رواية هلاك العشق الفصل الثالث 3 - بقلم الاء محمد

قاعده ف الكافيه متوترة .. قلقانه .. لأول مرة هتقول لزياد عن أكبر سر ف حياتها .. لأول مرة هتدخله نفق كبير وفويط ف ذكرياتها .. هي نفسها قعدت سنتين عشان تخرج منه .. شوية وكان داخل عليها بحماس .. زياد قعد قدامها ومسك ايدها / كنت متأكد إنك هتسمعيني .. هاجر شدت ايدها وقالت / أنا مش جايباك عشان اللي في دماغك يا زياد .. أنا جايباك عشان حاجة تانية خالص .. زياد اتضايق / طيب قولي فيه إيه ..

هاجر / هقولك بس بعدها لو فكرت تحاول معايا تاني لازم تعرف إن هيبقي ليا شرطين مهمين أوي .. أنا كل الناس عارفة إن أبويا مات من زمان بس لا مماتش .. زياد / مماتش إزاي يعني .. ده بابا قالي إنه حضر العزا .. هاجر / ما فعلاً ماما عملت عزا عشان هو بالنسبالها مات بس هو في الحقيقة عايش .. فلاااش .. أمال / يعني إيه يا سعيد هتطلقني .. بعد كل اللي استحملته معاك .. ليه كده يا أخويا .. طيب أنا مستعدة أنزل أشتغل وأساعدك ..

سعيد بهمجية / بقولك مبقتش عايزك ولا طايقك .. انتي إيه غبية مبتفهميش .. أنا بحب واحدة تانية غنية وبنت ناس وهتعيشني كويس بدل عيشتك الفقر دي .. أمال / طيب أنا معنديش مشكلة أفضل على ذمتك وأنت اعمل اللي يعجبك بس البنت تتربي مع أبوها واللي في بطني كمان .. سعيد / البنت مش عايزها حطيها قدام ملجأ واللي في بطنك حالا يموت .. سعيد مسك أمال وفضل يضرب فيها لحد ما نزفت ..

كانت هاجر شايفة كل ده وفضلت تصرخ وتعيط وحاولت تدافع عن أمها بس سعيد مسكها وضربها هي كمان لحد ما فقدت الوعي .. صحت لقيت نفسها في المستشفى .. هاجر بخوف / هي فين ماما .. الممرضة / اهدي يا حبيبتي متخافيش ماما كويسة هي بس نايمة .. شوية وتصحي .. هاجر / طيب أنا عايزة أروح عندها .. بااااك ..

هاجر مسحت دموعها / وروحت لماما .. شفتها وهي تعبانة وملامحها بهتانة وايدها سقعه .. تعرفي إن لحد دلوقتي شكلها مش راضي يروح من بالي .. وللأسف أخويا مات بسبب أبويا .. زياد كان مصدوم من اللي هاجر بتحكيه .. مكنش يعرف إنها عاشت الوجع ده .. ولا كان متخيل إن فيه راجل ممكن يعمل كده في مراته وبنته ..

هاجر بصتله ولمحت الصدمة في عينيه قالت بسخرية / مالك مصدوم كده ليه .. إيه مستغرب إن فيه حد ممكن يعمل كده في مراته .. أنت عملت أكتر من كده فيا يا زياد وأنا للأسف افتكرت إني ممكن أغيرك ومأساة أمي متتكررش تاني .. زياد / وأبوكي فين ..

هاجر بحسرة / معرفش والله هو فين دلوقتي بالظبط .. ممكن يكون في دبي أو في أمريكا أو في فرنسا أو في الأقصر بيتفسح مع مراته وبنته .. تعرفي لما نجحت في الثانوية العامة وجبت مجموع حلو رحتله كنت عايزة أفرحه بيا وأقوله إني أستاهل أتحب بس ملقيتوش أو هو بمعني أصح رفض يقابلني .. زياد / وليه مقولتيش كده من زمان .. هاجر زعقت / عشان مشوفش النظرة اللي في عينيك دي .. أوعي أوعي يا زياد تبصلي بشفقة تاني ..

زياد اتوتر / أنا والله مقصدش كده صدقيني أنا مش شفقان عليكي أنا مستغرب إن فيه حد ممكن يعمل في بنته كده أنا آسف يا هاجر .. هاجر / أنت دلوقتي عرفت كل حاجة وعرفت أنا رافضالك ليه ..

زياد / أيوه عرفت بس صدقيني يا هاجر أنا عمري في حياتي ما هعمل فيكي كده .. جايز غلطت بس أنا مش وحش أوي كده .. تفتكري أنا إيه اللي يخليني أقعد سنتين لوحدي .. إيه اللي يخليني أعيش الوقت ده كله على حبك .. صدقيني يا هاجر أنا اتغيرت مانكرش إني آخر مرة كنت فعلاً أناني .. هاجر / أنت متأكد من كلامك ده ..

زياد / أيوه والله .. تعرفي حاولت كتير أثبت إني مش بحبك أو أرتبط بواحدة بعدك بس مقدرتش لقيت نفسي تلقائي بقارنها بيكي .. طريقة كلامك هزارك ضحكتك حتى طبخك .. مكملتش أسبوع معاها .. مقدرتش مقدرتش أتخيل نفسي مع غيرك .. اطلبي أي ضمانات وأنا والله هقدمهالك .. هاجر / يعني أي حاجة هطلبها منك هتوافق .. زياد بثقة / جربي كده .. هاجر / اكتبيلي نصيبك في مصنع باباك باسمي والعربية بتاعتك كمان تكون باسمي ..

زياد قال بسرعة من غير تفكير / أنا موافق وأوعدك والله إني هعمل كل اللي أقدر عليه عشان تكوني مبسوطة .. هاجر ابتسمت أوي ولسه هتتكلم تليفونها رن وكانت مامتها .. هاجر / أيوه يا ماما .. فيه إيه براحة عشان أفهمك .. طيب طيب جاية .. هاجر قفلت التليفون وزياد بص لها / فيه إيه يا حبيبتي .. هاجر بصدمة / ماما كلمتني وقالتلي إن بابا طالب يشوفني .. وباعت حد من عنده لماما البيت عشان ياخدني أشوفه .. زياد / هتروحي ..

هاجر بقوة / لا مش هروح .. مش عايزة أشوفه .. ومش عايزاه يعرف طريقي .. أنا عايزة أختفي ومحدش يوصلي .. زياد / متأكدة .. يمكن فيه حاجة أو تعبان .. هاجر / تعبان ! يعني حتى يوم ما يفتكرني يبقى عشان تعبان .. صحيح راجل أناني مش بيفكر غير ف نفسه .. زياد قال بلطف / خلاص براحتك يا حبيبتي .. طالما مش عايزة مش هضغط عليكي .. هاا قوليلي فرحنا هيكون إمتى بقى .. هاجر / فرح !! ونعمل فرح ليه !

زياد / فرح وشبكة وفستان وشهر عسل في أحسن مكان في الدنيا .. كل ده ولا حاجة قدام إنك تكوني معايا يا هاجر .. هاجر اتكسفت واتوترت / طيب طيب .. نقول لماما وعمو حسين ونشوف .. زياد ضحك أوي وفضلوا يتكلموا ويهزروا .. كانوا حاسين إنهم مبسوطين ونفسهم يوقفوا الزمن عند اللحظة دي .. شوية وقاموا مشيوا .. وزياد وصلها بالعربية ..

زياد مسك ايدها وباسها / هاجي بكرة أنا وبابا عشان نتقدم من جديد لـ طنط .. وهجيب معايا حد أتمنى تتقبلي وجوده .. هاجر / ماشي وأنا هعملك غدا نفسك تاكل إيه .. زياد ابتسم / مرة كنتي عملتي ورق عنب وبطاطس كده محشية لحمة مفرومة .. عارفة أنا جربت أكل الأكلة دي من كذا مكان بس محبيتهاش زي ما حبيتها من إيدك .. هاجر ضحكت وقالت / ماشي يا سيدي هعملك الأكلة دي .. زياد / وانتي بتحبي تورته الآيس كريم هاجيبلك منها وأنا جاي ..

هاجر نزلت وطلعت البيت .. فضلت تخبط على الباب وهي مبسوطة وحاسة إنها أخيراً هتقدر تكمل مع زياد .. مامتها فتحت الباب .. هاجر دخلت وهي بتضحك وشدت مامتها معاها .. أمال باستغراب / شكلك مبسوطة .. هاجر / أوي أوي يا ماما .. أنا قولت لـ زياد على كل حاجة .. وشرطت عليه لو عايز نرجع يكتبلي المصنع وهو وافق .. شكله فعلاً بيحبني زي ما بحبه .. وهنرجع .. أمال بحزن / طيب كويس ألف مبروك يا بنتي .. أنا فرحانة ليكوا أوي ..

هاجر / مالك يا ماما بتقولي إنك مبسوطة بس شكلك مش مبسوطة خالص .. أمال / أبوكي يا بنتي واضح إن عنده مشكلة كبيرة عشان كده كان طالبك .. هاجر / سيبك منه يا ماما خليه في فلوس ومراته وبنته ملوش دعوة بينا أنا خلاص اتعودت على عدم وجوده ومبقتش محتاجاه .. المهم زياد هيجي بكرة هو وبابا عشان يتقدموا ليا تاني .. أمال / يالهوي بكرة بكرة .. قومي طيب بسرعة لازم نمسح الشقة ونشوف هنعمل أكل إيه ..

هاجر باستغراب / يا ماما ما إحنا لسه منظفين الأسبوع اللي فات .. أمال قامت وشدت هاجر / اسمعي الكلام يا بت .. يلا خلينا نشوف هنعمل إيه .. هاجر وأمها فضلوا ينضفوا ويظبطوا البيت اللي كان متظبط أصلاً بس طقوس الأم المصرية محدش يقدر مينفذهاش إلا وهنتضرب بـ أبو وردة .. هاجر / آآآه يا رجلي .. أنا تعبت أوي .. أمال كانت باصة للسجادة ومركزة / لا لا .. بت يا هاجر السجادة دي مش مظبوطة قومي يلا معايا نظبطها ..

هاجر / والله مش هتحرك تاني أبداً .. أنا خلاص فركش .. أمال مسكت الشبشب / هتقومي ولا .. هاجر بسرعة / ياااه دا أنا كنت بضحك معاكي .. قايمة أهو .. شوية وزياد رن على هاجر .. زياد / بتعملي إيه .. هاجر بتعب / كنت بنضف أنا وماما عشان سيادتك جاي .. زياد ضحك / ما أنا مش أي حد برضه .. هاجر / خف علينا يا عم .. انزل معانا على الأرض شوية .. زياد / حقي أغتر .. حبيبتي يومين بالكتير وتبقي في بيتي .. وأقدر آخدها في حضني براحتي ..

هاجر بكسوف / زياد اتلم بقى .. وبعدين يومين إيه ده مش أقل من ٦ شهور يا أستاذ .. زياد / نعم يا أختي .. وأنتي فاكرة إن أنا هستنى ٦ شهور كمان .. لا يا حبيبتي انتي على آخر الأسبوع بالكتير هتكوني مراتي غصب عنك .. هاجر / زياد متهزرش مش هلحق أجهز حاجة أنا .. زياد / وأنا مش عايزك تجهزي حاجة .. كل حاجة جاهزة أصلاً ..

فضلوا يتكلموا .. شوية يتخانقوا وشوية ويهزروا لحد ما ناموا .. وتاني يوم هاجر كانت واقفة قدام المرايا بتبص على نفسها كانت لابسة فستان أزرق ومسيبة شعرها وحاطة ميكب رقيق .. كانت مستغربة إزاي هترجع تاني لـ زياد بعد كل اللي حصل .. مين كان يصدق إن من ٣ سنين بس حياتها كانت مختلفة ١٨٠ درجة .. واضح إن الحياة هتفضل تفاجئها كتير .. شوية وجه وزياد وأبوه .. مامتها استقبلتهم وشوية وهاجر خرجت واتصدمت من اللي شافته ..