رواية كان اسمه حبيبي الفصل الثالث 3 - بقلم الاء محمد

ها يا حياه... طمنيني يا حبيبتي.. قولت بابتسامه نصر: متقلقيش يا عمتو.. الخطه ماشيه تمام.. وقريب أوي كل حاجة هترجعلك.. : أنا آسفة يا حبيبتي إني دخلتك في اللعبة دي.. إنتي مالكيش ذنب في كل ده.. + متقوليش كده يا عمتو.. إنتي مش عارفة إنتي إيه عندي وغلاوتك من غلاوة ماما الله يرحمها.. : تسلميلي يا حبيبتي.. المهم هو حاول يضربك أو يعمل أي حاجة.. + لا خالص.. كلام وبس وحرفيًا لسانه بيقول حاجة وعينه بتقول حاجة تانية خالص..

ابتسمت: مش عارف يبقى قاسي.. قالت بدموع: وراث الحنية من أبوه الله يرحمه.. قلبي وجعني عليه أوي.. مسحت دموعها وحضنتها: كل حاجة هتبقى تمام.. أوعدك.. حازم هيرجعلك وشركتك كمان واسمك وسمعتك.. : أنا مش عايزة أي حاجة غير حازم.. عايزة ابني يا حياه.. عايزاه يعرف الحقيقة.. + هيعرف كل حاجة.. أوعدك..

"شوية وخرجنا.. حازم صمم إن بابا وعمتو يتغدوا معانا.. كان بيضحك ويهزر معايا زي أيام الخطوبة بالظبط.. بالرغم إني عارفة إنه متجوزني انتقام.. بس كنت أتمنى إن حبي ليه يكون كافي إنه يغيره ويخليه يبص لقدام ويشوف مستقبله." & طيب إحنا هنمشي بقى.. خلي بالك من يا حياه يا حازم.. إنت واخد حتة من قلبي.. "مسك إيدي وبصلي بحب" _في عيني يا عمي متقلقش عليها.. : أو إوعى تزعلها يا حازم.. أنا اللي هقفلك عشان تبقى عارف.. ضحك وقال:

_متقلقيش يا عمتي.. ......................................... _رايحة فين يا هانم.. "وقف قدامي وهو مربع إيده وبيصلي" + لازم أنزل بسرعة.. المستشفى كلموني وقالوا إن فيه حالة خطيرة جت طوارئ.. _مفيش نزول.. + حازم بجد آخر حاجة ينفع تتعمل دلوقتي إننا نتخانق.. فيه حد بيخسر حياته ولازم ألحقه.. _قولت مفيش نزول..

حاولت أتمالك أعصابي وقولت: حازم.. أنا سكتت على كل إهانتك ليا وكلامك الجارح.. بس حاجة واحدة بس اللي مش هينفع أسكت عليها وهي شغلي.. لو سمحت لازم أنزل.. الست دي لو ماتت ذنبها هيبقى في رقبتي ورقبتك.. "سكت ودخل الأوضة ورزع الباب.. بصيت للأوضة بحزن ونزلت بسرعة.. كانت حالة صعبة أوي.. قعدت 4 ساعات في العملية وأخيرًا خلصت ودخلت مكتبي أرتاح.. رميت نفسي على الكنبة وغمضت عيني بتعب وفجأة لقيت الباب اتفتح"

* عملتيها يا بنت اللذينة وخطفتي الأنظار تاني.. + يا ساتر يا رب.. الله أكبر في عينك.. وأنا أقول حياتي بايظة ليه أصلًا أثاري حاطة عينك فيها.. * فين البايظة دي يختي.. من أسبوعين فرح في أرقى مكان في مصر وانهاردة عملية صعبة وتقيلة ونجحتي فيها.. + يا بت إيش حال ما إنتي عارفة إن جوازي فيك أصلًا وشهر وكل حاجة هتخلص.. أومال لو مكنتش حكالك كنتي قولتي إيه..

* ولو ولو اسمه جواز برضه.. لأ وايه مع راجل كل بنات البلد تتمناه.. بت بعد ما الحوار يخلص ويعرف كل حاجة أبقى رشحيني ليه والنبي.. + يختي يفضلوه وعليه ألف بوسة.. وبعدين إنتي بتعاكسي جوزي قدامي يا بت.. نهار أبوكي أسود.. * آآآآه مش كان من شوية جواز فيك وهينتهي.. بصتلها بغيره وضحكت: + لمي نفسك يا ليلي هااا.. أنا مش ناقصاكي.. المهم كنت عايزة أديكي اسم كده تخلي أخوكي يجيبلي كل المعلومات عنه.. * أشطا.. طيب فيه جديد؟

+ قبل ما أجي على طول عمتي كلمتني وقالتلي إن الظابط اللي متابع معاها قالها إن شريف شهاب عنده شحنة مخدرات جديدة وهما عارفين كل حاجة عنها وبيخططوا يمسكوه متلبس ويخلوه يعترف بكل اللي عمله وساعتها حازم يعرف الحقيقة.. * طيب يا بنتي وليه إنتوا مقولتش ليه كل حاجة وخلاص..

+ مكنش هيصدق يا ليلي.. حتى لو عملنا DNA وأثبتنا إن عمتي هي أمه الحقيقية.. مش هيصدق إن شريف خطفها منه ولبسها تهمة بوظت سمعتها.. دي قعدت 10 سنين تتعالج في مصحة نفسية بسبب اللي حصلها.. * يعني كل الأدلة اللي معاكوا دي ومش هيصدق!! ده يبقى حمار ومغفل بشكل..

+ بس يا بت متقوليش عليه كده.. وبعدين طبيعي ميصدقش.. حطي نفسك مكانه.. لو حد جه قالك إن أبوكي مش أبوكي وخطفك من أهلك الحقيقيين وتاجر مخدرات وسلاح وجاي في أي حاجة شمال هتصدقيه.. * أما يبقى حد معاه أدلة.. وفيه تحاليل ممكن أتأكد بيها وصور وحاجات كتير مش هيبقى قدامي اختيار أصلًا غير إني أصدق..

+ ده عندك إنتي.. شريف كان عامل حساب يوم زي ده.. وربي حازم بطريقة قاسية وعلمه يشك في كل اللي حواليه وميصدقش حد غيره.. بس تعرفي.. حازم حنين أوي وجواه كمية حب تملي العالم ده كله.. كنت أتمنى يكون بيحبني زي ما بحبه.. كنت أتمنى كل حاجة تكون حقيقة.. ضحكت وغمزتلي: * سيدي يا سيدي.. دا إنتي واقعة أوي.. طيب على الأقل مكنتيش اتجوزتيه يا موكوسة عشان الموضوع ميبقاش صعب عليكي أوي كده..

دموعي نزلت: + معرفتش أقول لأ.. رغم إني عارفة إنه كان بيعمل كل ده عشان أوافق أتجوزه وأنتقم من بابا فيا.. بس حبيته وحبيت المشاعر المزيفة اللي حسسني بيها.. "قامت حضنتني وفضلت تطبطب عليا" * متزعليش يا قلبي.. كل حاجة هتبقى تمام إن شاء الله.. وربنا هيعوضك.. + يارب.. أنا همشي بقى عشان اتأخرت.. وإنتي تابعي الحالة ولو حصل أي حاجة كلميني.. * خلصانة.. خلي بالك على نفسك..

"خرجت برا المستشفى وأنا حاسة بوجع في قلبي عمري ما حسيت بيه.. أكبر غلطة عملتها في حياتي إني حبيته.. مكنش لازم أسمح لنفسي أقرب منه وأحبه.. كان لازم ألتزم بالخطة وأقرب منه كصديقة وبس.. بس أنا اللي غلطانة وأنا برضه اللي هدفع تمن غلطتي.. فوقت على صوت السواق وهو بيقولي وصلنا.. دخلت البيت وأول ما دخلت اتصدمت من اللي شوفته.. + مين دي يا حازم.. قال ببرود: _دي ناردين خطيبتي.. "بصتلها لقيتها بتبصلي باستهزاء فقلت بلامبالاة"

+ خطيبتك!!! إممم طيب يا حبيبي مش تقولي إنك هتجيبها.. على الأقل كنت جبت غدا معايا.. على العموم إنتي مش غريبة يا حبيبتي المطبخ موجود ممكن تعملي أي حاجة سريعة أو تطلبوا دليفري.. "قربت منه وبصتله بحب" + حبيبي أنا هدخل أنام شوية.. قعدت وقت طويل أوي في العمليات فمحتاجة أرتاح..

"بوسته في خده وجريت على الأوضة.. مكنتش عارفة أتنفس.. معقولة حازم يعمل فيا كده.. معقولة يكون عايز يكسرني كده.. قعدت أعيط كتير.. لحد ما سمعت باب الشقة اتقفل ففهمت إنها مشيت ومفيش ثواني ولقيت باب أوضتي بيتفتح وحازم بيبصلي بغضب" _إنتي إيه اللي عملتيه ده؟! قولت ببرود: عملت إيه؟! _كلمتي ناردين بالطريقة دي.. ودخلتي الأوضة عادي كده ولا كأنك شفتي واحدة غريبة مع جوزك.. إنتي إزاي باردة كده؟!

+ أنا مقولتش حاجة غلط.. هي مش ضيفة برضه موجودة في وقت غدا.. وبعدين عادي أنا مش معتبرة نفسي متجوزة أصلًا.. فبراحتك.. _نعمم!! مش معتبرة إنك متجوزة إزاي يعني؟! + واحدة يوم فرحها جوزها قالها مش بحبك وكنت بخدعك وبمثل عليكي وإنها مجرد خدامة.. هتعتبر نفسها متجوزة!! حازم إنت نهيت حياتنا من قبل ما نبدأها.. ف أنا بعتبر نفسي مطلقة بس ناقص إمضتك وإمضتي على حتة ورقة وخلاص.. ربع إيده قدامه وقال:

_ومين قالك بقى إن هطلقك.. ده بعينك.. وأبعد ليكي من نجوم السما.. + هتطلقني يا حازم.. يأما هلجأ للخلع.. أنا مش عيزاك.. قرب مني وقال بهمس: بس أنا بقى عايزك.. بمزاجك أو غصب عنك.. "بعدت عنه ولسه هرد لقيت الموبايل رن" + الوو... مين حضرتك.. بتقول إيه!!!