رواية حلوة زماني الفصل الأول 1 - بقلم زهره عصام

الأستاذة اللي نايمة ورا، اقفيلي يا حلوة زمانك. قبل كدا بعشر دقائق. يا بنتي قومي بقي. -في إيه؟ ما المحاضرة لسه مخلصتش. إيه بتزني على دماغ أمي ليه؟ إنتي جاية من البيت تحضري المحاضرة وإلا تنامي. رجعت تنام تاني وهي بتقول: -جاية أنام. معلش مش مرتاحة على سراير بيتنا. قولت أجي أنام هنا. وأهو الديسك مريح وصوت الدكتور يجيبلك صداع فيخليكي تنامي أكتر. بالمايك اللي كل شوية يطلع صوت مخليني مش عارفة أركز. -تركزي في إيه يا شذي؟

ده إنتي من وقت ما جيتي وإنتي نايمة. شذي: -أركز في النوم. سبيني بقي عشان في حلم هموت وأكلمه. ركزي مع الدكتور. ركزي يمكن واحدة فينا تفلح. واكتبي وراه كل حاجة. متسبيش حرف يا جني. اتاوبت ورجعت تنام تاني. شذي نامت بعمق وبقت تحلم. يااه، أخيراً المحاضرة خلصت. ده أنا مش قادرة أقف من الصداع. هروح أجيب قهوة. أجيب لك معايا؟ مستنتش ترد عليها وقالت: -هجبلك معايا. خرجت جري ونزلت السلم بسرعة على الكافتيريا.

لقت زحمة والطلاب واقفين بالدور. فقالت في نفسها: -لا ما أنا مش هستنى الدور ده كله. كنت كملت نوم في المدرج وخلص. شمرت أديها وقالت: -استعنا على الشقا بالله. دخلت وسط البنات وقالت: -طلاق تلاتة ما أنا خارجة غير والقهوة في إيدي. ليا أنا والبت جني. أينعم أنا اللي هشربهم الاتنين وأدفعها حق واحدة بس مش مشكلة. هي بلطجة. أخيراً عرفت تعدي من وسطهم ووصلت قدام الكافية وقالت: -صباح الخير يا عم صالح. صالح: -صباح الخير يا أستاذة شذي.

شذي: -مالك يا عم صالح؟ أنا حاسة إن فيك حاجة. وشك مخطوف كدا عن امبارح. محتاج فلوس؟ قول وأنا هتصرف. إنت عارف إني مفلسة أصلاً. صالح ضحك وقال: -تسلمي يا ست البنات. طلب كل يوم مش كدا؟ شذي سندت على المكتب اللي قدامها ولا كان في ناس وراها وبتتكلم بهدوء وبرود أعصاب وقالت: -أيوه يا عم بس حياة عيالك بسرعة. لحسن جني هتفجر. أخدت القهوة وخرجت من وسطهم وهي بتقول بصوت عالي:

-أقسم بالله لو واحدة فيكم قلت ووقعت القهوة ما أنا سيباها غير وهي جايبة غيرها. وقد زعتر من بعتر. خرجت من وسطهم وهي باصة في القهوة وبتقول: -يا لكي من قهوة لذيذة. سألتهمك بتلذذ. مكملتش كلامها وخبطت في حد. بصتله وقالت بابتسامة سمجة: -منور يا دكتور. والله أنا آسفة طبعاً على القميص اللي اتبهدل. بس دلق القهوة خير يخويا. وكملت جوها: -مهو إنت اللي عامل زي عفريت العلبة. بتطلع من كل حتة. فاقت على خبط جني

على رجليها وهي بتقول بهمس: -قومي الله يخربيتك. الدكتور واقف. فتحت وقالت بهلوسة: -قوليله هحاسبك على القهوة اللي وقعها دي. بصوا للدكتور وضحكت وقالت: -هتدفع صح؟ الدكتور سابها ورجع مكانه. وشذي نامت تاني. بس اتفزعت على صوته وهو بيقول: -الأستاذة اللي نايمة ورا. اقفيلي يا حلوة زمانك. وريني طولك كدا.