رواية خارج عن المألوف الفصل العاشر 10 - بقلم نشوه عادل

السلسلة دي دخلت إزاي الخزنة وهي كانت على السرير؟ أنا فاكر كويس إني محطيتهاش. مريم: أنا اللي حطيتها يا مراد، لإني كنت دخلت بعد ما أنت نزلت لقيتها على الأرض، فرجعتها الخزنة وقفلت عليها. مراد: اممممم، وإنتي عرفتي الأرقام إزاي؟ مريم: أنت اللي كنت فاتحها قدامي يا ابني، أنت سخن ولا فاقد الذاكرة؟ مراد: إنتي مش مخبية عني حاجة يا مريم؟ مريم بصدمة وهي بتفرك بإيديها: لا طبعاً، هخبّي عنك إيه يعني!

مراد: مش عارف، بس حاسس إن وراكي حكاية كبيرة ومخبياها عني. مريم: لا يا مراد اطمن، أنا مش مخبية عنك أي حاجة، وأنت بالذات مبعرفش محكيش ليك. مراد: ماشي، يلا عشان نروح نتغدى. مريم: طب ماما وخالتو؟ مراد: أكلوا من بدري، أنا اللي غصبت عليهم ياكلوا عشان إنتي عارفة إن ليهم علاج. مريم وهي بتربع إيديها: اممم، وأنت مأكلتش معاهم ليه بقى؟

مراد وهو بيلعب بشعره: احم، عشان عارف إنك مبتعرفيش تاكلي لوحدك، ولو خلصتي السين والجين بتاعك ممكن نروح ناكل عشان أنا واقع من الجوع. مريم بضحك: ماشي يا دكتور. نزلوا مع بعض على أقرب مطعم ودخلوا وطلبوا الأوردر. مريم: هاخد نجريسكو، وأنت؟ مراد: أنا كمان نجريسكو، ده طبقي المفضل وإنتي عارفة. بصت مريم للجرسون لقيته بيبتسم ليها ابتسامة غامضة، فضلت متبعاه بعيونها لحد ما اختفى. مراد

وهو بيطرقع صباعه قصادها: إنتي ياهانم سرحانة في إيه وبتبصي على مين؟ مريم: أبداً، أنا معاك أهو، المهم طمني عليك، أنت بخير دلوقتي؟ مراد: الحمدلله، بس لسه مش قادر أصدق اللي حصل النهاردة. مريم: قولتلك متفكرش كتير عشان مش هتاخد من تفكيرك إلا التعب، أحياناً بيكون من الأحسن لينا إننا منعرفش تفسير كل حاجة بتحصل لينا، وإلا فضولنا ده هيدخلنا في دوامات إحنا كنا في غنى عنها. مراد: يا عيني على العقل والرزانة. وصل الجرسون

ومعاه الأوردر وقال: بالهنا والشفا. مسك الاتنين المعالق وبدأوا عشان يأكلوا، وفجأة الصوت: موووو. اتوقعت المعلقة من إيد مريم، ولاحظ ده مراد وقال: في إيه يا مريم؟ الصوت: سم بالاكل. برقت مريم وبصت للاكل. ردد الصوت: سم في طبقك، متأكليش منه. مراد: مريم، على فكرة أنا بكلمك. مريم: ها، أنا هقوم أدخل الحمام وأرجع، هغسل إيدي بس. وهي قايمة تعمدت توقع الطبق وتكسره. مريم بشهقة: يا خبر! أنا آسفة أوي.

جرسون آخر: ولا يهمك حضرتك، إحنا هنضفه ونجيبلك غيره حالا. مريم لاحظت الجرسون اللي كان غامض واقف بعيد بيضحك عليها، جريت عليه، لكن فجأة عيونه اتحولت للأسود وبقى شبح مليكة، ودخل على الحمام. تشجعت مريم ودخلت هي كمان على الحمام وقفت الباب: اخرجي كلميني وش لوش، إنتي عاوزة إيه؟ عاوزة إيه؟ صوت مرعب: مرااااااد. مريم: بعينك يا مليكة، مش هسمحلك تمسي منه شعرة حتى لو التمن روحي، إنتي فاهمة؟

شبح مليكة بصوت مفزع: هاخده قريب وهقتلك، لأنك حاولتِ تاخدي حاجة مش بتاعتك. كانت مريم هتصوت فيها، لكن لقت الباب بيخبط وصوت مراد: يا مريم افتحي، إنتي كويسة؟ فتحت مريم الباب وكان وشها عرقان جداً، انصدم مراد وضمها بقلق: إنتي بخير؟ مريم: عاوزة أروح. مراد: طيب، ماشي يلا. راح جاب حاجتها وركبوا العربية وراحوا على شقته، وكانت أمه وأمها سبقوهم طبعاً، حاولوا يبينوا إنهم بخير قصادهم، وحضرت نادية العشا ليهم.

في اليوم التالي فضلت مريم في البيت مخرجتش منه نهائي، لأنها كانت حاسة بتعب، لحد الساعة سبعة خرجت وقالت: أنا نازلة يا ماما. شادية: على فين؟ مريم: هروح عند واحدة صاحبتي نراجع مع بعض، لأني مروحتش الكورس النهاردة. شادية: هترجعي امتى؟ مريم: هحاول متأخرش إن شاء الله يا ماما. قربت منها وحضنتها. شادية بخوف: إنتي كويسة يا بت؟ مريم: آه يا حبيبتي بخير، يلا سلام. نزلت مريم متجهة لمكتب خديجة ودخلتها السكرتيرة على طول: أنا جاهزة.

خديجة: متأكدة يا مريم؟ مريم: متأكدة أوي. خديجة: تمام، تعالي معايا.

دخلوا على الغرفة اللي فيها الدايرة، لكن كان فيه مرايات كتير مرصوصة حول بعض، وفيه كرسي محطوط في نص الدايرة، طلبت خديجة من مريم تقعد عليه وتبص على المراية اللي قصادها بس، ومتبصش لا يمين ولا شمال. وقفت خديجة وراها وبدأت تقول كلام غريب، ويظهر على المرايات التانية طلاسم باللون الأسود وكلمة "مرفوض"، وفضلت تنتقل من مراية للتانية لحد ما وصلت للمراية اللي مريم بتبص عليها، واتغيرت الطلاسم للون الأحمر وكلمة "مقبول"، وفجأة ظهرت الست اللي كان شكلها مرعب واللي كانت جنية الخدمة.

خديجة: أوعي تغمضي عينك يا مريم لفترة طويلة، اتكلمي بثقة كأنك بتكلمي واحدة صاحبتك. مريم: هو... هو إنتي اسمك إيه؟ الست المرعبة: هفا. مريم: اسمعي يا هفا، مطلوب منك تغيري خدمتك في مقابل إعفائك نهائي من خدمتي أنا والجاية من نسل جدتي اللي جابتك وقيدتك بالخدمة. هفا: وإيه هي الخدمة؟ مريم: أخلص حبيبي مراد من أذى سحر وجن عاشق. هفا: قصدك مليكة؟ مريم: أيوه هي.

هفا: أقدر أمنع أذاها عنك لحد ما تقدري تتخلصي من سبب وجودها، لكن مقدرش أمنعها تأذي أي شخص تاني. مريم: طب حتى مراد وأهلي. هفا: ولا أي حد تاني غيرك إنتي وبس، أنا أقوى منها، أنا جن لكن هي روح، بس روح شريرة وليها قوة، قوتها كلها في السلسلة. مريم: طب أخلص من السلسلة إزاي وووووو...