رواية حورية التميم الفصل الأول 1 - بقلم ايناس طه

انتي بتقولي إيه... عايزيني أتجوز واحد أعمى وكمان كان متجوز قبل كده و مخلف. مرات عمها: هوا إنتي كنتي تطولي إن واحد زيه أصلاً يبصلك ويرضى يتجوزك. كفاية الفلوس اللي على قلبه وعيلته ومركزه. احمدي ربنا يا أختي. يا ريت كانت عندي بنت كنت جوزتهاله. أنا عارفة إني اخترتك انتي بالذات. حورية: حتى لو معاه مال الدنيا كله أنا مستحيل أوافق عليه.

مرات عمها: لا يا حبيبتي ما انتي هتتجوزيه يعني هتتجوزيه سواء برضاكي أو غصب عنك. انتي فاهمة. عمك أدى كلمة للناس وخلاص. الموضوع خلص. وبعدين مش كفاية مستحملينك وبنصرف عليكي. على الأقل ردي جزء من اللي عملناه معاكي. حورية: وأنا قولت اللي عندي. مش هتجوزه واللي يحصل يحصل. مرات عمها

ضربتها ومسكتها من شعرها: لا بقى اسمعيني كويس. ده مش بمزاجك. مش يوم ما تجيلنا فرصة زي دي واحدة غبية زيك هتضيعها. واعملي حسابك إن كتب كتابك النهارده يا حلوة. خليكي عاقلة كده واسمعي الكلام أحسنلك. انتي فاهمة. ويلا غوري من وشي. وزقتها على الأرض. حورية ببكاء: يارب أنا تعبت من اللي بيحصل فيا ده. ليه يا ماما انتي وبابا سيبتوني لوحدي. مسحت دموعها وقالت لنفسها: برضه مش هتجوزه.

(حورية بنت جميلة من عيلة بسيطة جداً عايشة مع عمها بعد وفاة والدها ووالدتها. 22 سنة. بشرتها بيضا. تمتلك عيون خضرا وشعر دهبي ومتوسطة الطول.) في مكان تاني. لا يا بابا مش موافق. إزاي تعمل حاجة زي دي من غير ما تاخد رأيي. على آخر الزمن أتجوز عيلة صغيرة وكمان واحدة مش من مستوانا. والده: إنت اتجننت يا ولد. إزاي تكلمنا كده. وبعدين إيه كنت عايزني أستأذن حضرتك يعني ولا إيه. أنا أبوك وعارف مصلحتك أكتر منك.

تميم: مقصدش بس إنت عارف إني رافض فكرة الجواز بعد سلمي الله يرحمها ومش حابب أتجوز تاني. والده: عارف. بس إنت مش هتفضل كده طول حياتك. فكر في ابنك. أكيد محتاج حد يراعيه وياخد باله منه. محتاج أم. وإنت كمان محتاج حد يكون جنبك. تميم بغضب: بالنسبة لابني فأنا موجود ومش محتاج حد يساعدني. ولا محتاج حد يعطف عليا.

والده: اهدي. وبعدين خلاص. أنا اتفقت مع أهل البنت وكتب كتابك النهارده عليها. إنت فاهم. اجهز والسواق هياخدك على المكان. وأنا هروح مشوار وهحصلك على هناك. وسابه ومشي. تميم اتعصب أكتر وبقى يكسر كل حاجة قدامه. وبيتوعد لتلك المسكينة. (تميم المرشدي 35 سنة. يمتلك عيون بني وشعر بني ودقن خفيفة جذابة. بشرته قمحاوية. طويل القامة ولديه جسد رياضي.) عدى اليوم وجه معاد كتب الكتاب. في بيت حورية. إلحق يا جمال البت هربت.

عم حورية: هربت. هربت إزاي. مراته: دخلت الأوضة علشان أشوفها جهزت ملقيتهاش. جمال: إنتي مش قولتي وافقت على الجواز. إيه اللي هيخليها تهرب يعني. مراته: هااا. جمال: إيه اللي هااا. إنتي في حاجة مخبياها عليا. ما تتكلمي ساكتة ليه. مراته بكذب: هخبي إيه. هي في الأول مكانتش موافقة بس بقيت أحاول معاها لحد ما اقتنعت بكلامي ووافقت. جمال: يا نهار أسود. وبعدين هنعمل إيه في المصيبة دي. وهنقول إيه للناس اللي جايه.

مراته: وأنا مالي. كله بسبب بنت أخوك الفقر. منها لله. جمال: بس بقى خلاص. ممكن تكون نزلت تجيب حاجة. أنا هنزل أسأل بهدوء يمكن يكون حد من الجيران شافها ونلحقها. مراته: فكرة برضو. يلا روح بسرعة مستني إيه.