رواية خادمة بقصر أبي الفصل الثالث عشر 13 - بقلم زهرة عصام

مر عشر دقائق وفتون دخلت بمج القهوة وورقها وهي بتقول بثقة: السلام عليكم. عمران وسليم وقفوا وقالوا في صوت واحد: انتي؟! سليم اتعصب وقال بزعيق: انتي إيه اللي دخلك هنا يا حيوانية انتي. فتون قعدت ببرود وشاورت لهم يقعدوا. سليم بغضب: انتي إيه معندكيش كرامة وصلت إنك تيجي ورانا الشركة دي كمان. فتون خبطت على الترابيزة ووقفت بحدة وقالت بصوت عالي نسبياً:

احترم المكان اللي أنت واقف فيه لو مش عارف تفرق بين حياتك الخاصة وبين الشغل اتفضل بره. عمران مسك دراع سليم وقعدوه غصب عنه وقعد بهدوء. فتون أخدت نفس وقعدت. مسكت التليفون وضغطت على رقم وقالت: فاتن تعالي شوفي البشوات يشربوا إيه وهاتيلي قهوة بدل اللي بردت دي. فاتن: تحت أمرك فتون هانم. فتون بصت لهم لقت معالم الصدمة على وشهم حرفياً. فتون: اتفضلوا عرفوا بنفسكم. عمران: أحم عمران النويهي. فتون بصت لسليم اللي خد نفس وقال وهي

كانت بتقول معاه في دماغها: سليم محمود النمر. فتون بصت لهم وأخيراً نطقت: فتون مصطفى خليل صاحبة شركات الخليل للدعاية والتصميم. خير. عمران بص لها بصدمة، هو كان مفكر إنه هيتعامل مع راجل. وسليم هنا فهم هي مبتخافش منهم ليه ولا بيهمها حد، واحدة ناجحة وحققت لشركتها اسم ومكانة في وقت قليل. بص لها وغله بيزيد يوم بعد يوم. عمران: أحم، كنا حابين نعمل مع حضرتك صفقة وهي نضم فرع الشركة بتاعتكم هنا للشركة بتاعتنا. فتون بعملية:

هستفيد إيه وأنا شغلي حر وأظن سمعتوا عنه قبل ما تيجوا. عمران: ده حقيقي وإحنا يشرفنا طبعاً إننا نتعامل معاكي شخصياً. فتون: انتوا هيبقي عليكم التصاميم والدعاية وإحنا التنفيذ. فتون: النص بالنص. عمران بحاجب مرفوع: مش فاهم. فتون: المكسب النص بالنص ودي نسبة أنا متهاونة فيها كتير أوي ومعنديش استعداد أنزل فيها. أما بقى للشروط والشرط الجزائي فده نتفق عليه بعد ما توافقوا على النسبة.

سليم قاعد مش طايقها أصلاً وعمال يفتكر اسمها سمعه فين قبل كده بس الذاكرة مش مسعداه. عمران: بس إنتي مش شايفة إن كده النسبة كبيرة أوي، إنتي لسه في البداية وإحنا... فتون قاطعته بابتسامة جانبية بينت الغمازة في خدها الشمال وقالت: عمران بيه زي ما أنت قولت لسه جديدة بس تقريباً لو مكنتش زيارتك دي اتعملت بيتهيألي كانت شركتكم وقعت خالص. قولتلك أنا متهاونة جداً وخدوا وقتكم في التفكير. عمران أخد نفس وقال: موافق.

سليم بص له بصدمة، ولسه هيتكلم عمران مسك إيده من تحت الترابيزة. فتون قامت وقفت بعد ما أخدت بالها منهم وقالت: يظهر إنكم حابين تتكلموا مع بعض، هسيبكم عشر دقائق. *** شاهي نزلت الشارع. نظرات الناس ليها كلها استحقار. سمعت واحد بيقول: "بطل مصر كلها ما تيجي هبسطك أوي بدل ما الداخلي كله باين للناس كده." شاهي دمعت وكملت مشي بسرحان. فتون وقعت العقود مع عمران وسليم، وعمران أخد رقمها عشان يعزمها على حفلة الشراكة. فتون:

آسف لكن مش هقدر، يدوب هنعمل احتفال الافتتاح هنا وهسافر فوراً، وقتي مش ملكي للأسف. سليم بتلقيح: مش فاضية غير في تشويه سمعة الناس بس. فتون: مش يمكن أهالي الناس دي مكانش عندها وقت تربيها وتعلمها الصح من الغلط والحرام من الحلال. أصل أكيد مش بنات الناس المحترمة اللي تلبس هدوم فوق الركبة وكاشفة كل جسمها. سليم لسه هيتكلم فتون قاطعته: ده مش موضوعي وأنا مليش دخل، موضوعي إن اللي يدوس ليا على طرف تدوس على رقبته.

وبصت في الساعة وقالت: بالإذن عندي معاد دلوقتي. وخرجت من أوضة الاجتماعات وعلى وشها ابتسامة ثقة. سليم: بص شوف عشان لما أكسرها متتكلمش. عمران: أنا مفتحتش بوقي لكن أنت اللي مش عارف تعمل حاجة معاها. *** مني صحيت ونزلت لقت محمود قاعد. قالت بغضب: انت قاعد هنا وسايب الفضيحة اللي إحنا فيها دي إزاي مدخلتش. محمود ببرود: عاوزة إيه يا مني، حلي عن رأسي، مش دي تربيتك برضوا ولا أنا غلطان. مني:

مش هسيبك غير لما تشوف حل، أنا يقولولي لمي فضايح بنتك، مش عارف منظري بقى قدام الناس إزاي. محمود: يعني دلوقتي كل اللي همك منظرك؟ مش همك مثلاً سمعة بنتك وإلا اللي حصل؟ مني: كل ده هيتنسي، لكن اللي من طبقتي ومن مستواي مش هينسى ويفضل ماسكها زلة عليا. مسكت دراعه وبقت تهز فيه جامد وتقول: أنا عاوزة أعرف مين اللي زقها وقعها بالمنظر ده. محمود غلب فيها فبصلها جامد وضربها بالقلم. *** شاهي ماشية وبعدت مسافة كويسة.

مكنتش واخدة بالها من الطريق. "واد انت يلا مش دي البنت اللي طالعة تريند تيجي نتسلى شوية." غمزلها وقال: "يلا وفرصة محدش ماشي في الشارع.. الحتة مقطوعة أصلاً." مشيوا ناحية شاهي و...