رواية حكاية قمر الفصل الخامس والعشرون 25 - بقلم وردة في البستان

ليل: محدش عملي حاجة ياقمر.. ممكن تسبيني بقا. قمر: ياليل ريحيني انتي عارفة أنا مبقدرش أشوفك كدا.. طب محدش جه جنبك.. زعلانة ليه.. علشان مجبتيش الهدوم اللي وعدتك بيها.. حاضر والله هروح للولية آخد منها الجمعية وأجبلك اللي انتي عاوزاه بس متزعليش.. أضحكي يلا ياليل علشان خاطري. ليل ابتسمت: خلاص ياقمر أنا كويسة. قمر: أيوة كدا ياحبيبتي.. أوعي تزعلي تاني.. أنا هروح دلوقتي آخد الجمعية ولا تزعلي نفسك أبداً. قمر مشيت.

ليل انفجرت من العياط تاني. *** كريم نزل متعصب.. ع صوت التليفزيون عالي وتونة بترقص على الأغنية.. راح خد الريموت وطفي التليفزيون. تونة بعصبية بصتله: أنت بتطفي التليفزيون لييييه! كريم بصلها بقرف.. ولما لف ضهره راحت تونة نطت على قفاه وراحت تعضه. تونة: أنا بكررهك ياولاد.. أنت ونعمة لشوهلك قفاك. نور ونجلاء جم يجروا على الصوت: أنتِ بتعملي إيه! نور شدتها ومسكتها: ليه كدا يا تونة.. عملك إيه! نجلاء ماسكة

كريم وكريم عايز يضرب تونة: أهدي يا كريم.. عيب كدا يا تونة.. مينفعش تعملي كدا عيب. تونة بعصبية: هو اللي قفلي التليفزيون.. هو مش بيحبني. نور: دادة خدي كريم على أوضته. كريم بيشد نفسه مش عايز يطلع. نور: علشان خاطري يا كريم اطلع يلا. تونة: غور. نور بتتكلم جد: فتون مش عايزة مشاكل مع كريم تاني لو سمحتي.. كريم وضعه مختلف عن باقي البيت.. متقربيش لكريم تاني لو بتحبيني.. مفهوم. تونة هزت رأسها ومشيت وهي زعلانة وبتعيط. ***

نجلاء: كريم ياحبيبي أهدى.. متزعلش منها دي ضيفة عندنا.. عيب نعامل الضيوف وحش. نور دخلت حضنت كريم: حبيبي أنت كويس.. متزعلش خلاص مش هتقرب منك.. وأنت كمان متجيش جنبها يا كريم وتزعلها.. تونة طيبة بس هي اتولدت في مكان غير اللي إحنا فيه.. ممكن تستحملها علشاني أنا. كريم هز راسه بالموافقة. نور: حبيب أختك أنت. عايدة: نجلاء.. كنزي بنتك جت تحت. نجلاء بفرحة: كنزي جت.. عن إذنكم هروحلها.

نور: وإحنا كمان هنيجي معاكي نسلم عليها.. يلا يا كريم. كنزي طلعت تجري حضنت نجلاء: وحشتينييي أووي أووي ياماما. نجلاء: وحشتيني أكتر ياحبيبتي.. أنا مصدقتش لما أبوكي قالي إنك جاية.. خلاص هتعيشي معانا. كنزي: أيوة عمو أحمد هو اللي قالي أعيش هنا.. وهينقل ورق كليتي هنا كمان. نجلاء: الحمد لله يارب.. كدا أبقى مطمنة عليكي وأنتي جنبي. نور: أهلاً يا كنزي.. عاملة إيه. كنزي: الحمد لله يا نور كويسة.

نور: سمعت إنك هتقعدي معانا.. فرحيني وقولي الكلام صح. كنزي بفرحة: أه أه هعيش معاكم. نجلاء: أنتِ مكلتيش ياحبيبتي طول الطريق.. تعالي معايا المطبخ أجيبلك أكل. كنزي: يلا. كريم بيبص لمح تونة قاعدة بعيد بتعيط.. بصلها ومشي. *** قمر راجعة مبسوطة ومعاها كياس كتير في إيدها ودخلت لقيت تونة وليل نايمين. قمر: إيه دا.. نايمين ليه دول غريبة.. قومي يابت أنتِ وهي شوفوا جبتلكم إيه يلا.

ليل صحيت وعينها ورمة.. قمر شافتها اتضايقت بس عملت كأنها مشفتهاش. قمر: بصي يالولو جبتلك إيه ياحبيبتي.. بصي الفستانين دول هيبقوا عليكي حلوين أوي.. وجبتلك البلوزة دي والسلوبتا دي عجبتني أوي قولت مش خسارة فيكي.. وشوية ميكياچ علشان تدلعي نفسك.. بصي اتفرجي الحاجات حلوة إزاي.. كل دول ليكي.. ولو عايزة تاني قولي بس متزعليش أبداً. ليل حضنتها وعيطت. قمر: بس لو تقوليلي إيه اللي جواكي ياحبيبتي.

ليل مسحت دموعها: متقلقيش أنا هبقى كويسة. قمر: طيب الحاجة عجبتك. ليل: حلوين أوي أوي يا قمر.. ربنا يخليكي ليا. تونة بزعل: وأنا مجبتليش حاجة. قمر: وأنا أقدر أنساك يا صغير.. تعالي.. بصي الفستان دا حلو إزاي.. وجبتلك تيشيرتين وشورت وبنس لشعرك.. وجبتلك اللعبة دي كمان مع إني عارفة إنها هتتكسر. تونة: أنا عايزة مايوه أنزل بيه البسين. قمر: حاضر هجبلك.. بس مش هتنزلي هنا.. أنا هوديكي بسين تاني تنزلي فيه براحتك. تونة: إمتى.

قمر: قريب بس اصبري عليا شوية. تونة: حاضر. ليل: أنتِ مجبتيش لنفسك حاجة. قمر: جبت عبايتين. ليل: عباية ليه.. ماتشتري هدوم عادي زي اللي جبتهملي. قمر: لا طبعاً.. أنا خدت على العباية خلاص.. مبلبسش غيرها. ليل: على راحتك. *** أسر راجع وبيبص على المكان اللي قاعدة فيه ليل وبعدين دخل على الفيلا. أحمد: حماتك بتحبك.. تعالي اتعشى معانا. أسر بيبص ملقاش ليل. زين بخبث: تعالي كل وهنخلي عايدة تناديلك على تونة تفتح نفسك على الأكل.

أسر: لا مش عايز.. أنا طالع أنام. أحمد: عملت إيه في الكلية يا أسر.. لو محتاج حاجة اطلب من ليل هتساعدك. زين: أه صح.. دي ليل معاك في نفس الكلية.. *غمز لأسر* أكيد هتساعدك.