رواية كان اسمه حبيبي الفصل الثاني 2 - بقلم الاء محمد

حضرت الفطار وروحت الأوضة عشان أقوله. سمعت بيتكلم وبيقول: _متزعليش مني يا أمل.. أنا بعمل كل ده والله عشانك، وواعدك هجبلك حقك منهم كلهم. اتصدمت من اللي سمعته. أمل! مين أمل! وياخد حقها من مين! أنا هتجنن. قررت أتصرف بشكل طبيعي لحد ما أفهم مين دي وحازم عايز ينتقم من مين. خبطت ع الباب. + الأكل جاهز يا حازم. _طيب. خرج بعد شوية وهو مكشر وبيبصلي بقرف. مقدرتش أحدد نظراته دي معناها إيه. _إيه القرف ده!

الأكل طعمه وحش وناقص ملح. أنتي فاشلة في كل حاجة كده. بصتله بصدمة وقولت: + إيه اللي أنت بتقوله ده! أنت أول مرة تقولي إني فاشلة. ده أنت.. أنت اللي كنت بتشجعني وبتقولي إني ناجحة وذكية. إيه اللي حصل لكل الكلام ده. _هه، أديكي قولتيها. كان كلام.. كلام وبس. لكن الحقيقة بقى إنك فاشلة وغبية وضعيفة. + حازم! أنت بتقول إيه! ليه كل ده! ليه بتعاملني كده! أنا عملتلك إيه عشان تعمل معايا كده!

حولت أجمل يوم في حياتي لخيبة أمل كبيرة وحزن هيفضل معلم في قلبي دايماً. ضحك وبصلي بتريقة وحقد. _هو ده المطلوب. أنا هحرق قلبك ومش هسيبك غير وإنتي متدمرة ومفيش أمل فيكي. دموعي نزلت ولسه هرد لقيت الباب بيخبط. مسحت دموعي بسرعة وروحت أفتح. لقيته مسك دراعي بقوة. _أنتي رايحة فين! خشي البسي حاجة بدل اللي أنتِ لبساه ده وأنا هفتح.

بصيت لـ لبسي باستغراب. كنت لابسة كاش قصير فوق الركبة. اتكسفت وجريت ع الأوضة بسرعة. إزاي لبست كده قدامه وإزاي نسيت أصلاً إن فيه حد معايا ومينفعش ألبس كده. اتعاملت تلقائي على إني مع حازم، جوزي وحبيبي ونسيت إني زوجة مع إيقاف التنفيذ. سمعت صوت بابا وحازم بيرحب بيه بحب واحترام. هو إزاي بيتحول كده! ده نظرته من شوية كافية تقتل كل الأمان اللي ليه جوايا. قولت بعياط: + وحشتني أوي يا بابا. & وحشتك إيه يا بكاشة! وإيه الدموع دي!

ده ليلة واحدة، أمال بعد أسبوع هتعملي إيه! ضحكت وفضلت حضناه وبعيط. مش عارفة ده عشان بابا وحشني فعلاً وأول مرة أبعد عنه ولا عشان فرحتي اللي اتدمرت بسبب حازم. : ما خلاص بقى يا بت. الله يكون في عونك يا ابني على النكد ده. ضحكت ومسحت دموعي. دي عمتو أميرة. أخيراً بقيت كويسة وهترجع لطبيعتها. جريت عليها حضنتها. + كده يا عمتو! وأنا اللي قلت إنك هتيجي في صفي. بتحرجيني قدام الأجانب. ضحك حازم وقال: _وهو أنا أجانب! بعدتني عنها:

: لا طبعاً متقصدش. متزعلش منها، هي طول عمرها دبش كده. لقيته قرب مني وشدني قعدني جنبه ومسك إيدي وباسها. _مقدرش أزعل منها. دي هي كل حاجة في حياتي. ربنا رزقني بيها بعد سنين عذاب. : ربنا يحميكوا يا حبايبي. تعالي معايا يا حياة عايزة. استأذنا منهم ودخلنا الأوضة. : ها يا حياة طمنيني. قولت بابتسامة نصر: + متقلقيش يا عمتو. الخطّة ماشية تمام.. وقريب أوي كل حاجة هترجعلك.