رواية قرار في ليلة الدخلة الفصل الرابع 4 - بقلم غير معروف

بين يوم وليلة كل شيء اتغير. من ساعات قليلة بس كانت قاعدة في الكوشة جنب حبيبها وكل الناس بترقص لها وفرحانة لها. دلوقتي كل أبواب الدنيا قفلت في وشها، وكل الناس بتبعد عنها. حتى أقرب الناس، أمها؟ مش عارفة تعمل إيه. طب تروح فين ولا مين هيستحملها، بالاخص بعد حكايتها بقت معروفة لكل أصحابها وأهلها وجيرانها؟ فكرت تنتحر بجد المرادي. حاولت كذا مرة بس على آخر لحظة، وعشان هي فعلاً مؤمنة

وبنت كويسة كانت بتقول: "لا، مش هخسر دنيتي واخرتي". كلنا بنغلط، بس هي غلطها كان كبير. خرجت من المستشفى بعد ما ممرضة أدتها هدوم تلبسها بعد ما صعبت عليها. طب تروح فين؟ افتكرت واحدة صاحبتها من أيام الكلية كانت ساكنة في طنطا، بس ليها شقة في القاهرة كانت بتعد فيها أيام الدراسة. معهاش تليفون، معهاش فلوس، معهاش أي ورق، معهاش أي حاجة، بس عندها يقين إن معاها ربنا. راحت على الشقة وسألت البواب إذا كان معاه رقمها.

وفعلاً طلع معاه الرقم واتصلت بيها. سلمت عليها وقالت لها إنها محتاجة تعد في الشقة يومين ولو تقدر تيجي لها بأسرع وقت لأنها في الشارع. صاحبتها قالت لها إنها جاية بعد يومين، بس مفتاح الشقة مع البواب وتقدر تاخده منه وتعد في الشقة لحد ما هي تيجي من طنطا. البواب أداها المفتاح وبصلها بصة غريبة. بصة سخرية واستهزاء. أداها المفتاح وسألها إذا كان في حد هيجي لها ولا لأ. قالت له: "حد مين، لا مفيش حد هيجي". وسابته وطلعت على الشقة.

استريحت شوية اليوم ده. وتاني يوم راحت شركتها القديمة تحاول ترجع الشغل تاني. بس ما رضوش يرجعوها، لأن الخبر كان اتعرف من بعض زمايلها. وبكل قسوة وطردوها من الشركة. رجعت الشقة وهي يائسة من الحياة، كل حاجة بتتقفل في وشها وكأنها جرثومة. تاني يوم صاحبتها جت من طنطا. سلمت عليها وقعدوا مع بعض وحكت لها كل حكايتها. بس الغريب إن صحبتها ولا اتأثرت من حكايتها وقالت لها: "ولا يهمك، عندي شغل ليكي".

"بس تسمعي الكلام وتوافقي على كل اللي هقوله لك". فرحت جدا وقالت لها: "ماشي، أي شغل بس آكل عيش ومكنش عالة عليكي". قالت لها: "من النهارده انسي اسمك القديم واسم الشغل بتاعك هيبقى صافي". "صافي؟ "مش مهم صافي، صافي المهم اشتغل بس قولي لي هشتغل إيه؟ قالت لها: "إيه يا بنتي البراءة اللي انتي فيها دي، انتي لسه معرفتيش هتشتغلي إيه؟ "لا معرفش."

"هتشتغلي هنا معايا ومعانا بنات تاني. في رجالة بيجوا يعدوا معانا بليل شوية يفرفشوا ويتبسطوا. ويباتوا ويمشوا الصبح، وكل ليلة بألف جنيه ليكي. في أسهل من كده يا صافي؟