رواية خطيبتي واخواتها التوأم الفصل العشرون 20 - بقلم رحاب القاضي

ناني ايه ده ايه المنظر ده. بعد خالد بسرعه عن ملك واخد منها المفتاح وقال انا قاعد فوق زي ما الدكتور بهاء قال لو احتاجتو اي حاجه قلولي. ناني بحده وما نشفش وش حضرتك هنا تاني لو سمحت، وانا ليا كلام مع بابا لما يرجع. خالد ببرود اوكي وانا كمان ليا كلام مع باباكي لما يرجع. وبص لملك اللي كانت لسه مصدومه وقال هبقي اكلمك عشان عايزك في حاجه مهمه، ملك في ايه مالك. ناني بعصبيه مالكش دعوه بيها واتفضل اخرج من هنا.

طلع خالد وكان مدايق، وناني قربت من ملك وقالت بغيظ هتفضلي متنحه كده، ازاي تسمحيله يقرب منك؟ ملك بدموع هو قليل الاب ثبتني ده طلع اجمد من امجد، ناني هو انا كده بقيت شمال. ضحكت ناني غصب عنها وقالت لا يا ملك بس هتبقي لو ما كانش ليكي ردة فعل. ملك استني بس عليا استنيييي والله هبهركم امسكي بقي كملي ترويق لمد ما اعمل العشاا. ناني طيب وبابا بعت رساله علي الفون بتاعي بيقولي انه جاي بكره الصبح. ملك

طيب خدي التقيله البت سما بكلمها مش بترد وحاسه انها مش تمام وكلمت محمد قالي ان عنده شغل ولما يرجع البيت هيخليني اكلمها ولحد دلوقتي ماكلمنيش. ناني بقلق انا اصلا حلمت حلم وحش عليها، بصي احنا نستني شويه ونكلمها ولو ما عرفناش نكلم طنط ثريا. ملك لا لا انا مستحيل اكلم القرشاانه دي. ناني والله ما في قرشانه غيرك بتتباسي يا ملك عيتي عينك والله لما يجي بابا لاقوله. ملك بدموع وهي داخله المطبخ ما بقولك هو اللي ثبتني قليل الادب.

*** وفي دبي محمد في المستشفي ومعاه فيروز اللي قالتله وهي متعصبه انا عايزه افهم ايه اللي يخلي مراتك تعمل كده في بنتي. محمد بجمود بعد اذنك دقيقه واحده بس وهاجي افهم حضرتك كل حاجه. فيروز بحده تمام يا محمد بس ياريت بسرعه. بعد محمد عنها شويه وكلم سما اللي ردت عليه وصوتها باين تعبان جدا وقالت عايز ايه؟ محمد

انا عايز افهم ايه اللي عملتيه في البنت ده الكاميرات فضحت كل حاجه يا هانم، خليتي ايه لبتوع الشوارع اتنيلتي عرفتي حاجه او شكيتي في حاجه مش المفروض تيجي تسأليني وافهمك. سما بحده وحياة امك يا محمد لو شوفتك تاني لافرمك انت فاهم يا راجل يا خاين خليك جنب حبيبة القلب. محمد اتنهد بضيق وقال انتي فين طيب وبتعملي ايه دلوقتي؟ سما

انا حجزت ونازله مصر كمان عشر دقايق وتطلقني يا ابن ثريا والا خيالك ده مش هيصورلك انا ممكن اعمل ايه فيك. خلصت كلامها وقفلت في وشه ودموعها نزلت، وبعدين كملت اجراءات سفرها لرجوعها مصر. وفي المستشفي قال محمد كل حاجه لفيروز. فيروز بجمود اممم والله مراتك معاها حق وعرفت تعمل في بنتي اللي انا ما قدرتش اعمله. محمد مش فاهم حضرتك تقصدي ايه؟ فيروز

انا ما عرفتش اربي بنتي يا محمد ومراتك حقها تعمل اكتر من كده بسبب غيرتها علي جوزها وانها لاقيه واحده تخطفه منها. محمد اوعدك ان اللي حصل مش هيتكرر وانا كده كده بخلص في اجراءات الفرع الجديد اللي همسكه وانا في مصر وهبعد عن هنا خالص. فيروز تمام يا دكتور محمد تقدر تتفضل. مشي محمد وفيروز دخلت عند جيدا اللي كان وشها كله كدمات وراسها مفتوحه وقالت اتربيتي كده ولا لسه يا هانم. مش كفايه انك مطلقه كمان دايره علي حل شعرك. جيدا

انتي فاكراني هسكت علي اللي عملته فيا البنت البيئه دي، والله لاخد حقي منها تالت ومتلت. فيروز البنت ما غلطتش دي بتحافظ علي بيتها وجوزها من وحده خطافة رجاله ولو عملتي اي غلطه تاني ما تعرفيش انا هعمل فيكي ايه ده انا بقيت في نص هدومي وعيني في الارض قدام حتت موظف عندي. جيدا بجمود اوكي يا ماما هنشوف الموضوع ده بس برضو حقي مش هسيبه. *** القاهره في شقه تانيه علي النيل كانت جيلان قاعده متوتره جدا وقرب منها هادي وقال

يا بنتي مالك متوتره كده ليه؟ جيلان بضيق لو سمحت يا هادي يس يعني جيت عشان يعني مش قصدي اللي فهمته. بعد عنها هادي وقال انا فاهم جيتي عشان تستفزي انس مش كده، اصلا ما فيش بنت تقول لولد عايزه اجيلك الا لو كان في سبب كبير وانا عارف ان السبب ده انس. جيلان بدموع وانت ايه بقي اللي خلااك توافق مدام عارف كده؟ ضحك بسخريه وقال هو في حد يلاقي واحده عارضه عليه نفسها ويقول للخير لا.

في اللحظه دي جيلان حست بمدي غلطها ودموعها نزلت وقامت بسرعه عشان تمشي بس مسك هادي ايدها وقال بحده كنت شاريكي وعايزك قدام الدنيا كلها من اول يوم اتقابلنا فيه في الجامعه وانتي رخيصه اووي مالكيش في الغالي وعشان انتي رخيصه روحتي لانس يتسلي بيكي وعشان كده برضو انتي هنا دلوقتي. جيلان بحزن وانتو كلكم زي بعض انت اصلا ما تفرقش عنه في حاجه. قالت كلامها ومشيت واول ما فتحت الباب لقيت انس في وشها. انس بحده

انتي بتعملي ايه هنا، ازاي تيجي هنا وبالمنظر ده. طلع هادي وقال اهلا بالكابتن تعالي اشرب حاجه جوه واقف كده ليه؟ انس بجمود برغم الخلافات اللي بينا بس انا عارف انك محترم وحتي لو هي متخلفه وغبيه انت ما كانش ينفع تسمع كلامها. زقها هادي لبره وقفل الباب وقال اهي عندك زي ما هي وانتو الاتنين تبعدو عن طريقي عشان ما تحصلش مشاكل وانا مش كوبري يا جيلان تمام.

خلص كلامه وقفل الباب في وشهم ودخل قعد علي الكنبه وكان متغصب جدا. وبعد شويه وقف انس بعربيته قدام بيت جيلان. انس انزلي وابقي اشكري جني هي اللي قالتلي اجيلك. جيلان بسخريه عبيطه وقعت في الفخ بسهوله زي كل مره، اصلا انا قاصده اخليها تعرف عشان تكلمك وتقولك. انس وغرضك ايه بقي من كل ده. جيلان بدموع كنت عايزه احس اني مهمه عندك يا انس زي زمان، بس انا غلط انا كل حاجه في حياتي غلط وانت كمان غلط.

نزلت من العربيه وانس كمان نزل وقال بعصبيه تبعدي عن علاقتي بجني انا غلط او صح مش عايزك في حياتي وعايزها هي افهمي بقي. جيلان بدموع

انت مين اصلا هاا انت مين عشان تكلمني كده انت مين عشان ارخص نفسي من البدايه عشانك، انت واحد اناني ومغرور فاكر ان انا وبنت عمتي لعبه في ايدك خسرتني صحابي بعلاقتي بيك والكل شافني وحشه وانا. وافقت وقولت كفايه انت عليا حتي جني لما جات انا كنت مبسوطه ان هتكون ليا اخت صغيره او زي اختي بس كرهتها بسبب حبك انت ليها. في الوقت ده كانت جني واقفه وسامعه كل الكلام اللي قالته جيلان، واللي صدمها لما انس قال

ايوه انا اناني في كل حاجه واللي تصدقني تستاهل كده. قربت جني منهم وقالت لجيلان تعالي ندخل بسرعه عشان خالو جوه. جيلان سمعتيه سمعتي حقيقته يا جني. انس بحده اخرسي يا جيلان و. جني بحده انت اللي تخرس خالص ومالكش دعوه بيا او بيها تاني فاهم ولا لا. انس زعقلها وقال بطلي غباء انتي كمان، واياكي يا جني تعملي بلوك او تفكري تبعدي بسبب الموقف البايخ ده احسنلك يا جني.

قال كلامه وركب عربيته ومشي بسرعه وهو متعصب جدا، وجني طلعت موبيلها وعملت بلوك وقالت انت. بتهددني طيب اهو البلوك اما نشوف اخرتها. ضحكت جيلان غصب عنها وقالت هههه ياريتني زيك يا جني، ياريتني قادره اكون زيك واقدر اعمله حتي بلوك. قالت كده وسابتها ومشيت وجني بصت للموبيل ولرقم انس اللي قي البلوك وقالت خليك شويه هنا يا انس عشان تعرف تهددني كويس، بس انا زعقتله وقولت كلام رخم انا هفك البلوك.

فكت البلوك بس قفلت الموبيل بتاعها وطلعت أوضتها وفضلت تذاكر. كانت عزة متابعة كل اللي حصل ده وقالت لنفسها: عزة جدعة يا جني، بس أنا لازم أتصرف وأخليكي تبقي ناصحة قبل ما جيلان تاخده منك. *** وتاني يوم الصبح كانت منة قاعدة مع فؤاد في كافيه وقالتله اللي حصل بين إياد وناني كله. فؤاد تمام، بس أنا مالي بكلامك ده. ناني رفضت موضوع الجواز وطلعت مش معجبة بيا زي ما انتي قولتي. منة بتوتر أنا كنت عايزة أساعدك يا مستر فؤاد و...

فؤاد بحدة أنا رايح إسكندرية يا منة، بس عشان أرجع ناني الشغل. لأن أهم حاجة دلوقتي عندي شغلي، إنما مش عشان أجري ورا حد مش عايزني. قال كلامه وسابها ومشي. ومنة اتضايقت منه وقالت: منة فقر راجل وش فقر. -وفي بيت أهل مريم القديم الباب خبط وراحت فتحت لقيت حازم ونيرة وأنس. مريم عايزين إيه؟ حد يجي لحد الصبح كده؟ حازم إيه قلة الذوق دي؟ ما توسعي تدخلينا. مريم بقي أنا قليلة ذوق؟

طيب هما هيدخلوا. انت هتفضل متذنب على الباب يا حازم الكلب انت. نيرة بحدة ما تخرس بقى يا حازم وما تدايقش ميمي القمر. وإنتي يا مريم يا كبيرة يا عاقلة دخلينا يلااا. مريم بصت لأنس وقالت: وانت مش هتقول حاجة؟ أنس لا، ما أنا لو اتكلمت هلاقي الشبشب في وشي، فمحترم نفسي وساكت. مريم ضحكت وقالت: ادخلوا طيب. وإنتي يا نيرة جهزي لنا فطار. حازم قبل الفطار الأول. انتوا عرفتوا إن إياد امبارح طلب نقله لقرية في الأرياف؟ مريم بدموع

منة لله اللي كان السبب. حازم معتز عنده حق، إحنا مش في فيلم ولا رواية يا مريم عشان معتز ينسى أبوه اللي مات بسبب أبو البنت دي، ولا هما ينسوا إن جوزك سبب في موت أبوهم وجدهم وكان سبب كبير إن أمهم تتعب في الحمل وتموت. أنس أنا كمان أتفق، مش هنقدر أبداً نكون عيلة واحدة يا ماما. مريم ببكاء طيب ما تخلوهوش يسافر. أنا بكلمه مش بيرد عليا. حازم بص لأنس وقال:

المهمة دي على الباشا أنس، هو اللي يقنعه ما يسافرش. وبسرعة يا أنس، لأنه مخلي علاء يتوسطله ويتنقل في خلال يوم أو يومين. أنس بضيق أنا فعلاً لازم أقنعه ما يسافرش، لأني محتاجه بجد جنبي الأيام دي. *** الإسكندرية. طلع خالد من أوضته في شقة بهاء وهو بيلبس الجاكيت الشتوي بتاعه وقال وهو بيتكلم في الفون: خالد يا ملك، طالع أهو والله. انتي في إيه مستعجلاني ليه كده؟ ملك بخبث لما تطلع هقولك. يلا بقى بسرعة. فتح خالد باب الشقة وقال:

طالع أهو وو... ااااه. قبل ما يكمل كلامه اتزحلق في الأرض ووقع على ضهره وهو ماسكه بألم. وملك نزلت من فوق وقالت: ملك إيه ده؟ انت حسيت بالزلزال يا خالودة؟ خالد بغيظ وهو الزلزال بيدلق صابون قدام الشقة؟ خلص كلامه وقام جري وراها وهي بتضحك. وطلعت الأسانسير وقبل ما بتقفل دخل عندها خالد وقال: خالد هتهربي تروحي فين تاني؟ ملك وهي بتضحك هههههه، خلاص. وبعدين انت كنت قليل الأدب امبارح وأنا لازم يبقى فيه رد فعل من عندي.

خالد ابتسم لضحكتها وقال: ده اسمه رد هبل أو عبط، مش رد فعل. أنا توقعت هتلوي خلقتك عليا مش هتتعاملي معايا أصلاً. ملك ما هو أنا مش بعرف أعمل كده، بس بعرف أعمل مقالب. هع هع هع. خالد أبو لهب بيضحك. اخرسي. ويلا خلينا نلحق إياد، الواد قاعد مستنينا. انتي قولتي لناني؟ ملك أيوه قولتلها. وكمان نص ساعة جاية ورانا. خالد طيب كويس جداً. وبعد شوية راحوا قعدوا في الكافيه اللي مستنيهم فيه إياد، اللي أول ما شاف ملك افتكرها سما

اللي شافها قبل كده وقال: إياد إحنا اتعرفنا قبل كده صح؟ ملك ياريت، بس أنا ما شفتش القمر خالص. خالد بغيظ هقلع الجزمة وأنزل بيها على وش أهلك. اخرسي. ملك فرحت وقالت لإياد: باين إنه بيغير عليا، مش كده؟ كتم إياد ضحكته وقال: احمم. هو مش انتي اللي كنتي مع خطيبك في اليوم اللي توهنا فيه أنا وناني؟ ملك لا، لا. دوكا سما عينيها بني. أنا ملك عينيّ سودا، وطبعاً ناني منفردة لوحدها بعيونها الخضرا. إياد تمام، فين ناني بقى؟ خالد

جاية، بس إحنا لازم نتكلم. إياد بجمود خااالد، أنا عارف أنا هعمل إيه. هيريحني أنا وناني، ومش مستحمل أي كلام. ملك هو انت أخو أنس صح؟ فيك شبه منه. هو أنس مرتبط؟ خالد بغيظ قومي روحي يا بت انتي، قوميي. امشي. ملك ببكاء انت بتزعقلي ليه؟ هو انت قاعد في بيت أهلك؟ إياد بقلق يا ابني هو في كده؟ خلاص يا آنسة ملك، حقك عليا أنا. ملك وهي بتمسح دموعها ملك، بس لو سمحت من غير آنسة. خالد بغيظ

اتفضل يا عمم. المهم سيبك منها وقولي انت ناوي على إيه؟ ملك استني، ناني وصلت. بعتتلي رسالة على الفون. يلا بينا وهما هيحلوا الموضوع سوا. باي باي يا جوز أختي. إياد ابتسم لعفويتها وقال: باي يا ملك، ومبسوط إني شفتك. ملك على فكرة انت ممكن تسيبك من ناني دي، نكدية. أنا فرفوشة والله و... سكتت لما خالد خبط إيده على الترابيزة وقالت: واحترم نفسك يا إياد باشا. انت في ناس الغيرة خلتها تولع أهو. عجبك كده. خالد بحدة

اخرسي يا ملك، ويلا قدام. ومشت ملك وخالد، وبعد كام دقيقة وصلت ناني الكافيه اللي إياد مستنيها فيه. ودخلت وأول ما شافته ابتسمت وقربت منه وقالت: ناني آسفة قبل أي حاجة، أنا آسفة على الكلام السخيف اللي أنا قولتهولك آخر مرة و... إياد بجمود اقعدي يا ناني الأول وهنتكلم في كل حاجة. قعدت ناني قصاده وهو قال: تشربي إيه؟ ناني إياد، لو سمحت ممكن تسمعني؟ الموضوع هو إن... قاطعتا إياد وقال:

من غير ما أسمعك يا ناني، الموضوع باين وأسفك مقبول. وأنا كمان زيك مش هقدر أكمل في العلاقة دي بعد اللي عرفناه والمشاكل اللي بين أهلنا. اتملت عيون ناني دموع غصب عنها وقالت: والله انت مكلمني عشان تيجي وتقولي كده؟ إياد أومال انتي فاكرة إيه؟ إحنا انبسطنا شوية وحبيتك و... ناني بحدة بطل كذب، عشان انت كنت بتتسلّى. انت بني آدم ما عندكش ضمير. انت لعبت بمشاعري. إياد بص الناحية التانية عشان يخفي دموعه. وهي زعقت فيه بصوت عالي

خلي الكل يبصلهم وقالت: ناني أيوه بص الناحية التانية اللي زيك آخره كده يا ندل. أنا آسفة إني في يوم حبيت واحد زيك يا إياد. آسفة بجد إني عرفتك وأديتك مساحة تدخل حياتي وتوجعني كده. قالت كلامها وسابته ومشيت. وهو فضل متابعها لحد ما خرجت وبعدين قام هو كمان ومشي. وأول ما وصلت ناني البيت اتصدمت لما لقيت سما قاعدة هي وبهاء وملك قصادها على الكنبة. ناني معقول يكون بيتهيألي؟ ملك لا مش بيتهيألك، أبوكي رجع واختك هتطلق. ضربها

بهاء على دراعها وقال: اتلمي وما تقوليش على اختك كده. سما ومين قالك بقى إني مش هتطلق؟ ده واحد خاين. بهاء مش هتكلم غير لما أسمع منه الأول. سما بسخرية قال رضينا بالهم والهم مش راضي بينا. بهاء اتلمي ياللي ما شفتيش تربية. قال كلامه وبص لناني بضيق ودخل أوضته. وناني راحت حضنت سما وعيطت وقالت: ناني جيتي في وقتك أوووي يا سما، أنا بجد تعبانة. ملك بنات، أنا لقيت ورق في مكتب بابا أنا وبروق ولقيت إني مرات خالد.

سما وناني في صوت واحد نعممممممم؟ ملك باااس، أوعوا بابا يعرف، فاهمين ولا لا؟ أنا بقى عايزة أتسلى بخالد ده شوية. سما بضيق واي بابا يعمل كده؟ هو إيه الخيبة اللي إحنا فيها دي بس ياربي. ناني بدموع لا، ده ولسه خيبتي أنا كمان. بس هو خلاص الموضوع خلص. طلع بهاء من أوضته وقال: ناني، هتكملي شغلك هنا. ما فيش سفر تاني، مفهوم؟ ناني بدموع حاضر. وو... وأنا آسفة اللي حصل ده مش هيتكرر تاني. بهاء بحدة

مش هسمح إنه يتكرر تاني. وأي واحدة فيكم هتعمل غير اللي أقوله هكسر رقبتها. ملك طبعاً الكلام ده مش لملوكة حبيبتك. بهاء زعق فيها وقال: ده انتي أولهم. ياللي بتمدي إيدك في الزبالة وتطلعي رجالة. قولت أمجد. لا لا لا. ملك انت علقت يا بابا. بهاء كمل كلامه وقال: وانتي عملتي إيه؟ روّحتي وركبتي دماغك وحبتيه يا بت العبيطة. سما: خلاص يا بابا، بقي هو إحنا ملايكة؟ طبيعي نغلط والمهم نصلح الغلط ده. وأنا أول واحدة هبدأ وهطلق. بهاء بغيظ:

أطلع من هدومي ياربي، هتكفروني يا بنات ندي. ناني: بس هو سؤال عايزة أفهمه، إيه اللي بينك وبين معتز أبو... أياد؟ بهاء: كانت في قضية متدبس فيها وهو صمم يلبسوهالي مشاكل قديمة وهو مقتنع إني مجرم يعني. ملك: يعني كده أنا مش هشتم تاني وطلعنا أعداء؟ بهاء اتنهد وقال: أنا طالع عند خالد، انزل ألاقي الغدا جاهز، وإنتي يا سما ارتاحي وبلاش تنطيط كتير عشان اللي في بطنك. *** وفي بيت أمجد البحيري، دخل البيت وقال لمامته:

فين نسمة يا ماما؟ عندها معاد عند الدكتور. صفاء بجمود: روحنا وجينا. أمجد: نعم، وإزاي روحتوا وأنا قولت متطلعش من البيت. صفاء: خليتها راحت وخليتها سلمت على عمها وابن عمها قبل ما يسافروا بره مصر زي ما فرضت عليهم يا أستاذ. وهي اختارتك وخلاص بقيت ليك لوحدك، لم نفسك بقى وخلي عندك دم. أمجد بعصبية: خليتيها راحت شافته، تمام، بس دي آخر مرة أسمحلك تعملي كده. وقفت صفاء وزعقت فيه وقالت: عندك يا ولد، إيه تسمحلي وما تسمحليش دي؟

لو نسيت إني أمك، إياك تنسي إني صفاا البحيري وإني مش ست زي أي ست، وإنت عارف كويس أقدر أعمل إيه. أمجد ابتسم وقال: أوكي يا صفاء هانم، وسوري ما أقصدش، بس بلاش تخلي مراتي تعمل حاجة من ورايا، أظن ده حقي. قربت منه صفاء وقالت: لا هرضى عنك ولا أسامحك غير لما تعيش حياة كويسة مع مراتك أم ابنك، وتبقى شخص محترم زي أبوك، مش زي الواطي عمك. سابها أمجد وطلع فوق عند نسمة اللي كانت نايمة، وقرب منها وقال بحدة: نسمة، نسمة.

قامت مفزوعة وقالت: في إيه؟ إنت عايز مني إيه؟ أمجد: ليه اخترتيني يا نسمة؟ نسمة بحزن: هو أنا مسموحلي أختار غيرك؟ قرب منها وقال: ولو مسموحلك تختاري غيري، هتعملي كده؟ بعدت عنه بسرعة وقالت: لا طيقاك ولا طايقة نفسي عشان كنت معاك في يوم من الأيام. وما تجيش تعمل فيها الضحية، لأنك إنت المجرم في الحكاية دي يا أمجد. أمجد بدموع:

كنت بتاع بنات وبتسلى بيهم، بس عشانك اتغيرت وبقيت كويس، وكنت بعمل كل حاجة عشان ترضي بيا. كنت مستعد أقف في وش الدنيا كلها وأقول إني بحب وهتجوز بنت الشغالة، وإنتي

بكل بجاحة جيتي وقولتي: "أنا مستحيل أبصلك لأني بحب ابن عمي وهتجوزه". حتى ما اهتمتيش لمشاعري. بقيت مجرم بسببك. إنت كرهتيني إني بقيت كويس بسببك، وجبتك ليا بالقوة، اتعمدت أأذيكي عشان تحطي اللوم عليه هو، وإنه هو السبب في اللي حصلك. خونتك بدل المرة ألف عشان أردلك اللي عملتيه فيا. روحت وعملت نفسي حبيت ملك وكنت هتجوزها عشان أرد كرامتي، فاختيارك وحبك لغيري. بس ما حدش اتعذب وتعب في كل ده غيري أنا. أنا الضحية، ضحية إني عشقت واحدة قاسية زيك. إنت طالق، والبيت ده بيتك إنت وابنك، وليكم كل حقوقكم.

قال كده ومشي. ونسمة كانت مصدومة من كلامه. ودخلت صفاء وقالت لها بقلق: حصل إيه؟ زعلك في حاجة؟ نسمة ببكاء: لا لا، هو مش كده، أكيد أنا كنت فاكرة إني رفضته عادي، ما كانش قصدي أأذيه كده. هو طلقني، هو... حضنتها صفاء وقالت: اهدي، اهدي طيب، دلوقتي وكل حاجة هتتحل. ما ينفعش كده عشان صحتك، اهدي يا بنتي. *** وفي القاهرة. كان أياد بيلم هدومه في بيت معتز اللي كان نايم في أوضته، ودخل أنس عنده وقال:

أبوك تعبان أوي ورافض يروح مستشفى، وحلف عليا لو قولت لأمك هيطلقها. أياد: هو حر، أنا ماليش دعوة بحد. أنس: إنت خلاص هتمشي؟ بعني تعلقني بيك أوي كده وتمشي. أياد ضحك وقال: هو أنا عشمتك بالجواز وخليت بسك إيه يا ابني الكلام ده. أنس بحزن: لا، بس بقى ليا صاحب وأخ ومش عايز أرجع لوحدي تاني. أياد: بالعكس، أنا هديلك فرصة تقرب من أبوك وأمك أكتر. مش إنت برضه كنت زعلان عشان مهتمين بيا أكتر منك. أنس: لا لا، ما تربطش دي بدي يا أياد.

أياد: أنا ماشي يا أنس ومش هرجع تاني. هبقى أجي أزوركم. وابقى خلي بالك من أهلك. قال كلامه وأخد شنطته ومشي، بس بص على أوضة باياه ودموعه نزلت ومشي من غير حتى ما يطمن عليه. *** في بيت عزت الشندويلي. جني كانت قاعدة بتعيط وزعقت في مامتها وقالت: حرام عليكي، إنتي ليه بتعملي فيا كده؟ عزة: كفاية بقي، الطرحة مكبراكي، وأنا أهو قصيتهم كلهم وقطعتهم مليون حتة. ويا تخرجي تروحي الامتحان بتاعك، يا تخليكي كده.

قالت كلامها وطلعت، وجني فضلت تعيط. ورن أنس عليها، ردت عليه بسرعة وهو قال: بصي، هو أنا مش طايق وشك، بس ما أقدرش ما أطمنش عليكي وإنتي رايحة الامتحان الأول ليكي. جني ببكاء: مش هروح يا أنس، مش هقدر أروح. أنس خاف وقال: في إيه يا جني وبتعيطي ليه كده؟ اتكلمي. جني ببكاء: ماما قطعت الطرح بتاعتي وعايزاني أقلع الحجاب وأروح الامتحان بشعري. أنس: لا معلش، فهمني، هي أمك أمك ولا مرات أبوكي؟ جني بعصبية: إنت بتهزر يا رخممم. أنس:

لا مش بهزر، المهم اقعدي كده راجعي لحد ما أجيلك. جني بصدمة: نعمم! إنت هتيجي بجد؟ *** وتاني يوم الصبح في إحدى قرى الأرياف. دخل أياد المستشفى وبص للبنت اللي واقفة بتزعق في الممرضة وابتسم عليها، وهي بتقول: هو حد قالك دي مستشفى في شارع الهرم؟ لأ، ده إحنا هنا الوحدة الصحية في قرية شهبانة. إيه بقي الأحمر اللي في وشك ده كله؟ الممرضة: والنبي يا دكتورة غادة، ده هو قلم روج واحد، خمست بيه في وشي. غادة:

هاتي يا بت إنتي قلم الروج ده وروحي شوفي شغلك. طلعت البنت قلم الروج وادته لغادة ومشيت وهي متغاظة. وغادة بصت للروج وقالت: حلو أوي ده، من أبو تلاتين جنيه، هاخده أشيله في جهازي. بس هو ليه صلاحية ولا لأ؟ أياد: بقي ده منظر دكتورة محترمة. غادة ابتسمت وقالت: حبيب مامي. وقربت منه وحضنته. *** في بيت فوزي البحيري، صحي على صوت البنت الأجنبية اللي نايمة جنبيه وبتقوله: فوزي قوم فوزي، في حد معانا في الأوضة. قام فوزي وقال:

حد مين اللي هيكون معانا؟ نايم يا حاجة. خالد بهدوء: ده مش حد غريب يا فوزي بيه، ده أنا... قام فوزي بسرعة وقال: إنت إزاي دخلت هنا؟