رواية خادمة قلبي الفصل الحادي والعشرون 21 - بقلم زهرة عصام

مالك : ينهار منيل بستين نيلة. إيه اللي انتوا عاملينه ده. ملك بصت ليهم و قالت بضحك: ميه ميه يا شباب استمروا. وليد بغمرة: عشان تعرفي يا كبيرة إننا هناخد حقك حتى لو مالك أخدك. هيحكيلك قطرة. قالها و هو بيحط الليب في بوقه و بيقزقز. ملك انكسفت أوي و استخبت ورا مالك. مالك بص لـ وليد بتحذير. وليد رفع ايده و هو بيقول: الله هو أنا عملت حاجة يا جدع. مالك قال بصوت واطي لـ ملك: ادخلي أوضيتك. و ملك ما صدقت جريت على الأوضة.

مالك بص ليهم و بص لـ ريا و قال: أنا مش قولتلك تفوقها. هاشم: مهي قدامك أهي يا مالك. حلوة و زي الفل. لا و النيولوك بتاع شعرها تحفة. أنا لازم اتصور سيلفي معاها. مالك: نيولوك يا شوية غجر. و بص على ريا المرمية على الأرض تحت رجليهم و شعرها و وشها مليان قشر ليب. وليد و هو بيتف قشر الليب على وش ريا: مالك متعصب كدا ليه. تكونش من بقيت عيلتك يا راجل. دي حتى عاملة مشاكل مع جميلة.

مالك بحاجب مرفوع: هي برضه اللي عاملة مشاكل مع جميلة. هاشم: طبعاً. هو في زي جميلة. أدب أخلاق. محدش بيسمعلها صوت. كل اللي بتقوله حاضر و نعم. و كمل بصوت واطي: ربنا يسامحني على الكدب ده. وليد: و إلا الميكب بتاعها تحفة تحفة. و شعرها اللي شكل أرسل التلفزيون دا بيظبط الإرسال. والله. هو في زي جميلة و أكل جميلة. و افتكر الكرشة و حط ايده على بوقه و قال: هو فعلاً مفيش في أكل جميلة.

ملك من وراهم بصوت واطي: دا انتوا هتدخلوا جهنم بطيارة عليا الطلاقة. وليد: إيه يا بسبوسة بالقشطة. مش بسيطة قدام الحليوة. و إلا عاوزاه يروح للـبرص دي. ملك: تفتكروا. وليد و هاشم هزوا رأسهم بإيجاب. ملك وقفت مرة واحدة و قالت بدموع وهمية: دايما مظلومة. والله العظيم انتوا يا عالم يا مفترية. طب من غيري مين هيغسلكم الهدوم. وليد بص لها بعين.

و ملك قالت: أينعم بحطها في الغسالة الاتوماتيك و تتغسل لوحدها. بس برضه بتعب. طب مين هيغسلكم المواعين. وليد ضيق عينه أكتر. ملك بلعت ريقها و قالت: أينعم سعادة البيه كنافة بالمانجة هو اللي بيغسلها. بس برضه لولايا ما كان عمل كدا. ملك لسه هتكمل. وصلت الندبة بتاعتها. مالك بص لها و قال: مش عاوزة أسمع ولا كلمة. انتي فاهمة. أنا مش قولت لك تدخلي أوضتك. بتخرجي منها ليه دلوقتي. أفهم. ملك بخبث: نسيت أفوق المرحومة. مالك لسه هيتكلم.

ملك بصت له بتحذير و قالت: طلاق تلاتة محدش يفوقها غيري. و جابت كوباية ماية و دلقتها مرة واحدة عليها. ريا فاقت و هي بتشق و تقول: إيه دا. الجو بيمطر و إلا إيه. ملك: أيوه. الحق ادخلي بقي بدل ما يقلب على تلج في القفا. ريا بصت لها و جريت على أوضيتها و هي بتتوعد لها. ريا بغل: أما خرجت من البيت ده بفضيحة مبقاش أنا ريا يا جميلة الكلب. ملك كانت ماسكة الشبشب في اديها عشان تهدد بها ريا لو عاندت معاها. و رمتها

على الأرض و هي بتقول: قطيعة محدش بياكلها بالساهل. و بصت عليهم و قالت بقرف: خسئتم كلكم. ها. و مشيت و هي بتدبدب في الأرض. مالك ضحك على منظرها و بص لها بحب و دخل أوضته. تاني يوم كان الجمعة. كلهم صحيوا فطروا و قاعدين بملل. وليد: إيه الملل ده. ما تيجوا نلعب. هاشم سقف و قال: صراحة و تحدي. تاني ملك أول ما سمعتهم جريت على الأرض قعدت و ربعت. لهم قعدوا جمبها. وليد لف الإزازة جت عند هاشم يسأل ريا.

هاشم بتلقائية: قولتي جاية عشان سياحة. أومال قاعدة في البيت أربعة و عشرين ساعة ليه. ريا اتحرجت من السؤال و قالت: معرفش حاجة هنا عشان أروحها. فهستنى مالك يفضي و يوديني. ملك بهمس سمعوه: إلهي يبلعك أبو الهول و نخلص منك بقي. لحسن الواحد جاب جاز. وليد و هاشم كتموا ضحكهم. و مالك ابتسم على تلقائيتها. هاشم لف الإزازة جت ريا تسأل ملك. ريا بخبث: دا انتي جتيلي في ملعبي أوي. يعني. ريا بصت لـ

ملك و قالت: انتي ليه حاطة الميكب الزبالة ده على وشك. سوري يعني. بس كلمة زبالة قليلة عليه. بس عندك حق. أهو تداري بيه شوية طلتك المقرفة.

ملك بغيظ و ردح: بقي طلتي مقرفة. يا اللي صرصار المجاري أنضف منك يا بت. دا انتي خضرا زي الملوخية المعفنة بالظبط. حتة جبنة قديمة اتهرت من كتر الدود. أصالة على طلتك يختي. دا انتي من غير شوية البوهية اللي في وشك دول. ولا حد كان عبرك. دا انتي ميتة سبع مرات قبل كدا يا بت. يلا يا خلة سنان مكسورة. دا انتي اللي يصطبح بوشك يا بت يتقل يومه. هاشم: كاااات. هايل يا فنانة. هاتيها من شعرها بقي. أصل في شعراية كدا هموت و آخدها.

ريا: هي مين دي اللي معفنة. يا بيئة انتي. طب أنا هتحداكي تشيلي البيلياتشوا اللي في وشك ده عشان يبان وشك الحقيقي و الكل يعرف شكلك اللي يخوف. ملك بسخرية: ما بلاش يا شكارة الأسمنت انتي. لحسن تتصدمي تاني. و قلدتها: يا صاحب القلب الطيب يا عم شكشك. وليد نام على الأرض من كتر الضحك و قال: يا واثق من نفسك انت. ملك بكبرياء: أومال يا سعادة البيه كنافة بالمانجة. أنا جميلة و أنا ماسكة في نفسي عنها بالعافية.

بصت لـ مالك اللي غمزلها من غير ما حد ياخد باله و هي اتكسفت. ريا بغيظ: طب أنا أهو. ريا بتحداكي يا جميلة تعملي اللي قولتي عليه. ملك بصت بعيونها لـ مالك تستأذن. هز رأسه براحة من غير ما حد ياخد باله. ملك بابتسامة عريضة: طب يا تنين مهاجر. قبلت التحدي. بس بشرط. ريا: إيه هو. ملك: هتقفي على رجل واحدة و ممنوع تبدليها. و وشك للحيطة و ايدك مرفوعة لفوق. و لو اتحركتي مجرد حركة بس. الساعة هتتعاد من الأول.

ريا من غير تفكير: موافقة طبعاً. ملك مشيت و هي على وشها ابتسامة ثقة. دخلت أوضيتها و قفلت الباب. وليد لـ مالك بهمس: تفتكر هتعملها. مالك: هتعملها. دي جميلة يا ابني. تتوقع منها أي حاجة. دي مطرقة أصلاً. وليد: حصل. حقيقي حصل. ما لنا إلا الصبر يا أم عبير. ملك في الأوضة. طلعت فستان شيك جدا. مش ديق و مش واسع. خليط بين اللونين الأبيض و الأسود. لبسته و رفعت شعرها فوق بتوكة و نزلت خصلات منه.

جابت قطنة و مسحت الميكب بالمزيل. و بصت لـ نفسها بثقة في المراية و قالت: قمر أربعتاشر يولاد. والله العظيم. و بعتت لنفسها بوسة في المراية. لبست صندل بكعب. و وقفت عند الباب. حطت ايديها على الأوكرة و خدت نفس و خرجت و هي بتفتح الباب. الكل بره قاعد مستني على نار. و الهدوء كان سائد في المكان.

مالك اللي مش عارف رد فعله هيكون إيه. و هاشم اللي مش متخيلها غير جميلة. أما وليد فكان بيضحك بخبث على منظرهم. و هو متأكد من شكل ملك لأنه شافها قبل كدا في الصور مع مالك. ريا اللي قاعدة بثقة و مستنية ملك تخرج عشان تتريق عليها. الكل انتبه لتكت الباب و هو بيفتح. و صوت الكعب و هو بيدب في الأرض. ملك بدأت تظهر ليهم. و كل ما تقرب الصورة توضح ليهم لحد ما وصلت قدامهم. هدوء عم المكان لدرجة إن صوت الذباب و هو بيطير كان واضح ليهم.

كلهم وقفوا بصدمة مرة واحدة. و مش مصدقين إن دي جميلة. مالك همس: مهلكة. و كمل بعد ما بص لها جامد و خلاها تنكسف. " آه يا مُعذبة القلب ما أعذبكي .. و ددت لو أزحت تلك العيون عنك و أدخلتك بين أضلعي إلي الأبد " ملك واقفة مكسوفة من نظراتهم ليها. و أخيراً وليد اتكلم. هو مكنش متخيلها بالحلاوة دي. وليد: بتهزروا يا جماعة. فين جميلة. و بص وراها و قال: انتوا بدلتوها و إلا إيه.

ملك ضحكت من غير صوت. و بصت لـ مالك اللي هيمان فيها على الآخر. ريا اللي مكنتش متوقعاها بالحلاوة دي. دي من غير ميكياج و جميلة جدا. بصت لها و بصت لنفسها. و بدأت الغيرة تدخل قلبها. هاشم اللي أخيراً نطق: مين المزة. بصلها و قال: يا مساء الأناناس على عيون أجمل الناس. ممكن النمبر بس عشان أشيلك من عيلتي اللي جاية عليا جامد دي. مالك بص لـ هاشم بغضب. و راح ضربه على قفاه خلاه يطلع لقدام شوية. و قال بغضب.