رواية هوس مجهول الفصل الثالث 3 - بقلم فونا

الحقني يا يوسف! ـ في إيه يا مريم ومال صوتك. كنت بترعش وعمالة أعيط وخايفة والباب عمال يخبط جامد. ـ الباب... حد عمال يخبط جامد على الباب ومش شايفه حد برا. لما بصيت و... والصوت خشن. ارجوك تعالى بسرعة. ـ متخافيش يا حبيبتي دقايق وهكون عندك. نظراً لأن يوسف ساكن في الشارع اللي ورايا بالفعل. دقايق ولقيته عندي. ـ تعالى يا حبيبتي بس اهدي. خدني في حضنه وأنا كنت عمالة أعيط وأترعش. اتكلمت بعياط:

ـ أنا مش عايزة أقعد هنا عايزة أمشي. حاول يهديني. ـ حاضر متخافيش واهدي، هاخدك تروحي معايا وتقعدي مع ماما. روحت مع يوسف ومرات عمي. أول ما شافتني خدتني في حضنها وقعدت تهديني. يوسف خد موبايلي عشان يراجع الكاميرا. بس للأسف الشخص ده كان مغطي نفسه حتى عيونه مش باينة! ـ الموضوع زاد عن حده يا مريم إحنا لازم نبلغ. هزيت راسي بهدوء. كانوا عمالين يتكلموا معايا كتير عشان ما أفكرش في اللي حصل.

نمت مع طنط في أوضتها ويوسف نام في أوضته. تاني يوم مروحتش الشغل. يوسف رفض واصر إنّي لازم أرتاح. ـ يوسف أنا مش هقدر أشتغل مع چون. ـ وأنا مش هخليكي تشتغلي معاه أصلاً أنا مش مرتاحله من ساعة ما شوفته. اتنهدت بارتياح إن چون مضغطش عليا. مرجعتش البيت وخايفة أرجع أقعد لوحدي. والصراحة طنط فرحانة بوجودي أوي. فضلت يومين مرجعتش البيت وحتى مش بنزل الشغل. ـ أنا حولت الشغل مع چون لحد تاني غيرك. ـ شكراً يا يوسف. ـ مش بينا يا دبة.

ضحكت. ـ أنتَ لسه فاكر. ـ مقدرش أنسى. ضحكنا وفضلنا نتكلم شوية أنا وهو وطنط. في يوم كانت طنط محتاجة حاجة من تحت ويوسف كان في الشغل. فنزلت أنا عشان أجيب. روحت سوبر ماركت بعيد عن البيت شوية. وأنا راجعة كنت ملاحظة إن فيه عربية ماشية ورايا! قلبي اتقبض وحاولت أسرع في خطوتي وبرضه كان ماشي ورايا! دخلت من شوارع جانبية ضيقة عشان ميّعرفش يجي ورايا وبالفعل تاه.

اتنهدت بارتياح وأنا ماشية وطلعت من شارع وفجأة لقيت عربية وقفت قدامي فجأة وحد زقني جوا العربية! حاولت أصوت بس ملحقتش. لقيت إيد اتحطت على بوقي وواحد قرب وشه من وشي جامد. ولحظة واحدة! ده چون! ـ فاكرك لما تبعدي عني مش هعرف أوصلك! أنتِ بتاعتي يا مريم!