رواية قدري الأسود الفصل التاسع 9 - بقلم غادة رجب

لقينا عمر بيتكلم وكل الناس متفاجئة. كان بيقول: "رحاب يا أجمل وأرق بنت شوفتها في حياتي. يا فرحة يا بنتي الأولى، يا أول حب شوفته على إيدك. أول مرة بنت تخطف قلبي، وإنتي دايماً خاطفة قلبي. يا أجمل بنت تتكسف وتجري تستخبي في أي حاجة تقابلها. يا كتر بنوتة بتحب الأكل رغم إنك رفيعة زي العصفور. أنا معرفش أنا إزاي بقولك كده قدام كل الناس، بس تقبلي تتجوزيني؟ تقبلي إني أخطف قلبك زي ما إنتي خاطفة قلبي كده."

ولقيناه نزل على رجله وماسك في إيده علبة بيتزا. آه والله، بيتزا. أصل رحاب مالهاش في الورد ومحن البنات. رحاب بتوتر وكسوف: "إنت إنت بتقول إيه؟ عمر: "بقول تقبلي تتجوزيني." رحاب: "بقولك صح يا عمر، هي البيتزا دي بإيه؟ عمر: "بالفراخ زي ما إنتي بتحبي، والكاتشب حار كمان." رحاب: "تعرف يا عمر إنك أخدت قلبي بالبيتزا." عمر: "طب افتحيها، ممكن تلاقي حاجة تاني تاخد قلبك." رحاب: "مش مهم حاجة تاني، هي البيتزا كفاية." عمر:

"يا بنتي فكك من الكرش شوية وخليكي في الرومانسية." وبالفعل رحاب فتحت البيتزا، لقت جواها خاتم روعة أوي. رحاب: "ياسطا، الراجل بتاع البيتزا نسي الخاتم جواها." عمر: "ياسطا، ده أنا اللي نسيت قلبي جوه." "احم احم، يعني إيه؟ يعني بتغريني بالبيتزا علشان أوافق عليك؟ عمر: "لا لا خالص، إنتي كده كده توافقي أحسن. أعملك قضية تعدي على قلب ظابط أثناء عمله." رحاب: "أتعدى براحتي، عندك مانع؟ عمر: "لا طبعًا، تحت أمرك يافندم."

عدى اليوم وكنا مبسوطين فوق الوصف والله. كنا أول مرة نحس بالفرحة دي. يا آه، أخيرًا فرحنا من قلبنا. ***** "عامله إيه يا كرشوا؟ "يا أختي، بكرة تحملي وتكوني كرشوا زيي كده." "آه يا بت يامي، هي بنوتة ولا ولد؟ "إنتي لو مهتمة كنتي عرفتي لوحدك ياهانم." "حقك عليا، إنتي عارفة مشغولين بتجهيز فرحنا." "آه، فكرة حلوة إنك إنتي ورحاب تتجوزوا في يوم واحد دي." "طبعًا يابنتي، هتكون الفرحة فرحتين."

"ربنا يفرحكم دايماً ياقلب أختك، تستاهلوا الفرح." "آه، هتفضلي ترغي كده كتير ومش ناوية تقولي بنت ولا ولد؟ "لا يا ستي، ولد اسمه زين." "لا يا ماما، هنسمي جاسر." "لا، معتز عايز زين للأسف." "يا أختي زين زين، كده كده هيتجوز بنتي." ولسه بنتكلم ولقينا رحاب جاية، قابضة وشها علينا. ***** "خير يا خري صبري، زعلانة ليه؟ "استاذ عمر يا ستي." "ماله سي عمر؟ "مش عايز يسمع مني إن النيش مالهوش لازمة في الشقة ومصاريف على الفاضي."

"فعلاً مالهوش لازمة، جدعة يارحاب، عاقلة طول عمرك." "وسي عمر رافض ليه؟ "علشان أنا عايزة بدال النيش حاجة تاني." "عايزة إيه؟ "عايزة مرجيحة في الصالة مكان النيش." "تصدقي إنك عيلة ومش متربية." "يابت، أنا هفضل طول عمري عيلة أصلًا." ***** "بتعيطي ليه يارحاب؟ حد يعيط يوم فرحه كده؟ "طب ما إنتي كمان بتعيطي يارحمة، وانهاردة فرحك."

"أنا بعيط علشان فرحانة بيكي يابت. أول مرة أحس إني أم عروسة، وإن بنتي هتتجوز وهيكون ليها بيت وحياة، هتكون مسؤولة وكبيرة وتشيل مسؤولية." "تعرفي إن دي أول مرة أبعد عنك وأسافر؟ طب لما أزهق أجري أقول لمين؟ يلا نخرج طيب؟ لما أتعب مين هيفضل جنبي؟ طب ولما حد يضايقني مين هيجيبلي حقي؟ ولما أكون مخنوقة مين هيجيبلي شوكولاتة؟ ولما أخاف مين هياخدني في حضنه؟ أنا خايفة أوي يارحمة."

"بس هبل، عمر بيحبك وهيعملك كل ده والله. وكمان اتصلي بيا هتلاقيني في وشك." حضنتها وطمنتها أوي. أنا فرحانة بيها. نزلنا القاعة، لكن حصل اللي مكنش متوقع. يافرحة ماتمت.