبتي. *بتتصل ب عربي مبيردش* زين: هتمشي دلوقت؟ قمر: آه يا زين.

زين: كويس عشان تلحقي تجهزي. قمر: أووف.. رد بقا. زين: مالك؟ قمر: عربي مش بيرد.. وأنا عاوزة يوصلني. زين: عربي تاني؟ قمر: في إيه ماله عربي؟ زين: مالهوش.. تعالي أوصلك أنا. قمر: لا عشان معطلكش. زين: أنا كدا كدا كنت ماشي أوصلك ع السكة. قمر: أصل أنا مش راحة البيت.. أنا راحة الحارة. زين: ليه؟ قمر: هشوف البيت وصل لحد فين ف التوضيب وكدا.. مش عاوزة أعطلك.. أنا هاخد تاكسي يوصلني. زين: لا مالهوش لازمة التاكسي.. أنا هوصلك.

قمر: هتروح معايا الحارة يا زين؟ زين بتردد: آه.. أروح مروحش ليه.. يلا بينا. قمر ابتسمت: يلا. *** ريم: ماتقومي تلبسي يابنتي.. مستنية إيه؟ سلمي: شكلها غيرت رأيها ومش هتروح. ريم: نععم.. متروحش إزاي يعني؟ لا لازم تروح. سارة: سلمي صح.. أنا غيرت رأيي.. مش هروح. ريم: إيه الجنان دا بقا؟ مانتي كنتي مقتنعة امبارح ونزلنا جبنا الفستان سوا.. إيه حصل انهاردة غيرتي رأيك؟

سارة: مش عاوزة أروح.. أنا مش هقدر أقابل وليد.. واحنا كمان ف فرح.. مش بعيد أروح ألاقي واقف مع واحدة. ريم: ما يقف مع واحدة.. وانتي كمان روحي.. نقيلك واحد قمر كدا.. اقفي معاه انتي كمان. سلمي: وممكن أسر يكون عزمك عشان وليد؟ سارة: تفتكري؟ ريم: أيوه صح.. إزاي تاهت عن بالنا.. اليوم اللي اتعزمتي فيه هو هو نفس اليوم اللي عملك فيه لاڤ ع البوست. سارة: بوست إيه؟

ريم: مش وقته دلوقتي.. *شدت سارة* يلا قومي البسي.. ما فيش وقت عشان متتأخريش. سارة: استني بس.. أنا لسه مفكرتش. ريم: مش وقت تفكيررر.. يلااا.. قدامي. *** قمر: أيوه هنا. زين: هو دا بيتك؟ قمر: آه.. مش عاجبك ولا إيه؟ زين: لا شكله لطيف.. بس محتاج شوية تظبيطات.. وممكن تهدميه وتستغلي الأرض.. مساحتها كويسة. قمر: لا طبعاً.. لا يمكن أهده.. دا من ريحة ستي الله يرحمها. زين: الله يرحمها.. طب يلا بينا ننزل. قمر: يلا.

سيد بفرحة: قمر.. أنا مش مصدق عيني.. انتي رجعتي امتى؟ قمر: عم سيد.. وحشني أوي.. عامل إيه وولادك عاملين إيه؟ سيد: أنا بقيت كويس أول لما شوفتك يابنتي.. مش عارفة أنا فرحان إزاي.. أنا آسف يابنتي ع الموقف الأخير اللي حصل مني. قمر: اللي فات مات يا عم سيد... لو مكنتش مشيت مكنتش وصلت للي أنا فيه دلوقتي.. أعرفك دا زين صاحب الشركة اللي بشتغل فيها.. ووالده كان صاحب بابا الله يرحمه.

سيد: يا أهلا وسهلا.. معلش يابني.. فرحتي بقمر نستني أقولكم اتفضلوا عندي ف الدكانة.. اشربوا حاجة. قمر: معلش.. ونبي يا عم سيد.. أنا بس عشان متأخرة.. عاوزة أشوف البيت والحق أمشي. سيد: وماله.. اشربوا الحاجة الساقعة الأول. قمر: مش... زين قطع كلامها: أنا مش مستعجل يا عم سيد.. وممكن أشرب حاجة ساقعة عادي. قمر بصتله. زين: في حاجة؟ قمر: لا.. ما فيش.. اشرب لحد ما أطلع أشوف البيت وأنزل.. خلي بالك منه ياعم سيد.

زين بصلها ورفع حاجبه: وأنا عيل صغير هتوه؟ سيد: متقلقيش يا قمر.. دا في عيني.. اتفضل يا زين بيه. زين: تشكر يا راجل يا طيب. قمر طالعة البيت.. شافت ست من الحارة ماشية بتعيط.. راحتلاها. قمر: مالك يا أم سهير.. بتعيطي ليه؟ أم سهير: ست قمر.. انتي رجعتي.. إزيك يا حبيبتي؟ قمر: أنا كويسة.. المهم انتي مالك؟

أم سهير: طردوني من الشغل عشان بتأخر غصب عني.. بسبب إنه بعيد عني.. ونزلت أدور ع شغل.. محدش قابل يشغلني خالص.. ومش عارفة هأكل العيال منين. قمر: طيب.. أهدي بس.. هتفرج إن شاء الله. *حطت إيدها ف الشنطة وطلعت فلوس* قمر: خدي دول يا أم سهير.. هاتي أكل للبيت.. ومش هسيبك والله.. لو احتجتي أي حاجة.. قولي لعربي وهو يقولي. أم سهير عيطت: كتر خيرك.. ربنا يباركلك ف صحتك وعافيتك.. ربنا يسترها عليكي دنيا وآخرة. "زين بيبصلها ومبتسم"

سيد: الست قمر دي ما فيش زيها ولا ف طيبة قلبها.. لو طلعوا الطيبة اللي جواها وفرقوها ع البلد كلها مش هتخلص.. بنت جدعة وبنت أصول بصحيح.. ميغركش عبده موتة اللي بيطلع منها ساعات.. دا بس عشان تعرف تعيش وتحمي أخواتها ونفسها من اللي حواليها.. إنما هي غير كدا خالص. زين: مكدبتش عليك.. ف الأول كنت شايف عبده موتة دا.. بس بعد كدا عرفت إن اللي جواها طيب.

سيد: لا.. دي فترة صغيرة اللي عرفتها فيها.. أنا عارفها من وهي صغيرة.. اللي مرت بيه ف حياتها مش شوية.. أبوها وأمها وجدتها. زين: والدتها رجعتلهم الحمد لله. سيد بفرحة: بتتكلم بجد؟ .. ألف حمد وشكر ليك يا رب.. أنا كنت متأكد إنها هترجع.. وقمر هتسامحها. زين: الحمد لله.. هي اتأخرت ليه؟ أنا هروح أشوفها.. وكتر خيرك ع الحاجة الساقعة دي. سيد: دا حاجة بسيطة يابني.. مش من مقامك. زين: متقولش كدا يا عم سيد.. قعدتي معاك دي بس...

مقامها كبير أوي عندي. زين داخل البيت.. وقمر نازلة اتقابلوا. قمر: خير يا زين.. في حاجة؟ زين: لقيتك اتأخرتي.. قلقت عليك. قمر: اتأخرت فين؟ أنا ملحقتش.. دا خمس دقايق ونزلت. زين: آه.. طيب يلا بينا. قمر: يلا. جعفر: اللله اللله.. انتي رجعتي تاني.. ومين اللي معاكي دا؟ قمر: وانت مالك.. ماتخليك ف حالك. جعفر: حالي ماهو دا حالي يا أختي.. عاوزني أشوفك نازلة من البيت الفاضي مع راجل غريب وأسكت؟

قمر بعصبية: انت اتجنننتتت.. إيه اللي بتقولو دا؟ جعفر: كمان هتجننيني.. تعالوا اشهدوووا يامنطقة.. الست الشريفة.. أو اللي عاملة نفسها شريفة.. نازلة من بيتها مع راجل غريب.. والله أعلم كانوا بيعملوا إيه فوق. *الناس اتلمت* قمر: والله العظيم لو مسكت.. لـ أنزل اللي ف رجلي ع دماغك. سيد: إيه اللي بتقولو دا.. عيب عليك.. اختي.. عاوز تشوه سمعتها.. حرام عليك.. الراجل كان قاعد معايا. جعفر: اطلع منها انت أحسنلك.

أم سهير: لا.. ميسكتش.. عم سيد عنده حق.. أنا شوفت قمر وهي طالعة لوحدها البيت.. حرام عليك يا أخي.. حرقتلها بيتها وجاي دلوقتي تقول كدا ف حقها. جعفر: انتي اتجننتي يا ولية.. انتي ناسيا انتي بتكلمي مين؟ قمر وقفت قصاده بسرعة قبل مايعملها حاجة: إياك تقربلها. جعفر: هتعملي إيه بقا.. انتي اللي هتحميها.. انتي ناسيا أنا عملت فيكي إيه.. وأقدر أعمل فيكي إيه؟

قمر: منستش انت عملت إيه.. ولا هنسا.. اطمن.. قريب نهايتك هتبقا ع إيدي.. يلا بينا يازين. ركبوا العربية ومشوا.. وجعفر بيبصلهم والغضب طالع من عينه: انتو بتتفرجوا ع إيه.. غوروا يلا.. كل حي يروح لحاله. *** زين سايق: مين الجدع دا؟ قمر: دا المعلم زفت. زين: ماله يعني؟ بيعمل معاكي كدا ليه؟ قمر: عشان طلب يتجوزني ورفضته. زين: تتجوزيه إيه دا شكله كبير أوي. قمر: اهو حظي كدا. زين بصلها: هو اللي ولعلك ف البيت؟

قمر بعصبية: آه.. بس ورحمة ستي.. ماهسيب حقي. زين: طيب.. أهدي.. بس شكلك مدوبة قلوب الحارة.. مرة جعفر ومرة عربي. قمر: عربي؟ ماله عربي؟ زين: مش عربي دا حبيبك؟ قمر ضحكت: عربي حبيبي.. دا مين قال كدا؟ زين: يعني أنا بشوفه بيوصلك ف كل مكان. قمر: عربي دا أصغر مني.. أنا اللي مربياه وبثق فيه.. علشان كدا جبته يشتغل معايا بس. زين فرح: اااه.. قولتيلي بقا.. عاوزة تروحي فين بقا؟ قمر: ع الأوتيل.. هروح لـ كنزي. ***

"الأوضة اللي فيها كنزي" ليل: هي قمر لسه مجتش يا ماما؟ هدي: لسه.. كلمتها قالت ف الطريق.. انتي لسه مالبستيش ياليل؟ ليل: عادي.. ماهي العروسة لسه ملبستش. هدي: العروسة بتحط ميكاب وهتلبس خلاص.. يلا انتي اجهزي. قمر: أنا جيت. هدي: كويس إنك جيتي.. انتي كمان.. يلا اجهزي.. وأنا هلبس تونة واللبس. قمر: إيه الحلاوة دي.. مبروك يا عروسة. كنزي: الله يبارك فيكي يا قمر. قمر: اومال فين نور؟ ليل: نور بتلبس وهتيجي هي وكريم.

تونة نطت: كريم جاي.. بسرعة ياماما لبسيني الفستان. ليل: بسرعة لبسيها قبل عريسها ما يجي. هدي وقمر ضحكوا. هدي: يارب.. يلبسها فستان فرحه. ليل: طب لبسيني أنا الأول فستان فرحي. هدي بصت لقمر: وانتي يا قمر.. من نفسكيش تلبسي فستان فرحك انتي كمان؟ قمر: أنا.. أدخل اللبس فستان فرح كنزي.. ونشوف حوار فستاني دا بعدين.. عن إذنكم. تونة: مش عاوزة تتجوز الهبلة.. هو الواحد طايله؟ هدي: تعالي يلا عشان تلبسي انتي. ***

"ف أوضة العريس.. حازم لبس وخلص" فريال: لولولولولولوليييييي... ألف مبروك يا حبيبي.. ربنا يتمملك ع خير.. عشت وشوفتك عريس ياضنايا.. اهئ اهئ اهئ. حازم: بتعيطي ليه يا ماما؟ انتي زعلانة إني هتجوز؟ فريال: لا يا حبيبي.. دي دموع الفرحة.. أنا فرحانة بيك بس. زين: عريسنا عامل إيه؟ حازم: تعالي يازين. زين: إيه الشياكة دي كلها؟ حازم: عريس بقا.. عقبالك. زين: إن شاء الله. فريال: أسيبكم أنا وأروح أشوف العروسة.. عملت إيه؟ ***

سائر بيلبس.. موبايله رن. سائر: إيه يا سهر.. عاملة إيه؟ سهر: إيه يا حبيبي.. انت عامل إيه.. طمني. سائر: أنا كويس الحمد لله.. خير.. في حاجة؟ سهر: انت هترجع امتى يا سائر.. كلنا محتاجينلك ف البيت. سائر: أنا مش هرجع البيت دا تاني.. لحد ما بابا يفهم اللي بيعملوا دا غلط. سهر: وهو من امتى فاروق بيسمع لحد.. انت لازم ترجع. سائر: بعدين يا سهر.. نتكلم عشان مش فاضي دلوقتي. سهر: انت خارج ولا إيه؟ سائر: آه.. رايح فرح حازم.

سهر باستغراب: حازم! وايه علاقتك بفرحه؟ سائر: اتعزمت أصل اسر عامل مفاجأة لـ ليل.. وهيتقدملها ف الفرح.. وكان عزمني.. وبالمرة أحاول أرجع لـ نور تاني.. انتي فاهمة.. من ساعة اللي بابا عمله مش بنتكلم. سهر: آه يا حبيبي.. إن شاء الله ترجعوا. سائر: سهر.. اوعي تقولي لـ صافي حاجة عن موضوع اسر وليـ... سهر: طبعاً يا حبيبي.. مش هقول.. متقلقش.. يلا أسيبك أنا.. أشوف وراك إيه.. باي. سهر للسواق: اطلع ع الفيلا. ***

العروسة والبنات كلهم خلصوا. نجلاء ماسكة إيد بنتها وبتعيط. كنزي: كفاية بقا يا ماما.. والله هعيط أنا كمان وأبوظ الميك أب كله. قمر: لا ونبي بلاش عياط.. انهاردة فرح.. نفرح بقا ولا إيه يا نوجة؟ نجلاء مسحت دموعها وحضنت كنزي: ربنا يتمملك ع خير يا حبيبتي. فريال دخلت: لولولولولولييي.. فين العروسة؟ "شافت كنزي قلبت وشها" فريال: إيه كل اللي ف وشك دا يا كنزي؟ كنزي: ماله ياماما؟ دا ميكاب. فريال: كتير ليه كدا.. لا امسحيه.. مش حل.

ليل: تمسح إيه بس.. ما فيش وقت.. والميكاب جميل جدا.. هو ميكاب العروسة بيبقى كدا؟ فريال: طب قلله حتى.. مش كدا. كنزي ع وشك تعيط: طيب.. أنا ممكن أقلله. نجلاء: ما فيش حاجة هتتقلل.. وبنتي كدا حلوة. فريال: انتي بتزعقي ليه يا نجلاء؟ أنا بتكلم ع اللي شايفاه. هدي: اهدوا يا جماعة.. وصلوا ع النبي. تونة: عمو سامح جاي ياخد العروسة.. يلا جهزي. قمر مسكت إيد كنزي: اهدي.. متخافيش.. ما فيش حاجة هتحصل. سامح دخل..

باس رأس كنزي وحضنها: هتوحشيني يا نور عين بابا.. *وبصلها ودمع* إيه الحلاوة دي بس.. جميلة ياحبيبتي. كنزي عيطت: وانت كمان.. هتوحشني أوي. قمر: يعني إحنا ماسكين فيها من الصبح عشان متعيطش.. وانت تيجي تعيطنا كلنا يا عم سامح. سامح: غصب عني والله.. *مسح دموع كنزي* خلاص يا حبيبتي متعيطيش.. يلا بينا. *** حازم والشباب كلها واقفين تحت مستنية العروسة تنزل. اسر: سارة جاية انهاردة.. أنا عملت اللي عليا.. ظبط دنيتك انت.

وليد: متقلقش.. أنا مش هسيبها تبعد عني تاني.. كل حاجة هتخلص انهاردة إن شاء الله. اسر: ربنا يوفقكم. وليد حط إيده ع كتف اسر: ويوفقك انت.. وشاورلها. اسر بيبص.. شاف ليل نازلة ورا العروسة وماسكة الفستان وفرحانة.. ابتسم. سامح: انت واخد أغلى حاجة عندي.. خلي بالك منها. حازم: متقلقش يا عمي.. كنزي في عيني وفي قلبي. *مسك إيدها* وفضل بصصلها وفرحان. زين بيدور ع قمر لحد ما عينه لمحتها وفرح.. وراح وقف معاها.. وهدي شايفاهم ومبسوطة.

سائر: عاملة إيه؟ هدي: الحمد لله يا حبيبي.. تعالي معايا. "راحت لنور وأحمد.. ونور اتوترت أول ما شافت سائر وديرت وشها" أحمد: إزيك يا سائر؟ سائر بص لنور: مش كويس والله.. قلبي تايه مني بقاله فترة. أحمد: نعم! هدي: أحمد بيه.. ممكن تيجي معايا شوية؟ أحمد: آه طبعاً.. اتفضل. سائر قرب لنور: متعرفيش قلبي راح فين؟ نور بصتله باستغراب. سائر بصتله: إيه دا؟ نور: في إيه؟ سائر: معقولة قلبي واقف قصادي وأنا بدور عليه؟ نور ابتسمت.

سائر: وحشتيني. نور: وانت كمان. سائر مسك أيدها: يلا بينا ندخل. نور: يلا. *** صافي ف أوضتها بتاخد المهدئ بتاعها وهتنام. سهر دخلت فجأة: صافي.. الحقي.. الكارثة اللي هتحصل. صافي: ف إيه؟ سهر: اسر هيتقدم لـ ليل انهاردة. صافي: إيه اللي بتقوليه دا؟ انتي اتجننتي.. استحالة دا يحصل.. بابا وعدني إنه مش هيتجوز غير... سهر: والله مش بكذب يا صافي.. سائر لسه قافل معايا وقالي إنه هيتقدملها ف فرح كنزي انهاردة.. انتي واقفة مستنية إيه؟

روحي لهم.. امنعيهم فوراً.. اسر بيحبك انتي يا صافي.. ليل واخدة منك.. هتسيبي حبك بسهولة ولا إيه؟ صافي متلغبطة وبتعيط: أنا مش عارفة أعمل إيه.. فين بابا؟ سهر: مش عارفة فين.. شوفي ف المكتب بتاعه كدا. صافي طلعت تجري تدور عليه: باااابااا.. يابابا انت فين؟ "ملقتهوش ف الأوضة.. دخلت المكتب.. شافت مسدس ع المكتب.. خدته ونزلت بسرعة.. وسهر متابعاها وبتضحك" *** كنزي وحازم بيرقصوا سلو. حازم: أنا مبسوط إن انهاردة فرحنا.

كنزي: وأنا كمان. حازم: شكلك مضايق.. مالك.. في حاجة حصلت؟ كنزي: لا.. حازم.. هو الميكاب شكله وحش عليا؟ حازم: بالعكس.. دا جميل جداً ولايق عليكي.. مين قالك إنه وحش؟ كنزي: ما فيش. حازم: أي كان مين قالك.. ميهمكيش رأيه.. المهم إنك عجبتيني أنا بالميكاب ومن غيره. *كنزي فرحت* حازم: أيوه كدا اضحكي.. ليفتكرواكي مجبورة ع الجواز. تونة: هما بيقولوا إيه؟ ليل: مالكيش دعوة انتي باللي بيقولوا. تونة: بصي البت بتضحكله إزاي.

ليل: يخربيتك.. اسكتي.. دا جوزها. *الأغنية خلصت واشتغلت واحدة تانية للكابلز* اسر: بعد إذنك يا تونة هانم.. ممكن آخد ليل نرقص؟ تونة: وتسبوني لوحدي؟ لا مش مسموح.. وترقص معاك بتاع إيه انت.. عيب كدا.. اختشوا. اسر: ع فكرة كريم واقف هناك بيدور ع حد يرقص معاه. تونة: فينه؟ فينه؟ اسر شاورلها عليه وخد ليل يرقص معاها.. وسائر ونور راحوا يرقصوا. زين واقف جنب قمر: هتفضلي واقفة كدا؟ قمر: أعمل إيه يعني؟ زين: مش عاوزة ترقصي؟

قمر: أرقص مع مين.. مانت سامع بيقول للكابلز. زين: لا.. عادي.. مش لازم للكابلز.. عادي لو عاوزة ترقصي.. تعالي نرقص.. عشان متقفيش لوحدك.. يعني مقصدتش حاجة.. لو مش عاوزة خلاص.. براحتك. قمر: آه.. مش عاوزة. زين شدها: طب حلو.. يلا بينا. قمر: زين.. انت بتعمل إيه؟ قولتلك مش عاوزة. زين: هيبقا شكلي وحش أوي لو سبتيني زي الأهبل كدا ومشيتي. *قمر اتكسفت ودمعت ومردتش* تونة: قولي كلام يضحكك. كريم باستغراب: كلام يضحك إزاي؟

تونة: زي ما العريس كان بيضحك العروسة. كريم: معرفش بيضحكها إزاي. تونة: يمكن بيزغزغها. كريم: انتي بتقولي إيه يا تونة؟ تونة: أيوه.. هو حاطط إيده ف وسطها وبيزغزغها. كريم: عاوزني أزغزغك يعني؟ تونة: لا.. أحسن أرقع بالصوت وأعملك فضيحة. كريم خاف وسابها ومشيت. تونة: استنا.. انت رايح فين؟ الغنوة مخلصتش.. استنا. وليد واقف عينه ع الباب ومستني سارة بفارغ الصبر. ليل: بتبصلي وبتضحك ليها. اسر: بصراحة.. مبسوط أوي. ليل: ليها؟

اسر: هقولك.. استني. ليل: رايح فين؟ اسر خد المايك والأغنية وقفت.. والكل بيبصلها. اسر: حابب آخد من وقتكم شوية.. السنادي كانت مختلفة بنسبالي.. كانت أحلى بكتير من اللي فاتوا.. حياتي اتغيرت 180 درجة *بص لـ ليل* للأحسن طبعاً.. وكل دا بفضل شخص واحد بس.. لو اتكلمت عنه مهما اتكلم مش هقدر أوصفه.. الحد دا موجود معانا هنا.. وهو عارف نفسه.. كل اللي بتمنى إنه يفضل معايا العمر كله. قعد ع رجل قدام ليل وطلع علبة

من جيبه فيها خاتم وفتحها: موافقة تحققيلي أمنيتي وتفضلي معايا العمر كله؟ الكل سقف.. وليل مش مصدقة اللي بيحصل وفرحانة أوي ودمعت.. وبصت لـ قمر.. وقمر هزت رأسها بالموافقة. ليل: أنا مواف.... صافي دخلت بتسقف: شابووه بجد.. قصة ولا الأفلام. اسر بعصبية: انتي إيه اللي جابك هنا؟ صافي: جاية أتفرج.. ولا أنا ممنوعة من الفرجة.. آه فعلاً.. مينفعش أشوف حبيبي وهو بيتسرق مني. اسر: انتي عايشة ف وهم يا صافي.. أنا بحب ليل.. فوقي بقا.

صافي: الوهم اللي انتو عايشين فيه دا.. مش هسمحلها تاخدك مني.. مهما كان التمن. هدي: صافي ياحبيبتي.. افهمي.. انتي بكرا تلقي الشخص اللي يحبك وتحبيه.. لسه الدنيا قدامك كبيرة. صافي عيطت: انتي بتعملي إيه هنا يا ماما؟ ليل: مش من حقك تقوليلي ياماما.. دي أمي أنا مش انتي.. شوفتي بقا إنك انتي اللي عايشة ف وهم. اسر: مش هتقدري تفرقي بينا مهما عملتي ياصافي.. اعقلي وامشي. صافي: لا.. هقدر يا اسر.. *وطلعت المسدس* الكل اتصدم.

اسر: إيه اللي بتعمليه دا.. انتي اتجننتي رسمي. صافي: اتجننت بيك وبحبك. اسر: واللي يحب حد يموتوا؟ صافي: ومين قال إني هموتك انت.. أنا هخلص منها. "قمر طلعت تجري.. زين جه يمسكها.. زقته.. وقفت قصاد ليل: مش هسمحلك تأذيها." صافي بتعيط بانهيار: وأنا مش هسمحلها تعيش مهما حاولت.. خدت مني كل حاجة.. سرقتهم مني.. سرقة سعادتي.. هي السبب ف اللي أنا فيه.

* زين وحازم شاوروا لبعض إنهم يتحركوا ويستغلوا إنها ملهية ف الكلام عشان ياخدوا منها المسدس * هدي بتقرب منها وبتعيط من خوفها ع بناتها: صافي ياحبيبتي.. أنا مستعدة أرجعلك.. بس نزلي المسدس.. عشان خاطري.. متعمليش ف نفسك كدا. ليل: انتي بتقولي إيه يا ماما؟ أنا أهون عندي أموت ولا تبعدي عني. صافي: وأنا هنفذ طلبك ياليل. سارة دخلت شافت المنظر.. طلعت تجري.. وقفت قدام صافي. سارة: انتي اتجننتي؟ إيه اللي بتعمليه دا؟ اعقلي يا صافي.

صافي زقتها وقعت ف الأرض: ابعدي عني. سارة قامت تاني: مش هبعد.. ومش هسيبك.. انتي أختي وصاحبتي.. مش هسيبك تضيعي نفسك يا صافي... هاتي المسدس عشان خاطري. صافي: مش هديهولك.. قولتلك ابعدي بقا. سارة بتشد منها المسدس.. جامد.. طلعت طلقة بالغلط. الكل صرخ.. وسارة وقعت ف الأرض. وليد بصدمة: ساررررةةةةة!!!!! *** وبعد ما وليد قرر يعترف لـ سارة ويقرب منها.. للأسف كان الوقت اتأخر.. يا ترى إيه هيحصل ف الأجزاء الجاية؟ تابعوا وهتعرفوا.