رواية خادمة الصقر الفصل السادس والستون 66 - بقلم يوستينا سامي

خالد بحدة: هتخدي الشوكولاتة ولا أديكي بالبوكس في وشك. نغم بصدمة: خلاص هاخدها، براحة شوية الله. إيه لازمة التبريق أنا مش عارفة. كريم بضحك: أحبك وأنت مسيطر يا خالد والله. خالد بضحك: لا أنا أعجبك أوي والله. نغم ابتسمت وعدت اليوم عشان متنكدش عليه، وقضوا اليوم مع بعض لحد ما وصل عساف ومعاه همس. أول ما دخلت همس جريت على والد عساف وحضنته: وحشتني أوي يا أونكل بجد. والد عساف: وأنتي أوي يا همس، ليه الغياب ده كله يا بنتي.

همس بحرج: معلش بقى سامحني، والله ده أنا كنت هموت وأنزل مصر عشان أشوفك أنت، أنت وبس على فكرة. عساف: احم إيه نحن هنااا، نلم نفسنا وبلاش أحضان عشان أنا بغير هااا. كريم بفرحة: والله أنا ما مصدق إنك رجعتي يا هموس، هنا في واحد كان بيموت حرفياً. عساف بحرج: كن في نفسك وبعدين اسمها همس. و أتلم عشان أنت اللي بتزعل على فكرة ولا إيه رأيك نسأل ياسوو. كريم بضحك: خلاص يا عم، أنا آسف همس أهو. تمام كده. ...

وفضلوا يتكلموا مع بعض وعساف أخد صقر ودخل بيه المكتب. *** في مكتب صقر... صقر بضحك: ممكن أفهم ساحبني ليه كده، ده إحنا خلاص 10 دقايق وهنطفي الشمع. عساف وهو مبتسم: ما تستهبلش يا صقر، أنت عارف أنا جايبك هنا ليه، هو أنت فعلاً روحت لهمس عند خالها عشان تحاول ترجعها عليا.

صقر ابتسم: آه حاولت ومش مرة مرتين، ممكن تزعل إني اتدخلت في حياتك بس أنا كان نفسي أشوفك فرحان زينا وحياتك كاملة، كنت أنت الوحيد اللي حياتك بايظة يا عساف، ما كنتش قادر أشوفك كده، أنا آسف لو اتدخلت بس... عساف قاطعه في الكلام وحضنه جامد: حقيقي أنت أغلى واحد عندي في الدنيا، مش بس عشان أنت السبب في كل حاجة حلوة حصلتلنا، لاااا، أنت أطيب بني آدم في الدنيا يا صقر.

صقر بفرحة بادل عساف الحضن: أنتوا إخواتي وأقرب ناس ليا، ونفسي أشوفكم مبسوطين وأنا ما عملتش أي حاجة زيادة عن الطبيعي على فكرة. وضحك صقر وحاول إنه يفك الموضوع. وقال له: اسكت مش أنا اديت أبوك 300,000 اللي أنا كنت سلفهم منك. عساف ضحك من قلبه: طب كويس إنك رجعت الفلوس اللي عليك بقى وبطل تستلف من حد تاني، السلف تلف يا ابني.

صقر بجدية: عساف اوعدني إن مفيش حاجة تخليك تبعد عننا، إحنا عيلتك التانية، افتكر إني دايماً في ضهرك وقت ما تحتاجني. عساف: ربنا يخليك لينا. ضحك عساف بتريقة: الفرق بينا حوالي سنة وبجد بعتبرك أخويا الكبير، أنت رهيب يا صقر بجد. صقر ابتسم بفخر: يا ابني مش بالسن، وبعدين يلا عشان نطفي الشمع. *** في الجنينة. اتجمعوا كلهم وكانوا واقفين مستنيين جاسر وعزة. الحديدي وهو ماسك معاذ: الساعة بقت 9 وجاسر موصلش، ما حد يكلمه.

صقر بغيظ: طب إيه رأيكم بقى إنه لو ما جاش في خلال 10 دقايق والله يطفي الشمع عشان ده عيل رخيم بجد. الحديدي: اهدي يا صقر معلش، الغايب حجته معاه. صقر: أهدي إيه بس يا جدي، ده عيل بارد هو ومراته. قمر بتحاول تهديه: خلاص يا صقر، جاسر زمانه جاي هو وعزة، وبعدين ما أنت عارف إن عزة حامل وصعب تمشي بالعربية بسرعة. نغم: آه وبعدين هدي أعصابك أحسن تطب ساكت، إيه عشان اتأخر شوية هاتنكد علينا إحنا.

صقر بغيظ وهو بيبص لخالد: اسكت مراتك يا خالد بدل ما أديك التورتة دي في وشها، أنا مش ناقص. خالد وهو شايل كارمن وبيلاعبها بهزار: طب اعملها عشان أسبسك أنا الجاتوه في وشك، نغم اعملي اللي أنتِ عايزاه يا حبيبتي، هزقي الناس كلها ولا يهمك، أنا أصلاً فقدت الأمل فيكي. نغم ضربته بغل في كتفه: كده برضوا. ياسمين بضحك خبطت نغم على دماغها: اسكتي بقى شوية، إحنا آسفين يا صقر، كمل زعيق.

كريم بحده: ياسمين اسكتي ده ممكن يبلعنا، وخذي امسكي ابنك اللي شغال عض في أمي من الصبح ده. وأنت يا عم صقر ما تطفي الشمع بقى ومتزهقناش، ده أنت رخيم صحيح، يعني شارط إن كلنا نبقى متجمعين ونسمع كلامك وفي الآخر تزعلنا، دي مش عيشة، أقولك ألغي رحلتشييي. وقعدوا يضحكوا كلهم جامد وصقر اتغاظ: كده طيب. ... ولسه هيولع الشمع دخل جاسر هو وعزة اللي كانت حامل في ولد وعايزين يسموه أدهم، وفي السابع.

جاسر دخل وهو رافع إيده: أنا آسف على التأخير، والله كله من البنت دي هي السبب. خالد بضحك: خلاص قرب اقف جنبي بلاش تقرب من صقر دلوقتي عشان هيطلع نار من بوقه، ويلا نطفي الشمع. وفعلاً اتجمعوا كلهم واحتفلوا بعيد الميلاد وطفوا الشمع وقعدوا يهزروا مع بعض كلهم. وصقر بعد عنهم شوية والحديدي راح وراه. الحديدي: مالك فرحان مش كده.

صقر ابتسم: كنت فاكر السعادة بتتقاس بالفلوس والمكانة والاحترام، طلعت غلطان، عرفت إن السعادة بتتقاس بحب الناس، أنا بجد النهارده في غاية السعادة يا جدي. الحديدي بفرحة: ليه يا صقر، وإشمعنى النهاردة.

بص صقر ناحية إخواته بفرحة: إشمعنى عشان خالد بقى عنده أكبر سلسلة مطاعم ومتجوز وعنده بنوتة وفرحان، حياته اتغيرت قوي بجد أنا فخور بيه أوي، وكريم استقر في مصر ورجع الشركة معايا متجوز ومرتاح مع ياسمين، حتى جاسر وعزة واكتملت النهاردة بعساف، همس أخيراً رجعتله. بعد كل ده بتسألني فرحان ليه. الحديدي

قرب منه وحط إيده على كتفه: عرفت أبوك اختارك ليه تبقى أنت الكبير من بعده، عشان واخد حكمته وعقله مع نقاء قلب والدتك، إينعم كان فيه حاجات مشوشة على النقاء ده، بس أنت قدرت تغير نفسك. وسابه الحديدي ووقف صقر وهو بيبص ناحيتهم بفرحة وفخر. ولكن الآن أدركت معنى الحب بوجود عائلتي بجانبي وأصدقائي، أصبحت ابتسامتي على وجهي أكثر بوجودهم جانبي. نعم، الفلوس ليست كل شيء، أحياناً الفلوس الذي تكون معنا تهلك حياتنا وتجعلها ألم ووجع قلب.

ولكن حب العائلة هو الدفء الذي كنت أبحث عنه من يوم نشأتي. واتفاجأ صقر بقمر حضنته من ضهره وبتقرب على ودنه وتقوله: بحبك أوي، كلهم بيرقصوا مع بعض. ما تيجي نرقص. صقر ابتسم وشدها لحضنه: أنا بموت فيكي يا قمر، روحي نادي عليهم ناخد صورة مع بعض. وقربوا كلهم وأخدوا صورة للذكرى.