رواية حكاية قمر الفصل السابع 7 - بقلم وردة في البستان

قمر بتضحك: الواد القط هو والشمام اللي معاه كانوا خاطفينها.. والعبد لله أنقذتها. ليل بتريقة: أنقذتيها إزاي بقى يا سوبر أمينة؟ قمر رفعت رجلها وبتشاور ع الشبشب: شايفة دا ولا مش مالي عينك.. تحبي تجربيه؟ ليل ضحكت: لا ميرسي.. جربته كتير قوي. تونة بترقص: سيد يا سيد. سيد بيطبل: سيد يا سيد. تونة: ونبي يا عم سيد. سيد: سيد يا سيد. تونة: عايزة حاجات يا عم سيد. سيد: سيد يا سيد. تونة: بسرعة يا عم سيد. سيد بيطبل: سيد يا سيد.

تونة بترقص: عندنا ضيوف يا عم سيد. سيد: عندكم ضيوف غريبة يعني؟ تونة: بوظت الغنوة، ونعمة ما هغني معاك تاني. سيد: خلاص يا ستي متزعليش.. قوليلي بقى مين جيلكم؟ تونة بصت يمين وشمال وقربت عليه: تعالي هات ودانك متخافش. سيد قرب ودنه. تونة: توووووووووووووووووووت.. وقعدت تضحك. سيد: كدا يا تونة، ماشي.. متكلمنيش تاني بقى. تونة بتضحك: خلاص خلاص، آخر مرة خلاص.. تعالي هقولك. تونة بتبص يمين وشمال تاني. سيد: فيه إيه؟ انتي متراقبة؟

تونة: ششش.. هات ودانك. سيد: خدي أهي.. وقرب عليها. تونة بتبص لودنه: انت كنت فيل وأنت صغير يا عم سيد؟ سيد: يابت بطلي طوله لسان وانطقي. تونة وطت صوتها خالص: أصل إحنا عندنا بتوع التلااافزيوه. سيد: إيه؟ مش سامع.. عالي صوتك. تونة بصوت عالي: عندنا بتوع التلاافزيوووه.. التلاافزيوووه. سيد: إيه التلفزيوه دا؟ تونة شاورت ع التليفزيون اللي عنده: ماهو عندك يا عم سيد التلافزيوه.. بتجيب حاجة متعرفش اسمها.

سيد: اسمه تليفزيون يا تونة، تليفزيون. تونة: هو تلافزيوووه.. انت اللي سمعك تقيل. سيد باستغراب: والله تصدقي فعلاً ممكن أكون بسمع اسمه غلط.. المهم احكيلي إيه بقى عندكم بيعملوا إيه؟ تونة لمّت كام شيكولاتة من عنده وفتحت فيهم وأكلت: أحكيلك بقى يا عم سيد عندنا بيعملوا إيه.. بس دا سر. سيد: احكي. نور: زين مش بيرد عليا. قمر: معلش يا حبيبتي، يمكن مش واخد باله.. جربي تاني. نور: أنا خايفة أكلم بابي وهو نايم أقلقه.

قمر: أكيد هو قلقان دلوقتي ومش جايله نوم طالما انتي مش موجودة. نور: انتي شايفة كدا؟ قمر: أيوة طبعاً.. كلميه. نور اتصلت بأبوها. أحمد بلهفة: نور.. انتي فين يا بنتي؟ قلقتيني عليكي.. موبايل مين دا اللي بتتكلمي منه؟ نور عيطت: أنا كنت هتخطف يا بابي.. بس قمر أنقذتني. أحمد: إيييه؟ إزاي دا حصل؟ انتي فين قوليلي. نور: أنا مش عارفة يا بابي.. خد قمر تقولك. أحمد: قمر مين؟ الو.. نور روحتي فين؟

قمر: اطمن يا أستاذ.. بنتك عندي ف الحفظ والصون.. ومحدش يقدر يقربلها. أحمد: أنا متشكر جداً يا بنتي.. قوليلي انتوا فين أجي آخدها. قمر: لا شكر ع واجب.. تعرف الـ*****.. اسأل ع الست قمر هيدلوك ع بيتي. أحمد: أيوة أيوة.. مسافة السكة وهجيلكم. قمر: بالسلامة.. يلا سلام. ليل: اهدي.. خلاص باباكِ جاي اهو. قمر: متعيطيش بقى يا حبيبتي.. خلاص حصل خير.. الله.. هو صحيح البت تونة اتأخرت ليه كدا؟ ليل: يمكن عم سيد قافل.. راحت حتة تانية.

قمر: لا.. أنا مسلمة عليه وأنا نازلة وكان فاتح. تونة ماسكة شيكولاتة وبتاكل فيها: قوم إيه بقى يا عم سيد... جعفر: ناولني علبة سجاير يا سيد.. إيه دا؟ تونة انتي هنا؟ إيه اللي ف وشك دا؟ تونة بقرف: دي شوكولاتة.. تدوق.. وبتحط الشيكولاتة ف وشها. جعفر: لا.. كليها انتي مش عايز.. إلا قوليلي يا بت يا تونة.. هي اختك قمر عاملة إيه؟ تونة: عاملة محشي.. تأكل. جعفر: نفسي والله آكل محشي من إيدها. سيد بضيق: خد يا معلم طلبك.. حاجة تاني؟

جعفر: آه.. شوف تونة عايزة إيه ع حسابي. سيد: متشيلش هم.. انت قمر محسّباني ع طلب تونة.. خلي فلوسك. سيد: بتقطع برزقها ليه بس.. جاب شيكولاتة كبيرة وحطها قدام عين تونة زغلللها: خدي دي.. وسلميلي ع اختك. تونة شدتها منه: وهي كمان بتسلم عليك يا معلم غدنفر.. دي حتى مبتنمش طول الليل.. بتفكر فيك و.. سيد بيبصلها ومبرقلها. تونة: طب روح انت يا غدنفورة.. وأنا هبقى أجيلك.. ومشي. سيد بيبصلها ومبرقلها. تونة: فيه حاجة يا عم سيد؟

سيد: مش عيب كدا يا تونة.. انتي عارفة اختك مبتطقوش.. وانتي بتاخدي منه حاجة. تونة: أنا ضحكت عليه وخدت الشيكولاتة منه. سيد: هي يعني قمر حرمالكِ؟ قمر: يا عم سيد.. تونة فين؟ ابعتها بالحاجة. سيد: حاضر يا قمر.. طالعة أهي.. خدي أهي الكيسة اللي طلبتيها. تونة: حطيت الماية المعدية. سيد: معدنية؟ مانتي لو بتروحي المدرسة هتعدلي كلامك دا. تونة: ليه ماله كلامي؟ سيد: عامل حادثة.. خدي.. خدي ويلا روحي لأختك.. دانتي بهدلتي الدكانة.

تونة: اهئ اهئ.. بتكرشني يا عم سيد.. ماشي.. ماشي. أحمد: بسرعة شوية يا سامح.