رواية قدري و نصيبي الفصل السادس 6 - بقلم السيد محمد

وفجأة يظهر شخص، ويحمل في يده أوراق ليضعها أمام فداء. فداء بخضة: إيه ده يا زيد؟ شكلك هتدبسني وهتخليني أحاسب على الليلة ولا إيه؟ زيد بضحك: يا بنتي انتي إيه؟ مبتبطليش، اهدي شوية. فداء: إيه الورق ده يا برنس؟ زيد: ده يا ستي عقد المكان ده، كتبته باسمك. فداء تنحت: إنت قولت إيه؟ زيد: بقولك كتبت المكان ده باسمك، وافتحي العقد وشوفي. فتحت فداء العقد لقيته فعلاً باسمها. فرحت فداء قوي.

فداء: أنا مش مصدقة نفسي يا زيد، بس إنت بتعمل كل ده ليه؟ زيد: بحاول أرضيكي يا فداء، وأنا قولتلك سيبلي نفسك يوم وأنا هوريكي قدراتي. فداء بصوت منخفض: لا دا لو كان كده أسيبلك نفسي عمري كله. زيد: نعم؟ بتقولي إيه؟ فداء: لا ولا حاجة، متأخدش في بالك. يتعشى زيد وفداء على ورد وشموع وضوت موسيقى هادئ، ويخلصوا السهرة بتاعتهم ويروحوا. فداء لزيد: مش عارفة أشكرك إزاي على الخروجة دي، بجد انبسطت.

زيد: أنا اللي انبسطت بصراحة، بقالي كتير مخرجتش خروجة زي كده، من آخر مرة كنت مع مليكة. فداء تبص له بتجحيرة كده وبصوت كله غيظ: ادخل نام يا زيد بدل ما أخليك تنزل الأكل اللي لسه طفحاه ومتتهناش بيه. زيد: لا أنا أروح أنام أحسن. تاني يوم تصحى فداء على صوت زيد في الريسبشن وهو بيتكلم في الفون. زيد: معقولة إنتي ومليكة جايين في الطريق خلاص؟ اعملوا حسابكم إن هعزمكم في مطعم ونتعشى سوا، هستناكي، يلا سلام.

فداء بغيظ: وليه يا زيد تعزمهم في مطعم؟ دول ضيوف برضه، هاتهم هنا وأنا هجهز عشا بنفسي، قال تعزمهم في مطعم قال. زيد باستغراب: إيه ده؟ إنتي طلعتي بتعرفي تعملي أكل وكنتي بتشتغيني ولا إيه؟ فداء: مترغيش كتير ويلا علشان أروح أجهز الأكل. زيد: وأنا هروح علشان ألحق أجيبهم من المطار. فداء في سرها: يارب العربية تتقلب بيكم وهما يموتوا وإنت بس اللي تعيش. بعد شوية زيد يرن على فداء ومبتردش. زيد لنفسه: دي شكلها ولعت في نفسها ولا إيه؟

وفي وقفته تدخل عليه جيجي ومليكة. جيجي دي بنت في سن فداء تقريباً، شكلها جميل وبشرتها بيضة وعيونها ملونة، ولابسة لبس ضيق وقصير وشايلة على إيدها قطة. بنت ناس قوي. زيد أول ما يشوفها يروح عليهم ويمسك القطة. زيد: وحشتيني قوي يا مليكة. جيجي: تصدق أول مرة أشوفها فرحانة كده من يوم ما سبتها. زيد: إزيك يا جيجي؟ إيه أخبار الشغل والشركة؟ جيجي: يعني ينفع لسه جاية من سفر وتعب وتكلمني عن الشغل؟

طب مش ونتغدى ونرتاح وبعد كده نتكلم في الشغل؟ زيد: عندك حق، يلا هنروح ونتغدى، بس المرة دي مش هنروح مطاعم، فداء علمتنا أكل وهنروح ونتغدى من إيدها. جيجي: هيا اسمها فداء؟ زيد: أه، هيا زمانها جهزت الأكل دلوقتي ومستنية علشان تسلم عليكي. جيجي: يلا بينا، أنا كمان نفسي أشوفها وأشوف ذوقك. بعد شوية يوصلوا البيت. زيد: فداء، إنتي فين يبنتي؟ إحنا جينا، تعالي سلمي على الضيوف.

في الوقت ده تخرج فداء من المطبخ وأول ما تشوف جيجي تتصدم من لبسها القصير والضيق. فداء: مين عروسة المولد دي؟ زيد بضحك: دي صديقتي جيجي يا فداء، هيا اللي شايلة كل شغلي هناك لما بكون هنا، ودي بقى مليكة اللي بحبها قوي. فداء في سرها: بقي اللي كنت بغير منها طلعت قطة؟ يعني مكنش ينفع لين تبقى مكانها؟ زيد: ودي فداء مراتي يا جيجي. جيجي: هاي يا فداء، كيفك؟ وتمد إيدها لفداء. فداء واقفة ومتنحة في لبس جيجي ومش بترد.

زيد: يا فداء سرحانة في إيه؟ جيجي بتقولك إزيك وبتسلم عليكي. فداء: آه، الحمد لله تمام، إنتي عاملة إيه؟ جيجي: الحمد لله كويسة. زيد: جيجي مولودة في إيطاليا يا فداء، بس عايشة في الإمارات، وده السبب اللي خلاني أتعرف عليها هناك. فداء: تعرف تسكت يا زيد؟ هو أنا سألتك في حاجة؟ ولا هي عينتك المتحدث الرسمي ليها؟ زيد: أنا بقول يلا ندخل على السفرة علشان ونتغدى. فداء: اتفضلوا على السفرة وأنا هجيب الأكل من المطبخ.

جيجي: أنا هاجي أساعدك يا فداء. فداء: لا متخافيش يا ست جيجي، أنا هعرف أجيبهم لوحدي، أنا ست بيت شاطرة، ولا إيه رأيك يا برنس؟ برنس: أه يا فداء، بصراحة أنا مشوفتش في جمال أكلك. (وفي نفسه يقول: دا أنا بطني اتهرت من أكل المطاعم) تدخل فداء بالمطبخ وتأتي بالأكل، ويجلس زيد وفداء وجيجي على السفرة. فداء: يووه، أنا نسيت المية، هقوم أجيبها.

زيد: لا والله، منتي قايمة، أنا هروح أجيبها، كفاية تعبتك والنهاردة وخليتك عملتي الأكل. ويقوم زيد ويدخل المطبخ. جيجي لفداء: بصراحة برافو عليكي يا فداء، قدرتي توقعي زيد وتتجوزيه بسهولة وتعملي اللي أنا وغيري معرفناش نعمله في سنين. لسه فداء هترد عليها، قطعتها جيجي بالكلام. جيجي: أنا مستغربة إزاي زيد يتجوز؟ دا كان رافض فكرة الجواز دي خالص بعد وفاة مراته، بس شكلك قدرتي تسيطري عليه وتخليه يتجوزك.

ليأتي زيد بالمياه ويجلس تاني على السفرة. فداء اتصدمت من كلام جيجي ومش قادرة تصدق اللي سمعته من جيجي. زيد: فداء مالك يا قلبي؟ سرحانة في إيه؟ فداء: لا يا زيد، مفيش حاجة. فداء في نفسها: يعني طلعت متجوز قبل كده وكمان كان رافض الجواز؟ امال اتجوزني ليه؟ أنا حاسة الموضوع فيه حاجة غريبة ولازم أعرفها. زيد بصوت عالي: فداء! إيه يبنتي؟ إنتي في غيبوبة ولا إيه؟ فداء: إنت بتكلمني أنا؟ معلش آسفة، مخدتش بالي.

وبدأوا ياكلوا، وفداء منزلتش عينها من على عين جيجي، ونفس الأمر كمان جيجي منزلتش عينها من على فداء. جيجي لفداء: إنتي شغالة إيه بقا يا فداء؟ فداء: أنا لسه متخرجة من سنتين من كلية تجارة. زيد: بجد؟ طب كويس خالص، دي فرصة بقى تمسكي حسابات الشركة بتاعتي. جيجي يبان عليها الزعل: بس الحسابات دي محتاجة خبرة يا زيد وشهادات، وفداء أكيد مشتغلتش الفترة اللي فاتت دي، فأنا بقول مينفعش نلبسها في منصب زي ده.

فداء بعصبية: أظن إن حضرتك منزلتش من بطن مامتك سكرتيرة يا أستاذة جيجي. زيد يحس إن الأمور هتشد بينهم فقرر يدخل. زيد: تسلم إيدك يا فداء يا حبيبتي، الأكل تحفة. جيجي: أه بصراحة أكلك طعمه جميل يا فداء. تعرفي يا فداء أنا معايا شهادات خبرة من كذا دولة وبتكلم تلت لغات، وإنتي بقى معاكي إيه؟ فداء: أنا معايا ربنا وأربع ملايكة. زيد ينهار بالضحك على فداء. فداء بغيظ: أنا قايمة عن إذنكم. وتدخل فداء المطبخ وفجأة،،،،،،،،،