رواية كهرمان الفصل الثاني عشر 12 - بقلم رحاب محمد

هو ريان بيه يعرف أن حضرتك مخطوبة؟ بلاش خطيبك يعرف علاقتك بريان وموضوع مقابلاتكم والكلام اللي بيقعد للصبح ده. انتفضت إهداء وهي تهتف باحتجاج: إيه علاقتكم دي؟ مالك يا أمل؟ أنا مش بعمل حاجة غلط والمفروض إنك أول واحدة عارفة كده كويس. وإذا كان على خطيبي اللي فجأة كلكم بتتكلموا عنه، فا إحنا بينا اتفاق إنه ما يدخلش في أي حاجة تخص شغلي وهو قابل وموافق. أمل: قابل وموافق؟

طيب بالمرة وهو قابل كده يعرف إن حضرتك مش بتلبسي الدبلة علشان محدش يعرف إنك مخطوبة وتمشي أمورك، وإنك مش بتقولي ده غير لو عايزة تستخدمي اسمه واسم والده. يا إهداء فوقي، ما يستاهلش منك كده. ده بيحبك بجد. فوقي قبل ما أي حاجة من دي توصله والدنيا كلها تتهد على دماغك، وقتها هتبقي خسرتي كل حاجة. أنا بقولك ده دلوقتي علشان خايفة عليكي، أنا ما يهمنيش حاجة غير مصلحتك.

صدح صوت هاتف إهداء في الأرجاء يقطع استرسال أمل في الحديث. اتخذته إهداء حجة للهروب من الحوار. كان المتصل على خطيبها. أجابت بصوت عالٍ ليصل إلى مسمع أمل، وكأنها تجيب بشكل غير مباشر على كلامها السابق. إهداء: الو، أيوه يا علي. أنا بخير. ملحقتش بس أكلمك قبل ما أنزل. إهداء: لا لا، أنا تمام. ما تتعبش نفسك. هروح أنام وهصحى كويسة. بس إنت وحشتني وعايزة أشوفك. لو مش هعطلك يعني، تعالَ عدّي عليا ونروح سوا. إهداء:

خلاص ماشي، هستناك. أنهت المكالمة وهي تلوح بيدها لأمل وتشير للهاتف بابتسامة: شفتي؟ أنا وخطيبـي تمام أهو. بلاش بقى تكبير المواضيع على الفاضي. ضحكت أمل بتهكم وهتفت بنبرة ذات مغزى: ما تعمليش الحركات دي عليا يا إهداء. ده إنتي تلاقيـك قلتي له ييجي علشان عايزاه يوصلك بس مش أكتر. ضحكت إهداء بقوة ورسمت ملامح البراءة على وجهها وأردفت: عيبك يا صاحبي إنك فاهمني. أومأت الأخرى برأسها بثقة وقالت: عيب عليكي. هو فيه حد فاهمك أدي؟

تابعت إهداء بجدية: لا بجد والله، المرة دي إنتي غلطانة. أنا ما فيش حاجة بيني وبين ريان. وإن كنت بكلمه، فا قولتلك علشان القضية. لازم تكوني فاهمة ده. أمل: يا إهداء... قالتها أمل بنبرة ذات معنى تفهمه الأخرى. لتُحمحم إهداء واستطردت: ماشي يا ستي. قولي زهقانة وبلعب شوية، أو عندي فضول ناحيته. بس برضه مش بعمل حاجة غلط، وإنتي عارفة كده كويس. ضحكت أمل بقوة: عيب عليكي، مش بقولك فاهماكي كويس؟

يبنتي اتلمي. خطيبك لو عرف حاجة زي دي مش هيعديها على خير. إنتي أكتر واحدة عارفة هو بيغير عليكي إزاي. غمزت بعينها اليسرى وقالت بثقة: لا تقلقي، كله تحت السيطرة. أمل: يخوفني منك. أجابتها بثقتها المعتادة: ما تقلقيش. ما فيش حاجة بتمشي غير زي ما أنا عايزة، وأنا عارفة بعمل إيه كويس وحدودي فين. تُرى فعلاً كل حاجة هتمشي زي ما هي عايزة؟ ولا المرة دي ثقتها هتخونها؟