رواية حكاية قمر الفصل الستون 60 - بقلم وردة في البستان

هدي: اه طبعًا بتكلم جد.. قلقانة من إيه.. علشان مش مكملة تعليمك يعني؟ قمر: لا.. هما قالوا لي إنّي أقدر آخد كورسات وأعوّض اللي فاتني.. بس حاسة إنّي مسؤوليّة كبيرة عليا.. أنا عمري ما اشتغلت في شركة وحاسة إنّي هفشل. هدي: مسؤوليّة إيه يا قمر.. انتي اللي بتتكلمي عن المسؤوليّة.. انتي اتحمّلتِ مسؤوليّة أكبر من دي بكتير من وأنتي عندك 13 سنة.. ودلوقتي بتقولي على شغل الشركة مسؤوليّة كبيرة.

قمر: مش عارفة يا ماما.. محتارة وخايفة بعد ما أعمل كل ده في الآخر متقبلش وأفشل. هدي: أنا متأكدة إنّك مش هتفشلي أبدًا.. بس لو فشلتي مش مهم.. المهم إنّك جرّبتي حاجة جديدة واتعلمتي.. مش هتخسري حاجة يا قمر صدقيني.. جرّبي.. وأنا وأخواتك هنفضل معاكي وفي ضهرك وندعمك في كل خطوة.. مش هتكوني لوحدك.. ولا هنخليكي تحسي بأي خوف أو ضعف. قمر حضنتها بفرحة: بشكر ربنا إنه رجّعك ليا.. وجودك جنبي بيقوّيني دايما.. أوعي تبعدي عني تاني.

هدي: مش هيحصل أبدًا.. أنا مصدّقت رجعت لحضنكم تاني.. المهم بقا قوليلي هتعملي إيه في الشغل؟ قمر: هكلم نور. هدي: هتقوليلها إيه؟ قمر بفرحة: هقولها موافقة. *** { بعد مرور شهور } نور نازلة تجري على السلم: كريم مشوفتش زين فين؟ كريم: لسه خارج دلوقتي.. الحقيه. نور طلعت بسرعة: زين.. زين! زين: إيه يا نور.. في حاجة؟ نور: كنت عاوزة أقولك إنهاردة مقابلة قمر.. متنساش.. أنت اللي تقابلها مش حد تاني. زين: اشمعنى أنا يعني؟

نور: علشان تتأكد بنفسك إنّها تستحق الشغل. زين: ماشي ياستي.. ولا وأنا أشك. نور: آه.. وخليك لطيف معاها ياريت. زين: أمسكها الشركة مكاني أحسن بقا. نور: مش قصدي كدا.. أقصد طريقتك متحسّسهاش إنّك مش عاوزها في الشغل. زين: ماشي ياستي.. حاجة تانية عاوزة تكلميني فيها عن قمر.. علشان أتعطّل أكتر عن الشغل؟ نور: لا.. خلاص ياروحي.. اتفضل. زين: ماشي. *** وليد قاعد سرحان. أسر: وليد.. أنت هنا من بدري ولا إيه؟

وليد: آه.. لقيت نفسي مخنوق شوية.. قولت أنزل الكافيه أغيّر جو. أسر: آه.. تغيير جو.. طب أقوم أنا بقا. وليد: رايح فين؟ خليك. أسر: أخليني إيه بقا.. ماهي زمانها جاية. وليد: هي مين؟ أسر: اللي هتغيّر جو معاها. وليد: اقعد يا أسر. أسر: لا يعم.. أحسن ليل تعرف وتزعل.. بلاش. وليد: مافيش حد جاي.. اقعد بقا. أسر: بتتكلم جد.. أنت نازل من غير ما يكون معاك واحدة.. لا.. أنا مش مصدق.. أنت شكلك سخن.

وليد: لا.. صدّق.. خلاص قطعت علاقتي مع كله. أسر: جاي تقطع علاقتك مع كله دلوقتي.. ماشي يا وليد.. اللي يريحك. وليد: أنت تعرف حاجة عن سارة؟ أسر: آه.. ليل بتكلمها دايمًا.. هي كويسة. وليد: عملت إيه في الامتحانات؟ أسر: ليل قالتلي.. حلّت كويس.. وفي انتظار النتيجة زينا. وليد: ربنا يوفقها.. ابقى طمّني عليها. أسر: طيب.. ماتكلمها أنت وتسأل عليها. وليد: بذمتك.. بعد اللي حصل آخر مرة.. هتكون عاوزة تكلمني؟

أسر: بصراحة.. ولا تتف في وشك حتى.. بس جرّب بردك. وليد: لا.. بلاش.. علشان مرجعش أعلقها تاني بحاجة.. هي بعدت كدا كويس ليها. أسر: تقصد كويس ليك أنت. وليد بزعل: آه.. كويس ليا.. أنا اللي اخترت كدا.. عندك حق. *** هدي: فتون.. ادخلي صحّي قمر.. أحسن تتأخر على المقابلة إنهاردة. تونة: حاضر يا ماما. قمر (لابسة لبس مناسب للشغل وهيلز عالية ولمّة شعرها لفوق وحاطة ميك أب سيمبل) خرجت: أنا صاحية يا ماما وجاهزة كمان.

هدي: بسم الله ما شاء الله عليكي.. زي القمر يا حبيبتي. تونة: زي إيه دي.. هي القمر نفسه يا ماما. ليل خارجة من الأوضة.. صفرت أول لما شافت قمر: إيه الحلاوة دي يا قمر.. أنتِ ناوية تبقي صاحبة الشركة ولا إيه؟ هدي: وليه لا.. قمر قدها.. وبقا معاها شهادات غيرها بياخدها في سنين.. وهي قدرت تاخدها في شهور بس.. علشان تعرفي اختك لما بتحط حاجة في دماغها بتعملها. قمر: لولا وقفتكم جنبي.. ما كنتش هوصل للي وصلتله ده.

هدي: انتي اللي عملتي يا قمر.. إحنا كنا بندعمك بس. قمر: ودا بالنسبة لي حاجة كبيرة أوي.. انتوا ساهمتوا بجزء كبير أوي في اللي وصلتله. هدي: وهنفضل جنبك وندعمك دائمًا لحد ما توصلي لأحسن مكانة يا حبيبتي. ليل: إيه ده.. انتوا هتعيطوا ولا إيه.. لا.. كدا الميك أب يسيح.. يلا يا حبيبتي روحي على مقابلتك.. ولما ترجعي نعيط كلنا سوا. هدي: لا.. لما ترجع هنفرح كلنا.. مش هنعيط إن شاء الله. قمر: أنا همشي علشان متأخرش.. ادعولي.

هدي: دعالك يا حبيبتي.. ربنا هيوفقك إن شاء الله. *** سارة: يا ماما.. قولتلك مليون مرة.. متفتحيش معايا موضوع ده.. أنا مش بفكر في الارتباط نهائي. مني: ليه يعني.. مش زي بقيت البنات.. أنتِ لازم تتخطبي وتتجوزي ويبقالك بيت. سارة: لا يا ماما.. مش زي بقيت البنات.. أنا مش عاوزة لا أتخطب ولا أتجوز.. أنا حرة. مني: استغفر الله العظيم يا رب.. طيب.. اديله فرصة بس.. اتقابلوا.. مش يمكن تغيري رأيك.

سارة: مش هغيره.. يا ماما.. أنا عارفة نفسي. مني: جرّبي.. مش هتخسري حاجة. سارة: مش هجرّب حاجة عارفة نتيجتها إيه. مني: أنا مش فاهمة.. ماله وائل ابن خالتك.. مش عاجبك في إيه؟ سارة: لا عاجبني ولا مش عاجبني.. أنا رافضة الموضوع وخلاص. مني: والسبب؟ سارة: من غير أسباب يا ماما.. عن إذنك.. أنا داخلة أنام. مني: أنتِ لسه صاحية.. أنتِ لحقتي؟ سارة: آه.. هنام تاني. ***

السكرتيرة: أستاذ زين.. في واحدة اسمها قمر.. بتقول إنّها عندها مقابلة معاك إنهاردة. زين: آه.. هي جت من امتى؟ السكرتيرة: من نص ساعة بس.. حضرتك كنت في الاجتماع. زين: طيب.. دخّليها وابعتيلي القهوة بتاعتي. السكرتيرة: حاضر يا فندم. *** "قمر دخلت وزين مركز في الورق اللي في إيده ومش باصصلها." قمر: ازيك يا زين؟ "زين شافها.. قام وقف وفضل باصصلها.. ومش مصدق إن دي قمر." قمر: زين.. أنت سامعني؟

زين بتوتر: آه.. آه.. اتفضلي.. تشربي إيه؟ قمر: ميرسي يا زين.. مش عاوزة.. أنا بقول نركز في اللي جاية علشانه الأول.. بص.. ده ملف فيه كل الأوراق المطلوبة زي ما نور قالتلي.. ودول الشهادات اللي أنا واخدها.. و.. "قمر بتتكلم وزين سرح فيها.. ومش مصدق إنها اتغيّرت 180 درجة في الفترة القصيرة دي.. طريقتها ولبسها وأسلوبها.. حاسس إنه أول مرة يتعامل معاها." قمر: ودلوقتي تقدر تسألني اللي أنت عاوزه.

زين بص في الورق: كل حاجة تمام.. مافيش حاجة عاوزة أسألها.. أنتِ هتشتغلي معانا. قمر بفرحة: بجد.. يعني اتقبلت؟ زين: عاوزة بعد كل ده ومتتقبليش؟ "قمر سكتت." زين: ثواني.. خليكي معايا.. خير يا علا. علا: المهندس سليم مستني حضرتك برا. زين: طيب.. شوفي يشرب إيه.. لحد ما أخلص المقابلة. علا: تحت أمرك يا فندم. قمر: مافيش داعي تعطل شغلك.. أنا كدا كدا همشي. زين: لا.. خليكي. قمر: !! زين: أقصد يعني.. لو حابة تستني أوصلك.

قمر: لا.. متقلقش.. عربي مستنيّني تحت.. هيوصلني. زين قلب وشه: عربي! طيب.. اتفضلي.. هوصلك لحد أستاذ عربي. قمر ابتسمت: ماشي. زين: ابقي سلميلي على ليل ومدام هدي.. وتونة. قمر: حاضر.. هسلم عليهم. زين: وابقوا تعالوا بقا.. انتوا بطلتوا تيجوا. قمر باستغراب: تمام.. هشوف وهنيجي. زين: أمتى؟ قمر: مش عارفة يا زين.. هشوف. سليم: زيين.. يا جدع.. بقا بعد كل الغيبة دي وتسبني ملطوع كل ده برا. زين حضنه: واحشني والله يا سليم.

"قمر سمعت اسم سليم.. بصّت اتصدمت وعينها لمعت.. ودّارت وشها بسرعة." سليم: لا.. واضح إنّي وحشك فعلاً. زين: بص.. خمس دقايق بس.. هوصل قمر.. بس وهاجي نرغي مع بعض براحتنا.. قمر.. تعالي.. قمررر بكلمك. قمر بتحاول تستجمع نفسها.. وراحت لزين.. وبعدت عينها عن سليم: نعم يا زين. سليم شافها: قمر!!!