رواية حكاية قمر الفصل الخامس والستون 65 - بقلم وردة في البستان

حازم: أنا مبسوط إن النهاردة فرحنا. كنزي: وأنا كمان. حازم: شكلك مضايق، مالك؟ في حاجة حصلت؟ كنزي: لأ. حازم، هو الميكاب شكله وحش عليا؟ حازم: بالعكس، ده جميل جدًا ولايق عليكي. مين قالك إنه وحش؟ كنزي: مافيش. حازم: أي كان مين قالك، ما يهمكيش رأيه. المهم إنك عجباني أنا بالميكاب ومن غيره. كنزي فرحت. حازم: أيوه كده اضحكي، ليفتكروا إنك مجبورة على الجواز. تونة: هما بيقولوا إيه؟ ليل: مالكيش دعوة أنتِ باللي بيقولوا.

تونة: بصي البنت بتضحكله إزاي. ليل: يخربيتك، اسكتي. ده جوزها. الأغنية خلصت واشتغلت واحدة تانية للكابلز. أسر: بعد إذنك يا تونة هانم، ممكن آخد ليل نرقص. تونة: وتسيبوني لوحدي؟ لأ، مش مسموح. وترقص معاك بتاع إيه أنت؟ عيب كده، اختشوا. أسر: على فكرة كريم واقف هناك بيدور على حد يرقص معاه. تونة: فينه؟ فينه؟ أسر شاور لها عليه وخد ليل يرقص معاها. وسائر ونور راحوا يرقصوا. زين واقف جنب قمر: هتفضلي واقفة كده؟ قمر: أعمل إيه يعني؟

زين: مش عاوزة ترقصي؟ قمر: أرقص مع مين؟ ما أنت سامع بيقول للكابلز. زين: لأ، عادي. مش لازم للكابلز. عادي لو عاوزة ترقصي، تعالي نرقص. عشان متقفيش لوحدك. يعني مقصدش حاجة. لو مش عاوزة خلاص، براحتك. قمر: آه، مش عاوزة. زين شدها: طب حلو، يلا بينا. قمر: زين، أنت بتعمل إيه؟ قلت لك مش عاوزة. زين: هيبقا شكلي وحش أوي لو سبتيني زي الأبل كده ومشيتي. قمر اتكسفت ودمعت ومردتش. تونة: قولي كلام يضحك. كريم باستغراب: كلام يضحك إزاي؟

تونة: زي ما العريس كان بيضحك العروسة. كريم: معرفش بيضحكها إزاي. تونة: يمكن بيزغزغها. كريم: أنتِ بتقولي إيه يا تونة؟ تونة: أيوه، هو حاطط إيده في وسطها وبيزغزغها. كريم: عاوزني أزغزغك يعني؟ تونة: لأ، أحسن أرفع بالصوت وأعمل لك فضيحة. كريم خاف وسابها ومشي. تونة: استنى، أنت رايح فين؟ الغنوة مخلصتش، استنى. وليد واقف عينه على الباب ومستني سارة بفارغ الصبر. ليل: بتبص لي وبتضحك ليه؟ أسر: بصراحة، مبسوط أوي. ليل: ليه؟

أسر: هقولك، استنى. ليل: رايح فين؟ أسر خد المايك والأغنية وقفت، والكل بيبصله. أسر: حابب آخد من وقتكم شوية. السنادي كانت مختلفة بنسبالي، كانت أحلى بكتير من اللي فاتوا. حياتي اتغيرت 180 درجة. بص لليل. لأحسن طبعًا. وكل ده بفضل شخص واحد بس. لو اتكلمت عنه مهما اتكلم مش هقدر أوصفه. الحد ده موجود معانا هنا، وهو عارف نفسه. كل اللي بتمنى إنه يفضل معايا العمر كله. قعد على رجل قدام ليل وطلع علبة

من جيبه فيها خاتم وفتحها: موافقة تحققي لي أمنيتي وتفضلي معايا العمر كله؟ الكل سقف، وليل مش مصدقة اللي بيحصل وفرحانة أوي ودمعت. وبصت لقمر، وقمر هزت رأسها بالموافقة. ليل: أنا مواف... صافي دخلت بتسقف: شابوه بجد. قصة ولا الأفلام. أسر بعصبية: أنتِ إيه اللي جابك هنا؟ صافي: جاية أتفرج. ولا أنا ممنوعة من الفرجة؟ آه، فعلًا، مينفعش أشوف حبيبي وهو بيتسرق مني. أسر: أنتِ عايشة في وهم يا صافي. أنا بحب ليل. فوقي بقى.

صافي: الوهم اللي أنتوا عايشين فيه ده، مش هسمحلها تاخدك مني. مهما كان التمن. هدي: صافي يا حبيبتي، افهمي. أنتِ بكرة تلاقي الشخص اللي يحبك وتحبيه. لسه الدنيا قدامك كبيرة. صافي عيطت: أنتِ بتعملي إيه هنا يا ماما؟ ليل: مش من حقك تقوليلها يا ماما. دي أمي أنا، مش أنتِ. شوفتي بقى إنك أنتِ اللي عايشة في وهم. أسر: مش هتقدري تفرقي بينا مهما عملتي يا صافي. اعقلي وامشي. صافي: لأ، هقدر يا أسر. وطلعت المسدس. الكل اتصدم.

أسر: إيه اللي بتعمليه ده؟ أنتِ اتجننتي رسمي. صافي: اتجننت بيك وبحبك. أسر: واللي يحب حد يموتوا؟ صافي: ومين قال إني هموتك أنت؟ أنا هخلص منها هي. قمر طلعت تجري. زين جه يمسكها، زقته. وقفت قصاد ليل: مش هسمحلك تأذيها. صافي بتعيط بانهيار: وأنا مش هسمحلها تعيش مهما حاولت. خدت مني كل حاجة. سرقتهم مني. سرقت سعادتي. هي السبب في اللي أنا فيه. هدي بتقرب منها وبتعيط

من خوفها على بناتها: صافي يا حبيبتي، أنا مستعدة أرجعلك، بس نزلي المسدس. عشان خاطري، متعمليش في نفسك كده. ليل: أنتِ بتقولي إيه يا ماما؟ أنا أهون عندي أموت ولا تبعدي عني. صافي: وأنا هنفذ طلبك يا ليل. سارة دخلت شافت المنظر، طلعت تجري، وقفت قدام صافي. سارة: أنتِ اتجننتي؟ إيه اللي بتعمليه ده؟ اعقلي يا صافي. صافي زقتها، وقعت في الأرض: ابعدي عني.

سارة قامت تاني: مش هبعد ومش هسيبك. أنتِ أختي وصاحبتي. مش هسيبك تضيعي نفسك يا صافي. هاتي المسدس عشان خاطري. صافي: مش هديهولك. قلت لك ابعدي بقى. سارة بتشد منها المسدس: قلت لك مش هبعد. سبيه يا صافي. صافي بتشد المسدس منها جامد، طلعت طلقة بالغلط. الكل صرخ، وسارة وقعت في الأرض.