رواية هو عوضي الجميل الفصل الخامس 5 - بقلم بسمله ابراهيم

شعبان بعياط: سامحيني يا بنتي، سامحيني. أنا ظلمتك وظلمت أطيب ست في الدنيا. أنا عارف إن مفيش أي سبب على اللي عملته. أنا آسف يا حبيبتي، ربنا أخد لك حقك مني. أنا آسف إني ما كنتش الأب اللي نفسك فيه. أنا مش جاي أجبرك على حاجة ولا عايز حاجة غير إنك تسامحيني. أبوس إيدك يا بنتي، سامحيني. كان ماسك إيدها عشان يبوسها. ندي سحبت إيدها بسرعة وهي بتعيط: أسامحك؟ أنت عارف أنا تعبت قد إيه!

أنت آذيتني أوي يا حاج شعبان. تعرف الحاجة الحلوة الوحيدة اللي عملتها إنك جوزتني نوح. عمره ما كان قاسي عليا، كان أحن عليا منك صدقني. وقف معايا ومع أمي اللي ما فكرتش وأنت بتطلقها فيها. طيب إيه الفرق بيني وبين نور عشان تحبها وأنا لأ؟ ليه يا أستاذ شعبان؟ شعبان بدموع: يا بنتي أنا مش عارف أقولك إيه. أنا فعلاً ما أستاهلش بنت زيك وست طيبة زى أمك. أنا آسف يا بنتي. وقام يمشي. ندي: هتسبني تاني ليه؟ ما وحشتكش؟

شعبان جري على ندي حضنها: وحشتيني أوي يا بنتي، أوي يا حبيبتي. ندي: أوعدني إنك تعوضني وتحبني زي نور. شعبان خدها في حضنه: وأكتر يا حبيبتي. كل ده ونوح واقف في صمت، فرحان إن أخيرًا ندي اتصالحَت مع أبوها. مهما كان الخلاف ده اللي لازم يحصل. نوح: إيه يا عمي، مش عايز تشوف أحفادك؟ شعبان بفرح: أحفادي؟ إسمهم إيه؟ نوح: يعقوب وعيسي وسارة وسما. شعبان: ما شاء الله. أنا عايز أشوفهم وأمشي على طول.

ندي: مش هتمشي تاني. أنا صدقت لما جيت، مش هتروح في مكان. شعبان ابتسم: أنا إزاي كنت أعمى كده؟ إزاي ماشوفتش قلبك الأبيض ده؟ أنتِ أحسن بنت في الدنيا. راح نوح وندي وشعبان الفيلا. أول ما دخلوا، عيسي راح عليهم هو وسما. عيسي: مين ده يا بابا؟ نوح: ده جدو يا حبيبي. سما: جدو؟ يعني زي جدو منصوي (منصور) نوح: أيوه، زي جدو منصور أبويا. ندي: ده أبويا أنا يا حبايبي. عيسي: إزيك يا جدو؟ شعبان حضن عيسي وسما.

شعبان: الحمد لله يا حبايب جدو. ندي: فين سارة ويعقوب؟ سما: سايه (سارة) فوق يا ماما في المطبخ. عيسي: ويعقوب في المطبخ كمان. يعقوب: جاي ومعاه آيس كريم مانجا. ندي: تعالي هنا يا يعقوب، سلم على جدو أبويا. يعقوب: إزيك يا جدو. شعبان: ما شاء الله، ده شبه أخوه أوي. وحضن يعقوب. نوح: عشان توأم يا عمي. سارة: جاية زعلانة يا بابا، يعقوب أكل آيس كريم المانجا كله. نوح: معلش يا روح بابا، هجيب تاني. بس تعالي سلمي على جدو أبو ماما.

شعبان: ما شاء الله، توأم بردو. عاملة زي أمك، بتحبي آيس كريم المانجا؟ ندي: أنت عارف. شعبان: أه. وجات سهير. شعبان: إزيك يا أم ندي. سهير: الحمد لله يا أبو ندي. شعبان: ممكن تسامحيني على أي مرة زعلتك فيها؟ سهير: من غير ما تقول، أنا مسامحاك من غير ما تقول ومن زمان. شعبان: طول عمرك قلبك أبيض يا ست الستات. فضل يلعب مع الأولاد. ندي: خلاص يا أولاد، جدو تعب. اتفضل يا بابا، ادخل الأوضة، خد دش وارتاح شوية.

شعبان فعلاً كان تعبان وراح مع ندي الأوضة. أخد دش ونام مرتاح. بعد أربع ساعات. ندي: بابا، يلا العشاء جاهز يا حاج شعبان. يلا اصحي يا بابا. مفيش رد. قربت منه تشوف النفس، بس مكنش في نفس. ندي بعياط: نوح، الحقني! نوح جه بسرعة: في إيه يا ندي؟ ندي بعياط: بابا مش بيصحي. نوح قرب منه، لقي النفس مقطوع. نوح: إنا لله وإنا إليه راجعون. ندي بصدمة: مات؟ سابني تاني؟ أنا صدقت لما رجع، ده وعدني هيعوضني ويحبني. مشي إزاي؟ وصرخت: لااااااا!

أكيد لااااااا! قوم يا بابا! أنا مصدقت رجعت. نوح قرب منها وأخدها في حضنه. نوح: اهدى، هو راح مكان أحسن. اهدى يا حبيبتي. سهير جات بسرعة على الصوت: فيه إيه؟ شعبان ماله؟ ندي: سابني تاني، سابني تاني. تمت إجراءات الدفن. زعلت أوي إنه سابني ومشي، بس كنت هزعل أكتر لو كان مشي وأنا وهو كان لسه فيه خلاف بينا. نوح كان معايا في كل وقت، وبسببه قدرت أتخطى كل حاجة. بعد ٢٣ سنة. ليلي: تيتا، تيتا! ندي: عيون تيتا.

ليلي: يلا هنتاخر على فرح عمتو. ندي: حاضر يا عيون تيتا. فين بابا؟ يعقوب: أنا أهو يا ست الكل. إيه القمر ده؟ كان عندك عشرين سنة. نوح جه جرى: إيه يا واد إنت! أنا بس اللي أتغزل بحبيبتي. عيسي: أيوه يا حاج، يا عسل. طبعًا ما أنت معاك حلويات. نوح: أحلى من الحلويات. ندي ابتسمت بحب على نوح. عيسي: العب يا حاج، ضحكت يعني قلبها مال. ندي: اتلم يا واد. فين مراتك ومراد حفيدي؟ مراد: أنا جيت يا تيتا. ندي: حبيبة تيتا، وحشتني.

مراد: وأنتي كمان يا تيتا. نوح: وجدو ملوش حضن؟ وحضن مراد. وبعد ساعتين، كانت ندي واقفة في القاعة مع نوح. بتبص على يعقوب وهو بيرقص مع مراته، وعلى عيسي مع مراته، وسارة اللي اتجوزت من سنة، وعلى العروسة الشقية بتاعت البيت اللي ماشية مع جوزها. بصت على عيلتها الحلوة، وبعدين بصت على نوح بحب. اللي أخدها وراح يرقص معاها. وأول ما بدأ يرقص، الكل قعد يسقف ليهم. نوح: هتبقي بتاعتي أنا وبس. ضحك. ندي: أنا بحبك أوي يا عوضي الجميل.

نوح أخدها في حضنه وشالها ولف بيها قدام تصفيق من الجميع، ونظرة الفخر من أولادهم.