رواية حياتي الفصل الثلاثون 30 - بقلم توتة

حياة: انت لسه ممشيتش؟ إيلان: اوباااا حياة: إيه؟ إيلان: هو إيه اللي إيه؟ إيه اللي انتي عاملاه ده؟ مرة إسدال ومرة برنس. حياة بخجل: أنا.. أنا كنت بحسب مفيش حد في الأوضة.. ونسيت هدومي.. أعمل إيه يعني؟ إيلان: متنسيش هدومك تاني. حياة: م.. ماشي. إيلان: هستناكي تحت عشان تروحي معايا الشركة. حياة: ماشي. إيلان: متتأخريش. *** جميل: إيه يا إيلان باشا على فين؟ إيلان: رايح الشركة.

جميل: وبالنسبة للي فوق دول يقولوا عريس رايح فين يوم صباحيته؟ إيلان: بابا.. هيا كمان هتيجي معايا.. وبعدين هما هيمشوا النهاردة.. مش عارف جبتهم ليه.. ما كان أي شهود وخلاص. جميل: انت عايزهم يقولوا عليا إيه في البلد هناك؟ إيلان: محسسني إنه جواز حقيقي.. ده هو يومين وهنتطلق. جميل: ولو برضو. إيلان: وأبو حياة مجاش من البلد ليه هو كمان؟ كده هيقولوا إيه؟

جميل: هما ميعرفوش العروسة تبقى مين.. ولو عرفوا أن العروسة من عندهم هناك واتطلقت بعد يومين.. يا ترى سمعتها هتكون إيه؟ إيلان: وعملت إيه في الحكاية دي؟ جميل: وديت الورق امبارح.. وإن شاء الله يكون في صالحنا. إيلان: ده أكيد هيكون في صالحنا.. والمحامي بنفسه قال الكلام ده. جميل: مش ضامنين برضو. إيلان: إن شاء الله خير.. عن إذنك. جميل: وهقول إيه للي موجودين دول؟

إيلان: اتصرف.. انت عارف ممكن تقولهم إيه.. بس أنا مش هقدر عشان الشغل اللي ورايا ميستناش. طنط چيلان: إيلان جوه في مكتب جميل.. انتوا هتروحوا الشركة النهاردة؟ حياة: آه. طنط چيلان: ليه مكنتوا تروحوش النهاردة؟ حياة: الكلام ده لو إحنا متجوزين بجد.. بس ده جواز مساعدة مش أكتر. طنط چيلان: طب والشهود اللي جايين من البلد دول؟ حياة: مش عارفة.. بس إيلان هيحل الموضوع أكيد. إيلان خرج من مكتب جميل: يلا!! حياة: يلا.

ركبت حياة سيارة إيلان وكان السكوت هو سيد الموقف. قطعت حياة السكوت: ممكن أسألك سؤال؟ إيلان: اممم. حياة: انت ليه بتاخد البرشام اللي انت بتاخده ده قبل ما تركب عربيتك؟ إيلان: وانتي مالك؟ حياة: والله!؟ إيلان: عايزة تعرفي ليه؟ حياة: وانت مالك برضو. ضحك إيلان بصوته كله: انتي مجنونة ولا إيه؟ حياة: ما انت زي البني آدمين وبتضحك عادي أهو. إيلان: اها.. بضحك عادي جدا.. بس انتي اللي بتسدي نفسي عن أي حاجة.

حياة: وإيه بقى اللي خلاك تضحك دلوقتي؟ إيلان: عشان انتي مجنونة. حياة: لو سمحت احترم نفسك.. أنا مش شغالة عندك عشان تكلمني كده. إيلان وقف العربية قدام الشركة وهو بيقول: يبقى متتدخليش في اللي ملكيش فيه. نزلت حياة من العربية وطلعت فوق وكان كل طلاب البحث موجودين. حياة: صباح الخير. الكل: صباح النور. طالب: احم.. هو إحنا بعد ما نخلص مراجعة وحل هنعمل إيه تاني؟

حياة: نراجع تاني وتالت.. وبعدين هانت كلها آخر الأسبوع وبعدين نرجع تاني للجامعة. طالبة: هو ده تبع الجزء الأول بس؟ حياة: بالظبط تبع الجزء الأول.. ولسه بقى هنعمل سيرش للشهر الجاي. طالبة: تمام. *** تاره: من اليومين اللي فاتوا دول كان الشغل كله مترحل. إيلان: رحل بتاع النهاردة كمان.. عشان مش هكون موجود النهاردة كمان. تاره: ما حضرتك موجود. إيلان: لاء منا نمشي دلوقتي. تاره: بس كده الشغل هيكون كتير.

إيلان: مش مهم.. ومش عايز مناقشة بعد كده. تاره: تمام. *** طالبة: دي تالت مرة نراجع فيها النهاردة. حياة: طب نعمل إيه.. مش هينفع نمشي قبل الساعة 4 ولا ينفع نغيب عشان بيتعوض في يوم الخميس أو الجمعة. طالب: دي المجموعة التانية لسه محلّوش آخر صفحتين. حياة: ملناش دعوة بيهم.. في عز ما كنا إحنا تعبانين كانوا هما زهقانين وبيتدلعوا.. وهما دلوقتي تعبانين في عز ما إحنا زهقانين من كتر إعادة المسائل.

طالب: دي لسه الساعة 2.. هنستنى كل ده. حياة: طب أنا جالي فكرة. طالبة: إيه؟ حياة: نتسحب واحد واحد ونخرج من الشركة. طالب: ولو السكيورتي عرف بقى وقال للمدير؟ حياة: متخافش المدير ده أهبل ومش هيعرف حاجة. إيلان: أهبل أوي.. لدرجة إنه مش هيعرف كل واحد شغال في شركته بيعمل إيه. طالب: ه.. هو حضرتك المدير؟ إيلان: آه أنا المدير الأأهبل. طالبة: شيلنا المادة.

حياة: لاء متقلقيش مش شيلنا حاجة.. إحنا حلينا كله بمجهودنا.. وميفرقش معايا حد. إيلان: خليكي قد كلامك. حياة: بالحرف. إيلان: تعالي على مكتبي. قال إيلان جملته وذهب إلى مكتبه. طالب: انتي المسؤولة وكده ممكن نشيل المادة. حياة: متقلقوش هحلها. حياة: مش هتقدر تعمل حاجة على فكرة.. وحتى لو عملت مش فارقة معايا. إيلان: وبالنسبة للطلاب المسؤولين منك؟ حياة: أنا المسؤولة عن الكلام اللي قولته مش حد تاني.

إيلان: وإيه بقى اللي انتي قولتي؟ حياة: اللي انت سمعته. إيلان بصوت عالي مع شوية غضب: حااااياة.. انتي زودتيها أوي ومش عارفة أنا لو اتعصبت عليكي ممكن أعمل فيكي إيه. حياة بقوة رغم الخوف اللي جواها: وأنا ميهمنيش حاجة.. وأعلى ما في خيلك اركبه. قالت حياة جملتها واتجهت إلى الخارج ثم ذهبت إلى غرفة البحث. حياة: متقلقوش انتوا متأذيتوش من حاجة.. أنا الوحيدة المسؤولة. طالب: هو قالك هيعمل إيه؟ حياة: ميقدرش يعمل حاجة.

طالبة: متأكدة؟ حياة: اممم.. هضطر أستأذن أنا.. طالبة: لسه الساعة مجتش 4. حياة: عادي مبقتش فارقة. نزلت حياة إلى الأسفل. رغدان: على فين؟ حياة: رغدان... انت جاي لمين؟ رغدان: لإيلان.. انتي رايحة فين بدري كده؟ حياة: افتكرت مشوار مهم. رغدان: أوصلك طيب؟ حياة: لاء مش مهم.. أنا هاخد تاكسي. رغدان: لاء تعالي أوصلك. حياة: معلش يا رغدان مش هينفع.. لازم أروح لوحدي. رغدان: خلاص براحتك. *** إيلان: جاي ليه؟ رغدان: إيه السؤال ده يا عم.

إيلان: مش فاضيلك.. اخلص. رغدان: مش جايلك. إيلان عقد حواجبه: نعم!! اومال جاي ليه؟ رغدان: جاي لواحد صاحبي هنا. إيلان: استناه بره.. هنا مكان شغل. رغدان: مالك كده مش على بعضك. إيلان: مفيش. رغدان: لاء مفيش إيه.. باين على شكلك. إيلان: متضايق من اللي حصل بس. رغدان: إيه اللي حصل؟ إيلان: قبل كده يا رغدان. رغدان: قلبك أبيض يا عم.. انسي بقى.. الا بقولك إيه. إيلان: ارغي. رغدان: مالها حياة؟ إيلان: وانت شفتها فين؟

رغدان: كانت خارجة من هنا. إيلان: ورا.. إيه.. كانت إيه؟ رغدان: في إيه؟ إيلان: خرجت من هنا! رغدان: آه. إيلان: وقالتلك رايحة فين؟ رغدان: مقالتش.. حتى قولتلها أوصلك قالتلي لاء مينفعش. إيلان: طيب امشي انت. رغدان: هغور من وشك يا عم.. ده انت القعدة معاك تقصر العمر. *** براء: انتي غبية يا حياة. حياة: هو أنا كلمتك ليه أصلاً سلام. براء: استني يا ماما.. في إيه؟ حياة: عايزة إيه؟ براء: انتي فين دلوقتي؟ حياة: مش هقولك.

براء: إيه ده ليه؟ حياة: مش ضامناكي ممكن تقولي لرغدان وهو يقول لإيلان وأنا هربانة منه أصلاً. براء: أخص عليكي يا اتش.. مش واثقة فيا. حياة: آه.. يلا سلام. براء: قوليلى ومش هقول لحد.. وهجيلك. حياة: لاء.. عايزة أقعد لوحدي. براء: ليكي حق بعد اللي عملتيه. حياة: سلام. *** إيلان: ردي بقى. حياة: نعم؟ إيلان: انتي فين؟ حياة: وانت مالك. إيلان: آه.. انتي بترديهالي بقى. حياة: احسبها زي ما تحسبها.

إيلان: اخلصي عشان لو جيتلك بنفسي مش هعديها على خير. حياة: عالنيل. إيلان: شاطرة إنك قولتي.. روحي بقى عالبيت زي الشاطرة كده. حياة: لاء مش هروح. إيلان: روحي واستهدي بالله عشان متندميش.. وبعد كده أما أكلمك تردي عليا على طول. حياة: شايف الكلام اللي انت قولته ده. إيلان: ماله. حياة: بلَّه واشرب ميته. إيلان: متنرفزنيش. حياة: زعلت؟؟ إيلان: أكيد. حياة: أهلك راسك في أتخن حيطة قدامك.

إيلان: الو.. حياة.. الو.. ماشي انتي اللي ابتديتي يبقى انتي اللي تتحملي بقى.