رواية خادمة قلبي الفصل الرابع والأربعون 44 - بقلم زهرة عصام

ملوك : -لا مفيش غير حازم بس اللي بيحبني و هياخدني معاه الشغل مش كدا يا حازم حازم حضنها جامد و قال : -و هخليكي تشيلي مالك كمان وليد بصله بصدمة و قال : -إنت بتقول إيه يا حازم؟ الواد لسة صغير دا لسة مكملش أسبوع إزاي تشيله غلط عليه حازم بصله جامد و قال بثبات : -متقلقش يا وليد إبنك في أمان و ملوك بتحبه مش كدا يا ملوك؟ ملوك هزت رأسها ببراءة و قالت : -أه بحبه بس مش بحب وليد و خرجت لسانها حازم بصلها و قال :

-طب إجري إقعدي جمب منه و ربعي رجليكي إجري ملوك بسرعة دخلت أوضة وليد و قعدت جمبه على السرير و ربعت رجليها كلهم دخلوا وراها و مستنيين يشوفوا حازم هيعمل إيه حازم راح عند ملوك و حط إيديها على رجليها بطريقة معينة و جاب مالك و حطه على رجليها ملوك بصلته و عينيها لمعت و ضحكت بسعادة و هي بتقول : -صغير أوي يا حازم حازم بعقل : -عشان كدا ملوك مينفعش تشيله أول ما يكبر شوية ابقي العبي معاه ملوك بتذمر : -و فيها إيه لما ألعب

معاه دلوقتي يعني حازم : -بصي يا ملوك مش إنتي بتحبي مالك الصغير؟ ملوك بصت له و هزت رأسها بإيجاب و قالت: -أيوة عشان هو أخويا. حازم : -عشان كدا مينفعش تشليه عشان هو ممكن يتعب إنتي لسة صغننة و هو نونو كدا يتعب ملوك زمّت شفتيها بتذمر و قالت : -خلاص خده أنا مش هلعب معاه تاني غير لما يكبر حازم شال مالك و حطه في إيد وليد اللي بيبصلهم بزهول و رجع شال ملوك و بقي يناغشها

كلهم بصلهم بحب و ابتسموا برضا على موقف حازم و إزاي عالج الموضوع أخد ملوك و رجع تاني الشركة *** رهف واقفة في المكتب مش عارفة تعمل إيه، بقت تتاوب و تقول : -يخربيت الملل أنا جاية أشتغل وإلا أتفرج على نفسي مش كان زماني دلوقتي بضرب في طاهر ابن اعتماد قعدت على الكرسي اللي قدام المكتب و مالت رأسها على المكتب و نامت و هي بتقول : -مش عارفة دماغي تقيلة كدا ليه هقيل شوية على ما المدير فرق لوز دا يجي و راحت في النوم بعد نصف ساعة

حازم داخل الشركة و شايل ملوك على إيده و كل شوية يبوسها ملوك بزهق : -كفاية بوس بقي إنت إيه مبتزهقش؟ حازم بضحك : -أنا لو زهقت من الدنيا كلها عمري ما أزهق منك يا ملوك ملوك بلوية بوز : -ماشي يخويا هنروح فين دلوقتي حازم بضحك : -إنتي عاوزة تروحي فين؟ ملوك بتفكير : -نروح لمالك عشان أغيظه مكنش راضي يجبني الشركة و بعدين نروح على مكتبك حاز ملوك كشرت وراحت لمالك. رفعت ايديها فمالك شالها وباسها من خدها. ملوك حضنته وقالت:

-بابي بتقول على ملوك وحشة. السكرتيرة لما سمعت كلمة "بابي" صاعقة نزلت عليها وبقت مبرقة. قالت بهمس: -بابي؟ أخر يوم ليا في الشركة. مالك طبطب على بنته وهمس ليها وقال: -ملوك أجمل بنت في الدنيا، بس لسانها طويل شويتين. ملوك بصت ليه ببراءة فمالك ضحك وقالها: -المفروض أتثبت كدا؟ أقسم بالله قدام نظرتك دي ما بقدر أتمالك نفسي. وبص للسكرتيرة وقال ليها بصرامة: -بنت مالك العدوي متربية أحسن تربية. وبص لملوك وقال: -إيه اللي حصل؟ ملوك:

-مش كانت راضية تخليني أدخل يا مالك. مالك: -قلب مالك، إنتي مين اللي جابك هنا؟ ملوك: -هو فيه غيره، حازم هو اللي بيحبني. حازم دخل عليهم لقي السكرتيرة واقفة مش على بعضها ومالك شايل ملوك. سأل بحذر: -إيه؟ ملوك: -تعال يا حازم شوف البت دي قالت على ملوك وحشة. حازم بص لها بغضب وقال: -الله في سماه، لو ما عارف إنك مخلصة في شغلك كنت رميتك لكلاب السكك. راح لملوك وخدها من مالك ومشي. مالك بص لها وقال:

-حازم متعلق بملوك جداً، وأي حد يغلط في حقها حتى لو أنا شخصياً بيقوم الدنيا. أنا ممكن أتساهل لأن عارف بنتي شقية، بس عمها لا. وتاني مرة تيجي، تدخل متكلميهاش. وكمل في سره: تربية منال لازم أتوقع منها أي حاجة. *** حازم دخل المكتب وبيدور بعينه عليها ملقاهاش قاعدة. حط ملوك على الأرض وقالها: -طلعي لعبك بقى وإلعبي هنا. ملوك هزت راسها بإيجاب وقالت: -ماشي يا حازم. حازم قعد على مكتبه وهو بيقول:

-أحسن إنها مشيت، مش ناقص ضغط على أعصابي. وبدأ يشتغل. ملوك بتلعب ومركزة جداً، وبقت تتحرك في المكان لحد ما وقفت مرة واحدة وعنيها وسعت وجرت على حازم وهي بتقول: -إلحق يا حازم، واحدة مقتولة ورا الكنبة. حازم: -بس يا ملوك، بتقولي إيه؟ ملوك: -تعال بس. وشدته من إيده وخدته. اتصدم لما شاف رهف نايمة ورا الكنبة وقال: -دا إيه الهم اللي الواحد جابه لنفسه دا. نزل على ركبته وملوك جنبه وهزها وقال: -إنتي اصحي. رهف:

-شششش، سيبوني أنام. أصل ابن اعتماد حارق دمي وفرقع لوز. كمل عليا. حازم بص لملوك اللي بصلته و شاورت على دماغها بمعنى "مجنونة". حازم همس لملوك وقال: -هاتي كوباية الماية من على المكتب. ملوك جابتها وجت بسرعة. حازم بل ايده ورش عليها بهدوء. رهف: -الله، ماية الدنيا بتمطر حلو. أصل الجو حر. حازم بص لها بصدمة وقال: -الدنيا بتمطر والجو حر؟ بص للكوباية في إيده ودلقها عليها. رهف اتفزعت وقالت: -في إيه؟ بصت لحازم وقالت:

-في إنسان خلوق محترم زي حضرتك يصحي حد كدا؟ ملك بصت لها وقالت: -إنتي عايشة؟ إحنا كنا فقدنا الأمل. حازم بص لها بحدة وقال: -وفي موظفة محترمة تنام في شغلها كدا. رهف اتأوبت وحطت ايديها على بوقها وقالت: -معلش، أصلك اتأخرت أوي وأنا الصراحة بزهق، فقولت أنام شوية لحد ما تيجي. حازم بص لها بذهول. وملوك قالت ليها: -طب ومنمتيش على الكنبة ليه؟ رهف بصت لها وضحكت وقالت:

-أنا استعملت ذكائي الخارق. كنت نايمة على المكتب، خفت حد يدخل عليا، هيكون شكلي وحش. قعدت أدور على حتة مستخبية محدش يشوفني فيها، ملقتش غير هنا، فنمت عادي يعني. ملوك بصت ليها بإعجاب وقالت: -ذكية أوي يا حازم، عجبتني وهنضمها لحزب منال. حازم بص لملوك وقال: -نعم يختي تضمي مين لمين؟ هي المشرحة ناقصة قتلة؟ ملوك: -ششش يا حازم. وبصت لرهف وقالت: -تعالي إلعبي معايا، أنا غضبانة وسايبة البيت، تعالي تعالي. رهف بحماس:

-يلا، أنا أصلاً عندي طفولة متأخرة. قامت وقفت ولسة ماشية وراها. حازم مسكها من قفاها وقال: -راحة فين؟ رهف: -هلعب معاها، في إيه الله. حازم: -تلعبي مع مين؟ ورانا شغل، يلا هاتي الملف الأزرق من المكتبة عندك. رهف راحت للمكتبة ورجعت تاني وقالت: -الملف لونه إيه معلش، عشان نسيت. حازم بابتسامة صبر: -الملف الأزرق. راحت للمكتبة ورجعت تاني وقالت: -اللي متكعب وإلا إللي مش متكعب؟ حازم بص لها وقال: -إللي مش متكعب.

راحت ورجعت تاني وقالت: -أزرق فاتح وإلا أزرق غامق؟ حازم مسكها من قفاها قعدها على الكرسي وهو بيشتم وقال: -سنة عشان تجيب الملف، سنة. كنت رحت جبته أنا وخلصنا. ينهار منيل على كدا. حازم راح جاب الملف وقعد يشتغل. ورهف اتسحبت وراحت تلعب مع ملوك. حازم كان سرح في شغله ونسيها أصلاً. مفاقش غير على صوتها وهي بتقول: -أنا كسبت، مع إنك كنت بتغشي. ملوك بصت لحازم وقالت:

-أنا هاجي معاك كل يوم ألعب معاها يا حازم، كدا كدا مش هروح الحضانة تاني. حازم حط إيده على وشه وبقي يعيط بإصطناع وهو بيقول: -كانت ناقصة بلاوي. هي الصبر يا صاحب الصبر. *** ملك قاعدة في بتأكل في نفسها ومنال بتبصلها وتضحك. منال: -حسيتي باللي أنا كنت بحس بيه، أحسن أهي ملوك دي اللي هطلع عليكي اللي عملتيه فيا. ملك: -إنتي بتصبريني وإلا بتفرسيني أكتر؟ منه ضحكت وقالت: -ربنا يسترها على ابني وميتعلمش منها. ملوك:

-إسكتي إنتي، انتي مش حمل كف مني وانتي بحالتك دي. وبقت تأكل في نفسها وتقول: -ماشي يا ملوك، ماشي يا بنت مالك يا تربية منال. منال بصت لها وكتمت الضحكة وقالت: -ومالها منال بقى يا روح أمك؟ اتظبطي بدل ما أظبطك. ملك: -ماشي يا ملوك، ماشي. *** مالك دخل المكتب لقي رهف منفضة لحازم وبتلاعب ملوك. يصلهم وبص لحازم وانفجر ضحك. حازم بص له جامد فمالك رفع ايده وقال: -خلاص خلاص، يلا عشان الوقت اتأخر وملك متصلة بقالها ساعة بتصرخ.

بص لملوك وقال: -إنتي عملتي إيه؟ دي ناويالك على نية. ملوك: -أنا أنا أعمل حاجة؟ دا أنا كيوتة. دايماً ظالمني كدا والله. وبصت للسما وقالت: -أهم يا رب، أهم إنت شايف وأنا مش هتكلم. وبصت لمالك وقالت: -هي ناوية على نية أوي يعني. مالك هز رأسه بإيجاب وكتم ضحكته فملوك قالت: -يلا، أنا مش خايفة منها أصلاً. حازم هيحوش عني. ومسكت إيد رهف وقالت: -تعالي معايا عشان لو حازم جاب ورا إنتي تحوشي عني. حازم بص لها بصدمة وقال:

-إنتي بتقولي إيه يا بنت إنتي؟ ملوك: -إحنا هنضحك على بعض؟ دي ملك بتبص ليك البصة بتقول ليها "سمعاً وطاعة". حازم: -طب يلا، ومتخافيش، مش هخليها تضربك. ملوك بصت لرهف وقالت: -برضوا مش عاوزة تيجي معايا. رهف ضحكت وقالت: -والله كنت أبغى بس لسة في كام معركة كدا هدخلها، عاوزة أكون بصحتي. وإنتي الصراحة أمك مفترية. ملوك: -والله عندك حق. مالك أخد ملوك وحازم وروحوا. ملوك بقت واقفة على الباب مش راضية تدخل. بصت لحازم وقالت:

-ما تيجي نهرب يا حازم. حازم ضحك بصوت مكتوم ومالك بص لها بصدمة وقال: -هتهربي تروحي فين يختي؟ ملوك: -مش عارفة، بس أكيد حازم عارف. حازم كان لسة هيرد عليها لقي ملك بتصرخ جواه بتقول: -ادخلي يختي، ادخلي يا رافعة رأسي، ادخلي بدل ما أجيلك. ملوك بصت لحازم وقالت: -متأكد إننا مش هينفع نهرب. مالك: -تعالي، متخافيش، أنا أهو معاكي. ملوك بصلته بسخرية وقالت: -والنبي يا مالك اسكت إنت، دا إنت بتخاف منها يا راجل.

حازم ضحك ومالك بصلها وقال: -طب ادخلي، حلال فيكي اللي هيحصلك. ملوك دخلت بثقة ووقفت قدام ملك وقالت: -أي يا ملك، عمالة تزعقي ليه؟ ملك بصتلها وقالت بغضب: -يا برودك يا شيخة، عاوزة نموتيني يا بت؟ شوفوا داخلة إزاي ولا كأنها عملت حاجة. منه ضحكت وقالت: -خلاص يا ملك، والله ما قادرة أضحك. ملك بصت لملوك وقالت: -أنا يجيلي استدعاء ولي أمر أنا يا ملوك؟ خدي هنا يا بت، عملتي إيه؟ احكيلي ومش هضربك. ملوك:

-مش أنا الغلطانة، دي الميس يا ملك، هي أصلاً خنقة وأنا مبحبهاش. منال بضحك: -ليه، إيه اللي حصل؟ ملوك: -هي قالتلي إرسمي كلب. منه: -وبعدين، أكيد مش دي المشكلة. ملوك: -لأ، ما هي لما قالتلي كدا قولتلها اقفي متتحركيش عشان أعرف أرسم بضمير. الكل بصلها بصدمة وانفجروا في الضحك. ومنال قالت ليها: -تعالي في حضني تعالي، بتخلصي ذنوبي. إنتي بتشجعيها؟ يا ماما، خدي هنا يا بت والله العظيم لتنضربي النهاردة. ملوك:

-يا شيخة اسكتي إنتي، قادرة تقفي على رجلك؟ بطلي أكل الأول وبعدين كلميني. ملك بصت ليهم وكلهم ضحكوا عليهم. وقامت وقفت مرة واحدة و...