رواية كبير الجبل الفصل الأول 1 - بقلم زهرة الربيع

أجنبية يا جدتي، دي هقعدها هنا كيف في الجبل وسط الذيابة والهجامة؟ ده الرجالة هنا ممكن يقطعوها، أحميها كيف يعني؟ جدته وقفت تتكئ على عصايتها وقالت: ولو محمتهاش أنت، مين ممكن يعمل كده يا دياب؟ ده أنت كبير الجبل كله. دياب قال بسرعة: أيوه يا جدتي، ماشي، بس العيال هنا اللي مبرشم، واللي خمورجي، ومافيش حد واعي للي بيعمله. ودي أجنبية، يعني فيها سين وجيم. ليه الورطة دي من أساسها؟ جدته قالت:

يا ولدي، المحافظ بذات نفسه كلمني. البنية جاية تعمل بحث عن الجبال وحياتها. هتاخد شوية صور وتعاوود. واختارولها المكان ده عشان وجودك فيه، ما تصغرناش عاد. نقولهم إيه، ما نقدرش؟ دياب قعد بضيق واتنهد وقال: لا يا جدتي، أكيد نقدر. وربنا يستر. هيه هتيجي ميته؟ جدته قالت بابتسامة: زمانها على وصول. دياب بص لها بغيظ وقال: ده أنتِ حازمة أمرك يا جدتي. زمانها على وصول، ويادوب بتقوليلي يعني؟ تحصيل حاصل. جدته ضحكت وقالت:

هتكبر على جدتك ولا إيه؟ ده أنا اللي علمتك كيف تكون جبل ساكن جبل. ولا عندك رأي تاني؟ دياب ابتسم وهز راسه بيأس وباس إيدها وقال: معنديش يا ريسة حليمة، معنديش. أنا هطلع أتكلم مع الرجالة وأفهمهم، وأحاول معاهم إنهم يتستروا لما تيجي. جدته ضحكت وهو طلع. وقف قصاد الرجالة وبدأ يلف قدامهم وهو بيوجه لهم التعليمات. قال بحزم: لو أي واحد منكم هوب ناحيتها بس، ولو فكر يدوس على ضلها حتى، هيبقى بيقف قصادي أنا. فهمتوا؟

الرجالة قالوا بصوت واحد: فهمنا يا ريس دياب. دياب قال بحرج: وكمان... احم... هتلاقوها واقفة كده ولا كده، فيه حاجة وهيه مستعجلة نسيت ما تلبسها. ملناش دعوة. سايحة وبتسيح من الشمس، وضروري تخفف هدومها. فهمنا؟ قالوا بصوت واحد: فهمنا يا ريس دياب. دياب قال: لو لا قدر الله بقى، هيه جاتها ضربة شمس في نفوخها، وعجبها واحد منكم وكلمته، هيعمل إيه؟ نعمل كيف ما عمل سيدنا يوسف؟ الرجالة قالوا بصوت واحد: هو عمل إيه يا ريس؟

دياب بص لهم بدهشة وقال: عمل إيه يا ريس؟ كلكم معرفينش عمل إيه؟ لا دي قصة طويلة. المهم، لو هيه زودتها واتمايعت على واحد منكم، يسترجل كده ويلم نفسه ويوقف صنم، لا يهاجم ولا يوقف جون. فهمتوا؟ أنا واثق فيكم، رجالة الجبل رجالة وسمعتهم سبقوهم، وأنا متأكد مهتصغروناش مع الأجانب. كل اللي ساكنين الجبل أنا ضامنهم برقبتي. بس قطع كلامه لما شاف شاب في العشرينات بلبس مختلف عنهم وجاي جري. وقال برعب: الحقوني! الحقوني يا جماعة...

الحقوني، أخـدوها، أخـدوها! دياب قال باستغراب: أنت مين يا جدع أنت، ووصلت هنا كيف؟ ومين أخد مين؟ الشاب قال بزعر: روتانا، روتانا، خدوا روتانا! دياب قال باستغراب: روتانا؟ روتانا دي مش قناة في التليفزيون باين؟ الشاب قال بسرعة: تليفزيون إيه؟ روتانا دي ماي فريند جاية علشان تصور هنا. ومقطوعين الجبل مسكوها وخدوها مني! دياب اتسعت عينه بصدمة وقال: الأجنبية ووووو