رواية حكاية قمر الفصل السادس عشر 16 - بقلم ياسمين علي

سارة دخلت شافت المنظر، طلعت تجري وقفت قدام صافي. سارة: انتي اتجننتي؟ إيه اللي بتعمليه دا؟ اعقلي ياصافي. صافي زقتها، وقعت ف الأرض. صافي: ابعدي عني. سارة قامت تاني. سارة: مش هبعد ومش هسيبك. انتي اختي وصاحبتي، مش هسيبك تضيعي نفسك ياصافي. هاتي المسدس علشان خاطري. صافي: مش هديهولك. قلتلك ابعدي. سارة بتشد منها المسدس. سارة: قلتلك مش هبعد. سبيه ياصافي. صافي بتشد المسدس منها جامد، طلعت طلقة بالغلط. الكل صرخ.

صافي بتبص ف إيدها، لقيت دم. وسارة وقعت ف الأرض. وليد بصدمة: ساررررةةةةة!!!!!! الكل جري علي سارة. وصافي مصدومة وجاية تقرب. سائر شدها جامد. سائر: ليه عملتي كدااااا؟ ليييه؟ ضيعتييي نفسك. زين: الاسعااااف بسرعةةةة. وليد ماسك سارة وبيعيط. وليد: سارة متسبنيش. أنا آسف مش هبعدك عني تاني والله ولا هزعلك بس متسبنيش. أنا بحبك ياسارة مش هقدر أعيش من غيرك.

سارة بصيتلهم كلهم ورجعت بصيت لوليد وحطيت إيدها ع خده، مسحت دموعه. فجأة عينها قفلت وإيدها بعدت عنه. ليل صرخت وحضنت قمر. وكنزي اغمي عليها. وليد مسك إيدها. وليد: سارة... سارة ردي عليا. متفقناش إنك تسبيني. لا. فتحي عينك. علشان خاطري فتحي عينك بس. أنا آسف والله ارجعيليييي. أبوس إيدك متسبنيييش ياساررة. *حضنها وقعد يصرخ* سااااااارررةةةة *** سهر: حمدالله ع سلامتك يافاروق. اتاخرت ليه كدا؟

فاروق: كان فيه شوية شغل بس كنت بخلصهم. انتي إيه اللي مقعدك لحد دلوقتي؟ سهر: أصلي كنت سهرانة مع صافي. مسبتهاش غير لما نامت. فاروق: صافي نامت. طب أنا طالع أطمن عليها. سهر بخوف: لالالا بلاشف. فاروق: بلاش أشوف بنتي. انتي اتجننتي ولا إيه؟ سهر: لا مقصدش يافاروق. أقصد إن أنا تعبت لحد ماخليتها تنام. فضلت تسأل عن هدي وأسر وامتى هيرجعولها وكده. لو صحيتها تاني هتسألك. يبقى الأحسن سيبها نايمة. وبكرة أبقى أشوفها.

فاروق: عندك حق. أنا مبقتش عارف أرجعهملها إزاي والله حاسس إني متكتف ومش قادر أعملها حاجة. سهر: متقولش كدا بس. إن شاء الله يرجعولها. متقلقش. اطلع انت بس استريح. وبكرة كل حاجة هتتحل. فاروق: يارب ياسهر. يلا تصبحي ع خير. سهر بابتسامة متصنعة: وانت من أهله يا أخويا. *** مني: ريم.. بت ياريم اصحي. ريم: نعم يا ماما. مني: هي أختك متصلتش تطمنا إنها وصلت ليه؟ أنا قلقانة عليها. ريم: تلقيها بس انشغلت ف الفرح ونسيت تتصل.

مني: طيب هي هترجع امتى؟ الوقت اتأخر. ريم: لا ماهي قالت هتقعد عند صاحبتها مش هترجع النهاردة. متقلقيش بقا ياماما وادخلي نامي وسبيني أنام. مني مشيت راحت ع أوضتها وهي قلقانة ومش مرتاحة وبتحاول تطمن نفسها بكلام ريم. التليفون رن. رقم سارة. طلعت تجري ترد. سارة: الووو.. أيوه ياسارة.. انتي فين.. قلقتيني عليكي. ليل بتحاول تستجمع نفسها. ليل: أنا ليل صاحبة سارة. ممكن حضرتك تيجي بكرا القاهرة. مني: إيه؟ أجي القاهرة ليه؟ وسارة فين؟

عاوزة أكلمها. اديني سارة أطمن عليه. ليل عيطت وقمر خدتها منها الموبايل. قمر: الو. حضرتك والدة سارة. مني: أيوه أنا. قمر: طيب لازم حضرتك تيجي القاهرة بكرا انتي ووالدها. مني: أنا مش فاهمة حاجة. أجي ليه وبنتي فين؟ حد يفهمنيييييي فين سارررة؟ قمر: البقاء لله. بنت حضرتك اتوفت. مني: ايييييييييه!!!!! *** فاروق نايم. موبايله رن. فاروق: الو... أيوه ياسعد بيه خير؟ في حاجة؟ سعد: انت فين يافاروق؟ الدنيا مقلوبة هنا.

فاروق: أنا ف البيت. إيه حصل؟ سعد: بنتك متهمة ف جريمة قتل. وبيتحقق معاها دلوقتي. فاروق بصدمة: بنتي؟ بنتي مين؟ انت اتجننت؟ أنا بنتي نايمة ف أوضتها. أكيد مش هي. بنتي متقتلش. سعد: بقولك بنتك بيتحقق معاها دلوقتي. فوق يافاروق وتعالى بسرعة. فاروق الموبايل وقع من إيده وبيحاول يقوم مش عارف. حاول يقوم ويروح لأوضة صافي وبينادي عليها بصوت عالي. فاروق: صااافي.. بنتي. سهر طلعت ع صوته. سهر: في إيه يافاروق؟ مالها صافي؟

فاروق دخل الأوضة ملقاش صافي. سهر: ياخبر. هتكون راحت فين دي؟ فاروق: بنتتتييي.. صافي هتضيع مني. سهر: أهدي يافاروق. رايح فين بس استنا. فاروق بيحاول ينزل ع السلم. مش قادر يتحرك. بيحاول يضغط ع نفسه لحد ماوقع ع الأرض. سهر: فاروق.. فارووف رد عليا. فاروق. *** في المستشفى. مني و ريم وصلوا وهما منهارين. مني: بنتيى فين؟ عاوزة أشوفها. قمر: اهدي ياحبيبتي. ممنوع الدخول عندها. مني: عاوزة أودعها. دخلوني عندها. هي فين؟ قمر راحت لزين.

قمر: زين اعمل حاجة خليها تدخل. زين: أعمل إيه؟ قدامك قالوا ممنوع. قمر: دي أمها يازين. إزاي ممنوع؟ لازم تشوفها. انت مش شايفها عاملة إزاي؟ الست هيجرالها حاجة. زين: لو دخلتلها هيجرالها حاجة بجد. قمر: لا هترتاح لما تودعها. علشان خاطري خليهم يدخلوها. زين: حاضر ياقمر. *** سائر داخل يجري. سائر: إيه اللي حصل لبابا ياسهر؟ انطق. سهر بتمثل العياط.

سهر: والله ما أعرف ياسائر. أنا كنت نايمة. لقيته بيزعق وبينادي ع صافي. طلعت أشوفها معاه ملقتهاش. وفجأة وقع ف الأرض وجبته ع المستشفى. سائر: الدكتور مقالش حاجة؟ سهر: لا لسه مخرجش. سائر: خير يادكتور. بابا عامل إيه؟ الدكتور: مش خير خالص. فاروق بيه جاتله صدمة عصبية شديدة اتسببت ف جلطة ف المخ. سهر: ياحبيبي ياخويا. ياريتني كنت أنا. سائر: طيب ممكن نسافروا يتعالج برا؟ الدكتور: حالة فاروق بيه متسمحش إن هو يسافر حالي.

سائر: وايه الحل يادكتور؟ وفي أمل يرجع طبيعي ولا لالا؟ الدكتور: في نسبة صغيرة جدا بالعلاج يرجع طبيعي. بس الأهم من إنه يرجع طبيعي ولالا. إن تحافظوا ع حالته دي. سهر: يعني إيه يادكتور؟ نحافظ ع حالته؟ الدكتور: يعني ممنوع وصول ليه أي أخبار وحشة. لحد ما الخطر اللي عليه يزول. وإلا ممكن لا قدر الله أي خبر وحش يتسبب ف موته. سهر: بعد الشر. متقلقش يادكتور. أنا هخلي بالي منه. هو هيخرج امتى؟ الدكتور: يخرج إيه يا أستاذة؟

مينفعش خالص. لازم يفضل تحت عينينا الفترة دي. وانتوا عليكم منع أي أخبار وحشة عنه وبس. عن إذنكم. سائر: يارررب. إيه اللي بيحصلي دا؟ مش عارف ألاقيها من صافي اللي ضيعت نفسها ولا من أبويا اللي بيضيع مني. سهر: مالها صافي ياسائر؟ سائر: صافي قتلت ياسهر. سهر: إيييه؟ إزاي حصل كدا؟ أنا مش مصدقة. طب هي فين دلوقتي؟ سائر: اتحقق معاها ومن كلامها هتتعرض ع طبيب نفسي. والأكيد إنها هتدخل مستشفى الأمراض العقلية. سهر: يعني صافي مجنونة؟

سائر: مش عارف ومش قادر أستوعب اللي هي عملتوا امبارح. دي لا يمكن تكون صافي اللي أعرفها. صافي اتغيرت للاسوأ. *** زين: خليها تدخل ياقمر. بس متغيبش. قمر: حاضر. ست مني.. تقدري تدخلي تشوفيها. ريم: أنا كمان عاوزة أشوفها. قمر مسكتها. قمر: تعالي ياحبيبتي. سيبى ماما بس تدخل. ريم بتعيط. ريم: اشمعنا أنا لأ؟ أنا كمان عاوزة أشوفها. عاوزة أعتذرلها. أنا السبب. أنا اللي قولتله تروح. ياريتني ما سيبتها تبعد عننا. ياريتني كنت منعتها.

قمر حضنتها. قمر: اهدي ياحبيبتي. متحطيش الذنب ع نفسك. دا قدر ومكتوب. ريم: هي هتوحشني أوي أوي. قمر: لا حول ولا قوة إلا بالله. ادعيلها ياحبيبتي. هي محتاجة الدعاء. مني دخلت الأوضة. أول لما شافت بنتها انفجرت من العياط.

مني: ياحبيبتي يابنتي. مين عمل فيكي كدا وحرمني منك. دانا مصدقت اتجمعت بيكي. ليه يخدوكي مني. لسه بدري أوي ياسارة. ملحقتش أشبع منك يابنتي. عاوزة أعرفك حاجة ياسارة. أنا مكنتش بعيدة عنك بمزاجي. لا كان غصب عني. والله كان غصب عني. ومكنش سهل عليا. بس كنت مطمنة. أبوكي بيحبك. كنت مطمنة عليكي معاه. دلوقتي أنا أعمل إيه من غيرك. دانا مصدقت بقيتي معايا ياسارة. حرموني منك يابنتي. ***

هدي: كفاية لعب ويلا ياتونة. ادخلي نامي. انتي منمتيش من امبارح. تونة حضنتها. تونة: لا ياماما أنا خايفة أوي. مش عاوزة أنام. هدي: خايفة. من إيه بس؟ أنا معاكي. تونة: خايفة البت تيجي تقتلني أنا كمان. هدي: متخافيش. هي اتقبض عليها خلاص ومش هتقتل حد تاني. يلا ادخلي نامي. تونة: طب تعالي معايا. هدي: حاضر. قمر وليل جم وهدي طلعت تجري عليهم. هدي: عملتوا إيه؟ اتدفنت خلاص؟ قمر: آه ياماما. ربنا يرحمها ويصبر أهلها.

هدي: ليل انتي كويسة؟ ليل: لا أنا مش كويسة. سارة كانت صاحبتي الوحيدة. مكنتش تستحق يحصل فيها كدا. سارة ماتت بدالي ياماما. أنا اللي كنت هموت مش هي. قمر: متقوليش كدا تاني. أنا مكنتش هسمح لحد يأذيكي. هدي: وكنتي هتعملي إيه بقا؟ كنتي هتقفي قدامها زي ماعملتي علشان تحميها. وبدل ما أخسر واحدة أخسر التانية. قمر: مش مهم أنا. المهم محدش يأذي حد من أخواتي. هدي: ادخلوا ارتاحوا دلوقتي ونتكلم بعدين. يلا ياقمر خدي أخواتك وادخلوا.

قمر: ماشي. *** فريال: جت الحزينة تفرح ملقتلهاش مطرح. كان مستخبيلك فين دا بس يابني. الفرح يتقلب جنازة. وكله بسبب مين؟ بسبب مجايبك. بوظتي فرح ابني. أقول إيه بس؟ ماهو الغلط عند ابني. لو كان خلاني أنا أختارله مكنش حصل كل دا. ماتردي يا أختي انتي ساكتة ليه؟ بكلم نفسي أنا. كنزي: أنا آسفة. فريال: وأعمل إيه بأسفك أنا؟ وابني حبيبي بايت برا البيت يوم فرحه. كنزي: عن إذنك. فريال: تعالي هنا رايحة فين؟ اتصليلي بيه يجي دلوقتي.

كنزي: حاضر. هدخل أجيب الموبايل. *حازم جه* فريال: حمدالله ع سلامتك ياحبيبي. أحطلك تأكل؟ حازم: الله يسلمك ياماما. هي كنزي فين؟ بقيت كويسة دلوقتي؟ فريال: كنزي إيه دلوقتي؟ بقولك تأكل انت مأكلتش من امبارح. حازم: مش جعان. عاوز أطمن عليها. فريال: طب اطمن عليا أنا الأول. حازم: مالك ياماما؟ انتي تعبانة؟ فريال: تعبانة دي شوية عليا. حازم: مالك؟ حاسة بإيه؟

فريال: نار جوايا. ورأسي هتنفجر من اللي حصل امبارح. بقا بعد ما استنا كل دا علشان أشوفك وانت بالبدلة يحصل كدا. وكله منها اللي جوا دي هي السبب. حازم: وهي كنزي مالها ياماما؟ هي اللي قالتلها تقتل؟ متنسيش إن هي كمان فرحتها باظت بسبب اللي حصل. مش إحنا بس اللي ضحايا. فريال: لا ياحبيبي. إحنا مالنا بالناس دي. أنا معزمتهمش ف الفرح ولا أعرفهم.

حازم: انتي معزمتيش بس أنا عزمت. ودول صحابي من قبل كنزي. يعني هي مالهاش ذنب. أوعى ياماما تكوني قولتي لكنزي كلام يضايقها. هي مش ناقصة. فريال: لا قولتلها ولا فتحت بوقي حتى. حازم: ماشي ياماما. عن إذنك هدخل أشوفها. فريال: ادخل ياحبيبي. اطمن عليها. لا أكون كلت منها حتة ولا حاجة. حازم: كنزي عاملة إيه؟ طمنيني. بقيت كويسة؟ كنزي: هي ماتت بجد؟ حازم: آه ياكنزي. واتدفنت خلاص. كنزي عيطت.

كنزي: أنا اللي جبتها. أنا السبب يا حازم. ياريتني ما سمعت كلامك. حازم: اهدي ياكنزي. اللي حصل دا مش بسببك. دا نصيبها. متحمليش نفسك فوق طاقتها. ارتاحي دلوقتي ولما تصحي نتكلم. كنزي: مش عارفة. مش بتغيب عن عيني لحظة. ومش قادرة أنسى لما كلمتها وكنت بقنعها تيجي الفرح. ياريتها كانت رفضت.

حازم: كنزي فوقي. انتي مالكيش ذنب. أظن مش انتي كمان اللي عزمتي صافي وعطتيها المسدس. اهدي كدا وافهمي. انتي معملتيش حاجة وحشة. دا نصيبها ياحبيبتي. ارتاحي بس انتي دلوقتي. كنزي: حاضر. هحاول. *** *بعد مرور أسبوع* نجلاء: سامح.. اصحا ياسامح. يلا قوم ياراجل. سامح: في إيه يانجلاء ع الصبح مالك؟ انهاردة إجازة. بتصحيني ليه؟ نجلاء: عاوزاك توصلني. سامح: أوصلك. انتي خارجة ولا إيه؟ نجلاء: آه. وانت جاي معايا. سامح: علي فين كدا؟

نجلاء: هروح أشوف بنتي. وحشتني. بقالي أسبوع بحاله مشوفتهاش. عاوزة أطمن عليها. سامح: تطمني عليها؟ هي مع حد غريب. ماتسبيهم يكملوا الشهر. لازم تروحي تغلسي عليهم. نجلاء: ماهي مقصوفة الرقبة. قاعدة معاهم. ماروحي هو اللي هيضايقهم يعني. سامح: مين مقصوفة الرقبة دي؟ نجلاء: أم حازم. هتكون مين غيرها؟ مقصوفة رقبة. سامح: عيب كدا يانجلاء. ميصحش نقول ع الناس كدا.

نجلاء: اسكت. دانا مبقوقة منها ع الآخر. من يوم الفرح واللي عملتوا ف البت. يرضيك تعكنن ع بتك وتقولها المكياچ بتاعك وحش؟ يرضيك؟ سامح: معلش يا نجلاء. عديها. يمكن مبتفهمش ف المكياچ. نجلاء: طب مانت كمان مبتفهمش. سامح: بتقولي إيه يانجلاء؟ نجلاء: أقصد إنك مبتفهمش ف المكياچ. بس عجبك صح؟ سامح: الشهادة لله. أنا بنتي حلوة ف كل حالاته. نجلاء: ومين يشهد للعروسة. سامح: طب يلا ياأم العروسة. قومي حضريلي الهدوم علشان نروح للعروسة.

نجلاء: من عنيا الاتنين. *** هدي: ليل. اسر مستنيكي بره. ليل: .... هدي: ليل أنا بكلمك. ليل: حاضر ياماما. طالعة. هدي: متتأخريش طيب. هدي: أهلاً وسهلاً بيك ياحبيبي. تحب تشرب إيه لحد ما... ليل خرجت وشكلها متبهدل وتعبانة. هدي: ليل. إنتي إيه مطلعك بالحالة دي؟ ليل: مالها حالتي؟ أنا كويسة أهوت. تونة: اجري حطي ف وشك حاجة ليطفش منك. اسر بيضحك. اسر: لا متقلقيش. مش هطفش. أنا راضي بكل الحالات. ليل حطت علبة قدامه.

ليل: الخاتم بتاعك. أنا وانت مش هنكمل. اسر: نعم!! انتي بتقولي إيه؟ هدي: إيه اللي بتقوليه دا ياليل؟ ليل: زي ما سمعته. أنا واسر مش هنكمل مع بعض. اسر: طب ليه؟ ممكن أفهم. أنا عملت إيه يخليكي تقولي كدا؟ ليل: أنا خدت قرار. اسر بعصبية: وأنا من حقي أرفضه. ليل: لا مش من حقك. هدي: اهدوا بس وصلوا ع النبي. العصبية مش هتحل حاجة.

اسر: ليل ياحبيبتي. أنا مقدر إنك متأثرة باللي حصل وموت سارة. وكلنا متأثرين. بس الوقت دا هيعدي. القرار اللي بتاخديه دا غلط. ليل: لو متأثر بموتها فعلا. كنت وافقت ع اللي بقوله. أنا وانت مش هننفع لبعض يااسر. أنا اتأخرت أوي ف القرار دا بسبب تأخير. اتسببت ف موت أقرب واحدة ليا. أنا مش هستحمل حد تاني يحصله حاجة بسببي. هدي: مش بسببك ياليل. قولتلك مليون مرة. اللي حصل دا مكتوبلها. انتي ليه مصممة تشيلي نفسك الذنب؟

ليل بتعيط: لا بسببي ياماما. هما كانوا صحاب مع بعض. من يوم ما دخلت بينهم وهما اتفرقوا. أنا مش بس السبب ف موت سارة. أنا السبب ف اللي حصل لصافي. أنا خدت منها كل حاجة. عاوزين يحصلها إيه لما تشوف حبيبها مع حد غيرها؟ أنا مش قادرة أسامح نفسي. اسر بعصبية: مش حبيبها! افهمي. أنا مش حبيبها ولا عمري كنت حبيبها. كل الأفكار دي ف دماغك وبس. ليل مسحت دموعها: وأنا قولت اللي عندي يااسر. مش هغير قراري. لو سمحت ابعد عني.

اسر: دا آخر كلام عندك. ماشي ياليل. اللي تشوفيه. هدي: اسر استنا بس يااسر. ليل قعدت تعيط وتونة جريت عليها حضنتها. هدي: مش عملتي اللي ف دماغك ومشيتي كلامك. بتعيطي ليه دلوقتي؟ ليل: أنا بحبه أوي. هدي: انتي هتجننيني ليه؟ منين بتحبيه ومنين عاوزة يبعد عنك؟ ليل: مش عاوزة حد يتأذي بسببي ياماما. أنا خايفة. هعمل إيه؟ هدي: طيب اهدي خلاص. علشان خاطري. ***

"في المستشفى.. في الأوضة اللي فيها فاروق. سهر داخلة تتسحب. وفاروق فاتح عينه وشايفها." سهر ابتسمت. سهر: حمدالله ع سلامتك يا أخويا ياحبيبي. يوة. دانا نسيت إنك مش بتتكلم. ف مش هتعرف ترد عليا. بس تصدق كدا أحسن. مرة بقا من نفسي أتكلم وانت تسمع وبس. *بصيتله*

سهر: ياااه. الرقدة دي شوفتها قبل كدا. مش فاكرة مين. آه افتكرت. كانت أمي الله يرحمها. اللي ماتت لوحدها بعد ما طردتها وحرمتني منها بكل قسوة وجبروت. وكل لما أقول سامحيه يابنتى دا مهما كان أخوكي بردك. متشيليش منه. ألاقيك بتعمل عملة أوحش من اللي قبلها. حتى الشخص اللي حبيته رفضت تجوزهوني. ظلم ورا ظلم ورا ظلم. لحد ما خلتني زي مانت شايف كدا. واقفة قصادك وأنا جوايا كرهه ليك يكفي العالم ويفيض منه كمان. فاكر بنتي اللي حرمتني منها؟

فاروق باصصلها ومستغرب وبيحرك راسه. سهر: بنتي اللي مسبتنيش حتى ألمحها. أخدهالي ف حضني. خطفتها مني. كنت فاكر مش هعرف إن اللي عمل كدا يبقا انت. كنت فاكر أنا عايشة كل السنين دي خدامة عندك. تقولي يمين يمين. شمال شمال. كنت فاكر كل دا ببلاش كدا! تبقى عبيط يافاروق. أنا عشت كل دا علشان أنتقم منك وأخد حق كل ذرة وجع خلتني أحس بيها. أنا جايلك دلوقتي ومبسوطة وبقولك أنا خدت حقي منك. ف بنتك الوحيدة. نقطة ضعفك يافاروق هي صافي.

فاروق مبرق لها وعاوز يعرف حصل إيه لصافي. ومش قادر يتحرك ولا يتكلم. سهر ضحكت ع منظره. سهر: طبعًا عاوز تعرف إيه اللي حصل لدلوعتك. دلوعتك اللي انت دمرتها بحبك ليها. خلتني مركزة غير معاها. عاوز تعرف بنتك فين دلوقتي؟

ف مستشفى المجانين. جننتهالك ع الآخر. كنت بخطط لها من وهي صغيرة. أنا اللي زرعت حبها لأسر. أنا اللي كنت بعلقها بيه. ومن الناحية التانية كنت بعرف اسر إنها مش بتحبه. وإنه مجرد لعبة زي الألعاب اللي بتتشبط فيهم بس. أنا اللي كنت بديها مخدرات ع أنها مهدئ. مخدرات تجننها. وأنا اللي حطيت المسدس ف مكتبك وكنت متأكدة إنها هتاخده. شوفت بقا أنا كنت صبورة إزاي. زي ما بيقولوا صبرت ونلت. لا وانتو الاتنين تقعوا ف يوم واحد. لا حقيقي أنا أمي دعيالي. انت تعرف أنا ممكن أخلص منك دلوقتي. وأطلع أصرخ وأقول الحقوا أخويا بيموت.

*قربت من الأجهزة. وفاروق متابعها وعنيه مليانة دموع وخايف. رجعت تاني قربت منه.* سهر: بس مش هعمل كدا. عارف ليه يافاروق؟ علشان أنا مش هستفيد حاجة بموتك. بالعكس. أنا كدا هريحك. بس شكلك كدا أحلى بكتير. والخوف مالي عينك وقلبك. مش قادرة أبعد نظري عنهم. الدكتور دخل. الدكتور: انتي بتعملي إيه هنا؟ سهر دمعت ولفت للدكتور.

سهر: كنت داخلة أطمن ع أخويا. مش قادرة أشوفه وهو بالشكل دا يادكتور. اتصرف. اعمل حاجة. أخويا لازم يرجع زي الأول. أنا ماليش غيره. الدكتور: طيب اهدي بس يا أستاذة. واتفضلي اخرجي برا. مينفعش تدخلي هنا تاني غير بإذن مني. سهر: اللي تشوفه يادكتور. عن إذنك. *خرجت ومسحت دموعها وضحكت ومشيت.* *** تونة مستخبية تحت اللحاف. تونة بصوت واطي: الو. كريم: الو ياتونة. عاملة إيه؟ تونة: أنا كويسة يا كريم. مش وقته. مش وقته. اديني اسر بسرعة.

كريم: الو ياتونة مش سامع صوتك. انتي بتتكلمي منين؟ تونة: أنا مستخبية تحت اللحاف. مش عاوزة حد يسمعني. فين اسر يلا؟ هاتوه بسرعة. ف موضوع خطيررر لازم أتكلم معاه فيه. كريم: مش عارف اسر فين. تقريبا مجاش. بس إيه هو الموضوع دا؟ قوليلى وأقوله. تونة: لالا مش هينفع أقولك. اديني رقمه. كريم: خلاص. طالما مش هينفع تقوليلي. أنا كمان مش هينفع أديلك رقمه. يلا باي. تونة: استنا استنا. متقفلش. خلاص هقولك. كريم: يلا قول.

تونة: بص يا كريم. إنهاردة الواد أخوك دا جه عندنا. والبت ليل أختي طلعتله منكوشة ومتبهدلة. ورميت الدبلة ف وشه. وقالتله أنا مش عاوزة أشوف وشك هنا تاني. كريم: تووووونةة. تونة: خلاص خلاص. هقول الحقيقة. بصراحة هي عطته الدبلة بس وقالتله مش هنكمل. كريم: وايه حصل؟ تونة: أخوك العرة مشي وسابها. وهي قعدت تعيط. وتقول بحبه بحبه. كريم: وانتي عاوزة اسر في إيه؟ تونة: عاوزة علشان أقوله. ليل بتحبك بتحبك. بس غاوية استهبال.

كريم: أوعي تعملي كدا ياتونة. تونة: ليه يعني؟ انت مش عاوزاه يتجوز أختي؟ ولا نكنشي مش قد المقام؟ كريم: لا مينفعش تقولي حاجة زي دي. كدا انتي. يبقا اسمك فتّانة. تونة: مش مهم فتون من فتانة. مفرقتش. كريم: تونة اسمعي الكلام. لو اسر عرف. مش هكلمك تاني خالص. مالكيش دعوة باللي اتقال قدامك. هما هيرجعوا لوحدهم. بس انتي متفتنيش. تونة: هحاول. ماشي. مش هتديني رقم اسر بقا؟ كريم: قولنا إيه؟ تونة: متفهمشي غلط. دانا كنت هسمع الكول بس.

*** "بعد شهر" سائر: حمدالله ع سلامتك يابابا. نورت بيتك. سهر: حمدالله ع سلامتك ياحبيبي. *فاروق مش عاوز يبصلها.* سائر: أنا آسف يابابا. أنا هسيبك بس علشان عندي شغل. بس متخافش. هسيب سهر معاك. والعلاج بتاعه أهو ياسهر تديهوله ف مواعيده. سهر: متقلقش. دا ف عنيا. *فاروق فضل يعمل أصوات ويهز رأسه ويبعد عن سهر. وسهر برقت له.* سائر: في إيه؟ هو بيعمل ليه كدا؟ كأنه مش عاوزك تقعدي معاه.

سهر: آآه. أنا فهمته. هو مش عاوزني أسيب الشغل لوحده. حتى وانت ف تعبك يافاروق بتفكر ف الشغل. سائر: طب خلاص. مفيش مشكلة. أنا هخلي نعمات تقعد معاك. متقلقش. وأنا مش هتأخر. *فاروق هز رأسه بالموافقة.* *** قمر: صباح الخير يازين. زين: صباح النور. فطرتي ولا لسه؟ لو تحبي ننزل الكافتيريا نفطر سوا. معنديش مشكلة. قمر ابتسمت. قمر: لا أنا سبقتك. فطرت معاهم ف البيت. زين: الف هنا ياستي. طب وراكي حاجة بعد الاجتماع؟

نتغدا سوا. ولا اتغديتي كمان معاهم ف البيت؟ قمر ضحكت. قمر: لا دي لسه معملتهاش. زين قرب عليها. قمر بعدت. قمر: في إيه يازين؟ زين مسك السلسلة اللي ف رقبتها. زين: السلسلة دي جبتيها منين؟ قمر: دي كريم عطاهالي. زين: للدرجة دي كريم بيحبك؟ قمر: ليه بتقول كدا؟ زين: علشان دي سلسلة ماما الله يرحمها. قمر: الله يرحمها. زين: حافظي عليها بقا. قمر: حاضر. زين: هستناكي بعد الاجتماع. هنتغدا سوا زي مااتفقنا. قمر: حاضر.

*ومشوا وهما مبسوطين.* "وكان في عقربة من بعيد بتراقبهم. والغِل طالع من عينها. أكيد عرفتوا هي مين." *** هدي: نورتني ياحبيبي. والدك عامل إيه؟ سائر: زي ما هو. بس خرج من المستشفى انهاردة. هدي: وصافي؟ سائر: دا اللي كنت جايلك علشانه. هدي: خير ياحبيبي. في إيه؟

سائر: أنا لسه كنت جاي من عند الدكتور النفسي اللي بيشرف ع حالة صافي. وآكدلي إنها كانت بتاخد نوع مهدئ مش موجود ف مصر. هو دا اللي كانت بترتاح عليه. والغريبة إني دورت عليه ف البيت ملقتش ليه أثر. عندك معلومة اسمه إيه أو شكله؟ (حاول يكذب وميقولش الحقيقة. علشان ميقولش إن أخته كانت بتاخد مخدرات)

هدي: والله أنا مش فاكرة اسمه. مصادفتش إني شفته قبل كدا. آه افتكرت. أنا سمعت سهر قبل كدا وهي بتقول لصافي إنها هتجبهولها. ممكن تسأل سهر. هتقولك. سائر: سهر!!! *افتكر ريأكشن فاروق لما قالوا سهر هتقعد معاك. وافتكر إنه قال لسهر ع مفاجأة اسر لليل ف فرح حازم.* سائر: أنا هستأذن. هدي: انت مشربتش العصير؟ سائر: معلش. أنا لازم أمشي دلوقتي حالا. عن إذنك. *** "في الشركة" سائر فتح باب المكتب جامد. سهر باستغراب: مالك ياسائر؟

سائر: إيه علاقتك بالعلاج اللي كانت بتاخده صافي؟ سهر اتوترت: علاج؟ علاج إيه؟ أنا مش فاهمة حاجة. سائر: المخدرات ياسهر. اللي كنتي بتجيبيها لصافي. اللي بسببها اتجننت. سهر: إيه اللي بتقولو دا ياسائر؟ مخدرات إيه؟ أنا مش فاهمة انت بتتكلم عن إيه. وايه علاقتي بجنان صافي؟ أنا. سائر: بلاش المخدرات. صافي عرفت منين فرح حازم وان اسر هيفاجئ ليل؟ وعرفت منين مكان الفرح أصلا؟ أكيد منك. أنا اللي زي الغبي قولتلك كل حاجة. صح ولا غلط؟

سهر: غلط. كل اللي بتقوله غلط. أنا أصلا مشوفتش صافي يوم الفرح. أنا مروحتش ع البيت. أنا كنت سهرانة برا. انت ظالمني ياسائر. سائر: أنا لسه جاي من عند هدي. وقالت إن انتي اللي كنتي بتجيبي العلاج لصافي. سهر: آآه. قول كدا بقا. الست هدي هي اللي وقعت بينا. ليه ميكنش هي وبتنتقم من أبوك ف اللي عملوا فيها زمان. أنا هعمل كدا ليه؟ سائر: علشان اللي عملوا فيكي زمان انتي كمان. *سهر اتصدمت إنه عارف.*

سائر: أنا عارف كل حاجة. أمي كانت بتحكيلي كل حاجة أبويا عملها فيكي. وكنت بستغرب هدوءك طول الوقت. سهر: محصلش. أنا معملتش حاجة. دا أخويا وصافي بنته. وكنت معتبراها بنتي. استحالة أعمل فيهم حاجة. هدي بتوقع بينا ياسائر. فوق. هدي دي بتكرهك انت واختك. مش بتحبكم. انت طول عمرك بتكرهها. أكيد مش هتصدقها وتكذبني أنا.

سائر: ماشي يا سهر. أنا مش هصدقها. ومش هصدقك. أنا هعرف مين السبب ف كل دا بطريقتي. بس من هنا لوقتها مشوفكيش لا ف الشركة ولا ف البيت. وهكلم المحامي يديكي حقك كله. سهر: انت بتطردني؟ سائر: مش هستأمنك لا ع بابا ولا ع مالنا. عن إذنك. *سهر بصاله ومتعصبة.* سهر: شكلك ناوي تحصل أبوك واختك. *قامت راحت ع مكتب زين. وشافت قمر جايه ع المكتب وماسكة ملفات. بتبص فيها. دخلت عند زين وهي بتعيط ومنهارة.* زين: في إيه ياسهر؟ مالك؟

فاروق حصله حاجة؟ سهر حضنته وقعدت تعيط. سهر: شوفت اللي حصلي يازين. شوفت سائر عمل فيا إيه. استغل رقدت أبوه وطردني من البيت والشركة. زين بيحاول يبعدها. زين: طيب اهدي وفهميني عمل كدا ليه. انتي عملتي إيه؟ سهر مسكت فيه أكتر. سهر: مش عارفة. أنا معملتش حاجة يازين. كله سابني. ف الأول بابا وبعدين ماما. ودلوقتي صافي وفاروق وسائر بيطردني. أنا بقيت لوحدي يازين. متسبنيش يازين انت كمان. أنا ماليش حد غيرك.

*قمر فتحت الباب شافت المنظر وسهر شيفاها.* زين: اهدي. مش هسيبك. *استجمعت نفسها و خبطت ع الباب. زين اتصدم وزق سهر.* قمر: الملفات اللي طلبتها. زين خدها منها ومش قادر يتكلم. قمر: أنا هستأذن. زين: مش هتحضري الاجتماع؟ قمر: لا. زين: طيب استني. هنزل معاكي. هوصلك. وبالمرة نتغدا سوا. قمر: معلش مش هينفع. أنا عندي معاد. مش عاوزة أتأخر عليه. ابقا اتغدا مع سهر. عن إذنك. زين مسك إيدها. زين: قمر استني. انتي فاهمة غلط.

قمر: مالهاش لازمة تبرر. كأني مشوفتش حاجة. *زقت إيده.* قمر: عن إذنك. *** قمر واقفة قدام الشركة مستنية عربي وعنيها مليانة دموع. سليم شافها وقف العربية قدامها ونزل. سليم: قمر انتي كويسة؟ إيه موقفك كدا؟ قمر: آه. أنا كويسة. عن إذنك. سليم: مش هسيبك تمشي ف حالتك دي. تعالي هوصلك. قمر: مفيش داعي. أنا مستنية حد. سليم: الحد شكله هيتأخر. تعالي معايا اركبي. يلا ياقمر. ***

زين رايح جاي ف المكتب ومتعصب ومش عارف يعمل إيه. سهر جاية تقرب عليه تاني. سهر: انت زعلت يازين علشان قمر شافتنا؟ زين رفع إيده قدامها. زين: ياريت متتكررش تاني ياسهر لو سمحت. سهر: أنا آسفة. مكنتش عاوزه أتسببلك ف إحراج. انت شكلك معجب بقمر. وأنا مش هرضى أفرق بينكم. لو عاوزني أروح أعرفها الحقيقة دلوقتي وإنه مالكش ذنب. أنا مستعدة. زين بيبص شاف قمر واقفة. زين: إيه موقفها مع سليم؟ سهر جت تجري تبص اتعصبت. سهر: سليمم!!

إيه علاقتهم ببعض؟ زين: انتي تعرفي سليم؟ سهر: لا معرفهوش. بس كنت بشوفه جاي لك هنا بس مش أكتر. عن إذنك. أنا لازم أمشي. *** سليم: هتفضلي ساكتة؟ مش عاوزة تعرفيني مالك؟ قمر: مفيش. ضغط شغل بس. سليم: لو زين مضايقك. أنا ممكن أكلمهولك. قمر: ممكن تقف هنا. سليم: راحة فين؟ *قمر نزلت ووقفت ساكتة. وسليم وقف جنبها.* سليم: كبرتي ولسه متغيرتيش. قمر: متغيرتش إزاي؟

سليم: لسه زي ما انتي. لما بتزعلي من حاجة أوي أوي. تروحي أي مكان فاضي وتفضلي سرحانة وساكتة. قمر: وانت لسه فاكر كنت بعمل إيه زمان؟ سليم: أنا منستش أي تصرف كنتي بتعمليه. ولو صغير حتى. ولا نسيتك انتي. حتى بعد ما قعدتي من المدرسة. كنت عارف عنك كل حاجة. وكنت بتابعك دايما. بس مكنتش عارف أساعدك علشان كنت لسه صغير. أنا عارف إنك نسيتيني من زمان. بس حتى لو دا حصل. أنا هفضل ممتن للصدفة اللي جمعتنا ببعض تاني.

قمر: مالهوش لازمة الكلام دا دلوقتي يا سليم. إحنا كنا صغيرين وقت ما كنا بنحب بعض. إحنا كبرنا دلوقتي والكلام دا عدى عليه كتير أوي. سليم: بنسبالك انتي بس ياقمر. أنا معرفتش الحب غير لما حبيتك. جربت أحب تاني بعدك فشلت. ومنستكيش. أنا بس نفسي تديني فرصة بس نقرب تاني من بعض. وأنا هعوضك عن كل السنين اللي بعدنا فيها عن بعض. أنا مش عاوزك تردي دلوقتي. خدي وقتك وفكري. قمر: أنا جعْت. سليم ضحك.

سليم: وأنا كمان والله. تعالي هعزمك ع الغدا. قمر: مش هينفع علشان اتفقت مع ماما إني هتغدا معاهم. سليم: آآه. يعني هتغدا لوحدي؟ قمر ابتسمت. قمر: لا طبعًا. انت معزوم عندنا. سليم: مامتك أكلها حلو؟ قمر: جدا. سليم: طب يلا اركبي بسرعة. قمر: يلااا. *** كنزي: صباح الخير. فريال: قولي مساء الخير. داحنا بقينا العصر ياحبيبتي. كنزي: حازم بيجي متأخر. أصحى بدري أعمل إيه؟ فريال: إيه إيه إيه إيه؟ وانتي بتصحي بس لحازم؟

دا كل مفهومك عن الجواز. والأكل والشقة. دا اللي نجلاء علمتهولك. كنزي: ماهو حضرتك مش بتحبيني أدخل مطبخك. ولا بتحبيني أروق البيت. أعمل إيه علشان أرضيكي؟ فريال: لا ياحبيبتي. متعمليش حجتي. المطبخ عندك أهو. ادخلي اعملي أكل لجوزك قبل ما يجي. وريني بقا هتعملي إيه. كنزي قلقت: هو الأكل إيه اللي هيتعمل؟ فريال: ادخلي شوفي بنفسك. أنا مجهزةالك كل حاجة.

كنزي دخلت المطبخ لقيت كرنبة كبيرة و أطباق فيها بتنجان وكوسة وفلفل وورق عنب و فرختين ورقاق. كنزي: ينهار أبيض. إيه دا كله؟ فريال: إيه ياحبيبتي مالك؟ اتخضيتي ليه؟ دانا مردتش أطلعلك البطة كمان. قولت أخليها يوم تاني. كنزي: هعمل كل دا إزاي؟ حازم قرب يجي. فريال: محدش قالك تصحي العصر. أنا هسيبك بقا علشان المسلسل بدأ. كنزي: أعمل إيه؟ أعمل إيه؟ اتصلت بأمه. نجلاء: الو. إيه ياكنزي. عاملة إيه؟ كنزي: الحقينييي ياماما. أنا ف مصيبة.

*** قمر: أيوه هنا. سليم: طيب هستأذنك دقيقة بس. مش هتأخر. قمر: رايح فين؟ سليم: السوبر ماركت. دا مش هتأخر. *عدى وقت وجه.* قمر: إيه دا؟ سليم: شوية حاجات لفتون. قمر باستغراب: فتون؟ انت عرفتها منين؟ سليم بتوتر: ف مرة لما شوفتك ف الحارة. كنتي بتنادي عليها. وأنا سمعت الاسم. قمر: بس أنا مبقولهاش فتون. أنا بقولها تونة. سليم ضحك. سليم: أيوه مانا سمعت تونة. و أكيد فهمت إن اسمها فتون. قمر: آه.

سليم: مش هنطلع ولا غيرتي رأيك ومش هتغديني؟ قمر: لا مغيرتش رأي. اتفضل. هدي جت تجري ع الباب. هدي: حماتك بتحبك. أنا لسه مخلصة الأكل. انتي معاكي ضيوف؟ سليم ابتسم. سليم: ازيك ياهانم. أنا سليم زميل قمر ف ال... قمر: زميلي ف الشغل. وهو وصلني. مكنش ينفع معزمهوش. هدي: ينور طبعًا. أهلاً وسهلاً. اتفضل. قمر: طيب أسيبك أنا ياسليم. هدخل أغير بس. البيت بيتك طبعًا. سليم: اتفضلي.

*تونة بترقبه من بعيد. وبتراقب الحاجات اللي معاه. وهو شافها فرح أوي وشاور لها تيجي.* تونة جريت. تونة: انت بتشاورلي أنا صح؟ سليم هز راسه. سليم: آه انتي. عاملة إيه؟ تونة: أنا كويسة. *وتبص ع الكيسة.* سليم ضحك وعطها لها. سليم: خدي الحاجات دي ليكي. تونة عينها لمعت. تونة: كلها كلها لي؟ سليم: آه كلها كلها ليك. تونة بتلقائية حضنته جامد. تونة: شكرا أوي ياعمو. أنا بحبك. سليم بدالها الحضن وعينه دمعت.

سليم: وأنا بحبك أوي أوي ياحبيبتي. قمر: الظاهر إن تونة حبيتك أوي. هدي: جايبلها نقطة ضعفها. لازم تحبه. قمر: الأكل جهز ياماما. هدي: آه ومستنيكم كمان. قمر: طب يلا ياسليم اتفضل. *** نجلاء: مصيبة إيه ياكنزي؟ انطق. في إيه؟ كنزي: أنا لسه صاحية دلوقتي. لقيت مامت حازم جايبالي أكل كتير أوي وعاوزني أعمله قبل ما ييجي حازم. وحازم كلها ساعتين ويخلص. وممكن قبل كدا كمان. نجلاء: اعملي بانيه ومكرونة.

كنزي: ياريت كان ينفع. بس دي مطلعالي كل أنواع المحشي وفراخ ورقاق وحاجات كتير أوي. دا مش بس مافيش وقت. أنا مش هعرف أعمل ولا حاجة من دول أصلًا. نجلاء: تستاهلي. علشان أقولك اتعلمي الأكل ياكنزي. بصي عليا وأنا بعمل. يكنزي. تقوليلي لا ياماما. مامت حازم هتعمل كل حاجة. اشربي بقا. كنزي: لا مش وقت شماتة ياماما. ساعديني. حازم لو رجع ملقاش أكل هيضايق. وهي هتقول إن أنا اللي المفروض أعمل. وهييزعل مني.

نجلاء: شوفي الولية العقربة. عاوزة توقع بين ابنها ومراته. بس أنا مش هسيبها تعمل اللي ف دماغها. كنزي: هتعملي إيه؟ نجلاء: ادخلي البسي. وأنا هكلم جوزك أقوله إني عزماكم وهصمم إنه ييجي. أنا الأكل عندي جاهز وكله تمام. كنزي: حاضر. حاضر هدخل ألبس. طب وهي هتأكل إيه؟ نجلاء: هي بقا تأكل في نفسها. مالناش دعوة. *** هدي جايبة طبق فاكهة وقعدة. هدي: مقولتليش بقا ياقمر. إيه حكاية سليم دي؟ قمر: مافيش حكاية. عادي. زميلي ف الشغل.

ليل: سليم مين؟ تونة: آه مانتي ليل نهار مرزوعة ف أوضتك. مانتيش دريانة باللي بيحصل. ليل: مش فيهالك. لو فايقة كنت قمت جبتك من شعرك. تونة: أنا فايقة. تحبي أجيبك أنا ياحبيبتي؟ هدي: دول لو مولودين فوق رؤوس بعض والله ماهيعملوا كدا. قمر: اومال أنا أعمل إيه اللي عايشة معاهم من زمان. ليل: مقولتوش بردك مين سليم؟

تونة: أنا أقولك. دا واد قمور إيه يابت ياليل. طول بعرض وعينه ياخررابييي ملونة وحلوة وملعلطة كدا. وجابلي حاجات حلوة كتير. شكله مش بخيل يابت ياقمر. وهيغنغك. ليل: هينغنغها؟ لا ياقمر متضيعيهوش من إيدك. دا هينغنغك. هدي: طب وزين؟ قمر اتضايقت. قمر: ماله زين؟ أنا ماليش علاقة بيه. كل اللي بيني وبينه شغل وبس. هدي: مالك اتحولتي ليه؟ هو حصل حاجة؟ قمر: لا ياماما محصلش. أنا داخلة أنام. تصبحوا ع خير. ليل وهدي بيبصوا لبعض ومستغربين.

تونة: عليا النعمة الواد زين دا شكله عمل مصيبة. *** "سليم بيفتح الباب. لقي سهر ف وشه." سليم: انتي إيه جابك؟ سهر: اخص عليك ياسليم. بدل ما تقول وحشتني. سليم: هقولها لو حاسسها. خلصي ياسهر. عاوزة إيه؟ سهر: أنا جاية أقولك إني خلاص ياسليم. هسمع كلامك. وهسيب كل حاجة وحقي وهسافر وهنبعد عن كل دا. *سليم ضحك جامد.* سهر: انت بتضحك ع إيه؟

سليم: ع اللي بتقوليه. وعليكي. فاكرة إنك مش عارف إنك انتقمتي خلاص وخدتي حقك. وعاوزة تسافري علشان تهربي. بس خلاص ياسهر. انتي اخترتي من زمان. وأنا خلاص نهيت اللي بينا من زمان أوي. بس انتي مش واخدة بالك. سهر اتعصبت: يبقا اللي شوفته صح بقا. انت إيه علاقتك باللي اسمها قمر؟ سليم: انتي بتراقبيني؟ سهر: رد عليا. إيه علاقتك بقمر؟

سليم: علاقتي بيها موجودة من قبل ما أشوفك. وياريتني فضلت معاها. ومجربتش أحب غيرها. قمر دي اللي كنت بحكيلك عنها زمان وعن حبي ليها. اللي كنتي بتحاولي بكل الطرق تنسيهاني. عرفتي قمر مين؟ سهر: استحالة تحب غيري ياسليم. مش هتنسا اللي بينا علشان حب عيال كان بينكم. سليم: اهو حب العيال اتطور. وقريب هيكون جواز. سهر: استحالة. انت بتكدب عليا. قمر بتحب زين مش بتحبك. استحالة تتجوزك. سليم: هنشوف. استأذنك بقا. ممكن أدخل الحمام.

*سهر قاعدة بتحاول تهدي نفسها لحد ما موبايل سليم رن وشافت اسم قمر. والشر طلع من عينها وردت.* قمر: الو ياسليم. أنا فكرت ف كلامك. وموافقة ع اللي طلبته مني. *** سهر كانت فاكرة إن انتقامها خلص خلاص وهترتاح. بس الظاهر الشر اللي جواها مالهوش حد. والمرة دي هيطول قمر. ياترى إيه اللي هيحصل؟ هنعرف الأجزاء الجاية. تابعوا...