رواية حكاية قمر الفصل الرابع والعشرون 24 - بقلم وردة في البستان

اسر: عايشين برا إيه يابني بقولك مش لاقيين ياكلوا.. وجايين يعيشوا عندنا في الفيلا؟ وليد: أومال فين أهلها؟ اسر: بتقول ماتوا. وليد: ياحبيبتي.. تلقيها ناقصها حنان الأب.. ماتشوفها كده أنت عندك حنان كتير اديها شوية. اسر حدفه بكتاب في وشه: تصدق أنا غلطان إني بحكيلك أصلاً. وليد بيضحك: أهدي خلاص بهزار.. عاوز أخرجك من المود اللي أنت فيه ده. اسر: نقطني بسكاتك وأنا هكون كويس.

وليد: طيب أنا هسكت اهو.. بس مفتكرش الاتنين اللي جايين دول هيسكتوا. اسر بيبص لقي صافي وسارة، وصافي بتشاورله من بعيد. اسر: مش ناقصها خاااالص. وليد: اتعامل عادي عشان متسألكش ماشية. سارة: هاي يا شباب عاملين إيه؟ وليد: تمام كويسين. صافي: اسر عامل إيه وحشتني. اسر: أنا كويس وأنتي؟ صافي: كويسة طالما شوفتك. وليد: أيوه ياسيدي مين قدك. اسر بصله بغيظ وسكت. سارة: حد قابل ليل خد منها المحاضرات؟ اسر بتسرع: لا ومش عاوز منها حاجة.

البنات استغربت طريقته. وليد خبطه في رجله وبصوت واطي: ركز هتشككهم فيا. سارة: مش عاوز حاجة منها ليه؟ صافي بغيظ: هي البت دي عملتلك حاجة يا اس؟ اسر: لأ معملتش بس مش عاوز حد غريب يبقى صاحبنا.. كفاية احنا بس.. وإن كان ع المحاضرات كل يوم واحد ييجي يكتبها ويديها للباقي. صافي بفرحة: آهو دا الكلام.. أنا أساساً مكنتش مرتاحة للبت دي ولا حبيتها.. بنت مستفزة.

سارة: أنا شايفة إن البنت لا مستفزة ولا وحشة.. وبعدين إحنا اللي طلبنا منها مش هي اللي جت قالت عاوزة أصاحبكم.. ومظنش يا اسر إننا هنعتمد على بعض إن كل يوم واحد فينا ييجي لو أنت جيت غيرك مش هييجي. وليد: بصراحة سارة عندها حق أنا مش هاجي.. ولو جيت مش هحضر. سارة: وأنتي ياصافي بذمتك هتكتبي محاضرات؟ صافي: آه عادي مكتبش ليه طالما اسر معايا موافقة. سارة: لا ماهو هيكون يوم لوحدك محدش معاكي فيه.

صافي: لا طبعاً اسر هيكون معايا صح يا اس؟ اسر: لا أنا أقصد كل واحد لوحده. سارة: قولتي إيه؟ صافي بتردد: موافقة (رضيت بأي حل المهم ليل تبعد عنها) اسر: خلاص يبقى كده مفيش غيرك أنتِ اللي معترضة يا سارة. سارة: تمام همشي ع كلامكم بس أنا لو غبت يوم أو حد فيكم غاب.. هاخد المحاضرات منها ومحدش يزعل طالما أنتو مضربين عنها كده ومش حابينها. الكل: تمام اتفقنا. *** نور: اهو ياستي مارشميلو كتير اهو زي ما طلبتي.

تونة: طعمه حلو أوي الشماليلو ده يا نور.. خدي حتة كده. نور بتضحك: اسمه مارشميلو يا تونة.. وبعدين أنا مش عاوزة أنا جايبة كل ده ليكي أنتي لوحدك.. بس هطلب منك طلب صغنن قد كده. تونة بقها مليان: قوللي براحتك. نور: بصي بعد ما تخلصي المارشميلو هتيجي معايا تاخدي شاور وهلبسك فستان حلو أوي.. وأظبطلك شعرك الحلو ده.. بس كده.. عشان اونكل زين لما يشوفك يحبك.

تونة برقت: أنتِ عاوزاني أعمل كوووووول ده عشان أبو طويلة ده يحبني.. ده لأ ممكن أتنازل عن تسريحة من أجله. نور: طب مش عشان خاطر زين.. عشان خاطري أنا.. وبعدين فين التسريحة دي يا تونة بذمتك دي تسريحة. تونة برقت لها: تقصدي إيه يا نور؟ نور بخوف: لأ لأ مقصدش متزعليش نفسك.. أنا عاوزاكي تكوني حلوة. تونة: وهو أنا في حلاوة؟ نور: أنا عاوزاكي تكوني حلوة أكتر وأكتر.

تونة: خلاص اديني وقت كده أقلبها في دماغي.. روحي أنتي هاتيلي فستق وتعالي. نور: فستق! تونة: إيه معندكوش فستق أومال فيلا وسلالم وانتوا معكوش ٥ جنيه تجيبوا فستق بيه؟ نور: لأ عندنا فستق وبنتق كمان. تونة: طب قومي هاتيلي يلا. نور: حاضر. تونة: استني.. افتحيلي التلفزيون ده عاوزة أتفرج. نور: حاضر.. اهو سندريلا شغال اتفرجي عليه. تونة: تعالي هنا.. إيه سندريلا ده شايفني عيلة صغيرة ولا إيه. نور بصتلها باستغراب.

تونة: عاوزة فيلم محمد رمضان.. أنتِ هتفضلي متنحالي يلا. نور: حاضر أهو. تونة بترقص: أيوه عابتو موته أيوه غنو معايا أيوه أيوه قولو ورايا عابتو موته. نور متنحلة. تونة: يلا روحي هاتيلي الفستق والبنتق. نور: أنتِ بتعامليني ليه كده؟ تونة: عشان تبقي تتريقي على تسريحتي تاني.. يلا روحي. نور: حاضر. تونة: عابتو موته أيوه أيوه.. عابتو موته. *** قمر: ليل إيه رجعك بدري كده؟ قمر مسكتها من إيدها: استني أنتِ مدريّة وشك ليه؟

ليل زقت إيدها: قولتلك مفيش بقا سبيني. قمر: أنتي معيطة.. فيه إيه حد عملك حاجة.. قوليلي وأنا أجيبلك حقك تالت ومتلت.. مالك يا ليل؟ ليل: قولتلك مفيش لو سمحتي ابعدي عني مش عاوزة أتكلم مع حد. قمر: لأ ماهو أنا مش هقف أتفرج عليكي وأنا شايفاكي كده.. قوليلي ماالك.. الولا ده عملك حاجة انطقي.. فين عنوانه وأنا أروح أطربقها على دماغه ودماغ أهله.