رواية همس المالك الفصل الثاني 2 - بقلم رؤى عمر

طلعت واتصدمت من اللي شوفته. لقيت دكتور نادر قاعد ومبتسم لشخص قاعد جمبه وواضح إن الشخص ده الفرحة مش سيعاه. استغربت وسلمت عليهم وقعدت بكسوف. بصلي الشخص ده فبصيتله. اتصدمت لما لقيته هو نفس الشخص اللي باعتلي ماسدج. بصيتله بصدمة. لقيته ضحك كأنه عرف أنا بفكر في إيه. في الآخر اتكلم دكتور نادر: _أنا يسعدني ويشرفني إني أطلب إيد بنت حضرتك يا عمي لأخويا مالك. بصيتله بصدمة واستغراب وقولت في نفسي: غريبة! هو مش كان اسمه حازم؟

أيوه كان حاطط صورته على الأكونت ومكتوب حازم! مش مالك! فوقت من سرحاني على صوت بابا وهو بيسألني: _ها يا بنتي إيه رأيك؟ باشمهندس حازم ابن ناس ومحترم والكل بيشهد بأخلاقه وما شاء الله مهندس كبير. بصيتلهم باستغراب من الاسم واتكلمت بإحراج: _والله يا بابا أنا محتاجة أفكر لأني معرفوش. اتكلم دكتور نادر: _طيب يا عمي نسيبهم يتعرفوا على بعض براحتهم. _طبعاً يا ابني اتفضل. ومشوا كلهم ومابقاش في غيري أنا وحازم أو مالك!

وطبعاً فضلت باصة للسجادة ومتكلمتش. _لو عجباكي السجادة أنا ممكن أجيب واحدة لينا في الشقة عادي على فكرة! _هه قديمة. اتكلم باستغراب: _إزاي؟ _يعني حضرتك سارقها من رواية! متفكرش نفسك روش يا عم الروش هه. _إيه ده.. انتي بتقري روايات؟ _طبعاً يا ابني انت عبيط دي الروايات دي روحي فيه. حطيت إيدي على بوقي من التصرف الغبي بتاعي. ضحك وقال: _واضح إنك متسرعة في الكلام وبتتكلمي بعفوية كتير. ضحكت بإحراج: _آسفة مكنتش أقصد. بصلي بحب:

_متتأسفيش انتي عفويتك أحلى حاجة فيكي بجد! اتكسفت: _شكراً! اتكلم بملل: _شكراً؟ هه عفوا!؟ بصتله ببراءة اللي هو أي عملت إيه؟؟ _طيب أنا مالك عندي 25 سنة خريج هندسة وانتي؟ _أنا همس 22 سنة بدرس فنون جميلة. _امم كويس جدا. دخل دكتور نادر هو وبابا. اتكلم بابا: _ها يا ولاد إيه الأخبار؟ رد حازم بسرعة: _كل خير وإنسة همس موافقة الحمد لله. بصلي بابا باستغراب: _تمام.. يبقى نقرا الفاتحة. ارتبكت وقولت: _بس ي بابا أنا مش موافقة..

رد حازم بسرعة: _بعدين يا همس هجبلك اللي نفسك فيه ها نقرا الفاتحة يا عمي! قرأوا الفاتحة باستعجال وأنا كل ده فاتحة بوقي من الصدمة وبقول في نفسي: بس أنا مش موافقة إيه ده!!! خلصوا الفاتحة وبصلي حازم وغمزلي. اتكسفت وبصيت في الأرض. ضحك حازم واستأذنوا هو ودكتور نادر ومشوا. _شكله عجبك؟ ارتبكت وقولت بسرعة: _لا لا مش عاجبني خالص.. بس قولت أدي لنفسي وليه فرصة؟ اتنهدت ماما بارتياح:

_ربنا يجعلكوا من نصيب بعض يا بنتي. متعرفيش باشمهندس حازم ده محترم قد إيه، ربنا يعلم أنا قد إيه ارتحتله، ربنا يوفقك يا حبيبتي. بابا: _يا رب يا بنتي يريح قلبك وتريحي قلبنا نفسي أشيل أولادك قبل ما أموت. _أولاد! أولاد إيه يا بابا دلوقتي..!!! بعد الشر عليك. قومت بعصبية ودخلت أوضتي. قفلت الباب. منا مش هنسى تعامل ماما معايا وقد إيه هما كانوا بيغصبوني على الجواز حرفياً!

مش هنسى ده لسا زعلانة إنهم مهتموش لرأيي ولا لكسرة قلبي وكانوا عايزين يجوزوني بالغصب. وكمان بيقولوا أولاد!! أولاد إيه اللي بيفكروا فيهم! صحيت الصبح غسلت وشي ولبست جيبة سودة تيشيرت قصير شوية وعليه جاكت جينز والكوتشي وخرجت. نزلت لقيتهم قاعدين بيفطروا. بصتلهم ببرود وأخدت مفاتيحي والفون من غير كلام وخرجت برا.

ركبت عربيتي وروحت الجامعة ودخلت قعدت في المحاضرة ومسكت الفون أقلب في بروفايل باشمهندس حازم أو مالك اللي اقتحم حياتي فجأة كده. معرفش إيه اللي خلاني أبعت أدد وقفلت الفون. خلصت محاضرة دكتور نادر واستدعاني على مكتبه. _هو كل يوم يستدعيِك هو هيتقدم بجد ولا إيه؟ و ضحكت. _لا يا ظريفة اتقدملي شخص هو كان معاه مش عارفة بقا يقربله إيه واتقرت فاتحتي كمان. هحكيلك لما أخرج باي. تك تك. _ادخل. _هاي دكتور نادر، حضرتك استدعتني تاني لي؟

_معقول معندكيش أي فضول تعرفي حاجة عن اللي حصلت امبارح؟ ببرود: _لا، أنا اتقرت فاتحتي على شخص لو ارتحنا مع بعض هنكمل أما لو مرتحناش هنبعد. خير بقا؟ ضحك بسخرية: _لا والله؟ يعني مش عايزة تعرفي أنا أقربله إيه حتى..؟ رديت بفضول: _هو انت تقربله إيه؟ رد ببراءة: _أخوه. رديت بذهول: _ده بجد؟ طب هو اسمه إيه عشان بجد توهت امبارح بابا يقول مالك وماما تقول حازم ومبقتش فاهمة أي حاجة خالص. ضحك بخفة:

_هو اسمه مالك.. بس الدلع بتاعه حازم.. اللي عايز يقوله مالك أوك واللي عايز حازم أوك برضو. _امممم، فهمت. _يلا روحي بقا عشان المحاضرة بتاعتك هتبدأ. خلصت محاضراتي وروحت البيت. طلعت غيرت هدومي ولبست بيجامة وقعدت. مسكت الفون. لقيت مالك قبل الأد هيي، إيه ده أنا ليه فرحانة كده؟ لقيته باعتلي رسالة. اتصدمت من وقاحة كلامه!!! لقيته بيقول: