رواية خديجه الفصل الثالث عشر 13 - بقلم امنيه سليم

وقفنا المرة اللي فاتت لما خديجه اتصدمت لما عرفت ان باسم اللي هيوصلهم. ياسمين باستعباط: هو أنت اللي جاي تاخدني ياباسم؟ شُكراً بجد. خديجه بتوعد: يلا يامنى عشان اتأخرنا. عايزه حاجه يا ياسمين؟ باسم مركز على خديجه وبيبص ليها من فوق لتحت، لبسها بيلفت نظره. ياسمين: هو أنا مش قُلت هوصلكو وأنتي وافقتي؟ خديجه باستعباط: أنا قُلت كده. يلا يامنى. باسم بجديه: يلا بقا أركبو وبطلو كلام. مينفعشي وقفتكو دي.

خديجه بجديه: جزاك الله خيراً يا أستاذ باسم. أحنا ماشين. باسم بحده: أنا قولت أركبو وباباكي عارف اني جاي أوصلكو. فياريت يلا عشان متعصبشي عليكي. خديجه بحده: تتعصب علي مين؟ وأنا قولت مش هينفع. ياسمين برجاء: بالله عليكي يلا بقا. منى بهدوء: يلا بقا ياخديجه كده هنتأخر علي القطر. خديجه بتبص ليهم من تحت النقاب بغيظ، ماشيي. ياسمين بتسقف أيديها بفرحه: أخيراً وافقتي. منى بهزار: هرمنا من أجل هذه اللحظه. ياسمين ركبت جنب أخوها.

منى وخديجه ركبو ورا، وأتحرك باسم بالعربية. ياسمين بتبص لخديجه: أنا فرحانه جداً ياخديجه اني عرفتك بجد. كان نفسي أعرفك من زمان. وكمان أحتمال تكوني مرات أخويه قريب. في اللحظه دي باسم بص في المرايا على خديجه. وخديجه عايزه تقوم تولع في ياسمين في اللحظه دي بس مش هينفع تتكلم قدام باسم لأنه أجنبي عنها. خديجه بجديه: جزاكي الله خيراً. ياسمين بسعاده: ماتيجي نتغدا سوا قبل ماتروحو. ماما هتفرح قوي أول ماتشوفك.

خديجه بجديه: أتكلمنا في الموضوع ده قبل كده يا ياسمين. سلميلي على مامتك كتير. خديجه في نفسها: هتسكت البت دي ولا أولع فيها؟ أنا اصلاً مستحرمة ركوبي العربية معاه. وعماله أتخيله سواق التوك توك. يالله لو عرف أنا مفكراه إيه هيموتني مدبوحه. ههههه. ياسمين بتلقائيه: لفت دماغها لخديجه ومنى تاني. بس منى مشغوله بتكلم خطيبها اللي هو كاتب كتابه عليها واتس. ياسمين بتلقائيه: بجد ياخديجه كلامك روعه. حتى باسم... ولسه هتكمل...

وخديجه مستنيه تكمل. باسم بص لياسمين: سكتتي؟ ياسمين بابتسامه بلهاء: ولا أي حاجه. وصلو على المحطة. باسم بجديه: خديجه قولي لباباكي جاين ليه بكرة أنا وأهلي. خديجه بجديه: وهي غضه بصرها. والله حضرتك كلم بابا وبلغه. ياسمين باستغراب: وفيها إيه ياخديجه؟ خديجه بجديه: هي الأصول كده يا ياسمين. أنا مليش أدخل في حاجه غير اني أوافق أو أرفض. أما الاتفاقات والحاجات دي أهلي هما اللي يعرفوني بيها. باسم بيعجب بيها أكتر واكتر.

خديجه: يلا بقا السلام عليكم ورحمة الله. ياسمين: وعليكم السلام ورحمة الله. خديجه: هكلمك بليل بإذن الله. ياسمين بابتسامه سعيدة: خلاص هستناكي إن شاء الله. خديجه ومنى ركبو القطر بتاع الشعب. لأنها رفضت تركب المكيف لما ياسمين عرضت عليها. وده طبعاً طلب باسم لما رفضت أنه يوصلها لغاية باب البيت. ياسمين ودعت خديجه ومنى وركبت العربية وبتبص على أخوها. باسم بحده: أنتي لسانك ده إيه؟ كنتي عايزه تقولي إيه؟

بيقلد ياسمين: بجد كلامك روعه. حتى باسم. باسم بتوعد: عارفه لو كنتي كملتي أنتي عارفه كنت هعمل إيه. ياسمين عايزة تضحك بس خايفة من عصبية أخوها. بس مش مصدقة اللي أخوها بيعمله ده. ياسمين بتلقائيه زي عادتها: نفسي أعرف ليه عايز تتجوز خديجه. على الرغم إنكم دماغ مختلفة خالص. والعالم بتاعك غير بتاعها. حتى النهارده لما سألتها حطت أيديها على بوقه. باسم باهتمام: أيوه. لما سالتيها قالت إيه؟ ياسمين: لا مقالتشي حاجه.

باسم بحده: أخلصي قولي قالت إيه. ياسمين بخوف: قالت أنا لو ليا نصيب. وحكت ليه كل اللي خديجه قالته بالحرف. ماعدا سبب هدايته وتغيره والكلام ده عشان مياخدشي باله ويعند أكتر. عند خديجه بعد ماوصلت ومصدعة من كتر زن منى عليها. وهي أتكلمت كتير النهاردة. صلت العصر ونامت. صحيت خديجه بعد المغرب. جريت صلت المغرب قبل مايفوتها وقرأت الأذكار وطلعت تقعد مع أهلها. خديجه بابتسامه: السلام عليكم يا أهل الخير.

عبدالرحمن: وعليكم السلام ياختي. يلا الله يسهلك. مش معايا فكة. خديجه بمزاح: وأنت من أمتى معاك فلوس أصلاً؟ ده أنت مفلس يابني. بتاخد مصروفك من ماما. عبدالرحمن: ليه هو أنا زيك يافاشلة؟ خديجه: أنت أصلاً تطول تبقى زي. خديجه: كفايه بقى أنتو مش هتكبروا أبداً. أم خديجه بابتسامه فرح: نمتي ياحبيبتي؟ بكرة باسم جاي هو وأهله عشان يتفقو على كل حاجه. أخيراً ربنا استجاب دعائي ورزقك بالي عمري ما حلمت اني يجيلك واحد زيه.

خديجه: كتمه غيظها. أنتي كده بتهنيني ياماما. أم خديجه: ياحبيبتي أنتي مفيش زيك. خديجه بهزار: أيوه أنا عارفه. لو مني اتنين كانت مصر خربت. أم خديجه بغيظ: شكل الشبشب وحشك ياخديجه. خديجه بفزع مصتنع: أسفين يا صلاح. انتهى اليوم على أبطالنا وبداية يوم جديد. خديجه استيقظت صلت القيام وصلاة الفجر وقرأت وردها من القرآن. ولسه هتقرأ الأذكار لقت منى بترن. خديجه بابتسامه: السلام عليكم الناس اللي صاحيه بدري.

منى: وعليكم السلام. أنا لسه منمتش ياختي. كنت بقرء في الورد بتاعي بقالي كتير أوي مقرأتش الورد. لغاية ماكنت هموت. وخوفت أقُلك تقيمي عليا الحد. خديجه بتساؤل: هو أنتي بتقرأي قد إيه الورد بتاعك يعني؟ منى: بقرء جزء يومياً. بس بقالي فترة كبيرة بقرء يوم واسيب عشرة. خديجه: اللهم بارك. جزء يومياً؟ بس في حاجه عايزه أعرفهالك. النبي

صلى الله عليه وسلم قال: أفضل الأعمال عند الله أدومها وإن قل. يعني يا منى يا حبيبتي بدل ما تقرأي في يوم جزء وتقعدي عشرة ماتقرأيش. ده مش حاجه حلوه. بالعكس ابدئي وردك بصفحه واحده يوميا وحاولي تتدبري في معناها. ولما تحسي أنك اتعودتي على صفحه زودي كمان نص صفحه. وكل شويه زودي شويه. متبقيشي عامله زي اللي بتصلي خمسين ركعة قيام ليل في يوم وتقعد السنة كلها تاركة قيام الليل. كفاية ركعتين بس دومي عليها.

منى بابتسامه: عندك حق. أنا هبدأ بصفحه. كفاية اني ابدأ يومي بكلام الله. خديجه بغرور مصتنع: أنا مش متخيله الحياة من غيري. منى: أيوه ياختي اتغري. هو حد قدك. الواد الحليوه جاي يخطبك النهارده. خديجه بغيظ: طب مابلاش حليوه دي. وبعدين أنا مغرورة من قبل ما أشوف وش الحليوه قصدي باسم. منى بابتسامه: ربنا يكمل ليكو على خير وسعادة.

خديجه بشرود: إن شاء الله. يلا بقا السلام عليكم. عايزه أنام شويه قبل معركة الطبيخ اللي ست الحبايب ياحبيبه ناويه تعملها. منى بابتسامه: وعليكم السلام.