رواية حكاية قمر الفصل الثاني عشر 12 - بقلم وردة في البستان

سيد بيعيط: اهدي يابنتي.. هتدخلي فين؟ البيت كله مولع. قمر بتصرخ وبتعيط: محدش ليه دعوة، سبوني أنا هلحقها. وبتحاول تبعد الناس عنها. عربي بيبص لبعيد: الحقي ياست قمر، تونة راكبة العجلة ورا عم شكشك. الناس كلها بتبص: فينها؟ فينها؟ عربي: أهي جاية. قمر قامت تجري عليها، حضنتها وبتعيط: انتي كويسة؟ انتي مكنتيش جوا. ألف حمد وشكر ليك يارب. ألف حمد وشكر ليك يارب. سيد: حمدالله ع سلامتك ياحبيبتي. تونة بتعيط: بيتنا بيولع ليه كدا؟

مين ولعوا ياعم سيد؟ سيد: والله يابنتي ما أعرف، أنا كنت بتغدى. مشوفتش حاجة. "قمر حاضنة تونة ومش بتتكلم." ليل جايه تجري عليهم: إيه اللي حصل يا قمر؟ إزاي حصل كدا للبيت؟ قمر خدت تونة وليل ومشت بيهم بعيد عن البيت وقعدوا ع رصيف ف الحارة. والمطافي جت تطفي. *** وليد: ماترد عليها يابني بدل ماهي عمالة تتصل كدا. آسر: مش رادد عليها. وليد: يمكن عاوزك ف حاجة مهمة. آسر: بزمتك صافي بتقول حاجة مهمة ف حياتها؟

وليد: بصراحة لا، بس رد بردك. آسر: لا يعني لا. أهي قفلت خلاص. وليد بيبص ف موبايله: قفلت عندك وبترن عليا. أنا هرد عليها. آسر: براحتك. وليد: إيه ياصافي؟ في حاجة؟ صافي بعصبية: مبتردش ع مكالمتي ليه يازفت انت وفين آسر؟ وليد: انتي لسه متصلة دلوقتي. صافي: اااء متتوهش ع الموضوع. فين آسر؟ عاوزة اكلمه. وليد بص لآسر: عاوزة تكلمي آسر. آسر شاورله يقولها نايم. وليد: آسر نايم. كان سهران، انتي عارفة. صافي: صحيه يكلمني. وليد: اصحيه.

آسر بصله بغضب. وليد: لا مش هينفع. بصي أنا لما يصحا هخليه يكلمك. ماشي؟ يلا سلام يا صافي. آسر: إنسانة معندهاش دم. وليد: بتحبك يا آسر وانت عارف كدا كويس. آسر: هي عارفة إننا صحاب وبس. لو ف بالها حاجة تانية دي متخصنيش. واقفل السيرة دي. أنا مش ناقصها، كفاية أبويا. ولا أروح أقعد ف أوتيل أحسن. وليد: لا ياصاحبي خليك. مش هتكلم عنها خلاص. آسر: أحسن بردك. وليد: مقولتليش بقا عملت إيه مع ليل؟ علشان تعتذرلها.

آسر: موقف كدا هبقى أحكيلك عنه بعدين. بس أنا هنام دلوقتي عشان زي ماقولتلها، أنا سهران ومنمتش. يلا تصبح ع خير. وليد: وانت من اهله. *** ليل: هنعمل إيه دلوقتي ياقمر؟ هنروح فين؟ قمر: مش اتبطرتي ع البيت؟ الصبح اهو راح. ارتاحي بقا. ليل: يووه ياقمر عليكي. خلينا ف... المهم هنعمل إيه؟ قمر: العمل عمل ربنا بقا. ليل: طب عاوزة أفهم دا حصل إزاي؟ وانتي كنتي فين؟

ولما انتي بتقولي للظابط إنك كنتي قافلة الأنبوبة قبل ما تمشي والموضوع مجاش من عربية الكبدة. أومال مين عمل كدا بس؟ جعفر: لا اله الا الله. إيه اللي حصل دا؟ مين عمل كدا بس؟ قلبي عندك ياست قمر. قمر: ياريتك جبت سيرة حاجة عدلة. وقامت وقفت قصاد جعفر. قمر: عاوز إيه يامعلم؟ مش عملت اللي ف دماغك؟ إيه جابك؟ جعفر: جاي أواسيكي. ونشوفك لو عاوزة حاجة كدا ولا كدا. أنا ف الخدمة.

قمر: طيب أوي انت يامعلم جعفر. *وعلت صوتها أكتر* لا وابن أصول كمان. "الناس واقفة تتفرج." وجاي تشوفني محتاجة حاجة؟ طبعاً بعد ما ولعتلي ف بيتي. هحتاج بيت أقعد فيه أنا وأخواتي. أقوم إيه بقا؟ أجيلك راكعة وأترجاك. وأقولك يامعلم اتجوزني وأنتشلني أنا وأخواتي من الشارع. مش هوووو دا اللي كنت بتفكر فيه يامعلم. *عليت صوتها أكتر* ماتررررردد. جعفر بارتباك: إيه اللي بتقوليه دا ياقمر؟ معقولة أنا أجي ع بنت حتتي؟ للدرجادي شايفني وحش؟

قمر: وحش؟ لا سمح الله. دانت سووو. شوقي: ماتحسبي ع كلامك ياست انتي. فوقي وانتي بتكلمي المعلم جعفر. قمر: اخرس انت خالص. بدل ما أنزل الشبشب ع قفاك وأخلي اللي مايشتري يتفرج عليك. شوقي بعصبية: انتي اتجننتي يابت انتي. سيد: عيب ياشوقي اللي انت بتعمله دا مع واحدة ست. عيب اختشي. شوقي: اقعد ياراجل انت ع جنب أحسنلك. جاي يزق سيد. قمر وقفت قصاده زقت إيده: عاوز تمد إيدك ع راجل قد أبوك يانطع؟ ياعديم الرجولة.

شوقي: وأمد إيدي عليكي انتي كمان. قمر بعصبية وداخلة تضربه. وليل وسيد مسكوها: تمد إيدك ع مين يللا؟ دانت أرخص من الشبشب اللي هديك بيه ع دماغك.