رواية خادمة قلبي الفصل السادس والأربعون 46 - بقلم زهرة عصام

ملوك بشماتة: إلبسي بقي عشان تبقي تشتميني تاني. ملك بصت لـ صفاء و قالت: عيدي تاني اللي إنتي قولتيها كدا. صفاء: البنت دي قليلة الأدب ومش محترمة، بترد على الميس بتاعتها، بس الغلط مش عليها الغلط على اللي رباها. ملوك فتحت بوقها و قالت: ينهار إسود ومنيل، مش لقيا غير أمي وتغلطي فيها، سلميلي على الأموات يا ميس صفاء. المديرة تنحت ووشها اصفر و قالت:

يلهوي دا اليوم مش هيعدي على خير، اللي أعرفه إن مدام ملك مش بتسيب حقها لحد وكمان بتجري ورا المشاكل، الله يخربيتك يا صفاء على اليوم اللي اشتغلتي فيه معانا. ملك برقت لـ صفاء ورمت النظارة وهي بتقول: حلو غلطت وأنا كنت مستنياها تغلط، لا وبتلكك أصلاً. قربت من صفاء وقالت: فرصة أخيرة عشان أكون عملت اللي عليا ومالك ميقولش عليا بخترع مشاكل مع طوب الأرض، اعتذري ليا ولملوك دلوقتي. صفاء: أعتذر لمين؟

لحتت عيلة لا راحت ولا جت ومش متربية كمان. ملوك: حلو غلطت تاني وأنا أصلاً مش بحبها، شوفي شغلك يا ملك. ملك بصت لـ ملوك وقالت: روحي اقعدي هناك واشربي العصير بتاعك يا قلب أمك، أصل أمك عندها طالعة ومش هتهدي غير لما تخلصها على أكمل وجه. ملوك قعدت على الكرسي وبقت تشرب العصير وهي متابعاهم. وملك قربت من صفاء وقالت: يعني بتشدي شعر البت وبتشتميها ولما ردت عليكي زعلتي، ومسكتيش على كدا لا حاجة تغلطي فيا أنا ومالك.

تؤ تؤ تؤ تؤ أنا ممكن أسامح في أي حاجة إلا إن حد يغلط في مالك ملوكي. فجأة مسكتها من شعرها ولهجتها اتغيرت وقالت: إيه فكراني مش هكلمك ولا هرد عليكي؟ اصحي يا حلوة دا ملك الشاذلي يا بت. صفاء صوتت وقالت: إبعدي عني يا متوحشة إيه اللي إنتي بتعمليه دا، إلحقيني يا ميس سلوي. ملوك بصت للمديرة وقالت: ميس سلوي مامي دلوقتي مش شايفة قدامها، نصيحة مني متتحركيش من مكانك لحسن تاخدي بوكس وإلا قلم.

ملك بشر: عاوزاها تلحقك من إيديا يا بنت سلطح ملطح، لا يا حلوة طلما وقعتي في إيد ملك يبقي مش هسيبك غير وأنا واخدة حقي وحق بنتي تالت ومتلت وبعدها أطردك من الحضانة مع توصية مني إنك متشتغليش تاني. صفاء عاندت معاها وقالت: ليه مفكرة نفسك مين؟ أنا كدا عرفت البت طالعة مش متربية لمين. سلوي: يخربيتك إسكتي ما تنضري و إنتي ساكتة، لازم تعاندي معاها هتضرر بك أكتر يا منيلة.

ملك: برافو يا ميس سلوى بتتعلمي بسرعة يا حبيبتي، أما إنتي بقي يا قمر، فـ ورحمت أمي ما هسيب في وشك دا حتة سليمة عشان تبقي تغلطي تاني. ملك مسكتها من شعرها ووقعتها على الأرض وقعدت فوقها وقالت: انضري بهدوء ومن غير شوشرة بدل ما أتصل بـ منال تجيب رهف وتيجي تكمل عليكي. ضربتها قلم على وشها وصوت القلم سمع في الأوضة وهي بتقول: بقي أنا بنتي متربتش؟ وبتشديها من شعرها تشوفيه باروكة؟ إيه يا قرعة هي زيك وإلا إيه؟

سلوي كانت واقفة خايفة وحاطة إديها على رقبتها وهي بتقول: يا رب خلصني منها على خير دا أنا غلبانة ومعملتش حاجة. ملوك بصت ليها وقالت: متخافيش يا ميس طلما إنتي بتسمعي كلامي مامي مش هتضرر بك، هي هتضر ب ميس صفاء بس عشان مزعلاني. سلوي بصت لـ ملوك وقالت: مش عاوزة حاجة يا ملوك يا حبيبتي، أبعت أجيب ليكي فطار. ملك: ابعتي هاتي لينا فطار، أخلص اللي في إيدي ونفطر مع بعض يا حبيبتي، أصل أنا حبيتك لله في لله.

صفاء بتصرخ وبتستنجد بأي حد. فجأة موبايل ملك رن وملوك أخدته وردت. ملوك: ألو يا مالك. مالك: أهلا وش المصايب أمك فين؟ ملوك: بتخلص على ميس صفاء يا ملوكي، بقولك الميس هتجيب لينا فطار نعمل حسابك. مالك: إقفلي يا بنت ملك يا تربية منال، مش هتستريحوا غير لما نتحبس كلنا، هتجيبوا أجلي منكم لله. ملوك: طب يا بابي يا حبيبي مستنينك، خلاص مش هنمشي غير لما تيجي تاخدنا. ملوك قفلت الخط مع مالك وسمعت صوت ملك يتقول ليها:

برافو عليكي يا حبيبت أمك، خليكي اسمعي كلامي كدا وأنا هخليكي تشيلي مالك الصغير ونلعب بيه مع بعض. بصت لـ صفاء ونزلت فوقها ضرب من تاني وهي بتقول: كله إلا بنتي اللي يقرب منها بأكله بسناني، عاوزة تبوظيلي نفسية البت، إلهي تبوظي ما يلاقوا ليكي ميكانيكي يصلحك. رهف: أخد حقي بإيدي وفي وقتها يا برنس، إنت مش فاهم أنا لو معملتش كدا منال هتشمت فيا. حازم برق وقال: منال؟ وإنتي تعرفي منال منين؟ رهف بتوتر: لهو إنت متعرفش.

حازم ضيق عينه وقال: لا يختي معرفش. رهف بمزاج: قول كلام غير دا يعني أنا مقولتش ليك؟ حازم بزهق: لا مقولتيش، ولخصي قولي بدل ما أطردك دلوقتي. رهف قعدت على الكرسي وقالت: طب اقعد اقعد يا سعادة البيه المدير كريم شانتيه بشا فرقع لوز بيه. حازم قعد وقال بنفاذ صبر: يا رب نخلص بقى. رهف حطت رجل على رجل وقالت: فاكر لما وليد بشا جه يتقدم لـ منه؟ حازم: إخلصي إنتي هتنقطيني، مالهم وليد و منه.

رهف: ما أنا جايلك في الكلام أهو إنتي اللي متعصب. خدت نفس وكملت. فاكر لما دخل المحل واشترى منه باكت شاي؟ حازم هز رأسه وقال: وكسفنا يومها بدل ما يجيب جاتوه جاب شاي العروسة مش عارف إيه الحكمة في كدا بس طالما الموضوع عدى خلاص، إنتي إيه علاقتك بالموضوع. رهف بضحك: أنا اللي اديته الشاي. حازم تنح وقال: يعني إنتي من عند ملك من الحارة. رهف هزت رأسها بإيجاب وقالت:

يعني أنا أعرفك أصلاً يا سعادة البيه المدير كريم شانتيه بشا فرقع لوز بيه من زمان جدا. حازم: ياااه فعلاً، ليه كام سنة الحوار دا. رهف: تاخد التقيلة بقى. حازم بلوية بوز: إشجيني يختي. رهف: منال تبقي خالتي واعتبر هي اللي مربياني. حازم برق وقال: أنا قولت من الأول استحالة الفصيلة دي تخرج عن العيلة دي. قام وقف ومسك رهف من قفاها وقال: إنتي هتحكي كل حاجة وإلا.

رهف: من غير وإلا أنا مش ليا هاخد القلم شوف إنت عاوز تعرف إيه وأنا هقوله ليك دا إنت حبيبي يا سعادة البيه المدير كريم شانتيه بشا فرقع لوز بيه. بس بعد إذنك لو ينفع يعني سيب البلوزة عليها أقساط. حازم بص في عنيها ورهف بص في عينيه وقلبها دق أما حازم قال في نفسه: بريئه بس شرشوحة وتربية منال، يعني لسان خمسة ستة متر قدامها. رهف اللي سرحت تماماً، وقلبها دقاته بتزيد وكل شوية تتمعن أكتر في عينه. حازم قال بسخرية:

مكنتش أعرفك إن عيني حلوة قوى كدا. رهف فاقت على جملته وقالت: لا دا أنا كنت بحاول أحدد لونها، وبتخيل إزاي هيبقي لونها في الشمس فكك إنت من الحوار دا، دي عادة منذ الطفولة، سيب بقى البلوزة يا سعادة البيه المدير كريم شانتيه بشا فرقع لوز بيه. حازم هزها وهو بيقول: أول حاجة تبطلي تقولي الإسم دا اسمي بشمهندس حازم غير كدا لا. رهف: وليه التكليف ووجع القلب مشيها حازم وخلاص. حازم برق ليها وهزها وهو بيقول: إنتي هتصاحبيني يا بت؟

يا شيخة أنا مش عارفة أعمل معاكي إيه؟ رهف زعقت بضحك وهي بتقول: ومصاحبكش ليه إن شاء الله؟ هي من خالتشي حبيتشي تبقي حمت إخوانك؟ بصت لية لقيته هيتعصب فقالت بسرعة: طبعاً، إنت مش هتاخد بكلام عيلة زي يا أيها البشمهندس المبجل المحترم. حازم زقها وبعد خطوات عنها وهو بيقول: أعمل فيكي إيه؟ أعمل فيكي إيه؟ رهف ردت عليه بسرعة من غير تفكير: حبني. حازم برق وبصلها وهو بيقول: إيه؟

ملك قاعدة على المكتب بتأكل هي وملوك وسلوي بتبص ليهم بزهول وصفاء واقفة وشها الحيطة ورافعة إديها الاتنين لفوق. ملك: خدي طعمية يا ملوك إنتي بتحبيها، وإلا أجيبلك فول. ملوك: هاتي ليا طعمية يا ملك بقالي كتير مش أكلت منها. ملك قعدت ملوك على رجلها وبقت تأكلها وتأكل وهمست ليها: إنتي متأكدة إن أبوكي جاي؟ ملوك هزت رأسها بإيجاب وقالت: أيوة دا قفل في وشي السكة يعني جاي متعصب يا ملك، تيجي نجري. ملك: أسد يلا في إيه؟

إجمعي كدا وميهمكيش حاجة هي علقة والسلام. يدوب ملك خلصت جملتها ومالك فتح الباب ودخل منه، بص عليهم وشافهم قاعدين بياكلوا والمديرة خايفة تتكلم، اتذهل من الموقف بس استعاد ثباته وقال في نفسه: تربية منال أتوقع منها أي حاجة، يلا ربنا يقويني عليهم وأربيهم الإتنين من أول وجديد، ولو حكمت هربي منال معاهم. بص ليهم وملك بلعت الأكل وقالت: هاي ملوكي تعال كل يا حبيبي إنت خرجت النهارده من غير فطار. مالك برق ليها وبص للمديرة وقال:

في إيه؟ إيه اللي بيحصل هنا؟ سلوي بلعت ريقها وبصت على صفاء اللي لسة واقفة مكانها وخايفة تتحرك، بص لـ ملك اللي دارت وشها وبصت لـ ملوك وقالت: كلي طعمية يا حبيبتي، إنتي هفتانة ومنه كانت بتأكل أكلك. ملوك: ومش كانت راضية تديني مكرونة بشامل يا ملك. ملك ضربت على صدرها بحركة شعبية وقالت: مش راضية تديكي مكرونة بشامل. بصت لـ مالك وقالت: لا يا حبيبي مينفعش كدا لازم تجيب لـ ملوك مكرونة بالبشاميل هو إحنا حليتنا غيرها.

ملك بص لهم وقال: حاضر عنيا هجيب ليكم إنتوا الإتنين أغلى مكرونة بشاميل. وبص للمديرة وقال: قولي الآنسة تيجي وتتحرك من مكانها. سلوي بصت لـ ملك وقالت لـ صفاء تيجي تقعد. مالك قعد في مقابلة ملك وصفاء قعدت على كرسي جنبهم. مالك أول ما شافها برق وبص لـ ملك وقال: عملتي إيه تاني يا تربية منال. ملك برقت لية وقالت: سمعاك بتقول حاجة يا مالك. مالك: إنتي لسة سمعتي حاجة؟ اصبري عليا بس لما نروح. بص لـ صفاء وقال:

أنا بعتذر جداً عن اللي حصل دا. صفاء: اعتذار إيه حضرتك هي كلت أكلي، دي بهدلتني وفرجت الناس عليا، أنا هعمل محضر أصلاً. ملك بلوية بوز: إعملي أنا معايا كل الحق واحدة بتشتم بنتي وبتمد إيديها اللي تتقطع عليها، وهدخل حقوق الطفل في الموضوع يلا. مالك برق ليها وقال: مسمعش صوتك لحد ما نمشي من هنا. ملوك همست لـ ملك برعب: ملك هو هيضربنا أنا عاوزة حازم.

ملك: والله يا بنتي أنا أول مرة أشوف أبوكي كدا، شكلنا هناخد علقة محترمة يا ملوك. ملوك هزت رأسها وعيطت وقالت: أنا عاوز حازم. مالك شخط فيها وقال: مش عاوز أسمع صوتك دا، وإياك تعيطي أو تقولي عاوزة حازم، لا حازم ولا غيرة هيحوشوا عنكم النهارده. ملك اتعصبت وقالت: إيه في إيه نازل شخط من وقت ما جيت وقولتلك غلطت فينا أنا وإنت والبت، أنا محدش يغلط في جوزي وبنتي ولا تربية بنتي. مالك زعق وقال: ملك اخرسي مش عاوز اسمعلك صوت. ملك

قامت ومسكت ملوك وهي بتقول: لا تسمعلي ولا أسمعلك، سيبهالك مخضرة يا مالك بس ابقي افتكر مين ملك، ومن غير سلام. ملك أخدت ملوك وخرجت من المكتب وماشية براحة ومالك اعتذر من المديرة ومن صفاء وعطاها مبلغ مالي عشان مترفعش قضية. خرج بسرعة ورا ملك وملوك وهو بيقول بعصبية: ملك استني عندك، هو أنا سمحتلك تمشي؟ ملك مشيت ولا كأنها سمعت حاجة ومالك لحقها على باب الحضانة مسك إيديها ولفها ليه بعصبية وضربها كف.

ملك اتفاجئت منه وملوك اللي برقت وبقت تعيط جامد، ملك حاطة إيد على وشها والايد التانية ماسكة ملوك. مالك: أنا مش بقولك اقفي؟ ملك مبرقة في الفراغ وضمت ملوك عليها جامد ومالك بيزعق وملك مش سامعاه أصلاً لحد ما رفعت عينها عليه وإيدها لسة على خدها وقالت بقهر: طلقني يا مالك. منال قاعدة وحست بوغزة في صدرها طلعت تليفونها وحاولت تتصل بـ ملك بس ملك مش بترد، جربت تتصل بـ مالك تليفونه مغلق. قامت تتمشى بتوتر وهي بتقول:

استرها يا رب، سلمها من عندك يا كريم، أنا عارفة إن بنتي إيديها طوية ولسانها مترين قدام لكنها غلبانة وتستاهل كل خير، هي بس تلقائية زيادة عن اللزوم ومتحبش حد يدوس ليها أو لحد يخصها على طرف، والنبي يا رب سلمها من عندك ورجعلي بنتي وحفيدتي ومالك سالمين غانمين، استودعتهم عندك يا رب. منه جت لقت منال بتلف بقلق وبتدعي فقالت بقلق: في إيه يا منال مالك؟ مش بالعادة قلقانة كدا. منال بدموع نادرة: حاسة إن أختك فيها حاجة يا منه.