رواية حين تقع في الحب الجزء الرابع الفصل السادس والعشرون 26 - بقلم ندى علي حبيب

كانت ندي تقف أمام المرآة تلبس عباية استقبال وتضع ميكب بسيط، وترجع شعرها للخلف. نظرت في المرآة. ندي في نفسها بسخرية: كنت متفقة معاه إن كل اللي عملته هيكون معاه هو، كنت بقول هرقص معاه هو وهنام في حضنه هو. النهاردة أنا هقابل أهل جوزي اللي هو عاصي. فعلاً الحياة دي صغيرة أوي. عاصي دخل الأوضة وبص عليها، كانت سرحانة. بصلها باستغراب: سرحانة في إيه أوي كدا؟ ندي بانتباه: نعم؟ ولا حاجة. أنا أصلاً خلصت، يلا ننزل لهم تحت.

عاصي بص ليها بإعجاب: العباية عاملاكي شبه الملوك. ندي بابتسامة: شكراً. عاصي بص ليها بتركيز: متغيرة ليه يا ندي؟ في إيه اللي حصل؟ ومتقوليش مش متغيرة عشان باين عليكي وعلى صوتك إن في حاجة. ندي بصت ليه: لو قلت ليك مفيش حاجة مش هتصدق. بس بجد مفيش أي حاجة. أنا دخلت حياة جديدة وغريبة عني وبحاول أتأقلم عليها مش أكتر. عاصي مسك إيدها: حياة غريبة ليه يا ندي؟ مش عاجبك الحياة معايا؟ ندي بسرعة: لأ، مش موضوع مش عاجبني الحياة معاك.

موضوع إني متعودتش أبعد عن مامتي أو أختي. متعودتش أبقى بعيدة عنهم ومش عارفة حاجة وكدا، فاهم صح؟ عاصي بشك: هاتي تليفونك كدا يا ندي. ندي بتوتر: اشمعنى؟ عاوز فوني ليه يا عاصي؟ عاصي: لأ عادي، هشوف حاجة. ممكن تجيبه ليا لو سمحت. ندي جابته من على التسريحة وأدته ليه: اتفضل. عاصي فتح التليفون. أول ما فتحه ظهرت رسالة: (اتجوزتي ليه يا ندي؟ وإنتي عارفة إني بحبك وبموت فيكي. وعارف كمان إنك بتحبيني. وعارف إنك متجوزة غصب، بس لييه؟

وفقتي لييه يا ندي تكسري قلبي اللي حبك؟ علشان إيه؟ علشان كلمة غيري؟ والآخر أنا برجع ليكي أهو.) عاصي بابتسامة سخرية: بيقول لك عارف إنك متجوزة غصب وبيقول لك إنتي كسرتي قلبه. ومسح التليفون وبأعلى إيده على الأرض رزع. ندي بصت ليه بخوف: عاصي، أنا مردتش عليه ولا حتى كنت هرد. بالعكس، كنت هعمله بلوك ومش هرد. والله العظيم. عاصي بغضب وسخرية: بجد؟ كنتي هتعملي بلوك؟ إنتي شايفة منظرك وأنا بقول لك هاتي الفون؟

شايفة منظرك من الصبح سرحانة؟ والحمد لله سرحانة في كلام الباشا. ندي مسكت إيد عاصي بدموع: يا عاصي، والله العظيم ما ليا أي كلام معاه خالص. ومسحت دموعها وأخدت الفون منه. اقعد هنا كدا يا عاصي. عاصي قعد على السرير بقوة مسلوبة ووجع في قلبه. ندي مسكت الفون ورنت عليه: الو، أنا متصلة بيك أقولك حاجة واحدة. إنت ليك علاقة بيا؟ هو بضحك: إيه؟ العريس شاف الشات ولا إيه؟ ندي: لو سمحت رد على كلامي. أنا ليا علاقة بيك؟ هو بضحك:

ما أنا كنت لسه بعلقك علشان يبقى فيه أه. عاصي شد الفون من إيدها بغضب: اسمع يا روح أمك يا **** عليا النعمة من نعمة ربي لأكون مبيتك في التربة ومحاصر أهلك عليك. ودا وعد مني وهجيبك لو في آخر الدنيا هجيبك. باعت لمراتي ليه يا *****؟ أنا هعلمك تحرم تفكر في اللي حلال تفكر فيه علشان هنسفك نسف. هو بخوف قفل الفون في وشه. عاصي رمى الفون على السرير وحط إيده على وشه بغضب: الواد دا اللي إنتي حكتيلي عنه؟ ندي بعياط:

يا عاصي، أنا من يوم ما لبست دبلتك وأنا عمري حتى مفكرت غير فيك. مليش دعوة بحد غيرك. إنت جوزي. ولو مكنتش عايزة أتجاوزك مستحيل أخليك تقرب ليا يا عاصي. عاصي بص ليها بسخرية: وسرحانة في إيه من الصبح يا ندي؟ أكيد مش سرحانة في حبنا؟ ندي مسحت دموعها: مش سرحانة يا عاصي. أنا كنت بفكر في اللي حصل دلوقتي. لو إنت شفت رسالة زي دي ه تفهم إيه؟ ردة فعلك هتكون إيه؟ وإنت عارف إن انت بقيت الماضي والمستقبل يبقى إيه لازمة إنك تشك فيا؟

عاصي بصوت عالي: أنا مش شاكك يا ندي. أنا صاحي 3 يوم جواز ليا والمفروض إن عريس صاحي لقي مراتي سرحانة مش بتتكلم ولا حتى بتوجهة كلام ليا. أنا كذا فكرة جت لدماغي. عملت إيه؟ زعلها؟ طيب ممكن تعبانة؟ طيب في إيه؟ والآخر ألاقي واحد زي ابن ***** يقولها الكلام دا. والنبي قوليلي أعمل إيه؟ ندي حضنته بعياط: متعملش حاجة. الفون بتاعي معاك، خليه. مش عاوزاه. ومش عاوزاك تزعل. وأنا آسفة لو ضيقتك بحركة مني. وآسفة إن حطيتك في موقف وحش.

بس والله العظيم يا عاصي أنا بحبك إنت ومليش علاقة بأي حد في الحياة غيرك. عاصي: أنا عايز أعيش معاكي في جو هادي. نعيش في حب وحياة حلوة. مش عايز أعيش في شك وغموش وزعل ونكد يا ندي. ساعديني في دا لو بتحبيني فعلاً. ندي: هساعدك. بس تقولي مش زعلان مني يا ندوش. عاصي: مش زعلان منك يا ندوش. بس لو لقيت حاجة زي دي في فونك تاني ومن ابن *** متزعليش مني. وأنا هعديها المرة دي بمزاج. ندي بصت ليه ببرائة: أنا جعانة أوي يا عاصي.

عاصي بابتسامة مسك إيدها: تعالي يلا هننزل نفطر تحت. ونزل بيها على تحت. ولكن جواه غيرة تكفي إنها تحرق مدينة كاملة. بس استهدى بصبر لأنه متأكد إن ندي مبقاش ليها علاقة بأي حد وكل اللي يهمها هو. بساسر بضحك: يا عريس يا عريس، صباح الخير يا باشا. عاصي بضحك: صباح النور يا ابني. ابعد من طريقي كدا، عريس جديد. إنما إنت لسه عازب. ببسر بغيظ: تصدق بالله إن قلة الكلام معاك مصلحة. يعني أنا جاي وبرحب بيك وإنت مصمم تقفلني منك. ندي بضحك:

خلاص يا عاصي متعملش فيه حاجة. مهما كان إنت عريس، إنما هو زي ما قلت عازب. ببسر بصدمة: يسوااادي! إنتو الاتنين زي بعض. على رأي المثل: الحلة لقت غطاها. نور أول ما شافت عاصي وندي واقفين برا بيهزروا مع ببسر، زغرطت. نور بابتسامة: صباح الخير يا عرسانا. نزلتوا ليه؟ كنا هنطلع الأكل ليكم. ندي راحت عندها وحضنتها: لأ، القعدة بقت مملة فوق. وبعدين إحنا بقالنا يومين فوق، ننزل شوية بقى. وبعدين أنا جعااااانة يا بشر.

يا حماتي، ابنك خسسني مش بياكلني. نور وهي تحضن ندي: أخص عليك يا عاصي، مبتاكلش البت ليه؟ عاصي بص ليهم بصدمة: يجدعان، أهو هي قدرت تستعطفكم إزاي؟ دا إحنا نازلين عشان مفيش أي أكل فوق خااالص، خلصت كله. ندي: كدااااب. إنت كنت بتاكل معايا. مين اللي واكل حمامة لوحده؟ عاصي: ومين اللي واكل الخمسة التانيين لوحده؟ ندي بغرور: أنا. عاصي: أهو يعني أنا واكل واحدة. لكن إنتي خمسة لوحدك. ندي: إنت بتعد عليا الأكل؟

لأء، يبا كدا مش هنسلك سوا. وديني عند أمي يباااا. نور بضحك: إنتو الاتنين نسخة من بعض. ادخلوا تعالوا. ودخلوا على شقة نڤين. عاصي باستغراب: أبويا فين؟ ومحمد وعمر؟ نور: نزلوا يصلوا الجمعة، وأكيد راحوا على القهوة. عاصي: طيب أنا نازل ليهم. دوشة، عاوزة حاجة؟ ندي بهمس وبتحريك شفايفها: اندومي. وإنت طالع، شالله يسترك. عاصي بنفس الهمس: حاضر. نڤين: يا عاصي، إنت لسه عريس. هتنزل ليه؟ عاصي: الآه، أومال هتحبس.

ما تقول كلمة يا عم ببسر للناس دي. ببسر: يلا ننزل يا جدع. عاصي حط إيده على كتفه ونزلوا بضحك: دي الكلمة اللي مستنيها أصلاً يا كاااابير. نڤين حضنت ندي: عاملة إيه يا عروستي؟ ندي بابتسامة: الحمد لله بخير. نڤين بابتسامة: حلوة يعني؟ ندي: أيوا الحمد لله. نور: الواد عاصي زعلك؟ عرفيني كدا وأنا أسلخه. ندي بضحك: عندك بقااا الطلعة دي. دا أنا في الساخ مدرسة. نور بضحك: ربنا يهنيكم يا رب يا قلبي. ندي: يارب. أومال حبيبة فين؟ نور:

حبيبة وفرحة في البلكونة. ادخلي ليهم على ما نخلص الفطار. ندي دخلت لقت البنات في البلكونة وهي بتغني بضحك: قال لك تعيش هتشوف الندل والخاينين. وأنا شفت ناس يا زمن يتلبسوا في الرجلين. حبيبة حضنتها بضحك وكملت: معدنها قش ودش مبدأها غدر وغش. فرحة بضحك وهي تطبل ليهم على التسريحة: يبني الأصول معلش خليك من الصابرين. ارقص يا عبسلام. حبيبة: عروستناااا، عاملة إيه؟ ندي: الحمد لله بخير. فرحة بغمزة: الجواز حلو يا ندوش؟

التجربة حلوة ولا نسيبنا منه؟ ندي بتذمر: لو تقصدوا قلة أدب، هسيبكم وأطلع شقتي بقى. حبيبة وفرحة راحوا حضنوها بضحك: بنهزر يا حبيبي. المهم إنك بخير. ندي ببرائة: أنا هموت جوع يا عيااال. حبيبة: يلا تعالوا نطلع ناكل. …………………. علي القهوة. ببسر وقف ليهم في الشارع: العريسسسس يا جدعاااان. غسان بضحك راح حضنه: مبروك يا باشا. عاصي: الله يبارك فيك. قاسم بضحك: نقول مبروك ولا نسكت؟ عاصي بغرور: قول مبروك يا قاسم.

أصل لو مقولتش هيجرالك حاجة. محمد حضنه: عليا الطلاق لسانك دا محتاج قطعه. بس عسل. مبروك يا كبير. عاصي بضحك: حبيبي يا غالي. الله يبارك فيك. عمر: العريييس بتاعنا يا ناس. مبروك يا باشا. اقعد اعد واحد شيشة هناااا يا مصبااااح. غسان وهو بيشرب القهوة: إيه اللي نزلك النهارده؟ إحنا كنا فقدين الأمل إنك تنزل الأسبوع دا أصلاً. عاصي: هو الجواز حلو وكل حاجة. بس القهوة مملة فعلاً. يعني محبوس في الشقة وأنا محبش كدا.

أنا أحب أبرتع في الدنيا. إن جيت للحق. ببسر بضحك: ما هو إنت تنسى البرتعة عشان مراتك. الله يصلح حالها مش سهلة. ولو شمت عليك حاجة هتدفنك عادي. الرجالة رفعوا إيدهم: وإحنا هنكون بريئين منك ليوم الدين. غسان: وأنا مدخلش ليك في حوار أبداً علشان أكيد هتكون إنت الغلطان. ولو مش غلطان إنت لازم تطلع غلطان. من الآخر كدا. عاصي بيعطس: يخربيت كدا. الواحد أخد برد أهو بقاا. إنتوا حسدتوني؟ أنا كنت فلا. ببسر: كروناااا باينة عليك أهي.

وطلع تليفونه. استنى يااض لما نشوف أعراضها كدا. حاسس بألم في الصِدر. عاصي باستغراب: صِدر إيه يلاااا؟ أنا معنديش الكلام دا. ببسر خبطه في كتفه: الصَدر يا حماااار. مش شرط دماغك تكون شمال علطول كدا. المهم سعال. عاصي وهو بيكح: لأ لأ، معنديش. غسان: مفيش أيييه؟ إنت بتطلع في الروح وتقول معنديش. سعال. عاصي بص ليهم: أيوا معنديش. أنا أدري بحالتي. معنديش سعال. دا شوية كحة. قاسم بضحك: على أساس الكحة دي نغمة فون.

وما هي دي السعال يحمااار. عاصي: في إيه يا ناس؟ إنتوا حسستوني إن عندي مرض خطير. مش كدا. عمر: تؤتؤ. اسكتوا يا بشر وسيبوا الراجل. هو عارف نفسه. صباح: وأحلى حجر شيشة لأحلى عريس في الدنيا. عاصي: تسلم يا غالي. محمد: بلاش تشرب أي دخان بقااا. لأنك شكلك داخل على دور برد سليم. عاصي: الله يطمنك يا عم محمد. أنا على كدا أطلع أشرب سحل. عمر: والله الواحد طالع من الفرح مهدود هده. يولاد بنت كلب. غسان: طرقة بس طرقة يعني.

سيف أيجة جري ليهم: يا بااااباااا، تعالوا يلا الفطار اتحط. محمد: طيب جايين اهو. غسان قام: قوموا يلا نروح نفطر علشان هنروح الفيوم بليل. عاصي باستغراب: هنروح الفيوم ليه؟ غسان حط إيده على كتفه ومشي: أنا وعمامك وأبسر وجدك هنروح. إنت هتفضل هنا. عاصي: أيوا رايحين ليه أصلاً؟ غسان: الأرض اللي هناك عليها مشاكل وحورات. هنروح نشوف فيه إيه كدا ونرجع. عاصي: عليا النعمة الأرض دي لو اتباعت يبقى أحسن. ببسر:

جدك ماسك فيها ومش عارف السبب. ومع إنها ولا بتطلع زرعة ولا ليها لازمة. محمد بضحك: كل ما أفتكر غسان وهو بيقول السنة اللي فاتت الأرض السنة دي هطلع رز كتير أووي. قاسم بضحك شديد: ياااااني يولاد. والآخر صفت على 5 شكاير رز. يخربيت كدا. غسان بضحك: كان شكلي وحش أووي قدامكم. وطلعوا على البيت. ندي كانت بتحط الأكل على السفرة مع حبيبة وفرحة. غسان: ينهار أبيض. عروستنا اللي بترص الأكل. ندي بمرح: شوفت.

شوية وهيسلخوني وأنا لسه عروسة كدا أهو. عاصي وهو بيشاور على ندي: أقدم ليك ندي مراتي. أكبر إنسان في العالم ممكن يضحك عليك ويخليك تحس إنك بتنيمه بعلقة وتصبحوا بعلقة. ندي بصت لعاصي: فين الاندومي يا ضنا جوزي؟ ببسر: لأ، اطمنت على مستقبلك بعد ضنا جوزي دي. حبيبة: استنوا بس كدا. أنا سمعت كلمة اندومي في الحوار. ندي، إنتي هتاكلي مع مين الاندومي دا؟ ندي ببرائة: طيب ودي عايزة كلام يا بيبو؟

معاكي إنتي وفرحة والغيبوبة زهرة اللي بتنام أكتر ما بتقوم. فرحة طبطبت على ضهر ندي: أصيلة يمااا. فكرت هتعدري بينا وتاكلي لوحدك، بس طلعتي محترمة. ندي: أنا بنت ناس والله يا عيال. مش عارفة مين اللي مديكم عني فكرة وحشة كدا والله. عاصي: ولاد الحرام كتير. بقا هنعمل إيه؟ ندي: على رأيك. ولاد الحرام كتير. ببسر بضحك: لأ والله يا جماعة مش كدا. دي النيخة التانية من عاصي بجد.

ندي بابتسامة بصت لعاصي وكأنها بتقوله إنها مبسوطة إن شكله في حاجة. عاصي بادلها الابتسامة وكأنه بيقولها نفس الكلمة. ندي في نفسها بحب واضح على ملامحها: أنا فعلاً مكنتش بحب قلبك يا عاصي. ولا حتى قلبي عرف معنى الحب غير معاك. ممكن أكون لسه في بدايتي حبي ليك. بس متأكدة إن مش هندم أبداً. عاصي: ناااكل بقااا. وأحب أقول لك يا نور هانم، هتنامي وحيدة النهارده عشان جوزك رايح الفيوم. نور: أيوا ما أنا عارفة إنه رايح الفيوم. عاصي:

يعني إيه؟ مش زعلانة إنه هيبات بره؟ نور: لأ، أصل رايح في شغل يا حبيبي. يعني هو مش رايح يلعب. عاصي قعد وجنبه ندي وهو بيخبط السفرة بإيده براحة: يخسارة. كنت هموت وأخليهم يتخانقوا. نور بضحك: إنت مش وارد على جنة يا عاصي. خلي بالك. نسمة بضحك: جنة جنة إيه بقااا؟ دا لو راح جهنم يبقى ربنا كرمه. عاصي وهو بيبص لندي: شايفة بيقولوا عليا إيه؟ ندي بهمس: غيرانين منك. شوف باين عليهم إزاي. نورهان: بتقولي ليه إيه يا ندي؟ ندي ببرائة:

بقول إنكم بتهزروا معاه. عاصي بص ليها بضحك: الشيطان بيسقف جنبك والله يا ندي. وقعدوا يفطروا في ضحك وهزار. بعد فترة من الفطار. غسان: نور، اعملي شاي بقااا علشان عايزين نشربه ونمشي قبل بليل يا رجالة. قاسم: كنت لسه هقولك عايزين نمشي في النهار علشان مش عارفين الجو بليل هيبقي عامل إزاي. غسان تليفونه رن: الو. إزيك يا كبير. أدهم: بخير الحمد لله. بقولك إيه، متقلقوش على ياسمين. هيا معايا.

عرف قاسم إني معرفتش أرن عليه علشان معيش رقمه. غسان: متقلقش. إحنا عارفين إنها معاك. بس بقولك إيه، أي حاجة هتحصل رن عليها. وإحنا رايحين النهارده الفيوم في شوية شغل هناك هنعملهم. لو عايز تيجي معانا هات ياسمين هنا وتعالى. أدهم: طب دا كلام. والنبي أنا اتمرمط مرمطة مفيش ظابط اتمرمطها قبل كدا في حياته. والشويه اللي عايزهم نعدهم مع الزوجة تاخدوني فيهم العد عني ياراجل. قاسم بضحك: الزوجة اللي عايز تعد معاها دي اللي هي أختي صح؟

أدهم بغيظ في قاسم: لأ، إنتوا كدا هتعطلوني. سلام يا غسان. وقول لقاسم أختك في حضني متقلقش عليها. محمد: أنا شايف اللي بتعمله في الناس بيتعمل فيك. ندي جابت الشاي ووزعت على الكل وراحت قعدت جنب البنات. عاصي: يابت أنا متجوز علشان أبقى قاعد ومراتي جنبي، مش متجوز علشان تلزقي في أخواتي كدا. فرحة: اوباااا. بقا إنت بتغير مننا ولا إيه يا حقود إنت؟ عاصي: أنا حقود يا أنثى الكلب إنت. ندي: هي أنثى الكلب اسمها إيه؟ كلبة؟ عاصي:

يا حبيبتي لاء، اسمها فرحة. الكل ضحك عليه. ندي بضحك: قصف جبهة رزع. فرحة بغيظ وهي بتزقها: جنب جوزك بقااا يماا. عاصي مسك إيدها: تعالي يا حبيبتي، ملكيش إنتي في العنف دا. ندي بتمثيل: أيوا أنا رقيقة. خدني جنبك بسرعة. نورهان ويمني أيجوا من شقتهم جري على البيت ومعاهم لب وسوداني. نور: إيه المسلسل بدأ؟ نورهان قعدت وجابت القناة: أيوا، آخر إعلان اهو. يلا علشان هيبدأ. يمني: المسلسل هيبدأ. اسمع صوت لحد هولع فيه. سيف أيجة عند ندي:

إزيك يا عروسة؟ ندي شالته على رجلها وباسته: إزيك يا سيوفه؟ عامل إيه؟ سيف: كويس. شوفتيني وأنا في فرحك؟ أنا اللي كنت لابس البدلة الصغيرة. ندي: أيوا، أخدت بالي منك. سيف: كنت حلو صح؟ ندي باست خده: كنت زي القمر. سيف لف وشه: بوسي الناحية التانية. عاصي: إيه ياااابااا؟ في إيه؟ دي مراتي. محمد: ودي تربيتك الصالحة يا عم عاصي. عاصي: غلطان إن بدردحه ليك شوية يعني. محمد: أهو، أول ما أدردحه أدردحه على مراتك. البس بقااا. نور: هششش.

المسلسل بدأ. عايزين نسمع بقا. غسان: _رق مي *تينك. مسلسل بارد. القناة مبتشفرش أبداً طول الشتي اللي فات والاشارة زفت. السنة دي الاشارة 10 على 10. قاسم: ما هو دا بيكون من حظ النسوان. فرحة جابت بطانية كبيرة وانضمت ندي ليهم وفضلوا يسمعوا المسلسل في جو هادي وممتع وهما بياكلوا لب. …………………. في البلد. مصطفي: الجو برا شتي جامد. إيه دا؟ كريم نزل من شقته: مش كنت رايح البنك يابني؟ الجد:

ما هو بيقول لك الدنيا جايباها برا والشتي لركبك. كريم: يسوااادي. متهزروش يعني. على اليوم اللي وايح أكلم أم نيرا تشتي فيه؟ مين اللي بص ليا في اليوم؟ عزة بهمس: العقارب باينة زي عين الشمس. أميرة بغيظ: وهما مين العقارب دول يا أستاذة عزة؟ عزة ببرائة: إنتي مالك يا أميرة؟ أنا بتكلم عادي. واللي على راسه بطحة يحسس عليها. لو إنتي زعلتي وأخدتي الكلام عليكي يبقى إنتي عارفة إنك عقربة. لكن لو سكتي مش هنقول دا. سكتت. متخافيش. أسماء:

وخدة لسان أختك بالظبط. عزة: ما هي أختي أخدت لسانها منك يا سمكة. مرحناش بعيد يعني. مصطفي بغضب: بت، إنتي وهي. عليا النعمة هقوم أطقش دماغكم في بعض. وإنتي يا أميرة مش كل كلمة تاخديها عليكي. وإنتي يا وزة بلاش تتكلمي ولا تلقحي بالكلام. ويلا كل واحدة تشوف وراها إيه. أميرة، إنتي وأسماء ادخلوا المطبخ سعدوا أمكم في الغدا يلا. أسماء: أنا هبطانة ومش هدخل مطابخ. أنام. مصطفي بزعيق: أنا قولت كلمة.

واللي مش هتقوم هقوم معاها أنا يلااااا. أسماء وأميرة اتخضوا من صوته وقاموا راحوا على المطبخ. فريدة باستغراب: أميرة وأسماء في المطبخ معانا؟ خير يارب. هتتحسدوا. أميرة بغيظ: ما هو مصطفي بيه زعق فينا كأننا شغالين عنده. وبسبب بنتك يا طنط نادية. نادية: أميرة، عزة تعبانة. يعني اللي هيزعلها أنا مش هسكت ليه. مهما كان مين. محدش ليه أي علاقة بيها. ( في الصالة ) مصطفي وكريم والجد قاعدين سوا. الجد:

عايزين نروح لبنت عمكم في مصر علشان صباحيتها. كريم: ما إحنا هنروح لنيرا بكرة علشان نتكلم مع أهلها ونروح على ندي. مصطفي: بس أعتقد مش هنروح النهارده. الجو لبص أووي. الجد: لأ، هنروح بكرة إن شاء الله. وإنت يا مصطفي مش ناوي تفرحني وتتجوز بقا؟ مصطفي بحزن: ما أنا فرحتك قبل كدا. وأظن إن ربنا يرحمها. كانت خير الزوجة. الجد: ربنا يرحمها برحمته الواسعة. بس إنت لازم تتجوز يا مصطفي. إنت لسه صغير. وفرحتي اللي بجد هي جوازكم.

مصطفي اتنهد وغير الموضوع: المهم قولي يا كريم عرفت خطيبتك إن هنروح ليهم؟ كريم: قلت ليها على إن رايحين النهارده. وشكلنا مش هنعرف. يبقى نروح على بكرة بقا وخلاص. المهم هقوم أكلمها وأعرفها كدا ونخرج شوية. الجد: هتروحوا فين في البرد دا؟ كريم: هنروح نعد على القهوة شوية ونرجع كدا. علشان مبحبش قعدة البيت دي خااالص. مصطفي طلع البرندة ووقف يشم ريحة الشتي وبيفتكر فرحة وهي بتطلب منه يرقص معاها: بفكر فيكي ليه يا ست فرحة.

( في أوضة كريم ) كريم: الو نيرا، أنا صورت لك منظر الشارع قدامنا. الشتي مبهدل الدنيا. معرفش أجي النهارده خالص. نيرا: أيوا شوفت الفيديو. الشتي صعب عندكم أووي. لأ خلاص، بكرة أو بعده تعالي. كريم وهو بيلبس الكوتش: إنتي بتعملي إيه كدا؟ نيرا: كنت برتب البيت وبجهز شوية حاجاتك. كريم: طيب أنا نازل شوية كدا على القهوة وكدا أو كدا نازل بكرة القاهرة علشان في شوية حاجات عايز أعملها. نيرا: هتنزل في الجو دا إزاي يا كريم؟ كريم:

معرفش أعد في البيت. لازم أنزل شوية على القهوة. المهم يلا هينزل شوية ولما أرجع هكلمك. نيرا: ماشي. باي. وقفت. طبعاً مينفعش يتكلم معايا شوية. هيتحسد ويبقى الكاريزما بتاعته ضاعت. وحطت الفون جنبها وفضلت تحط كريم على إيديها بغيظ. جيهان: إيه يا نيرا؟ الجماعة مش هييجوا ولا إيه؟ نيرا: لسه قافلة مع كريم حالا. بيقول إن الجو شتي جامد هناك. وهيجيوا على بكرة. جيهان: طيب تمام. هروح أشوف خالك علشان مرات خالك تعبانة. وأرجع.

بس متخرجيش من البيت. نيرا: كنت عايزة أروح أشوف ندي. جيهان: كلميها. لكن متخرجيش من البيت. وقفت باب الأوضة وطلعت. نيرا: احبسيني أفضل يا غالية. هي جت عليا. ما الدولة كلها جاية عليا يا شوية ظالمة. وقالت بصوت عالي: غلطاااااااااان في حسباااااتي……………………… ( في شقة عاصي ) عاصي فاتح اللاب وبيتابع الحسابات بتاعت الشركة في الفترة الأخيرة. وشغال عطس. ندي طلعت من المطبخ باستغراب: في إيه يا عاصي؟ شغال عطس كدا ليه؟

و راحت حطت إيدها على راسه. إنت راسك دافية يا عاصي. عاصي عطس: أيوا، أخدت دور برد محترم. ندي: استني هعملك كوباية ينسون وهتاخد حباية بندول وهتبقى زي الفل. عاصي وهو بيكح: لأ، مبحبش الينسون. بلاش تعملي. تعالي بس اقعدي. ندي: والله من إيدي هيبقى حلو وهتحبه. استني بس. وراحت على المطبخ عملت كوباية الينسون وشالت اللاب. ندي: اشرب بقااا وقولي رأيك. على ما أنزل أجيب من عند ماما نڤين حباية بندول وأجي. عاصي مسك إيدها بابتسامة:

ربنا يخليكي ليا. ندي لبست الإسدال: إن شاء الله يسترك. عاصي بقرف: انزلي يا ندي الله يجحمك. انزلي. ندي ضحكت ونزلت على تحت. لقت الكل متجمع زي ما هما. نورهان: نزلتي ليه يا دوشة؟ لأ يكون الواد عاصي زعلك. ندي: يولاد، إنتوا واخدين إني حد يقدر يزعلني؟ دا أنا لوحدي بجر شكل. نور بضحك: طيب تعالي. عايزة إيه يا روحى؟ ندي: عايزة حباية بندول علشان عاصي واخد برد. نڤين جابت العلبة: خدي يا حبيبتي. بس لازم الأول ياكل حاجة.

ندي أخدت العلبة: حاضر. وطلعت على الشقة. دخلت لقت عاصي لسه مشربش حاجة. ندي بصت ليه: عاصي، هموتك لو مشربتش الكوبايه دي. اشربها على ما أجيب ليك أكل. عاصي بتعب: بجد مش هقدر آكل ولا أعمل أي حاجة. هاتي العلبه. أخد حباية. ندي باعتراض: يا عاصي، مينفعش. ولو فاكر إن هسيبك تاخد الحباية على معدة فاضية يبقى غلطان يا كبير. وقلعت الإسدال وراحت على المطبخ عملت شوربة خضار.

وعاصي دخل الأوضة لبس سويت شيرت تقيل على بنطلون صوف وراح قعد على الصالون قدام التليفزيون. ندي جابت الشوربة وراحت ليه: يلا بسم الله. افتح بوقك. عاصي: كمية الحنان اللي إنتي فيها أنا مش متعود عليها. أنا كنت بتعب وبنسى إني تعبان أصلاً. ندي: أنا بقا لما كنت بتعب كنت بعمل حوار وأعمل نفسي بموت. وشوية يغمى عليا. عاصي بضحك: ليه كدا كل داندي؟ ندي: علشان مروحش المدرسة. عاصي بتفكير: أيوا صحيح. لسه امتحاناتك قد إيه؟ ندي:

لسه 15 يوم. عاصي: طيب الامتحانات هتخلص وسنة تالتة هتاخديها منازل بدل البهدلة وكدا. ندي: عاصي، أنا كان نفسي أقولك إنت كدا بتدمر حياتي وهضيع مستقبلي وكدا. بس أنا أمنية حياتي إني أطلع من المدرسة ومتعلمش. عاصي بضحك: أصلاندي وهي بتجيب ليه الحباية: يلا خد الحباية أهي. وأنا هبدء أذاكر من بكرة علشان أعرف أعدي السنة دي. وإنت ادخل نام شوية. عاصي وهو بيبلع الحباية: هدخل أنام. وإنتي هتعملي إيه؟ ندي: هقوم أكلم ماما والعيلة.

وهاجي أنام جنبك. المهم ادخل ارتاح إنت شوية. وفعلاً عاصي دخل ونام. و ندي كلمت أمها والعيلة كله. ندي دخلت لبست دفاية سودا وسرحت شعرها وراحت نامت جنب عاصي. بس طبعاً زي العادة بتفرك على السرير. ندي في نفسها: يعني أنا بقالي يومين مش عارفة أنام عشان المكان غريب عليا. ولما أجي أنام يصحى عاصي ويصحيني. أعمل إيه؟ أصوت؟ عاصي قام بص ليها بضيق: بتفركي ليه يا ندي في السرير؟ ندي قامت وقعدت:

الصراحة الصراحة، أنا مش عارفة أنام على السرير خالص. يعني في العموم مش متعودة أنام في مكان غريب. عاصي فهم قصدها وشدها نيمها على كتفه: طيب حاولي تنامي. يمكن تنامي على كتفي. ندي: بس إنت تعبان. عاصي: نامي يا ندي. مش عايز أتنرفز عليكي. ندي بمرح: عنيف أووي إنت. ( تحت في بيت نڤين ) كان غسان ومحمد وعمر وقاسم ومنير مشيوا وسابوا ببسر. نور: ببسر مرحتش معاهم ولا إيه؟ ببسر ساب اللاب: لأ، لازم حد مننا يفضل في البيت. نور:

متخافش يا حبيبي. مش عايز أعمل لك حاجة قبل ما أطلع. ببسر بص ليها: صراحة عايزك تنزلي حبيبة لي. نور بضحك: عايز البت بليل ليه يا عاصي؟ ببسر بضحك: أوعي تفهمي صح. دا أنا عايزها علشان أوريها باقي العفش اللي أيجة مش أكتر والله. نور: حاضر. هبعتها ليك بس متخليهاش تتأخر. وطلعت على فوق. نور: حبيبة. ودخلت أوضتها. حبيبة: نعم يا ماما؟ بابا مشي ولا لسه؟ نور: بابا مشي. بس ببسر عايزك تحت علشان يوريكي باقي العفش.

انزلي ومتتأخريش تحت يا حبيبي. يالا. حبيبة نزلت على تحت جري ودخلت اترمت في حضنه: وحشتني وحشتني وحشتني. ببسر: إنتي اللي مشغولة عني على الآخر يا بيبو. حبيبة: مش كان عندنا فرح بقااا. طرقة على رأي ندي. ببسر بضحك: ومشالله العيال طبقوا عليكي اللي اتعلموه في حياتهم من ألفاظ وكلام وكله. حبيبة بضحك: حصل. المهم وريني العفش بقا. ببسر طلع تليفونه ووراه الحاجات اللي جابها. وكانت منبهرة بيه. حبيبة: حلوووين أووي بجد.

بس كدا ناقص إيه؟ ببسر: لسه المطبخ. عايزك إنتي تختاره علشان أنا معرفش في الحوارات دي بقا. حبيبة: سبها عليا يا معلم إنت. متشيلش هم. ببسر: بعد معلم دي خلاص مش شايل حاجة في الدنيا. وبما إنك معلمين وكدا. ياسلام بقا لو تدخلي تعملي كوباية شاي تبقي تشكري أووي يا زعامه. حبيبة: عنيا يا اسطاااا. ببسر: يسوااادي. اسطااااا. أنا اطمنت على مستقبل عيالي. ادخلي يا حبيبه. ادخلي.