في صباح اليوم الموعود، وهو حفل زفاف العروسين عاصي وندي.
عاصي صحي من النوم على صوت المنبه، كانت الساعة 10 صباحًا. قام من على السرير وفتح البلكونة وقفل الشيش وفتح الدرج، طلع كيس من البلالين وبدأ ينفخها ويعلقها ويزين الأوضة وهو جواه فرحة وراحة رهيبة.
عاصي بضحك: مين كان يصدق إن أنا أتجوز؟ لأ وكمان أزين الأوضة علشان النهارده دخلتي.
وندي رنت عليه.
ندي بتوتر: صباح الخير.
عاصي بحب: صباح الورد على أجمل عروسة. صحيتي ولا لسه؟
ندي اتعدلت على السرير وقعدت: أيوه لسه صاحية حالا. الكوافير اتصلت عليا وقالت على الساعة 12 لازم أكون موجودة هناك.
عاصي وهو بيربط البالونة: ماشي يا قلبي، قومي كدا صحصحي وجهزي نفسك. هاجي آخدك الساعة 12.
وقفل.
ندي حطت الفون جنبها وقعدت في خوف: مفيش حاجة هتحصل ليا. عاصي بيحبني ومستحيل يزعلني. أنا بس اللي مخوفة نفسي بنفسي. وبعدين الخوف طبيعي، أي عروسة بتكون خايفة.
وعيطت.
ندي: أحسن عيطي ونكدي على نفسك يوم فرحك، شاطرة يا ست زفتة.
وقامت مسحت عيونها وطلعت برا.
فريدة بابتسامة: صباح الخير يا عروسة.
ندي بمرح: صباح النور يا فوفا. بس أي يا ولاد، عروسة إيه دي؟ مش متعودة على كدا.
نادية: اتعودي بقااا، مش اتجوزتي وهتسيبيني لوحدي خلاص. شوفي مين اللي هيخدك في حضنه لما تزعلي.
ندي بمرح وهي بتهز أكتافها: عاصي اللي هيخدني بقااا يا ست نادية. فكرك هعيط وأقولك والنبي أوعي تجوزيني؟ لأ لأ لأ، هتجوز هتجوز هتجوز هتجوز.
عزة جت ليها بسرعة: أنا خلاص هتجوز وهبطل أبص على الشباب.
أسماء بقرف: ناس بيئة.
ندي حطت إيدها في وسطها وعوجت شفايفها: جري إيه يا أسماء يا أختي؟ أنا لولا 8 شهور اللي أمي حملت فيا فيهم وربيتني كنت مسحت بوشك البلاط. اهو يبقى ليكي لازمهم.
مصطفى دخل من باب البيت وفي إيده كولمن المية بضحك: مش هما 9 شهور برضه ولا ناقصين؟
ندي بغرور: نحن نختلف عن الآخرون، أنا أمي ولدتني في الثامن.
مصطفى بضحك: ما علينا، المهم خدي خلي حد يملي الكولمن دا علشان نحطه تحت يا عروووسة.
ندي بصت على نفسها وعلى البجامة اللي كم نازل وكم متشمر والبنطلون كبير وغرقانة فيها: شكلي شكل عروسة يعني.
مصطفى بص عليها: هو بنطلون البجامة كبير عليكي، بس أهو أحسن من مفيش خالص، ولا إيه يا وزة.
عزة بسرعة: أنا موافقة.
مصطفى بضحك: موافقة على إيه؟
عزة بصت ليهم: مش هو قال تجوزيني؟ برضه ولا أنا اللي بدأت أتخيل؟
مصطفى وندي ماتوا من الضحك عليها.
ندي بصت في الساعة: يخرررابي، أنا داخلة آخد شور. هتأخر على فرحي كدا.
وهزت شعرها بغيظ على أسماء وأميرة: اتشاااو يا عقارب.
ودخلت الحمام.
أميرة في همس: والله ما في عقربة غيرك.
عند نور وغسان.
نور كانت نايمة على صدر غسان ومستمتعة في النوم أوي، بس صحيت على صوت الأغاني اللي في بيت نڤين.
نور رفعت راسها لقت غسان مستغرق أوي في النوم. بصت عليه بحنان: حبيبي، تعبت اليومين دول، أنا عارفة.
وباست دقنه.
غسان بدأ يصحي، بص عليها كانت نايمة على صدره، باس راسها: صباح الخير. ومسح عيونه: إحنا الساعة كام؟
نور بصت في الساعة اللي متعلقة: 11 إلا ربع أهي.
غسان قام واتعدل على السرير ورجع راسه لورا: من الصداع اللي عندي، أغمي عليا مش نُمت.
نور بابتسامة قلعت التيشيرت بتاعها ولفت ليه، لقت رسمة على سلسلة ضهرها: إيه رأيك؟
غسان لمسها بإعجاب: واو، جميلة أوي دي. عملتيها بالحنة صح؟
نور هزت راسها: ماما نڤين قالت إن زمان كانت العروسة بتتحنى والحماة ترسم على إيدها. بس أنا مبحبش الحنة على إيدي، خليت يمني رسمتلي الرسمة دي. كانت الرسمة عبارة عن فراشة كبيرة موصلة من أول عنقها لآخر سلسلة ضهرها.
غسان مشي صباعه عليها باتجاه الرسمة وقال بهمس: حلوة أوي.
نور غمضت عينها وحركت ضهرها وقالت بهمس: شيل إيدك، الحركة دي بتعصبني.
غسان قرب راسه من رقبتها وباسها: بتعصبك إزاي؟
نور مالت رقبتها وهي لسه مغمضة: مش عارفة.
غسان رجع راسها لورا وخلى وشها قصاد وشه: إنتي مغمضة لي؟ فتحي.
نور رفعت حواجبها بتوهان وفتحت عيونها: ابعد.
غسان قرب من شفايفها وباسها بحب وقال بين قبولاته: مش عايز أبعد. وحشتيني.
نور مش مركزة في أي حاجة: وأنت كمان.
(الباب خبط)
نور فاقت وبعدت شوية وبتزق غسان: الباب يا غسان.
غسان شدها ليه: سيبك منه، مش وقته.
يمني وهي برا: يا نووور يا بنتي اصحي بقااا.
نور تزقه بضحك: معلش يا حبيبي، مسمعتش الباب. أسفة. تعالي ادخلي.
يمني: لأ مش فاضية، أنا عايزة الطرحة. فضي.
نور بضحك: طيب ادخلي يا بنتي علشان أجبهالك ليكي.
يمني بحرج: جوزك فين؟
نور بغيظ: تعالي يا يمني، متحرقيش دمي. هدخل أنزله علشان كدا كدا لازم ينزل. وإحنا ندخل نشوف الهدوم.
يمني دخلت وقعدت في الصالة: طيب أنا هنا أهو.
نور قفلت الباب بتاع الشقة ودخلت لغسان، لقيته واقف قدام المراية بيعدل هدومه.
نور وهي بتعدل لياقة القميص بتاعه من ورا: نازل ولا إيه؟
غسان وهو بيظبط الحزام: أيوه، نازل أشوف الدنيا تحت. أي بس متتأخريش علشان نفطر.
نور باست خده: ماشي يا حبيبي.
وغسان طلع وهي وراه.
غسان بابتسامة: صباح الخير يا أم سيف.
يمني: صباح النور يا أبو عاصي.
غسان نزل ونور أخدت يمني ودخلوا على أوضة النوم.
نور فتحت الدرج بتاع الطرح.
نور: اختاري. أنا عندي 4 طرح فضي. شوفي الشكل اللي يعجبك.
يمني: أنا الطرحة اللي جبتها مش فضي، وأنا متأكدة إن لونها كان فضي في المحل.
نور قعدت على السرير ومسكت بطنها: طيب كويس إن عندي. خديلك واحدة بقا.
يمني: فستانك نبيتي صح؟
نور: أيوه، بس جبته منفوش شوية من تحت علشان بطني. وبعدين ما إنتي شوفتيه.
يمني بغيظ: طيب أنا فستاني أسود ليييي؟ الكل جايب ألوان وأنا جايبة أسود.
نور: بالعكس، الجزمة الفضي والطرحة الفضي على الفستان الأسود جامدة.
يمني أخدت الطرحة: طيب، أنا هنزل تحت علشان بعمل بطاطس مهروسة وسيباها على النار. وإنتي انزلي يلا علشان الكل بيسأل عليك.
نور: نورهان ونسمة والكل تحتي.
يمني بضحك: أيوه، كلهم تحت بيرقصوا.
ونزلت.
نور دخلت على الأوضة أخدت شور دافي وطلعت، لبست قميص بيتي شتوي لونه أصفر بحزام من على الوسط وطرحة سودا وحطت رشة برفان على رقبتها ونزلت على تحت.
نڤين: يعني أقول أم العريس ولا العروسة يا ولاد.
نور بضحك: ما هي راحت عليا بقااا. الأستاذ عاصي كبرني وانتهى الحوار.
انتصار: إزيك يا نور؟ وحشتيني يابت والله العظيم.
نور راحت سلمت عليها وحضنتها: وإنتي والله يا عمتي. عاملة إيه؟ وازي صحتك؟
انتصار: أنا الحمد لله يا حبيبتي. إنتي عاملة إيه وحملك عامل إيه؟
غسان اللي قاعد في الصالون: قولي حملها عامل فيا أنا إيه يا عمهم.
محمد طبطب عليه بضحك: معلش علشان تتهد شوية.
عمر: هو كدا الحلو لما تبهدله الأيام.
عاصي نزل من على السلم: كنت زي الوردة يا نن عين ابنك. دعوة ودعت عليك يولاااا.
الكل ضحك عليه وعلى كلامه وفضلوا يقولوا: يا عريس يا عريس.
عاصي بغيظ في أسر: هتجوز هتجوز هتجوز هتجوز. وإنت قاعد طبعًا. أنا هخلف وابني يتف عليك وانت قاعد القعدة دي برضه.
أسر بغضب: سمعين، وأنا اللي بقول عريس وواجب احترامه.
نورهان بضحك: يلاااا الفطار جهز يا رجالة.
عاصي بغيظ في أسر: أيوه، النهارده فرحي. لازم آكل. إنت قاعد ليه يا أسر؟ طب دا كلام يا ناس؟ يعني أنا عريس ولازم أتغذى وقاعد قبلي.
أسر وقف ليه بغضب: ياض، هزعلك. بطل غلاسة. أهلك ديم.
محمد لغسان: إنت غلس يا غسان. أصل إنت بتتشتم.
غسان: ما هو لما يكون الابن قليل الأدب لازم يجر أهله معاه. بص فوت فوت، أنا سبت ليه فرصة إن جيت للحق.
نور: بصوا، تعالوا افطروا الأول وبعدين كملوا كلام بقا.
الكل قعد ياكل في ضحك وهزار.
وبعد شوية.
عاصي: بنات، في حد جي الكوافير علشان هنمشي دلوقتي.
حبيبة: لأ، الكوافير اللي ندي راحة ليه محدش بيروح معاها. إنتو روحوا، وعلى ما ترجعوا هنكون إحنا في القاعة.
عاصي: ماشي، يلا همشي أنا وأجهز. يا أسر، على العصر كدا هنروح صالون حكاية نلبس ونجهز هناك.
أسر: متتأخرش إنت بس.
عاصي نزل وركب العربية ورن على ندي: يلا يا عروسة.
ندي وهي بتشيل الفستان: أنا على السلم أهو. تعالي خد مني الفستان علشان تقيل أوي. وقفت ماما، أنا ماشية.
نادية والكل فضلو يصفقوا. وهي نزلت مع عاصي اللي شايل الفستان وهي بتضحك. ركبت، عاصي ركب جنبه.
ندي بضحك: عاصي، لو أنا اتكلمت في البيت بتاعنا الكل يسقف ويرقص.
عاصي بضحك: عروسة بقااا.
ومشوا على الكوافير.
بعد وقت.
عاصي مسك إيدها وباسها: خدي بالك على نفسك. ولو حصل حاجة كلميني. وأنا على الساعة 8 هكون عندك.
ندي نزلت: ماشي. يلا باي.
ودخلت على الكوافير.
السكرتيرة: إنتي آنسة ندي صح؟
ندي بابتسامة: أيوه أنا.
السكرتيرة: إنتي في الدور التاني، روحي هناك يا قمر.
ندي طلعت ودخلت بهبطان: يا أهل الدور.
و حطت الفستان على الكنبة.
الميكب أرتست بضحك: تعالي يا ندووش. إحنا هنـ...
ندي: أنا لو جاي لمستشار مش هتعملوا فيا كدا.
المايكب أرتست بضحك: معلش يا باشا، قوليلي بقا عايزة الميكب خفيف ولا تقيل؟
ندي بمرح: بصي يا أختي، أنا من إيدك دي لإيدك دي. اعملي فيا ما بدالك، بس طلعيلي حلوة وحياة أبوكي.
الوقت بيمر ما بين الضحك والهزار والرقص والفرح. الكل متحمس أوي للفرح. والساعة بقت 6. عاصي أخد البدلة وكل حاجاته هو وأسر وراحوا على الصالون يجهزوا هناك.
(في أوضة فرحة)
نيرا: بنات، الساعة 6 ونص. قوموا يلا علشان نلحق نلبس. إخلصوا.
فرحة اللي قاعدة قدام المروحة: الماسك بتاعي نشف ولا لسه؟
نيرا حسست عليه وبدأت تشيله: بس كدا. اغسلي وشك يلااا. وإنتي يا حبيبة يلا.
حبيبة بتنفخ في إيدها: يا ولاد، المانيكير ينشف الأول علشان مش عايزاه يبهدل حاجة. البسوا وأنا هقوم أهوه.
بعد ساعة، كلهم كانوا لبسين الفساتين اللي عبارة عن فستان لونه بيج منفوش شوية من تحت وبحزام بسيط وسمبل من على الوسط وبكمام من عند الكتف منفوشة شوية ومن آخر الإيد بإستيك. وطرح بيج مفكوكة شوية مبينة الحلقان الكبيرة والجميلة أوي وجزمة شفافة بكعب. حبيبة وفرحة ونيرا وزهرة لبسين زي بعض بالظبط وكانوا شكلهم حلو أوي وكيوت. والميكب السمبل بتاعهم.
نيرا بفرحة: بناااات، اعااا. شكلينا حلو أوي.
حبيبة بغيظ: الرموش بتاعتي خيلان.
فرحة راحت قدامها وفضلت تظبط فيها: حركي رموشك كدا.
حبيبة حركتهم: أيوا، حلوين كدا. يلااا نتصور بقااا.
وفضلوا يتصوروا كتير أوي.
في شقة يمني.
يمني لبست الفستان بتاعها والطرحة مفكوكة شوية.
محمد اللي بيرش برفان وباصص للمراية: لفي الطرحة يا يمني، اخلصي.
يمني برجاء: يا محمد، بص والله جميلة أوي. أنا عايزة الحلق يبان.
محمد: مش هعيد كلامي تاني. والله لفي الطرحة كويس علشان والله ماهتتساب كدا.
يمني بغيظ لفت الطرحة.
محمد راح عندها ومسك وشها بين إيده: شوفي كدا شكلك ملوكي إزاي.
سيف: طيب وأنا شكلي حلوم.
محمد باس خده: قمر يجدع، قمر.
محمد مسك إيد يمني: يلا نروح هناك، زمان الكل خلص.
وخدها وراحوا على بيت نڤين. أول ما طلعت ياسمين راحت ليها جري.
ياسمين: دباااابيس بسرعة.
يمني بضحك فتحت الشنطة الفضي اللي في إيدها وطلعت علبة دبابيس: خدي. بس هتحطي فين؟ إنتي كل لبسك خلصان أهو.
ياسمين كانت لابسة نفس فستان نسمة ونورهان. فستان رصاصي صك وسمبل أوي مفيش فيه أي شغل غير إنه فيه حزام من الخرز وكمام منفوشة. بس ياسمين مش محجبة، فكانت عاملة شعرها كله لورا ولابسة طوق من الخرز نفس الحزام وجزمة شفافة. لكن نسمة ونورهان لبسين طرحة رصاصي أغمق من الفستان شوية.
ياسمين: السوستة بتتفتح. عايزك تثبتيه من فوق بدبوس.
يمني مسكت دبوس وفضلت تظبط فيه.
قاسم نازل بغضب: أم الفستااان ضيق وبرضه تقولي عاجبني.
نسمة نزلت وراه: أنا شايفة إنه حلو. إنت بس اللي عايز تنكد علينا.
عمر بغضب: تعالي يا راجل، دا حاجة زي الخرا.
قاسم: إنت مراتك لبسة نفسه؟
محمد بضحك: واختك كمان. بس كلمة حق، إنت هتسكت علشان كلنا عايزين نفرح ومش عايزين نكد.
نڤين بغضب: طيب يبقى حد بيتكلم كدا.
نسمة ونورهان راحوا باسوه.
نسمة بفرحة: قلبي اللي ناصرنا دا بقا.
نڤين: هو يوم ولازم أعدي. وإنتوا مراتتكم لبسهم حلو أهو، وحتى لو إيه هو اتشرا وانتهى الموضوع.
عمر: أمك بتقوي النسوان علينا يا قاسم.
انتصار: مال فستان مراتك يا عمر، ما هو زي الفل أهو.
قاسم: قال أمك اللي بتدينا جوايز. ما هي كمان بتقوي.
محمد: مراتي يا غالية، تعالي هنا.
الكل ضحك عليهم.
في شقة نور.
نور قعدت على السرير بعد ما لبست الفستان والطرحة وخلصت كل حاجة. غسان كان برا بيتكلم في الفون ودخل ليها.
غسان: يلا يا نور، عاصي رايح يجيب ندي من الكوافير دلوقتي. يلا علشان نمشي قبله.
نور بصت ليه: لبسني الصندل، مش قادرة أوطي.
غسان وقعد ولبسها الصندل: أي خدمة تانية؟
نور باست خده ومسحت وشه من الروج: تسلم يا حياتي كلها.
ومسكها من إيدها ونزلوا على تحت.
غسان: يا عمررر، عمررر.
عمر: إيه يا باشا؟
غسان: الأتوبيسات مشيت ولا لسه؟
عمر: لسه ماشيين حالا. وقاسم أخد مراته والبنات وراح.
غسان: أخدهم في عربية واحدة كلهم؟
قاسم: قلت ليهم هات ليا فرحة وزهرة وخد نيرا وحبيبة. البنات زعلوا، عايزين يركبوا سوا.
نور: ياسمين، الروج دا لونه حلو عليكي. هاتي أحط وامسح اللي حطيته.
غسان شدها: والله متأخرين. والمصحف متأخرين. الروج بتاعك زي الفل وجميل والله.
ياسمين بضحك: الراجل زهق منك يا شيخة.
نور بضحك: ماما مشيتي؟
ياسمين: أيوه مشيت في الأتوبيسات.
نورهان: ياسمين هتيجي معايا ولا مع نوري؟
ياسمين: هي يمني مشيت؟
نورهان: أيوه مشيت.
ياسمين: طيب استني هاجي معاكي.
ونزلت وركبت معاها. وعمر مشي ونور غسان أخدها وراحوا على القاعة.
عاصي نزل من عربيته بهيبة ومنظر جذاب، كل اللي كان في الكوافير كانوا بيعاكسوه. ودخل الكوافير لقي ندي واقفة وفي بنات كتيررر أوي معاها. راح عندها بابتسامة واتصدم من جمالها.
عاصي بحب وصدمة: بت، هتموتيني من جمالك. إيه الحلوة دي كلها؟
ندي بابتسامة وفرحة: بجد شكلي حلو. بس إنت كمان حلو أوي.
عاصي بغمزة راح حضنها: دا إنت بطل بطل يعني.
الميكب أرتست: إيه يا عريس، مش هتشيل ولا إيه؟
عاصي بهمس لندي بخبث: دا إحنا هنشيل لصبح.
ندي البسمة راحت من وشها وخافت تاني: طيب يلا نروح على القاعة بقااا.
عاصي مسك إيدها وأخدها على العربية. والكل بيزغرط. ركب ورا وهي جنبها.
أسر بغيظ: بقا مخليني السواق يا عاصي بيه.
عاصي بغيظ فيه: عريس بقا، معلش. أيوه صحيح، عقبالك بعد عمرين طوال إن شاء الله يا أسووور.
أسر: أنا هحترمك علشان مراتك اللي قاعدة جنبك دي. بس.
وساق على القاعة.
(في القاعة كانت كبيرة جدا مكشوفة من فوق وكانت مطلة على البحر. وكل اللي موجودين في القاعة ناس راقية، كان الظباط والأهل وقرايب ندي وقرايب عاصي والكل فرحانين أوي بلمة الحلوة دي في مناسبة حلوة).
البنات كانوا بيتصوروا كتيررر أوي.
عزة: بقولكم إيه؟ حبيبة تعالي انزلي تحت وخلي فرحة وزهرة ونيرا وراكي علشان الصورة تطلع حلوة.
وغسان ونور بيستقبلوا المعازيم لحد ما الدي جي قال حمدالله على سلامة العروسين وشغلوا موسيقى في الأول.
الكل وقف وسقف والبنات فضلوا يرقصوا.
عاصي أخد إيد ندي ومسكها بابتسامة وفرحة. والكل راح يسلم عليهم.
غسان أخد عاصي في حضنه: ألف مبروك يا بطل.
عاصي حضنه: الله يبارك فيك يا غالي.
وحضن أمه.
نادية حضنت ندي: ألف مبروك يا فرحتي في الحياة يا أجمل وأرق بنوتة.
ندي: الله يبارك فيكي يا أختي. مش أمي.
وحضنت عزة ونيرا والبنات.
حبيبة جابت منديل وفضلت تنشف عرق ندي.
ندي بضحك: تعرفي، كنت بتريق على البنات اللي بيعملوا كدا للعروسة.
البنات ضحكوا.
وجدها راح عند عاصي حضنه بعد ما سلم عليها: مبروك يا بني، خد بالك منها.
عاصي: في عيني يا حج.
واخد إيد ندي وراح على الكوشة. وفرحة ونيرا وحبيبة وزهرة وعزة شايلين ديل الفستان بفرحة. كانوا مصدومين من جمالها هي والفستان. ومشيت على أغنية "طلي بالأبيض طلي".
عاصي بهمس ليها: وأميرك ماسك إيديكي وقلوب الكل حواليكي والحب يشتي عليكي وردددددد. ومش حافظ بقا.
ندي بابتسامة وهمس جنب ودنه: بحبك.
عاصي بص ليها ومش مصدق نفسه. الفرحة بقت فرحتين بعد اعترافها: بمووووت فيكي.
وراحوا قعدوا على الكوشة.
حبيبة راحت لأسرا وهزت كتفه بدلع: إيه رأيك فيا يا حضرت الظابط؟
أسر بحب وغمزة: جميلة يا قلب حضرت الظابط.
حبيبة بحب: بس إيه الشياكة دي؟
أسر بغرور: دي العادة يا...
حبيبة: خف تواضع وحياة أبوك.
أسر بصدمة: حياة أبوك؟ لأء، أنا مش عايزك تلقطي كلام من حد. أنا عايز حبيبتي الرقيقة.
نيرا راحت ليهم بضحك: يا عم فكها شوية.
أسر: مش عايز الفك دا. ابعدوا عن البت والنبي.
كريم راح عند أسر وسلم عليه: عامل إيه يا جدع؟
أسر: بخير يا كيمو. خد خطيبتك بقا وبعيييد عننا إنت وه.
نيرا: خطيبة مين يااااض؟ إنت بتبيعني ببلاش يا أسر؟
كريم مسك إيدها وبدأ يعرفها بأهله بحب واضح عليه.
كريم بهمس ليها: افردي وشك يا نيرا.
نيرا ابتسمت بتصنع: هموتك يا كريم. إنت مكلبش في إيدي كدا ليه؟
كريم بخبث: ناعمة، فا حابب أمسكها. في مانع ولا إيه؟
نيرا بصدمة من وقاحته: الناس بتبص علينا، سيب إيديك.
كريم قرب منها: إنتي اللي تفكيرك شمال يا نيرا. أنا أقصد البسك خاتم الخطوبة.
وطلع خاتم من علبته ولبسه ليها مع صدمتها.
حبيبة وفرحة في صوت واحد: يا نيرووووو يا جامدة.
نيرا: دا إيه؟
كريم باس إيدها والكل سقف ليهم: بقيتي خطيبتي رسمي. ولو مضحكتيش هحضنك الثانية.
نيرا ماتت من الضحك: تحضني إيه؟ دا أنا أضحك أوي.
كريم بضحك: أيوا كدا.
الدي جي: نستقبل العروسين بأول رقصة سلوو.
عاصي أخد إيد ندي وراح على المسرح ورقصوا على أغنية "أنا بعشقه".
عاصي بحب: مش مصدق نفسي إن برقص معاكي وإن النهارده دخلتنا فعلا. دا كان حلم بنسبة ليا يا ندووش.
ندي بمرح: صدق بقااا. بس اعرف إن إحنا بعد الرقص اللي هنرقصه دا هنروح ميتين.
عاصي بخبث: لأ، أنا رايح صاااحي، متقلقيش.
ندي في نفسها: يسوااادي. إنت لازم تهبط علشان تروح تنام يا عصعص.
عاصي قرب منها وحضنها برقة وشالها ولف بيها: بحبك يا ندوووش.
ونزلها وفضل حاضنها.
ندي بخوف: عاصي، أنا خايفة.
عاصي باستغراب: من إيه يا قلب عاصي؟
ندي ببرائة: من لما نروح.
عاصي بضحك: كل حاجة بوقتها. إحنا هنا نرقص ونتبسط.
وبسأل.
الدي جي شغل أغنية "سهرنا يا ليل". ندي مش مصدقة وبصت للبنات. كلهم طلعوا ليها ولفوا حولينها.
ندي مسكت إيد عاصي: لو هفضل طول الليل أحضنه مش هشبع من حضن حبيبي. استني يا شكس بقا، استني. مش عايز حبيبي يروح مني.
عاصي بضحك: مش رايح حتة والله. أنا معاكي شهر بحاااله.
وحضنها وفضلوا يرقصوا.
نيرا مسكت إيد ندي وندي مسكت إيد حبيبة وفرحة وعزة وزهرة وحضنوا بعض: الليلة أنا أسعد إنسانة. لو هفضل متل الليل سهرانة مش هتعب برضو مدام حضنااااه.
وفضلوا يرقصوا بحب.
فرحة بهمس ليهم: العقارب جاين هنااا. شوفي قلعين إزاي.
فرحة: يلااااا عاااصي ارقص.
طلع مصطفى وكريم وأسر وفضلوا يرقصوا. والدي جي شغل مزمار عبد السلام وفضلوا يرقصوا عليه والكل انضم ليهم وفضلوا يرقصووو.
ياسمين كانت واقفة على الطربيزة لقت حد جنبها بيقولها: وحشتيني.
ياسمين رفعت عينها ليه وكان أدهم: أ أدهم؟ إنت طلعت؟
أدهم: هششش. اهدي ومتعمليش شوشرة. وأنا هفهمك كل حاجة. تعالي معايا. قاسم عارف، متقلقيش.
ومسك إيدها وأخدها معاه.
ومشي على المسرح.
غسان بضحك: ولااااا، عيزينك ترفع راسنا.
عاصي برفع حاجب: عيب عليك. دا أنا ابنك.
قاسم بضحك: ما دا اللي قالقنا.
غسان ضربه في كتفه: إتلم علشان مش عايز أضحك الفرح عليك.
واتصوروا كتير أوي.
عاصي راح مسك إيد ندي وقعدوا على الكوشة.
ندي بغضب: عايزة أرقص يا عاصي. بتاخدني ليييه؟
عاصي: يا قلبي، أنا مش عايزك تتعبي. وإنتي رقصتي كتير أوي. وبعدين البطل بتاعي جميل أوي النهارده وأنا خايف عليه من العين كدا.
ندي بكسوف: بجد شكلي حلو.
عاصي مسك إيدها وباسها بعشق: زي القمر.
ندي بصت عليه بحب: أنا محظوظة بيك. كنت مفكرة إن لما أتزوج هتجوز واحد ميعرفش معنى الحب ولا يعرف معنى الحياة. واحد أكره حياتي معاه.
عاصي بص ليها بحب: طيب واتجوزتي إيه؟
ندي بحب: اتجوزت العاصي.
عاصي باس إيدها: وأنا بحبك يا قلب العاصي.
أسر وقف في نص المسرح ومعاه الميك: النهاردة نصي التاني بيتجوز، صديق الطفولة ورفيق الأيام اللي بسببه البسمة على وشوش العيلة كلها. اسمع يلااا، أوعى تفكر إن علشان اتجوزت هتتكبر عليا. علشان أكون موضح الصورة بس واسمعني بقا.
أغمض كتف في كتف في ضهر بعض.
عاصي قلع الجاكت ورماه على ندي وراح رقص مع أسر على الأغنية ويحطوا كتفهم في كتف بعض ويرقصوا. والبنات شدوا ندي وراحوا رقصوا معاها كمان على الأغنية.
غسان راح قعد جنب نور: أم العريس قاعدة سرحانة. في إيه كدا؟
نور مسكت الجاكت بتاع البدلة بتاعته: خد البس الجاكت يا غسان. والله هتاخد برد. وإنت بتموت لما تتعب.
غسان أخد الجاكت وحطه قدامه على الطربيزة: سيبك من الجاكت. مالك قاعدة كدا؟
نور بحب: بعيد كل حياتي من تاني. بفتكر يوم فرحنا. بفتكر إني كنت شكل ندي كدا. كنت خايفة أوي من حاجات كتير. كان جوايا حاجات مش عارفة أطلعها أو أقولها. وبفتكر إني مستحيل كنت أصدق إن هتجوز وأخلف وابني النهارده بيتجوز. حاجة حلوة صح؟
غسان مسك إيدها وباسها: إحنا بنينا حياتنا من الصفر. وكل يوم الصفر بيبقى واحد. مرينا بمشاكل كتير أوي. بس نور وغسان بيقدروا عليها. صح ولا لأ؟
نور بحب: صح.
الدي جي: آخر رقصة سلوو. وأي كابل عايز يشارك يطلع على المسرح يلا.
غسان أخد إيد نور وطلع يرقصوا. وعمر ونورهان ونسمة وقاسم ويمني ومحمد وأسر وحبيبة وكريم ونيرا (اللي متغاظة بس فرحانة) وأسماء وأميرة (اللي رقصوا مع بعض).
فرحة اللي واقفة تبص عليهم: دك شلل في رخامتكم. عيال سمجها.
أسماء: البت متغاظة. تعالي نغيظها أكتر.
أميرة: إزاي أشيلك يعني ولا أعمل إيه؟
أسماء: لأ، مش لدرجة دي. نضحك ونهزر ولا هي في بالنا.
وبيتطلعوا لسانهم ليها.
فرحة بغيظ لفت وراها لقت مصطفى واقف. أيجة ليها فكرة.
فرحة راحت عنده: إزيك يا أستاذ مصطفى؟
مصطفى: إزيك يا آنسة؟ أي خدمة؟
فرحة بسرعة: ممكن ترقص معايا؟ بس بالله مترفض. علشان فعلا الموضوع مهم بنسبة ليا.
مصطفى بضحك: ماشي يا ستي.
واخدها وراح يرقص بيها على المسرح. ودا خلى أسماء وأميرة يولعوا.
فرحة رفعت حواجبها ليهم بغيظ.
مصطفى: على فكرة، واحدة فيهم طلبت مني أرقص معاها بس رفضت.
فرحة بفرحة: احلف يا جدع؟ والله لو ما كان عيب كنت خدتك بالحضن.
مصطفى بضحك: الله يستر. مش ناقصين فضايح.
وأخيراااا انتهى اليوم مع أغنية "مبروك يا حياتي قلبي" والمعازيم بدأت تروح.
ندي سابت عاصي اللي مشغول بالناس اللي بتسلم عليه وبصت لأمها اللي مشغولة بالناس برضو. ومسكت في نيرا بخوف: والنبي أوعي تسيبيني. خديني معاكي.
نيرا بضحك: ما هو مينفعش. أنا ممكن أكون معاكي في كل حاجة إلا الحتة دي. أنا كدا سلام يا باشا.
ندي: مش إنتوا صحابي؟ بتتخلوا عني ليه بقااا.
عاصي مسك إيد ندي المتلجة وراح بيها على العربية. والكل أخد مراته وعياله وروح. والرجالة ماشيين ورا عاصي وبيزمرو وبيزفوه على الطريق.
عاصي بص لندي: يا بتيييت. مالك وشك أصفر ليه كدا؟
ندي ابتسمت غصب: أنا أنا تمام. متخافش عليا. اطمن، اطمن.
ندي إيدها بترعش من الخوف والقلق. وبعد شوية وصلوا البيت وسلمت على جدتها والعيلة بدموع ولدتها اللي هتسافر مع العيلة.
عزة بعياط: أنا عايزكي. مش هعرف أنام من غيرك.
ندي حضنتها: مش إنتي كنتي بتشتمي فيا أهو؟ سبتك ومشيت.
وقالت بهمس: أعدي مع العقارب.
أسماء ونورا وأميرة سلموا عليها وركبوا الأتوبيس اللي راجع البلد.
نادية بدموع: ندي في أمانتك يا عاصي. خد بالك منها علشان خاطري. وإنتي خلي بالك منه يا ندوش. وأنا هجيلك بكرة.
ندي بدموع: طيب خليكي النهارده. مش لازم تمشي.
نادية حضنتها: هجيلك والله. بس لازم أمشي علشان علاج أختك.
عاصي باحترام وحب ومسك: في عيني يا أمي. والله متقلقيش عليها خالص.
نادية حضنتهم الاتنين وركبت الأتوبيس ومشيت بعد وداع كبير.
محمد بطبل على البوابة: وخدناها، خدناها.
الكل قال وراه: واخد يمني وطلع شقته. وهكذا عمر ونورهان بعد السلام. وعاصي أخد ندي وطلع.
نڤين أيجة من المطبخ ومعاها كوبايتين لبن ساقع: استني يا عاصي. خدي يا ندي يابنتي اشربي كوباية اللبن دي.
ندي أخدتها شربتها. وإنت يا عاصي اشربها. أخدها وشربها.
نڤين حضنتهم: ربنا يبارك ليكم في حياتكم ويسعدكم ديما يا حبايب قلبين.
نور حضنتها وقالت بهمس: متخافيش أوي كدا. اهدي. مفيش حاجة.
حبيبة ونيرا بصوت عالي: أخيرااااا. الفرح خلص يولاااد.
غسان: يلا يا عاصي، خد مراتك واطلع. وإنتي يا حبيبة إنتي ونيرا اطلعوا على فوق.
الكل طلع على بيته. وقاسم أخد نسمة وطلع. اللي نزله أسئلة هي ونور فين ياسمين.
(في شقة عاصي وندي)
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!