رواية كما تدين تدان الفصل الأول 1 - بقلم زينب رمضان

حسام يابني انت فين *أنا هنا يا ماما في حاجة *أيوا يابني تعالى عايزاك في موضوع *خير يا ماما *خير يابني. بص يا حبيبي انت دلوقتي ما شاء الله كبرت وبقيت عريس ملو هدومك. وأنا الصراحة عايزة أفرح بيك وعندي العروسة *إن شاء الله هتفرحي يا أما بس في الوقت المناسب. وبعدين هي مين دي اللي في دماغك *هدير بنت عمك صابر اللي في الشارع اللي جنبنا. انتي عارفاها بنت محترمة ومنتقبة والف مين يتمناها

*لا يا أما مستحيل أتجوزها. تتجوز أي واحد من الألف دول بس هي متنفعنيش أنا *ليه يابني مالها البنت دي؟ تقول للقمر قوم وأنا أقعد مكانك. مالها أدب وأخلاق وجمال. ناقصها إيه *ناقصها إني كنت بكلمها وماشي معاها عادي قبل ما تلبس النقاب *بجد يعني انت رافضها عشان كدا؟ طب في حد في دماغك؟ واحدة شايفها مكلمتش حد قبلك ولا كلمتك انت كمان *آه في يا أما. صفاء. صحيح مش ملكة جمال ومش منتقبة بس واثق إن محدش كلمها قبل كدا *لا والله؟

يعني انت مش راضي باللي كلمتها وعايز تتجوز واحدة بتكلم طوب الأرض؟ مش راضي باللي زرعت في قلبها الحب وغويتها وعايز اللي كلمت غيرك بس متكونش مكلمالك انت؟ بص يا ابني البنت بعد ما سبتها ربنا هداها وانتقبت وبتصلي الوقت بوقت. مكلمتش غيرك. معملتش زي اللي بيقولوا أنا كدا كدا وحشة ومش هتغير وأزيد في الغلط. لا دي رجعت لربنا وتابت وحافظت على نفسها. ليه عايز تغلط الغلط دا يا ابني

*يا أما البنات كلها زي بعضها. خلاص مش عايز أتوز خالص *اسمع يا حسام لو مسمعتش كلامي وكلمت عمك صابر وقولتله إننا هنروحله بكرة نطلب إيد هدير مش هتكون ابني ولا أعرفك. وشوفلك مكان تاني تعيش فيه *يا ماما بس اسمعي. انتي ليه محموقة ليها كدا. كإنها بنتك مش أنا اللي ابنك

*محموقة ليها لأنه بنت واحنا عندنا بنات. مش عايزة اللي بتعمله في بنات الناس يطلع على بناتي. وانت عارف إن كما تدين تدان. وأنا مش مستغنية عن بناتي إن يحصلهم حاجة بسببك يا ابن بطني *خلاص يا أما اللي تشوفيه. هكلمه ونروحله بكرة ونشوف آخرتها إيه معاها *ربنا يسترها معاك يا حبيبي ويفتحلك الأبواب المقفولة يارب ويهديك يا حسام يا ابن بطني *يارب يا أما يارب السلام عليكم *وعليكم السلام يا حسام يابني

*معلش بكلمك في وقت زي دا يا عم صابر. بس أنا عايز أعزم نفسي عندكم بكرة أنا والحاجة لو معندكمش مانع *تنورونا يابني البيت بيتكم *خلاص إن شاء الله هنكون عندكم بكرة بعد العصر *إن شاء الله يابني على خيرة الله -*أي يا حماتي اقفي عوج واتكلمي عدل ياختي *انتي بتكلميني كدا ليه يابت انتي *أتكلم زي ما يعجبني. والي مش عاجبه ياخد الباب في إيده وهو خارج *دا بيتي وبيت ابني. انتي اللي تاخدي الباب في إيدك مش أنا. انتي الغريبة مش أنا

*لا يا حماتي اقفي عندك. ما غريب إلا الشيطان يا أختي. وأنا أصلاً موافقتش أتوز اللي حارسه وصاينه ابنك غير لما اتنازلي عن الشقة والأرض. يعني انتي وهو ملكوش حاجة عندي. عرفتي مين اللي هياخد الباب في إيده *انتي بتقولي إيه؟ مستحيل ابني يعمل كدا *اهو عندك أهو. اسأليه يا أختي عمل كدا ولا لا. بس بعيد عني عشان عايزة أريح دماغي من صداعكم *أنت عملت كدا يا صبحي ليه يابني؟ مفكرتش فيا؟ مفكرتش في اللي ربتك وسهرت على راحتك عمرها كله؟

اللي فنت عمرها في تربيتك؟ مفكرتش فيا خالص *خلاص يا أما بلاش تقطيع على الصبح واسطوانة كل يوم دي. محدش قالك خلفيني واسهري على راحتي. وبعدين منال حبيبتي تقول وتعمل اللي هي عايزاه. عايزة تعيشي معاها يبقا بشروطها هي وتعملي اللي هي عايزاه من غير ما تفتحي بوقك. غير كدا الباب يفوت جمل *ليه يابني حرام عليك؟

دا أنا وأبوك عمرنا ما وكلناك مال حرام ولا منعنا عنك حاجة. ولا في مرة رفعنا إيدينا عليك عشان تطلع كدا. يابني قولي غلطنا في إيه واحنا بنربيك عشان تطلع كدا *اسمعي بقا من غير كتر كلام. لمي هدومك دلوقتي وشوفي هتعيشي فين. أنا مش عارف أعيش مرتاح مع مراتي في وجودكماشي يابني أنا ماشية. أرض الله واسعة وربنا مش هيسيبني. بس ابقى دورلك انت كمان على مكان تعيش فيه لما عيالك يكبروا انت والمدام. مع السلامة يابن بطني

—*أهلاً أهلاً يا حسام يابني نورتونا والله يا ست أم حسام *دا نور البيت وصحابه يا أبو هدير. بص يا أبو هدير من غير لف ولا دوران. إحنا جاين النهاردة طالبين القرب منكم في بنتك هدير لابني حسام. إيه قولك *هو في قول بعد قولك يا أم حسام؟ بس أنا من ناحيتي يشرفني إننا نكون نسايب. دا كفاية إن بنتي هتكون عند إنسانة محترمة زي حضرتك *تسلم يا أخويا. ربنا يخليك. بس ممكن تنادي العروسة تشوف العريس ويتكلموا مع بعض شوية عشان ناخد رأيها

*القول قولك يا أم حسام. معلش يا أم هدير روحي ناديلها *من عنيا يا أبو هدير. ثواني يا جماعة *بت يا هدير ~نعم يا ماما *البسي يابنتي واطلعي سلمي على خالتك أم حسام وابنها ~خير يا ماما في حاجة *أم حسام وابنها جاين طالبين إيدك يابنتي ~أنا مش موافقة يا ماما ومش عايزة *يابت اسمعي الكلام. مينفعش تحرجي أبوكي قدام الجماعة ~بس يا ماما *مفيش بس. اطلعي اقعدي معاه ولو مرتحتيش خلاص. أكيد مش هنجبرك على حاجة يعني

هدير بتوتر: حاضر يا ماما ثواني وطالعة هدير في نفسها: يا ترى عايز مني إيه يا حسام بعد ما كسرت قلبي؟ عايز إيه مني تاني؟