رواية حكاية قمر الفصل الخمسون 50 - بقلم وردة في البستان

كنزي: يارب ياماما. نجلاء: طيب بما إنك بقا معندكيش حاجة النهاردة، إيه رأيك ننزل نشتريلك شوية حاجات كدا لجهازك؟ آه بلاش نزنق نفسنا للآخر ومافيش وقت. كنزي بفرحة: موافقة طبعًا. نجلاء: خلاص ياحبيبتي أنا هكلم أبوكي أقوله. _ليل داخلة وقمر جريت عليها. قمر: كنتي فين ياليل وإزاي تخرجي من غير ما تقوليلي؟

ليل: معلش ياقمر بس فيه واحد زميلنا كان تعبان وروحنا زورناه.. ونسيت الموبايل هنا معرفتش أكلمك.. عن إذنك أنا هدخل أنام بقا عشان تعبانة. قمر: تعالي هنا، انتي رايحة فين؟ أنا مخلصتش كلامي. ليل: ماشي، لما أصحى نتكلم. قمر: مفيش حاجة لما تصحي دلوقتي. ليل: في إيه ياقمر مالك؟ بقولك تعبانة، منمتش طول الليل. قمر: وهو حد قالك متناميش؟ حد قالك تخرجي نص الليل من غير ما تقولي؟ ليل: واحد تعبان وروحنا زورناه، حصل إيه يعني؟

قمر: انتي شايفة إن اللي عملتيه دا عادي يعني؟ خروجك من غير علمي نص الليل.. واكتشف الصبح إنك مش موجودة وقلبي كان واكلني عليكي وراسي عمالة تودي وتجيب، ياترى حصلها إيه وراحت فين.. كل دا عادي؟ ليل: قمر لو سمحتي، بقولك تعبانة، حسي بيا شوية. قمر بعصبية: وأنا مين يحس بيا؟ انتي تعبانة وأنا إيه؟ عايشة حياتي ومبسوطة يعني؟ مانا شايلة الهم ومبتكلمش.. وبقول أسيبك تعيشي الحياة اللي أنا معشتهاش.. أنا عاوزة إيه غير أشوفكم مبسوطين؟

بس تزودي لا مش هسمحلك، مش عشان عشنا في فيلا تنسي اللي اتربينا عليه وتفكري إن كل حاجة بقت عادي بنسبالك. ليل بعصبية: أنا مبقتش صغيرة يا قمر، أنا عارفة أنا بعمل إيه كويس.. وياستي مش عاوزاكي تشيلي همي، أنا أعرف أشيلوا لوحدي، ارتاحي بقا ولو أنا اللي تعباكي.. أنا بقولك اهو، شيليني من دماغك عشان ترتاحي وتعيشي مبسوطة.. بس متحكميش فيا بعد إذنك.

قمر دمعت: ماشي ياليل، طالما انتي شايفة نفسك مش صغيرة.. ومش لازم أتحكم فيكي ولا عاوزاني أشيل همك وأقلق عليكي.. زي ما تحبي، أنا مش هتدخل في حاجة ليكي تاني ياستي.. عن إذنك. ليل اتضايقت من اللي قالته.. مش عارفة ليه عملت كدا مع قمر.. جايز تفكيرها في مامتها هو اللي مأثر عليها. تونة طلعت من ورا الكنبة.. ليل اتخضت. ليل: يخربيتك.. انتي بتعملي إيه هنا؟

تونة: كنت قاعدة بسمعكم يا أختي.. إيه اللي عملتيه دا مع قمر.. أخزقلك عينك دلوقتي يعني؟ ليل: ونبي ياتونة سبيني أنا مضايقة ومش طايقة نفسي. تونة: أحسن عشان تبقى تضايقي قمر تاني أحسن. ليل عيطت: مكنش قصدي.. أنا غبية وبتغبي دايما بس والله بيبقى غصب عني. تونة: طب خلاص متعيطيش.. خلاص بقا متزعليش مني.. أنا بس مبحبش قمر تضايق. ليل: ولا أنا والله بس غصب عني بقا. تونة: خلاص، لما قمر تيجي تصالحيها ماشي.

ليل: حاضر هعمل كدا.. ممكن أدخل أنام ولا انتي كمان هتمنعيني؟ تونة: لا روحي اتخمدي، مش طايقة أشوف وشك. ليل: يوة مانتي كنتي لسه حلوة. تونة: كيفي كدا بقا، يلا غوري. ليل: حاضر. _قمر قاعدة لوحدها بتعيط.. حد خبط على ضهرها بتلف تبص. قمر ابتسمت: كريم.. تعالي اقعد معايا.. عامل إيه؟ كريم ابتسم وشاور بإيده: 👍🏻 قمر: يارب دايما ياحبيبي. كريم مسح دموعها بإيده وبصلها وكأنه بيسألها ليه بتعيطي؟

قمر: اتخنقت أنا وليل.. أنا مش زعلانة من كلامها ليا.. أنا زعلانة عشان مش عارفة اللي جواها.. ليل أختي أنا مربياها.. تصرفاتها دي مبتعملهاش غير وهي جوها حاجة مخبيها.. أنا خايفة عليها أوي.. وف نفس الوقت مش عاوزة أضغط عليها عشان تحكيلي حاجة.. مش عارفة أعمل إيه يا كريم. كريم قام وقف. قمر: رايح فين؟ كريم شاورلها تستنى. بعد 10 دقايق جالها تاني. قمر: روحت فين وسبتني؟ كريم فتح إيده كان فيها سلسلة رقيقة جدا وفيها قلب صغير.

قمر: جميلة أوي يا كريم.. دي لمين؟ كريم شاور عليها. قمر: ليا أنا.. أنا أول مرة حد يجبلي هدية.. متشكرة أوي ياحبيبي.. ممكن تلبسهالي بقا؟ كريم فرح إنها عجبتها ولبسهالها. قمر حضنته: أوعدك مش هقلعها خالص. _نادر فتح باب الأوضة. نادر: سارة ياحبيبتي انتي نايمة؟ سارة عدلت نفسها: لا يابابا أنا صاحية. نادر: كنت عاوز أتكلم معاكي. سارة: عارفة يابابا اللي هتقوله.

نادر: لا مش عارفة.. أنا فكرت في اللي اتكلمنا فيه.. ولقيت إن معاكي حق، مش عشان سفري أغيرلك حياتك.. موافق إنك تفضلي هنا طالما هتكوني وسط صحابك والناس اللي بتحبيها. سارة: لا يابابا أنا مش هفضل هنا.. أنا ماليش حد هنا غيرك انت وبس.. وبما إنك هتسافر.. أنا هروح أعيش مع ماما وأختي في إسكندرية. نادر: بتتكلمي جد؟ انتي متأكدة من قرارك ياسارة؟ سارة: آه يابابا متأكدة.