رواية حور وتامر الفصل الثالث 3 - بقلم جاسمين

ابتسمت ابتسامة صفراء وهي تقول: -منور يا دكتور. اتفضل. "على" -نعم يا أسطا. نظرت لتامر وقالت: -وصي على كوبايتين شاي وابعتهم على الشارع لحد ما أشوف عربية الدكتور. رد واحد من اللي شغالين: -أجي معاك يا معلم. حور: -هات الشنطة وتعالى ورايا. مشيت حور مع تامر والصبّي معاه شايل الشنطة لحد ما وقفت عند عربية تامر وقالت: -حصلها إيه قبل ما تركن الركنة دي؟ تامر باستغراب: -كنت ماشي ولقيتها بتفوت. حور: -تمام. هات العدة يا ابني.

مسكت حور العدة وبدأت تصلح في العربية وسط استغراب تامر. بصت للصبّي وقالت: -روح هات لي... من الورشة يا ابني. راح الولد الورشة وفضلت واقفة حور مع تامر. مسكت كوباية الشاي بتاعتها وهي بتقول لتامر بتريقة: -اتفضل يا دكتور. متخفش الشاي بتاعنا نضيف وبنغسل الكوباية كويس. مسك منها الكوباية وهي بدأت تشرب في الشاي بتاعه. تامر باستغراب: -مدخلتيش هندسة ليه وإنتي بتفهمي في العربيات؟ فضلت حور باصة قدامها وقالت وهي بتشرب من الشاي:

-أنا بحب أتعلم اللغات. شغلتي دي حرفة ورثتها من أبويا الله يرحمه. أنا دخلت السن بمزاجي واشتغلت شغلانة أبويا عشان متحوجش لحد. تامر بص لها وقال: -برافو. بس لما تتخرجي هتكملي في الشغلانة دي؟ رفع حاجبه وقال: -معتقدش إنك لو بقيتي معيدة أو دكتورة في الجامعة أو حتى اشتغلتي في شركة محترمة هينفع تكملي في الشغلانة دي. ضحكت باستهزاء من كلامه وقالت:

-الشغل مش عيب وحتى لو بقيت دكتورة في الجامعة أو شغالة في شركة هكمل، لأن أنا مش بستعر من شغلانة فلوسها حلال. الواحد لو نسي أصله الناس هتنسى هو مين. أنا أبويا لما كان عايش الله يرحمه كان بيصرف عليا من الشغلانة دي وكنت بمشي بثقة وأقول أنا أبويا شغال كذا. الشغل مش عيب ولا حاجة الواحد يستعر منها مادام بالحلال. فضل واقف بيفكر في كلامها اللي باين إنه منطقي جداً.

الصبّي جاب اللي هي طلبته. صلحت العربية وأخدت المفتاح ودخلت تجربها واشتغلت. نزلت من العربية وهي بتقول: -عربيتك سليمة يا دكتور. اتفضل. تامر: -كام؟ الصبّي كان هيرد لكن حور بصت له إنه يسكت وبصت لتامر باستهزاء وقالت: -عيب يا دكتور. من غير فلوس. يلا يا فتحي هات العدة وتعالى ورايا. تامر مسك إيدها قبل ما تمشي وقال: -متعودتش أصلح حاجة من حاجاتي من غير مقابل. بصت لإيده فسابها. قربت منه وقالت في ودنه بهمس:

-اعتبر المقابل إنك متحاولش بعد كده تقل مني قدام حد يا دكتور. تمام. وسابته ومشيت قبل ما يتكلم. وصلت الورشة وبدأت تشتغل تاني. لحد الساعة ما جت ٦ بليل ومشيت.

الصبح كان فيه محاضرات حضرتها هي وكارما ومكنش عليهم النهارده دكتور تامر. وهي خارجة شافت الولدين اللي أخدوا رفد شهر وداخلين وكل واحد معاه أبوه. بصوا عليها بغضب وسمعت همسات مش مفهومة بين الأب وابنه وطلعوا للعميد. مهتمتش وراحت لكارما وروحوا. كارما طلعت ارتاحت وحور كذلك وبعدين قالوا هيذاكروا مع بعض عشان الامتحانات قربت. كارما بغضب: -يووووه. إيه المادة دي؟ حور بهدوء: -هنفهم براحة. قولنا إيه؟ هنفهم براحة براحة يا كارما.

كارما: -ده على أساس إنك فاهمة. حور: -نحاول. هنحاول براحة برضه. كارما: -طيب. اتفضلي اشرحي. بصت حور في الكتاب بتمعن وبعدين بصت لكارما وابتسمت وقالت: -مش قلت براحة. مسكت كارما المخدة وضربت بيها حور وهي بتقول: -لا براحة بلا بتاع. هنسقط في المادة. حور: -بت. اتهدي. امسكي الكتاب واقرأي وأنا همسك وأقرأ ولو لقينا ثغرة ولو بسيطة عشان نفهم المادة المعقدة دي. وبعدين سكتت وقالت: -أكيد هنعمل حاجة يعني. كارما: -صبرني يارب. حور:

-طب إيه رأيك نحاول؟ كارما: -أنا عندي رأي أحسن. حور: -إيه؟ كارما: -نعمل كيكة الشيكولاتة القمر بتاعتك وبعدين نذاكر أو ننام. أيهما أقرب. حور بتفكير: -بس بكرة نذاكر جامد أوي. كارما: -أوي أوي. حور بغضب: -هنسقط السنة دي بسبب تفكيرك. اتفضلي امسكي الكتاب وشوفي هنعمل إيه. كارما بصت لها وقالت: -هنعمل كحك. هاتى الكتاب. فضلوا نص ساعة يقرأوا في المنهج على أمل إنهم يفهموا حاجة. حور: -الحمد لله فهمت الجزئية دي. وبدأت تشرح لكارما.

كارما: -أنا صحبتي شطورة أوي أوي. حور: -وإنتي فهمتي إيه؟ كارما: -فهمت اللي شرحتيه. حور: -بت. بت. والله. هعمل منك كفتة. بقالك نص ساعة بتقرأي عقلك مستوعبش حاجة خالص. كارما ببراءة: -خالص. فالصحور: -إيه السهوكة دي يا ماما. وبعدين بزعيق: -متتعدلي يا بت. كارما اتنفضت وقالت: -أوامرك يا فندم. حور بتحاول تداري ابتسامتها قالت: -ناس متجيش غير بالعين الحمرا. كارما: -إنتي عينك رمادي يا فندم.

_روح بيته ودخل وقعد على الكنبة وهو بيفكر في كلامها. إزاي كان بيعاملها كده؟ هي عملت إيه عشان يطردها من المحاضرة؟ شكلها كان غريب. وانت مالك؟ كل دي أفكار كانت بتدور في راسه وهو بيفكر فيها لحد ما زهق وزعق وهو بيقول: -يووووه. إيه ده؟ وأنا شاغل نفسي ليه؟ الصوت كان عالي ومسموع لدرجة إنه افتكر نفسه مجنون. غير هدومه وحاول يهرب من التفكير فيها ونام. _حور مسكت الكتاب وهي بتحذفه في وش كارما وقالت:

-عيني رمادي. تصدقي يبت. ولا أقولك. قومي اطلعي. غورى. أنا عايزة أعرف. إنتي إزاي بتطلعي من الأوائل؟ إنتي بتذاكري من ورايا. كارما: -أنا أصلاً مش بفهم. دول بيدوني درجات شفقة يا بنتي صدقيني. حور: -إحنا ننام وأكيد ربنا هيحلها عشان إحنا غلابة. كارما: -عين العقل يا حب. تصبحي على خير. حور: -بس ده سريري. كارما: -معلش بقى. سيبالك حتة صغيرة أهو. حور: -صبرني يارب. _كارما صحيت وكانت نايمة جنب حور. فتحت عينها وهي بتهز

في حور وبتقولها بنعاس: -اصحي يا حور. علينا محاضرات الساعة ١٢ النهارده. حور بنعاس: -سيبيني أنام يا كارما. كارما: -اخلصي وقومي. حور مردتش. كارما قامت غسلت وشها وجابت كوباية ميه وراحت لحور. كارما: -استعيني على الشقا بالله. ورمت على حور الميه. حور اتنفضت وقامت وهي بتقول: -أعوذ بالله من الشيطان الرجيم. فيه إيه؟ كارما: -صحيتي. شطورة. يلا قومي البسي. أنا هطلع ألبس. لو نزلت وملقتكيش مخلصة هيبقى يومك زي أيام الكلية كدا. حور:

-أعوذ بالله من الشيطان الرجيم. أنا أكيد بحلم. إنتي إبليس صح؟ كارما بزعيق: -حوووور. اصحي وفوقي. حور اتنفضت وقامت دخلت الحمام. كارما من ورا الباب: -نص ساعة وألاقيكي جاهزة. ماشية. وخرجت. طلعت بيتها. حور جهزت وكارما كمان وراحوا الجامعة وكانت أول محاضرة دكتور تامر. _دخل والكل سكت وهو بيقول: -النهاردة فيه امتحان. كل الطلاب بصوا لبعض وفيه منهم اللي اعترض. تامر بغضب وصوت عالي: -اللي عايز يشيل المادة يتكلم تاني أو يعترض.

_في الكافتيريا. كارما: -يا مستقبلي اللي ضاع ياني. حور: -بلاش صياح واهدي. كارما: -أهدى. هسقط وتقولي أهدى. حور: -بس يا بنتي. هنجح شفقة. مش إنتي قولتي بتنجحي شفقة. كارما: -أنا حسدت نفسي. أنا حسدت نفسي. حور: -يلا نروح. مش هحضر محاضرات تاني. المحاضرة دي سدت نفسي. حور: -براحتك. أنا هاروح الورشة. سلام.

خرجت حور في نفس الوقت اللي خرج فيه تامر. عدت الشارع عشان تركب. وهو ركب عربيته وفضل باصصلها. لقى عربية نزل منها اتنين بيشدها لجوا بالغصب. فضلت تقاوم. نزل واحد تالت وزقها جامد. كان ساعتها هو خرج من العربية بتاعته ولما لقى العربية اتحركت. رجع تاني وركب عربيته ومشي وراهم. لما وصل ودخل اتفاجأ بـ