رواية حكاية قمر الفصل الثامن 8 - بقلم وردة في البستان

سامح: اهدأ يا أحمد بيه، مش كلمتك وطمنتك عليها؟ (سامح جوز نجلاء والسواق الخاص بأحمد الألفي، لكن أحمد لا يعتبره مجرد سائق بل صديقه الذي يحكي له كل ما يزعجه لأنه يثق فيه) أحمد: قلقان برضو يا سامح، المكان ده مينفعش نور تفضل فيه. أنا مش عارف إيه اللي وداها لحد هناك، أنا خايف عليها أوي. سامح: مش بتقول إن الست اللي أنقذتها كلمتك وطمنتك إن مش هيحصل لنور حاجة؟ أحمد: آه، بس مش هطمن غير وبنتي في حضني. سوق بسرعة أنت بس. ***

قمر بتفتح الباب، شهقت: يا مصيبتي، إيه اللي في وشك ده؟ تونة: شوكولاتة! قمر: كل ده؟ وإيه اللي في إيدك ده كله؟ (تونة ماسكة كيسة مليانة حاجات حلوة) تونة: مش أنتي قولتيلي اصحي يا تونة، هاتي لك حاجات حلوة؟ قمر: كل ده؟ ادخلي، دانا هقطع رقبتك بس البت تمشي. (تونة بترجع شعرها المنكوش لورا ووشها كله شيكولاتة، وماشية بأناقة قدام نور. راحت قعدة وحطت رجل على رجل، ونور بتضحك على اللي بتعمله.) ليل زقت رجل تونة: اقعدي عدل يا مفعوصة!

تونة جاية تقوم تنط على ليل، وليل استخبت ورا نور. قمر مسكت تونة: معلش امسحيها فيا أنا يا غالية. تونة بعصبية: سيبيني، والله لأقطع شعرها في إيدي! قمر: خلاص، أنتي الكبيرة، معلش. عيلة وغلطت، معلش. تونة هدت: ماشي، عشان الست المحترمة اللي قاعدة دي، بس هسكت. نور بتضحك: ربنا يخليكي يا حبيبتي. الباب خبط. نور: ده أكيد بابي. قمر: روحي افتحي يا ليل، عبال ما أجيب الحاجة الساقعة. ليل فتحت: اتفضلوا. أحمد: فين بنتي؟ نور.

نور جريت حضنته: بابي، كنت خايفة مشوفكش تاني. أحمد: بعد الشر عليكي يا حبيبتي. سامح: حمد الله على سلامتك يا نور. نور: الله يسلمك يا عمو سامح. قمر: نورتوني والله. نور: هي دي قمر اللي أنقذتني يا بابي؟ أحمد: مش عارف أشكرك إزاي على اللي عملتيه والله. (طلع شيك من جيبه) اتفضلي، ده مبلغ بسيط، أنتي تستاهلي. ليل فرحت.

قمر بضيق: أنا معملتش غير واجبي يا أستاذ، غيري كان هيعمل زي. ونور بنتك زي أخواتي بالظبط. الخير اللي عملته عاوزاه يعود ليا فيهم. تيجي تقولي خدي المقابل؟ لا يا أستاذ، مش هقبل حاجة زي دي. (ليل قلبت وشها) أحمد: بس ده مش مقابل، اعتبريه هدية مني. قمر: متكملش يا أستاذ، أنا مش هاخد حاجة. أنا هديتي إني اتعرفت على الجميلة دي. ربنا يحرسهالك ومتشوفش فيها حاجة وحشة أبداً. أحمد: يارب يا بنتي. مش يلا بينا يا نور؟

قمر: دي الحاجة الساقعة زي ما هي. أحمد: مرة تانية معلش. اتفضلي، ده الكارت بتاعي، احتاجتي أي حاجة، أي حاجة، متتردديش إنك تكلميني. قمر خدت الكارت: إن شاء الله. كل خير. مع السلامة. مع السلامة. بتلف وشها، لقيت ليل قالبة وشها. ليل: أنتي إزاي متاخديش منه الفلوس؟ قمر: متعودتش آخد من حد فلوس. فلوسي أنا أجيبها من نفسي. ليل: بس ده حقك، بنته كانت ممكن تموت، وأنتي لحقتيها.

قمر: ربنا هو اللي بعتني ليها، وأنا معملتش حاجة غير اللي ربنا قدرني عليه. يعني الفلوس مش حقي. واقفلي الموضوع على كده بقى يا ليل. هاتي يابت يا تونة، احسبي الحاجات اللي جبتيها علشان أحاسب عم سيد. ليل: هتفضلي معيشانا في الفقر ده لحد امتى؟ قمر: فقر؟ أنا معيشاكي في فقر ليه؟ طلبتي إيه وقولتلك عليه لأ؟ دانا كل حاجة بعملها لك. ما تردي. ليل: أيوه فقر، أنتي شايفة البيت اللي هيقع على دماغنا ده؟ كانت الفلوس دي ممكن تعمل حاجة.

قمر: ما إحنا طول عمرنا فيه، عمرنا ما اشتكينا من حاجة. ليل: عشان مكنش معانا. قمر: ولسه زي ما إحنا، مفيش حاجة اتغيرت. ليل: كان حاجات هتتغير، بس أنتي كل حاجة ترفضيها. قمر: وأنا رفضت إيه تاني؟ تونة: متحسبيش الشيكولاتة دي، دفعت حقها. قمر: وأنتي جبتي حقها منين؟ تونة: مش أنا، ده المعلم غدنفر دفع حقها وبيسلم عليكي. قمر ضربت إيدها على صدرها: يلاهوي! أهو ده اللي كنت خايفة منه. بيلف عليكم واحد واحد. ورحمة ستي مانا سايباه. ***

نجلاء بتحضن نور: حمد الله على سلامتك يا حبيبتي. نور: الله يسلمك يا دادة. أومال زين فين؟ هو معرفش؟ نجلاء: لا يا حبيبتي، هو نايم. أحمد: آسر جه؟ نجلاء بتوتر: لا، مجاش لسه. أحمد بعصبية: مجاش إزززززززززززاي! (الجرس رن) نجلاء: أجري يا عايدة، افتحي. آسر: عايدة، نبي اعمليلي أي حاجة عشان دماغي هتتفرتك. وهاتيها على الأوضة. أحمد: أهلاً! أهلاً بالصايع اللي بيسهر لي لوش الصبح. لا وكمان جاي سكران. آسر: أنا عاوز أنام.

أحمد: استنى عندك. فاكرها وكالة من غير بواب ولا إيه؟ نور: بابي، خلاص سيبوه يطلع ينام. أحمد: مفيش نوم. هفضل لحد امتى شايفه بيضيع نفسه بنفسه كده وأنا قاعد أتفرج؟ آسر: والله أديك قولت بضيع نفسي، مش بضيع حد غيري. سيبوني بقى براحتي.