رواية قمر الزين الفصل العشرون 20 - بقلم ساسو محمد

قمر سألت زين: صحيح يا زين انت مقولتليش الجواز بعد قد إيه؟ زين: هي طنط مقالتلكيش؟ قمر: هو في إيه؟ أسأل ماما تقولي هو زين مقالكيش؟ أسألك تقولي هي ماما مقالتلكيش؟ حد يجاوبني يا جدعان. زين بضحك: خلاص يا ستي الجواز بعد شهر. قمر: نعـــم. زين: اتعصبتي لي؟ قمر: عشان اللي انت بتقوله ده. زين: وأنا قولت إيه؟ قمر: قولت إن الجواز بعد شهر. زين: وفيها إيه يعني؟ قمر: فيها كتير. زين: زي إيه؟

قمر: زي إني مش هلحق أجهز نفسي ونجيب الحاجات اللي ناقصة، وكمان مش هنلحق نحجز القاعة، وفوق ده كله أنت مأخدتش رأيي. زين: الحاجات الناقصة مش كتير، ممكن ننزل في أي وقت نجيبهم، والقاعة اتحجزت خلاص. قمر: اتحجزت إزاي يعني؟ زين: يعني حجزتها، إيه اللي مش مفهوم في الجملة؟ قمر: من غير ما تاخد رأيي. زين: ومين قالك إني مأخدتش رأيك؟ قمر: أخدته إزاي بقي إن شاء الله؟ زين: أخدته من آخر مرة كنا فيها مع بعض.

قمر: إزاي واحنا متكلمناش في الجواز أصلاً؟ زين: أقصد آخر مرة ساعة الخناقة. قمر: اممممم، الصراحة أنا شايفة إن لسه بدري، لي الاستعجال؟ زين: بقولك إيه يا بت، لولا المشكلة اللي حصلت دي كان زمانا اتجوزنا أصلاً، ومش بعيد كمان تبقي دلوقتي، بس نعمل إيه بقي في الدماغ. قمر: طب أنا لسه في حاجات ناقصة في هدومي عايزة أجيبها والفستان طبعًا.

زين: عندك رقيه ويارا وكوكي هيجوا من إسكندريه كمان أسبوع أو اتنين، ابقي خديهم وانزلي هاتي اللي انتي عايزاه. زياد: وتقي كمان لو تحبي تبقي معاكي. قمر: طبعًا أحب، بس هي مش ناقصة كفاية عليها الحمل. تقي: مليكيش وقت، ما هتعوزيني هتلاقيني. قمر: ربنا يخليكي ليا. تقي: ويخليكي. سراج: طب يلا بقي كفاية كده ولا إيه؟ سمية: يلا. هند: ما لسه بدري. سراج: بدري إيه، أنتي مش سامعة البيه اللي فاجأنا إن الجواز بعد شهر ده. هند: هو مقالكش؟

سراج: لا قالي، بس كنت فاكرة بيهزر. زين: في حد يهزر في الموضوع ده؟ سراج: طب يلا قدامي. ومشوا وقمر دخلت نامت. تاني يوم. صحت ودخلت الحمام توضأت وأدت فرضها وجهزت وخرجت. قمر: صباح الخير يا ست الكل. هند: صباح النور يا عروستي. قمر: أنا مش مصدقة اللي بيحصل ده والله يا ماما. هند: مش مصدقة إيه؟ قمر: مش مصدقة إني بعد شهر همشي وأسيبك. هند: أنتي هتتهاجري، ده هتسكني في العمارة اللي قدامي. قمر: يعني مش زعلانة إني همشي وأسيبك؟

هند: لا مش زعلانة، أنا فرحانة وفرحانة أوي كمان. قمر: فرحانة عشان هسيبك؟ هند: فرحانة عشان أخيرًا هشوفك عروسة يا روحي. قمر: طب أنا نازلة واحتمال أتأخر شوية. هند: لي؟ قمر: عشان زين كلمني بالليل وقالي إنه احتمال يعدي عليا عشان نروح نشتري حاجات من الحاجة الناقصة. هند: طب يا حبيبتي خلي بالك من نفسك. قمر: وأنتي كمان، سلام. هند: سلام. وصلت البنك ودخلت مكتبها. قمر: صباح الخير يا ريم. ريم: صباح النور، إيه مالك فرحانة كده لي؟

قمر: عشان زين اتفق مع ماما إن الجواز بعد شهر. ريم: بجد، مبروووك يا روحي، ربنا يتمملك بخير. قمر: الله يبارك فيكي. ريم: صحيح الورد بتاع كل يوم على مكتبك هناك أهو. قمر: هو اللي بيبعته ده مزهقش؟ ريم: وأنت يتزهق منك برضه يا جميل. قمر مسكته وقرأت الكارت وكان مكتوب: "مبروك لأحلى قمر في الدنيا، أنتي تعرفي إني بعد الساعات والدقائق والثواني لحد ما أوصل للدقيقة اللي هشوفك فيها عروسة." قمر: ده إيه ده إن شاء الله؟ ريم: في إيه؟

قمر: ده عارف إني عروسة وخلاص هتجوز. ريم: بجد؟ قمر: اه، سيبك يلا نشتغل. وبدأوا شغل، وقبل ميعاد خروجهم بساعة. قمر: إيه الدوشة اللي بره دي؟ ريم: مش عارفة. قمر: طب تعالي نشوف. ريم: يلا. وخرجوا وشافوا زين في وسط البنك والناس حواليه. ريم: ده زين. قمر: زين! وإيه اللي جابه؟ وهي رايحة سمعت حد بيسأل زين: ومين سعيدة الحظ بقي؟ زين حط على كتف قمر وقال: قمري طبعًا. الشخص: مش انتوا فركشتوا؟

زين: لا طبعًا، دي كانت مسافرة عشان ابن خالتي خطب بنت خالته مش أكتر. الشخص: على العموم مبروك. زين: الله يبارك فيك، عقبالك. قمر همست في ودن زين: إيه اللي جابك؟ زين: جاي أعزم زمايلي على فرحي، فيها حاجة دي؟ قمر: طب مش تقولي. زين برخامة: مليش مزاج. ضربته قمر في كتفه: غلس. زين: أنا؟ وخرجوا اشتروا حاجات، وزين فجأة وقف قدام أتيلييه. زين: إيه رأيك؟ قمر: في إيه؟ زين: نجيب الفستان دلوقتي واحنا مع بعض. قمر: لا طبعًا. زين: لي؟

قمر: عشان فيه فال وحش إنك تشوف الفستان قبل الفرح. زين: مين اللي قال كده؟ قمر: معرفش، بس أسمع إنهم بيقولوا كده. زين: طب أنا هختار البدلة إزاي من غير ما أشوف الفستان؟ قمر: أنا هبقي أقولك تجيب لون إيه. زين: أمري لله. وروحوا، وعدا أسبوعين في شراء الحاجات الناقصة، لحد ما وصل يارا وياسمين. قمر: وحشتيني أوي يا خالتو. ياسمين: وأنتي كمان يا روحي وحشتيني. يارا: ومفيش وحشتيني يا يارا؟ قمر: لا طبعًا وحشتيني.

وقضوا اليوم مع بعض واتفقوا إنهم يخرجوا تاني يوم يجيبوا الفستان. وعدا أسبوعين كمان، وجه وقت الفرح. قبل الفرح بساعات. قمر بتكلم زين بعصبية: أنت مخلتنيش أتفق مع ميكب ارتست، ولا أنت اتفقت؟ أعمل إيه أنا دلوقتي؟ زين: طب ممكن تهدي؟ قمر: أهدي إزاي، الفرح كمان ساعات. وقاطع كلامها يارا: قمر. قمر: طب ثواني خليك معايا. زين: براحتك. قمر: نعم يا يارا. يارا: كوكي وصلت. قمر: طب أعمل إيه؟ يارا: هو إيه اللي تعملي إيه؟ قمر: مش فاهمه.

يارا: كوكي جايه عشان تعملك الميكب اب يا قمر، في إيه؟ قمر: طب هخلص مكالمة وأجي. يارا: تمام. قمر لزين: طب مقولتليش لي إن كوكي هي اللي هتعمل الميكب اب؟ زين: عشان تبقي مفاجأة. قمر: وهتعرف تعمله بقي ولا هتبوظلي وشي؟ زين: عيب عليكي، دي عندها بيوتي سنتر خاص بيها في ألمانيا. قمر: بجد؟ زين: اه والله. قمر: طب يلا اقفل بقي عشان ألحق أجهز. زين: هتوحشيني الكام ساعة دول. قمر: طب يلا يا بابا، سلام. زين بضحك: سلام.

ودخلت كوكي عملتلها الميكب اب ولبست الفستان وقاعدة مستنية زين، فجأة يارا دخلت عليها. يارا: قمر، الورد ده جه ليكي. قمر: ده أكيد من زين. ومسكته وشافت الكارت وكان مكتوب: "خلاص يا روحي، كلها ثواني وأشوفك عروسة." قمر لنفسها: تاني الشخص ده؟ وعرف بيتي منين؟ زين من وراها: عشان ساكن قصادك. قمر اتخضت وبعدت شوية عنه. زين: إهدي بس، في إيه؟ قمر: أنت إزاي تخضني كده؟ زين: مراتي واخضها زي ما أنا عاوز.

قمر: وبعدين دخلت كده من غير ما تقولي وبوظت الفيرست لوك. زين: ومين قالك إني معملتش الفيرست لوك؟ قمر: عملته إزاي؟ زين: عملته أول ما لفيتي، بس أنتي بوظتيها. قمر: طب اخرج وتعالي نعملها تاني. زين: أنا مش هعمل حاجة تاني. قمر: يعني إيه؟ زين شدها لحضنه وقالها: خلاص بقي، وهمس في ودنها: "لقد هرمت من أجل هذه اللحظة، وأخيرًا شوفتك وأنتي عروسة." قمر: يعني أنت اللي كنت بتبعت الورد؟ زين: اه طبعًا، أومال فاكرة مين؟

قمر: بس أنت قولت مش أنت. زين: كنت عايز أضايقك شوية. قمر بعدت عن حضنه وقالت: طب أنا غيرت ومش عايزة أتجوز. زين: لا يا روحي، مش بمزاجك، وأنتي عاملهالي زي عروسة البحر كده. قمر: يعني عجبتك؟ زين: أنتي طول عمرك عجباني يا قمري. قمر: ربنا ما يحرمني منك يا روحي. كوكي من وراهم: يلا يا حبيبي أنت وهي، فيه معازيم مستنية. زين: فصيلة. وراحوا الفرح، وكريم فاجأ يارا بكتب الكتاب، وعمر طلب زهره للجواز، وتم الفرح على خير. وبعد عشر سنوات.

بقي معاهم نغم 9 سنين وادم 7 سنين. نغم: مامي بقولك. قمر: قولي يا روح مامي. نغم: أنتي وبابي حبيتوا بعض إزاي؟ حكتلها قمر الحكاية كلها، حتى مشكلة كوكي واللي حصل بعده وسوء التفاهم بتاع رقيه. قمر: وبس يا ستي واتجوزنا. نغم: يااااه، كل ده حصل. قمر: شوفتي بقي. نغم: اتصديقي يا مامي. قمر: أصدق إيه؟ نغم: أنا لو مكان بابي بعد اللي قولتيه ده، أنا مش هتجوزك. زين من وراها بضحك: صدقتي يا بنتي والله. نغم وادم جريوا على زين.

وقمر بزعل: بقي كده يا زينو. زين: بضعف، أنا وإنتي بتقوليلي يا زينو دي. قمر: طب إيه بقي؟ زين: أنتي أحلى حاجة حصلتلي في حياتي يا روح زينو. نغم: وأنا إيه بقي يا زينو؟ زين: أنتي وادم تاني أحلى حاجة حصلتلي في حياتي بعد قمري. قمر: ربنا ما يحرمنا منك يا حبيبي. زين: ولا يحرمني منكم يا حبايبي.